Fornegypsk lágmynd rennir stoðum undir frásögn Biblíunnar

Þessi átta metra háa lágmynd með myndletri stendur við innganginn að fornegypsku musteri í Karnak sem var helgað guðinum Amon. Að sögn fræðimanna sýnir lágmyndin sigra Sísaks faraós í löndum norðaustur af Egyptalandi, þar með talið Júda og norðurríkinu Ísrael.

Lágmyndin sýnir Amon þegar hann færir Sísaki, eða Sesonk,a fleiri en 150 fanga, einn fyrir hverja sigraða borg eða þjóð. Borgarheitin eru greypt í sporöskjulaga mynd á líkama fanganna. Sum nöfnin eru enn læsileg og sum hver þekkt af lesendum Biblíunnar. Meðal nafna eru Bet Sean, Gíbeon, Megiddó og Súnem.

Innrásin í Júda er nefnd í Biblíunni. (1. Konungabók 14:25, 26) Hún lýsir reyndar herförinni í smáatriðum. Biblían segir: „Á fimmta ríkisstjórnarári Rehabeams konungs hélt Sísak, konungur Egypta, í herför gegn Jerúsalem ... Hann kom með tólf hundruð stríðsvagna og sextíu þúsund vagnliða. Fleiri hermenn en tölu varð á komið fylgdu honum frá Egyptalandi ... Hann tók virkisborgirnar í Júda og komst allt til Jerúsalem.“ – 2. Kroníkubók 12:2–4.

Lágmyndin í Karnak er ekki eini fornleifafundurinn sem styður frásögnina af innrás Sísaks í Ísrael. Fundist hefur steinbrot úr minnisvarða með áletruninni „Sesonk“ á þeim stað þar sem bærinn Megiddó var á biblíutímanum.

Nákvæm frásögn Biblíunnar af sigrum Sísaks í Júda er dæmi um heiðarleika biblíuritaranna. Þeir skráðu samviskusamlega sigra og ósigra sinnar eigin þjóðar en slíkur heiðarleiki var óalgengur meðal sagnaritara til forna.