Tökum framförum í boðunarstarfinu – kennum biblíunemendum að temja sér góðar námsvenjur

Af hverju er það mikilvægt? Til að ná andlegum þroska þurfa biblíunemendur að næra huga sinn og hjarta á meiru en undirstöðuatriðum í orði Guðs. (Hebr. 5:12 – 6:1) Nám krefst fyrirhafnar. Það felur meðal annars í sér að tengja nýjar upplýsingar við fyrri vitneskju og sjá hagnýtt gildi þeirra. (Orðskv. 2:1-6) Þegar nemendur læra að rannsaka sjálfir geta þeir svarað biblíuspurningum með hjálp ritanna okkar. Einlæg viðleitni þeirra til að heimfæra það sem þeir læra hjálpar þeim að standast prófraunir sem þeir mæta sem kristnir menn. – Lúk. 6:47, 48.

Hvernig förum við að?

Leggðu áherslu á að leita leiðsagnar Jehóva í bæn fyrir hverja námsstund. – Jóh. 14:26; 1. Kor. 2:10.
Hvettu nemanda þinn alveg frá upphafi til að undirbúa sig fyrir biblíunámstund ykkar. Sýndu honum þitt eintak af námsritinu og kenndu honum að undirstrika bara lykilorð eða setningar.
Reyndu að fá nemandann til að svara spurningunum með eigin orðum. Forðastu að láta námsstundina verða þurran upplestur á spurningum og svörum þar sem nemandinn les svörin beint upp úr bókinni.
Hvettu nemanda þinn til að lesa daglega í orði Guðs. Sýndu honum Áætlun um biblíulestur á jw.org (undir ÚTGÁFA > BÆKUR OG BÆKLINGAR) sem sýnir gagnlega aðferð sem hann getur notað. Að gera það að venju að lesa daglega í Biblíunni krefst staðfestu en það er erfiðisins virði. – Sálm. 1:2, 3.
Sýndu nemanda þínum hvernig hann getur fundið svör við biblíuspurningum með því að nota Varðturninn VEFBÓKASAFN eða geisladiskinn Watchtower library. Útskýrðu fyrir honum skammstafanir á ritum sem eru oft notuð á safnaðarsamkomum.

Prófaðu eftirfarandi í mánuðinum:

Þegar þið komið að millifyrirsögn eða ljúkið við kafla skaltu biðja biblíunemanda þinn að draga saman í fáeinar setningar það sem hann hefur lært. Ef þú heldur ekki biblíunámskeið skaltu æfa þig í að draga saman í fáeinar setningar efni sem þú lest í Biblíunni eða í Varðturninum til að bæta lesskilning þinn.