Geta mannslíkamans til að græða sár

FJÖLMARGIR samverkandi þættir gera líf okkar mögulegt. Þar á meðal er geta líkamans til að græða sár og endurnýja skemmda vefi. Um leið og líkaminn fær sár byrjar hann að græða það.

Hugleiddu þetta: Margþætt frumustarfsemi, þar sem hvert ferlið tekur við af öðru, fær sár til að gróa:

• Blóðflögur loða við vefi umhverfis sárið og mynda blóðkökk sem lokar skemmdum æðum.

• Bólga ver sárið fyrir sýkingu og fjarlægir allt „rusl“ úr sárinu.

• Innan nokkurra daga er líkaminn byrjaður að gera við skemmda vefi, draga sárið saman og gera við laskaðar æðar.

• Að lokum endurmótar örvefur svæðið sem varð fyrir skemmdum og styrkir það.

Vísindamenn eru að þróa plast sem getur „grætt“ eigin skemmdir með því að líkja eftir blóðstorknun. Í þessu endurnýjanlega plasti eru agnarsmáar samsíða pípur með tveimur ólíkum vökvum sem „blæða“ þegar þær brotna. Þegar vökvarnir blandast mynda þeir hlaup sem breiðist út um skemmda svæðið og lokar sprungum og götum. Þegar hlaupið storknar myndar það sterkt efni sem gerir plastið jafn sterkt og það var fyrir. Vísindamaður nokkur viðurkennir að þessi viðgerð á gerviefni, sem enn er í þróun, „líki eftir“ því sem er nú þegar til í náttúrunni.

Hvað heldur þú? Þróaðist geta líkamans til að græða sár? Eða býr hönnun að baki?