Gagnleg greinaröð fyrir boðunarstarfið
1. Hvert er markmiðið með greinaröðinni „Samræður um Biblíuna“?
1 Í almennri útgáfu Varðturnsins eru annað slagið birtar greinar úr greinaröðinni „Samræður um Biblíuna“. Markmiðið með þessari greinaröð er tvíþætt, annars vegar að kynna kenningar Biblíunnar á áhugaverðan hátt og hins vegar að sýna okkur hvernig við gætum rökstutt ákveðið efni með hógværð og virðingu. (1. Pét. 3:15, 16) Hvernig getum við nýtt okkur þessar greinar?
2. Hvernig getum við notað þessa greinaröð í boðunarstarfinu?
2 Notaðu greinarnar í boðunarstarfinu: Þú gætir geymt aukaeintök af þeim tölublöðum Varðturnsins sem innihalda greinar úr þessari greinaröð. Þegar húsráðandi, áhugasamur einstaklingur eða biblíunemandi spyr spurningar eða kemur með mótbáru, sem hefur verið tekin fyrir í einni af þessum greinum, skaltu gefa honum eintak af greininni og bjóðast til að ræða um hana. Ef þú átt ekki prentað eintak af tölublaðinu, sem inniheldur þessa grein, gætirðu hlaðið henni niður af jw.org.
3. Hvernig gætum við rætt um eina af þessum greinum við viðmælanda okkar?
3 Hvernig gætu umræður um eina af þessum greinum farið fram? Sumir hafa beðið viðmælanda sinn að lesa upphátt það sem húsráðandinn segir og lesið sjálfir það sem votturinn segir. Þessi þriðju persónu-aðferð getur reynst vel af því að hún gefur viðmælandanum kost á að kynna sér trú okkar án þess að finnast umræðurnar of persónulegar. – 5. Mós. 32:2.
4. Hvernig getum við notað greinarnar í þessari greinaröð til að þjálfa okkur?
4 Þjálfaðu sjálfan þig og aðra: Þegar þú lest yfir greinarnar skaltu taka eftir ritningarstöðunum, myndunum og röksemdafærslunni. Taktu eftir í hvaða tón efnið er skrifað. Reyndu svo að beita svipaðri aðferð þegar þú segir öðrum frá fagnaðarerindinu. (Orðskv. 1:5; 9:9) Systir nokkur sagði: „Að lesa þessar greinar er eins og að læra af ,fullkomnum‘ brautryðjandafélaga – sem kemst alltaf rétt að orði.“
5. Hvernig getum við hjálpað biblíunemendum okkar að undirbúa sig fyrir boðunarstarfið?
5 Þú getur líka notað þessi útskrifuðu samtöl til að hjálpa biblíunemanda þínum að undirbúa sig fyrir boðunarstarfið. Lesið upplýsingarnar saman og leyfðu nemandanum að vera í hlutverki boðberans. Þannig geta biblíunemendur æft sig í að tjá trú sína kurteislega. (Kól. 4:6) Þessar greinar eru svo sannarlega ein af mörgum leiðum sem Jehóva notar til að hjálpa okkur að „fullna þjónustu“ okkar. – 2. Tím. 4:5.