Við þurfum að heimsækja fólk aftur og aftur
1 Brást þú vel við í fyrsta sinn sem þér var sagt frá fagnaðarerindinu? Ef ekki hlýtur þú að vera þakklátur fyrir að vottar Jehóva skuli hafa heimsótt þig aftur og aftur þar til þú þáðir loksins biblíunámskeið. Það er gott að hugsa til þess þegar þú starfar hvað eftir annað á svæðinu þínu.
2 Líf manna er stöðugt að breytast. Þeim mæta ný vandamál eða nýjar aðstæður skapast, þeir frétta af uggvænlegum atburðum í samfélaginu eða í heiminum, þeir verða fyrir fjárhagserfiðleikum, veikjast eða einhver í fjölskyldunni deyr. Slíkir atburðir geta kveikt löngun þeirra til að vita hver sé ástæðan að baki þessari ógæfu. Við þurfum að koma auga á hvað fólki liggur á hjarta og svara því síðan með huggandi boðskap.
3 Þetta er björgunarstarf: Ímyndaðu þér björgunarmenn á slysstað. Enda þótt sumir leiti á svæði þar sem fáir finnast á lífi slá þeir ekki slöku við og hætta af því að starfsfélagar þeirra finna fleiri á lífi annars staðar. Björgunarstarfi okkar er enn ekki lokið. Ár hvert er haft uppi á hundruðum þúsunda manna sem vilja lifa af ‚þrenginguna miklu.‘ — Opinb. 7:9, 14.
4 „Hver sem ákallar nafn [Jehóva], mun hólpinn verða.“ (Rómv. 10:13-15) Þessi orð ættu að brýna þá nauðsyn fyrir okkur að halda prédikunarstarfinu áfram. Frá því að fyrst var farið yfir starfssvæði okkar hafa börn vaxið úr grasi og eru núna nógu gömul til að hugsa sjálf alvarlega um framtíðina og tilgang lífsins. Það er engin leið fyrir okkur að vita hver mun að lokum hlusta. (Préd. 11:6) Margir fyrrverandi mótstöðumenn hafa tekið við sannleikanum. Það er ekki okkar hlutverk að dæma fólk heldur að halda áfram að gefa því tækifæri til að heyra og bjargast frá þessum gamla heimi. Við þurfum að ‚fara í sífellu‘ til fólks og reyna að vekja áhuga þess á Guðsríkisboðskapnum eins og fyrstu lærisveinar Jesú gerðu. — Matt. 10:6, 7, NW.
5 Það er merki um miskunn Jehóva að við höfum enn tækifæri til að prédika. (2. Pét. 3:9) Þegar við leyfum öðrum að heyra aftur og aftur beinum við athyglinni að kærleika Guðs og þannig vegsömum við hann.