Hvernig munu stríð og átök taka enda?

GUÐ BINDUR ENDA Á STJÓRNIR MANNA

Stjórnir manna líða undir lok í stríði sem Biblían kallar Harmagedón.a (Opinberunarbókin 16:16) Þá verður ‚konungum allrar heimsbyggðarinnar safnað saman til stríðsins á hinum mikla degi Guðs hins almáttuga.‘ (Opinberunarbókin 16:14) Harmagedón er stríð Guðs sem bindur enda á öll stríð.

Guðsríki, eða stjórn Guðs, kemur í stað stjórna manna. Það ríkir frá himnum og því veður aldrei eytt. (Daníel 2:44) Guð hefur valið son sinn, Jesú Krist, sem konung í þessu ríki. (Jesaja 9:6, 7; Matteus 28:18) Þessi stjórn er ríkiðb sem Jesús kenndi fylgjendum sínum að biðja um að kæmi. (Matteus 6:9, 10) Allt mannkynið verður sameinað undir einni heimsstjórn sem Jesús ríkir yfir.

Ólíkt stjórnum manna mun Jesús ekki nota vald sitt í eigin hagsmunaskyni. Hann er sanngjarn og mismunar ekki fólki. Þess vegna þarf enginn að óttast að vera vanræktur vegna kynþáttar, þjóðernis eða uppruna. (Jesaja 11:3, 4) Og fólk þarf ekki að berjast fyrir rétti sínum vegna þess að Jesús hefur áhuga á velferð hvers og eins. „Hann bjargar hinum fátæka sem hrópar á hjálp, hinum bágstadda og þeim sem enginn hjálpar … Hann frelsar þá undan kúgun og ofbeldi.“ – Sálmur 72:12–14.

Ríki Guðs mun losa jörðina við banvæn vopn. (Míka 4:3) Það mun líka fjarlægja vont fólk sem vill ekki hætta að berjast eða spilla friði annarra. (Sálmur 37:9, 10) Allir karlar, konur og börn munu finna til öryggis hvar sem þau eru á jörðinni. – Esekíel 34:28.

Fólk mun búa við fullkomnar aðstæður undir stjórn Guðsríkis. Þetta ríki mun leysa þau vandamál sem fá fólk til að fara í stríð, eins og fátækt, hungur og húsnæðisskort. Allir munu hafa meira en nóg af næringarríkum mat og búa við þægileg kjör. – Sálmur 72:16; Jesaja 65:21–23.

Ríki Guðs mun gera að engu allan þann skaða sem stríð hafa valdið. Það á ekki aðeins við um líkamlegu sárin heldur líka andlega og tilfinningalega sársaukann sem stríðshörmungar hafa í för með sér. Þeir sem hafa dáið verða meira að segja reistir upp aftur til lífs á jörðinni. (Jesaja 25:8; 26:19; 35:5, 6) Fjölskyldur munu sameinast aftur og sársaukafullar minningar um stríð hætta að hrjá fólk vegna þess að „það sem áður var er horfið“. – Opinberunarbókin 21:4.

GUÐ MUN AFMÁ SYNDINA

Ríki Guðs mun sameina fólk í tilbeiðslu á Jehóva,c hinum eina sanna Guði, sem er „Guð kærleikans og friðarins“. (2. Korintubréf 13:11) Fólk mun læra að búa saman í friði. (Jesaja 2:3, 4; 11:9) Þeir sem fara eftir því sem þeir læra munu losna undan áhrifum syndarinnar. – Rómverjabréfið 8:20, 21.

GUÐ MUN ÚTRÝMA SATAN OG ILLU ÖNDUNUM

Ríki Guðs mun eyða þeim sem standa á bak við stríð, Satan og illu öndunum. (Opinberunarbókin 20:1–3, 10) „Friðurinn verður allsráðandi“ þegar við verðum laus við ill áhrif þeirra. – Sálmur 72:7.

Þú getur treyst að Guð standi við loforð sitt um að binda enda á stríð og vopnuð átök. Hann bæði getur og vill stöðva stríð.

• Guð hefur bæði visku og mátt til að binda enda á stríð og ofbeldi. (Jobsbók 9:4) Ekkert er honum ofviða. – Jobsbók 42:2.

• Guði þykir vont að sjá fólk þjást. (Jesaja 63:9) „Hann hatar þann sem elskar ofbeldi.“ – Sálmur 11:5.

• Guð stendur alltaf við orð sín. Hann getur ekki logið. – Jesaja 55:10, 11; Títusarbréfið 1:2.