HVERNIG ER HÆGT AÐ RJÚFA VÍTAHRING HATURS?

3 | Upprætum hatur úr huganum

Biblían segir:

„Umbreytist með því að endurnýja hugarfarið svo að þið getið sannreynt hver sé hinn góði og fullkomni vilji Guðs og hvað honum sé þóknanlegt.“ – RÓMVERJABRÉFIÐ 12:2.

Hvað merkir það?

Það skiptir Guð máli hvernig við hugsum. (Jeremía 17:10) Við þurfum að gera meira en forðast hatursfull orð og verk. Vítahringur haturs hefst í huganum og hjartanu. Þess vegna þurfum við að uppræta hvern vott af hatri þaðan. Aðeins þannig getum við ‚umbreyst‘ og rofið þennan vítahring.

Hvað getur þú gert?

Hugleiddu vandlega viðhorf þitt gagnvart öðrum – sérstaklega þeim sem eru af öðrum kynþætti eða þjóðerni. Spyrðu þig hreinskilnislega: „Hvernig lít ég á þá? Byggist viðhorf mitt á því sem ég hef sjálfur kynnst eða á fordómum?“ Forðastu samfélagsmiðla, kvikmyndir eða afþreyingarefni sem elur á hatri og ofbeldi.

Orð Guðs getur hjálpað okkur að brjóta niður hatursfullar hugsanir í huga og hjarta.

Það er ekki alltaf auðvelt að leggja hlutlægt mat á eigin hugsanir og tilfinningar. En orð Guðs getur hjálpað okkur að ‚dæma hugsanir og áform hjartans‘. (Hebreabréfið 4:12) Haltu því áfram að rannsaka Biblíuna. Berðu það sem hún kennir saman við viðhorf þín og gerðu þitt besta til að laga hugarfar þitt að meginreglum Biblíunnar. Orð Guðs getur hjálpað okkur að brjóta niður hatursfullar hugsanir sem eru eins og „sterkbyggð vígi“ í huga og hjarta. – 2. Korintubréf 10:4, 5.

Reynslusaga – STEPHEN

Breytti hugsunarhætti sínum

Stephen og fjölskylda hans þurftu að þola hatur frá hvítu fólki. Fyrir vikið varð hann fyrir áhrifum af herskáum stjórnmálasamtökum sem börðust fyrir borgaralegum réttindum. Með tímanum fór hann sjálfur að taka þátt í hatursglæpum. Stephen segir: „Við vinirnir áttum það til að fara á myndir í bíó sem sýndu illa meðferð á afrískum þrælum í Bandaríkjunum. Óréttlætið vakti hjá okkur svo mikla reiði að við réðumst á hvít ungmenni sem voru í bíósalnum. Síðan fórum við að leita að fleirum til að lumbra á í hverfum hvítra.“

Viðhorf Stephens breyttist algerlega þegar hann fór að kynna sér Biblíuna með vottum Jehóva. Hann segir: „Ég hafði verið umkringdur kynþáttafordómum. Það sem ég sá hjá vottum Jehóva kom mér þess vegna mjög á óvart. Til dæmis lét hvítur vottur svarta fjölskyldu passa börnin þegar hann þurfti að ferðast til útlanda. Ég varð líka vitni að því að hvít fjölskylda tók að sér svartan ungling sem hafði engan stað til að búa á.“ Stephen gerði sér grein fyrir að vottar Jehóva eru það kærleiksríka bræðralag sem Jesús spáði fyrir um. – Jóhannes 13:35.

Hvað fékk Stephen til að hætta að hata aðra og beita ofbeldi? Rómverjabréfið 12:2 hjálpaði honum. Hann segir: „Ég þurfti að gera breytingar. Ég þurfti að ‚endurnýja hugarfarið‘ til að koma ekki bara vingjarnlega fram við aðra heldur sjá að þetta er besta lífsstefnan.“ Stephen hefur nú verið laus við hatur í meira en 40 ár.