„Komið og fylgið mér“
1. Hvaða tækifæri fáum við í biblíunámi safnaðarins á komandi mánuðum?
1 Guðspjöllin fjögur lýsa á einstakan og nákvæman hátt lífi Jesú hér á jörð. Og þar sem kristnir menn eiga að „feta í fótspor hans“ viljum við vera undirbúin og fylgjast vel með þegar farið verður yfir bókina „Komið og fylgið mér“ í biblíunámi safnaðarins frá og með vikunni sem hefst 1. mars. (1. Pét. 2:21; Mark. 10:21) Við ættum að íhuga sérstaklega vel þá þætti í lífi Jesú sem geta verið okkur til hvatningar í boðunarstarfinu.
2. Hvernig getur þolgæði Jesú verið okkur góð fyrirmynd?
2 Fordæmi Jesú: Hefurðu einhvern tíma fengið neikvæð viðbrögð frá fólki þegar þú prédikar hús úr húsi? Þegar við verðum fyrir því koma orð Jesú upp í hugann: „Hafi menn ofsótt mig þá munu þeir líka ofsækja yður.“ (Jóh. 15:20) Auðvitað er ekki hægt að líta á öll neikvæð viðbrögð sem ofsóknir. Engu að síður var það vegna gleðinnar sem beið Jesú að hann gat þolað ýmiss konar erfiðleika og prófraunir. Við getum líka einbeitt okkur að því að hljóta velþóknun Jehóva og hlakkað til launanna vegna trúfesti okkar. Það hjálpar okkur að,þreytast ekki og láta hugfallast‘. (Hebr. 12:2, 3; Orðskv. 27:11) Ef við gefumst ekki upp í boðunarstarfinu getum við einnig verið viss um að Jesús Kristur mun styðja okkur. — Matt. 28:20.
3. Hvernig getum við haft sama viðhorf og Jesús til boðunarstarfsins?
3 „Til þess var ég sendur“: Að boða fagnaðarerindið um ríkið var aðalatriðið í lífi Jesú. (Lúk. 4:43) Hann gaf örlátlega af sjálfum sér í þjónustunni. Hann vissi að boðunarstarfið væri áríðandi og leitaði ávallt leiða til þess að tala við fólk um Guðsríki. Hvað ættum við að gera sem fylgjendur hans? Höfum við tækifæri til að segja öðrum frá boðskapnum þegar við sinnum okkar daglegu störfum? Kærleikur Krists ætti að vera okkur hvatning til að grípa hvert tækifæri sem gefst til að boða fagnaðarerindið. — 2. Kor. 5:14.
4. Hvernig getum við tekið framförum í boðunarstarfinu?
4 „Aldrei hefur nokkur maður talað þannig“: Kennsla Jesú hafði djúp áhrif á aðra. (Jóh. 7:46; Matt. 7:28, 29) Hvað gerði hann ólíkan öðrum kennurum? Hann elskaði sannleikann sem hann kenndi, hann elskaði fólkið sem hann kenndi og hann notaði mismunandi kennsluaðferðir. Ef við líkjum eftir kennaranum mikla getum við tekið framförum í boðunarstarfinu. — Lúk. 6:40.
5. Hvert ætti að vera markmið okkar þegar við förum yfir bókina „Komið og fylgið mér“?
5 Þetta eru aðeins fáeinir af þeim gimsteinum sem við finnum með því að skoða líf Jesú. Hvaða önnur verðmæti getum við fundið? Þegar við kynnum okkur líf og starf Jesú í biblíunámi safnaðarins skulum við hafa það að markmiði að,sannreyna kærleika Krists‘ með því að feta í fótspor hans í orði og verki. — Ef. 3:18, 19.