2 | ‚Huggunin sem Ritningarnar veita‘

BIBLÍAN SEGIR: „Allt sem var skrifað áður var skrifað til að við gætum lært af því og haldið voninni vegna þolgæðis okkar og þeirrar huggunar sem Ritningarnar veita.“ – RÓMVERJABRÉFIÐ 15:4.

Hvað þýðir það?

Biblían getur hughreyst okkur og veitt okkur þann styrk og þolgæði sem við þurfum til að takast á við neikvætt hugsanamynstur. Boðskapur hennar gefur okkur líka von um að tilfinningalegur sársauki heyri brátt sögunni til.

Hvernig hjálpar þetta?

Öllum líður illa af og til en þeir sem eru haldnir þunglyndi eða kvíða gætu þurft að glíma við sárar tilfinningar daglega. Hvernig getur Biblían hjálpað?

Biblían gefur okkur margt jákvætt til að hugsa um og það getur komið í staðinn fyrir neikvæðar hugsanir. (Filippíbréfið 4:8) Það getur hughreyst okkur og róað svo að við getum haft stjórn á tilfinningum okkar. – Sálmur 94:18, 19.
Biblían getur hjálpað okkur að berjast gegn þeirri hugsun að við séum einskis virði. – Lúkas 12:6, 7.
Mörg vers í Biblíunni fullvissa okkur um að við stöndum ekki ein og að Guð, skapari okkar, skilji tilfinningar okkar til fulls. – Sálmur 34:18; 1. Jóhannesarbréf 3:19, 20.
Biblían lofar að Guð muni fjarlægja sárar minningar. (Jesaja 65:17; Opinberunarbókin 21:4) Þegar vondar hugsanir og tilfinningar þjaka okkur getur þetta loforð gefið okkur styrk til að halda út.

Hvernig Biblían hjálpar Jessicu

Áhrifin sem þunglyndi hefur á mig

„Ég fékk taugaáfall þegar ég var 25 ára og var greind með alvarlegt þunglyndi. Sárar minningar af því sem ég hafði upplifað skutu skyndilega upp kollinum án þess að ég réði nokkuð við það. Læknar hjálpuðu mér að skilja að þunglyndið tengdist neikvæðum hugsunum sem komu til vegna áfalla í lífinu. Ég þurfti lyf og meðferð til að hjálpa mér að skilja og leiðrétta óheilbrigt hugsanamynstur.“

Hvernig Biblían hjálpar mér

„Þegar þunglyndið var sem verst fékk ég kvíðaköst, ofsakvíða og ég svaf ekki. Kvíðavaldandi hugsanir sem ég hafði enga stjórn á gagntóku mig oft á næturnar. Guð getur hughreyst okkur og róað þegar áhyggjur eru að buga okkur eins og fram kemur í Sálmi 94:19. Ég hafði því Biblíuna og minnisbók með uppörvandi biblíuversum við rúmið. Þegar ég gat ekki sofnað las ég nokkur biblíuvers og leyfði þannig Guði að hughreysta mig.

Biblían hvetur okkur til að hætta að hugsa um það sem samræmist ekki því sem við vitum um Guð. Áður var ég sannfærð um að ég væri einskis virði, það gæti enginn elskað mig og að ég væri ekki til neins. En ég hef lært að það stangast í rauninni á við það sem Biblían kennir en hún sýnir að Guð er kærleiksríkur og samúðarfullur faðir sem er annt um okkur hvert og eitt. Smátt og smátt tókst mér að ná stjórn á hugsunum mínum í stað þess að láta þær stjórna mér. Ég hef lært að líta mig sömu augum og Guð gerir. Þannig tókst mér að sigrast á þessu neikvæða viðhorfi til sjálfrar mín.

Ég hlakka til þegar allar sárar minningar og óheilbrigt hugsanamynstur heyrir sögunni til. Það sem gefur mér styrk núna til að takast á við takmarkanir mínar er sú dásamlega von fyrir framtíðina þegar ég þarf ekki lengur að glíma við þunglyndi og að vita að geðraskanir verða brátt úr sögunni.“