Kennum auðmjúkum að ganga á Guðs vegum
1. Hvað felst í því að gera menn að lærisveinum?
1 Á fyrstu öldinni var sagt um lærisveina Krists að þeir „væru þessa vegar.“ (Post. 9:2) Sönn kristni hefur áhrif á öll svið lífsins. (Orðskv. 3:5, 6) Þegar við höldum biblíunámskeið þurfum við þess vegna að gera annað og meira en að miðla nákvæmri þekkingu á biblíukenningum. Við verðum líka að hjálpa biblíunemendum að ganga á vegum Jehóva. — Sálm. 25:8, 9.
2. Hvað getur fengið biblíunemendur til að fylgja fyrirmælum Guðs?
2 Kærleikur til Jehóva og Jesú: Það getur vissulega reynst þrautin þyngri fyrir ófullkomna menn að færa hugsanir sínar, viðhorf, tal og hegðun til samræmis við vilja Guðs. (Rómv. 7:21-23; Ef. 4:22-24) En auðmjúkt fólk reynir það engu að síður sökum kærleika til Guðs og sonar hans. (Jóh. 14:15; 1. Jóh. 5:3) Hvernig getum við hjálpað biblíunemendum okkar að glæða með sér slíkan kærleika?
3. Hvernig getum við hjálpað biblíunemendum að glæða með sér kærleika til Jehóva og Jesú?
3 Hjálpaðu nemanda þínum að kynnast Jehóva og eiginleikum hans. Einn trúbróðir okkar sagði: „Fólki getur ekki þótt vænt um einhvern sem það þekkir ekki. Þess vegna nota ég Biblíuna til að kenna nemandanum nafn Guðs alveg frá byrjun og er vakandi fyrir tækifærum til að leggja áherslu á eiginleika Guðs.“ Kjörin leið til að gera það er að benda á fordæmi Jesú. (Jóh. 1:14; 14:9) Auk þess skaltu nota upprifjunarrammann í lok hvers kafla í bókinni Hvað kennir Biblían? til að hvetja nemandann til að íhuga stórkostlega eiginleika Guðs og sonar hans.
4. (a) Hvers vegna finnst mörgum biblíunemendum erfitt að prédika? (b) Hvernig getum við hjálpað nemendum okkar að stíga fyrstu skrefin í boðunarstarfinu?
4 Kennum með góðu fordæmi: Þegar við kennum og leiðbeinum öðrum sýnum við þeim með verkum okkar hvað það merkir að ganga á vegum Guðs. (1. Kor. 11: 1) Flestir biblíunemendur eru til dæmis óvanir að tala um trú sína við ókunnuga. Því gæti reynt á þolinmæði okkar og leikni þegar við hjálpum þeim að glæða með sér þann kærleika, trú og hugrekki sem þarf til að taka þátt í boðunarstarfinu og gera menn að lærisveinum. (2. Kor. 4:13; 1. Þess. 2:2) Okkur langar til að leiðbeina biblíunemendum okkar og þess vegna viljum við vera við hlið þeirra þegar þeir stíga sín fyrstu skref í boðunarstarfinu.
5. Hvernig getur gott fordæmi hjálpað biblíunemendum að skilja hvað felst í því að fylgja fyrirmælum Guðs?
5 Nemendur þínir geta lært af fordæmi þínu á öðrum mikilvægum sviðum kristilegs lífs. Þegar þú heimsækir sjúka eða heilsar fólki hlýlega á safnaðarsamkomum sjá þeir kærleika þinn í verki. (Jóh. 15:12) Þú kennir þeim að þjóna öðrum þegar þú tekur þátt í að þrífa ríkissalinn eða þegar þú aðstoðar aðra á einhvern hátt. (Jóh. 13:12-15) Þegar þeir sjá að þú lifir einföldu lífi verður þeim ljóst hvað það merkir að leita „fyrst ríkis [Guðs] og réttlætis.“ — Matt. 6:33.
6. Hvaða árangri skilar það að hjálpa auðmjúkum að þjóna Jehóva?
6 Það krefst mikillar fyrirhafnar að fræða aðra um orð Guðs og gera þá að lærisveinum. En það veitir líka mikla ánægju að sjá auðmjúkt fólk lifa „í sannleikanum“. — 3. Jóh. 4.