Hvernig berum við okkur að þegar við störfum með ritatrillur?

Það hefur gefið góða raun að nota ritatrillur í boðunarstarfinu til að laða einlægt fólk að sannleikanum. (Jóh. 6:44) Öldungarnir hafa þess vegna verið hvattir til að skipuleggja götustarf með ritatrillur á safnaðarsvæðum þar sem er mikil umferð gangandi vegfarenda. Ritatrillur eru hreyfanlegar og þess vegna er yfirleitt ekki nauðsynlegt að fá leyfi frá yfirvöldum. Hverjir eru hæfir til að taka þátt í þessu starfi? Boðberar sem sýna góða dómgreind, hafa virðulega framkomu og eiga gott með að tala við fólk. Við ættum að hafa eftirfarandi atriði í huga til að trillustarfið verði árangursríkt. Fyrst er talið upp það sem við ættum að gera en síðan það sem við ættum ekki að gera.

Gerðu þetta:

Vertu vingjarnlegur og hjálplegur gagnvart þeim sem ganga fram hjá. Sumir boðberar brosa og heilsa vingjarnlega. Ef einhver lítur á ritatrilluna gætirðu sagt: „Þér er velkomið að taka rit ef þú vilt.“
Stattu í hæfilegri fjarlægð frá ritatrillunni. Á sumum svæðum hefur boðberum fundist árangursríkt að standa innan örfárra metra frá ritatrillunni. Öðrum hefur þá fundist vegfarendur hika frekar við að stoppa, svo að þeir standa aðeins fjær og bíða þar til einhver stoppar við trilluna. Þegar vegfarandi nálgast ritatrilluna skaltu reyna að hefja samræður með því að spyrja: „Hefurðu einhvern tíma velt þessari spurningu fyrir þér?“
Notaðu Biblíuna eins oft og þú getur.
Útskýrðu fyrir þeim sem taka námsrit, eins og bókina Hvað kennir Biblían?, hvernig biblíunámskeið fer fram. Þú getur boðist til að sýna myndskeiðið Hvers vegna ættum við að kynna okkur Biblíuna? á snjallsíma eða spjaldtölvu.
Fáðu upplýsingar til að geta haft samband við áhugasama þegar það er mögulegt. Ef viðmælandinn býr ekki á þínu safnaðarsvæði skaltu fylla út eyðublaðið Vinsamlegast fylgið eftir (S-43) og láttu síðan ritara safnaðarins fá það eins fljótt og hægt er.