Kristinn kærleikur eftir náttúruhamfarir í Mexíkó

DAGBLAÐ í Mexíkóborg sagði: „Undanfarna 20 daga hafa náttúruhamfarir — fellibyljir og jarðskjálfti — gengið yfir strendur Mexíkó og skilið eftir sig dauða og eyðileggingu.“ — El Financiero, 17. október 1995.

Mexíkósku ríkin Campeche, Quintana Roo og Tabasco urðu illa úti er fellibylurinn Ópal gekk yfir snemma í október síðastliðnum. Nærri 200 manns létu lífið, yfir 150 slösuðust, 500.000 urðu fyrir eignatjóni og þúsundir heimila skemmdust eða gereyðilögðust.

Jafnskjótt og útibú votta Jehóva í Mexíkó frétti af tjóninu var kannað hvernig vottunum á tjónasvæðunum hefði reitt af. Í ljós kom að yfir 2500 vottar höfðu neyðst til að yfirgefa heimili sín. Aðrir vottar skutu fúslega yfir þá skjólshúsi.

Hjálparmiðstöðvum var komið upp. Bágstöddum var séð fyrir mat, fatnaði og peningum. Eftir að flóðin rénuðu hófust vottarnir handa við að endurbyggja hús kristinna bræðra sinna.

Hinn 9. október varð mikið tjón í ríkjunum Colima og Jalisco í öflugum jarðskjálfta sem mældist 7,6 stig á Richterkvarða. Átta ríkissalir votta Jehóva skemmdust verulega. Tólf hús í eigu votta hrundu og um 65 skemmdust. Sem fyrr var skipuð hjálparstarfsnefnd og aðstoð veitt.

Hinn 20. október, reið síðan annar jarðskjálfti yfir Chiapas-ríki. Þar eyðilögðust heimili 88 votta í viðbót og 38 hús stórskemmdust. Tveir ríkissalir gereyðilögðust og fjórir aðrir skemmdust mikið. Um svipað leyti skemmdu flóð af völdum fellibylsins Roxanne heimili um það bil 80 votta í Veracruz-ríki. Fjögur hús gereyðilögðust. Hjálparsjóður, sem vottar Jehóva stofnuðu, veitti þessu fólki líka skjóta aðstoð.

Þótt sumir vottar hefðu marist og beinbrotnað fórst enginn í þessum náttúruhamförum. Alls voru send um 24 tonn af matvælum og 4 tonn af fatnaði til þeirra sem voru hjálparþurfi. Margir utansafnaðarmenn dáðust að þessu hjálparstarfi. Kona í Colima sagði: „Ég hafði bara heyrt að vottar Jehóva væru mjög sameinaðir, en nú sé ég það með eigin augum.“

Oft sagði fólk um vottana og hjálparstarf þeirra: „Þetta eru bræður í raun.“ „Þeir eru best skipulagði hópurinn.“ Sumir sögðu jafnvel: „Ef allir hópar, sem koma til hjálparstarfa, ynnu eins og vottar Jehóva væri búið að hreinsa alla borgina.“

ú eru yfir 440.000 vottar í Mexíkó sem flytja samlöndum sínum fagnaðarerindið um ríki Guðs. Kærleikurinn, sem þeir sýndu hver öðrum í þessum náttúruhamförum, var líka áhrifamikill vitnisburður. — Jóhannes 13:34, 35.