OBE ỌSOSUỌ IRUẸRU-IVIE

5 Emezae Jafẹt họ Goma, Magọg, Medeyai, Jevan, Tubal,+ Mishẹk+ gbe Taeras.+

6 Emezae Goma họ Ashkenaz, Raefat, gbe Togama.+

7 Emezae Jevan họ Elaeshah, Tashish, Kitim, gbe Rodenim.

8 Emezae Ham họ Kush,+ Mizreyẹm, Put, gbe Kenan.+

9 Emezae Kush họ Siba,+ Havila, Sabta, Reama,+ gbe Sabtika.

Emezae Reama họ Shiba avọ Didan.+

10 Kush họ ọsẹ Nimrọd.+ Ọye họ ohwo ọsosuọ nọ o zihe ruọ ohwo ologbo evaọ otọakpọ na.

11 Mizreyẹm họ ọsẹ Ludim,+ Anamim, Lẹhebim, Naftuhim,+ 12 Patrusim,+ Kasluhim (ọnọ ahwo Filistia+ a no oma riẹ ze), gbe Kaftorẹm.+

13 Kenan họ ọsẹ Saedọn,+ ọmọ ọsosuọ riẹ, gbe Hẹt,+ 14 jegbe ahwo Jebus,+ ahwo Amọ,+ ahwo Gẹgash,+ 15 ahwo Hiv,+ ahwo uyẹ Arkae, ahwo Sin, 16 ahwo Avad,+ ahwo Zẹma, gbe ahwo Hemat.

18 Apakshad họ ọsẹ Shila,+ Shila họ ọsẹ Iba.

19 Emezae ivẹ a yẹ kẹ Iba. Odẹ ọjọ Pilẹg,*+ keme evaọ oke uzuazọ riẹ, otọakpọ na o hẹriẹ.* Odẹ oniọvo riẹ họ Jọktan.

20 Jọktan họ ọsẹ Almodad, Shilẹf, Hezamevẹt, Jira,+ 21 Hedoram, Uzal, Dikla, 22 Obal, Abimẹl, Shiba, 23 Ofaya,+ Havila,+ gbe Jobab; enana kpobi yọ emezae Jọktan.

28 Emezae Abraham họ Aiziki+ gbe Ishmẹl.+

29 Enana họ enọ i mu inuwou rai họ: Ọmọ ọsosuọ Ishmẹl họ Nebeyọt,+ kẹsena Kida,+ Adbiẹl, Mibsam,+ 30 Mishma, Duma, Masa, Hedad, Tima, 31 Jitọ, Nefish, gbe Kẹdema. Enana họ emezae Ishmẹl.

32 Emezae nọ Ketura+ ọse Abraham o yẹ họ Zimran, Jọkshan, Midan, Midian,+ Ishbak, gbe Shuah.+

Emezae Jọkshan họ Shiba gbe Didan.+

33 Emezae Midian họ Ifa,+ Ifẹ, Henọk, Abaeda, gbe Ẹldeya.

Enana kpobi yọ emezae Ketura.

34 Abraham họ ọsẹ Aiziki.+ Emezae Aiziki họ Esọ+ gbe Izrẹl.+

35 Emezae Esọ họ Ẹlifaz, Ruẹl, Jiẹsh, Jelam, gbe Kora.+

36 Emezae Ẹlifaz họ Timan,+ Omar, Zifo, Getam, Kinaz, Timna, gbe Amalẹk.+

37 Emezae Ruẹl họ Nehat, Zira, Shamah, gbe Miza.+

38 Emezae Siya+ họ Lotan, Shobal, Zibiọn, Enah, Daeshọn, Izẹ, gbe Daeshan.+

39 Emezae Lotan họ Horae gbe Homam. Oniọvo-ọmọtẹ Lotan họ Timna.+

40 Emezae Shobal họ Alvan, Manahat, Ibal, Shifo, gbe Onam.

Emezae Zibiọn họ Eyah gbe Enah.+

41 Ọmọzae* Enah họ Daeshọn.

Emezae Daeshọn họ Hẹmdan, Ẹshban, Itran, gbe Kiran.+

42 Emezae Izẹ+ họ Bilhan, Zeavan, gbe Ekan.

Emezae Daeshan họ Ọz gbe Eran.+

43 Enana họ ivie nọ i su evaọ ẹkwotọ Edọm+ taure ovie o te ti su ahwo Izrẹl:*+ Bila ọmọzae Biọ; odẹ okpẹwho riẹ họ Dinhaba. 44 Nọ Bila o whu no, Jobab ọmọzae Zira nọ o no Bọzra+ ze o te muhọ esuo evaọ ẹta riẹ. 45 Nọ Jobab o whu no, Husham nọ o no ẹkwotọ ahwo Timan ze o te muhọ esuo evaọ ẹta riẹ. 46 Nọ Husham o whu no, Hedad ọmọzae Bidad, ọnọ o fi Midian kparobọ evaọ ẹkwotọ* Moab o te muhọ esuo evaọ ẹta riẹ. Odẹ okpẹwho riẹ họ Evit. 47 Nọ Hedad o whu no, Samla nọ o no Masrika ze o te muhọ esuo evaọ ẹta riẹ. 48 Nọ Samla o whu no, Sheọl nọ o no Rehobọt nọ o rrọ akotọ Ethẹ na ze o te muhọ esuo evaọ ẹta riẹ. 49 Nọ Sheọl o whu no, Bale-henan ọmọzae Akbọ o te muhọ esuo evaọ ẹta riẹ. 50 Nọ Bale-henan o whu no, Hedad o te muhọ esuo evaọ ẹta riẹ. Odẹ okpẹwho riẹ họ Peyu, yọ odẹ aye riẹ Mẹhetabẹl, ọmọtẹ Metrẹd, ọmọtẹ Mizahab. 51 Kẹsena Hedad o te whu.

Iletu-orua Edọm họ Timna oletu-orua, Alva oletu-orua, Jitẹt oletu-orua,+ 52 Oholibema oletu-orua, Ilah oletu-orua, Paenọn oletu-orua, 53 Kinaz oletu-orua, Timan oletu-orua, Mibza oletu-orua, 54 Magdiẹl oletu-orua, Aeram oletu-orua. Enana họ iletu-orua Edọm.

2 Enana họ emezae Izrẹl:+ Rubẹn,+ Simiọn,+ Livae,+ Juda,+ Isaka,+ Zẹbulọn,+ 2 Dan,+ Josẹf,+ Bẹnjamin,+ Naftalae,+ Gad,+ gbe Asha.+

3 Emezae Juda họ Ẹr, Onan, gbe Shila. Ọmọtẹ Shua ohwo Kenan na họ ọnọ o yẹ emezae esa nana kẹe.+ Rekọ Ẹr, ọmọ ọsosuọ Juda ọ jẹ dha Jihova eva, fikiere O te kpei no.+ 4 Tama,+ aye ọmọzae Juda o yẹ Pirẹz+ gbe Zira kẹ Juda. Emezae isoi Juda o wo.

5 Emezae Pirẹz họ Hẹzrọn avọ Hemọl.+

6 Emezae Zira họ Zimrae, Itan, Himan, Kalkọl, gbe Dera. Aikpobi imasoi.

7 Ọmọzae* Kamae họ Eka,* ọnọ ọ wha okpẹtu* se Izrẹl,+ ọnọ o yoẹme kẹ Ọghẹnẹ hẹ evaọ eware nọ ọ ta nọ a rẹ raha kufiẹ na.+

8 Ọmọzae* Itan họ Azaraya.

9 Emezae Hẹzrọn nọ a yẹ kẹe họ Jeramiẹl,+ Ram,+ gbe Kẹlubae.*

10 Ram họ ọsẹ Aminadab.+ Aminadab họ ọsẹ Nashọn,+ osu ahwo uyẹ Juda. 11 Nashọn họ ọsẹ Salma,+ Salma họ ọsẹ Boaz.+ 12 Boaz họ ọsẹ Obẹd. Obẹd họ ọsẹ Jẹsi.+ 13 Jẹsi họ ọsẹ Ẹlayab, ọmọ ọsosuọ riẹ, Abinadab+ ọmọ avọ ivẹ, Shimea ọmọ avọ esa,+ 14 Nẹtanẹl ọmọ avọ ene, Radae ọmọ avọ isoi, 15 Ozẹm ọmọ avọ ezeza, gbe Devidi,+ ọmọ avọ ihrẹ. 16 Inievo-emetẹ rai họ Zeruya avọ Abigẹle.+ Emezae Zeruya họ Abishae,+ Joab,+ gbe Asahẹl,+ aimasa. 17 Abigẹle o te yẹ Amesa,+ yọ ọsẹ Amesa họ Jita, ohwo Ishmẹl na.

18 Kelẹb* ọmọzae Hẹzrọn o wo emezae nọ aye riẹ Azuba gbe Jẹriọt a yẹ kẹe; yọ enana họ emezae nọ aye na o yẹ: Jisha, Shobab, gbe Adọn. 19 Nọ Azuba o whu no, Kelẹb ọ tẹ rehọ Efrat,+ aye na o te yẹ Họr+ kẹe. 20 Họr họ ọsẹ Yurae. Yurae họ ọsẹ Bẹzalẹl.+

21 Nọ oyena o vrẹ no, Hẹzrọn o te lele ọmọtẹ Meka+ ọsẹ Giliad+ wezẹ. Nọ Hẹzrọn ọ jọ ikpe udhosa ọ rọ rehọ ọmọtẹ na, o te yẹ Sigọb kẹe. 22 Sigọb họ ọsẹ Jeya,+ ọnọ o wo ikpewho udhegbesa evaọ ẹkwotọ Giliad.+ 23 Uwhremu na Gẹshọ+ avọ Siria+ a tẹ rehọ Havọt-jeya+ mi ai, a rehọ Kinat+ avọ ewho esese riẹ* kugbe re, ikpewho udhosa. Enana kpobi yọ uyẹ Meka ọsẹ Giliad.

24 Nọ Hẹzrọn+ o whu no evaọ Kelẹb-efrata, Abaejah aye Hẹzrọn o te yẹ Ashhọ+ ọsẹ Tekoa+ kẹe.

25 Emezae Jeramiẹl, ọmọ ọsosuọ Hẹzrọn họ Ram ọmọ ọsosuọ, Buna, Orẹn, Ozẹm, gbe Ahaejah. 26 Jeramiẹl o wo aye ọfa nọ a re se Atara. Ọye họ oni Onam. 27 Emezae Ram ọmọ ọsosuọ Jeramiẹl họ Meyaz, Jemin, gbe Ika. 28 Emezae Onam họ Shamai avọ Jeda. Emezae Shamai họ Nedab avọ Abaeshọ. 29 Odẹ aye Abaeshọ họ Abẹhel, ọnọ o yẹ Aban avọ Molid kẹe. 30 Emezae Nedab họ Silẹd avọ Apeyẹm. Rekọ Silẹd o whu ababọ emezae nọ o yẹ. 31 Ọmọzae* Apeyẹm họ Ishai. Ọmọzae* Ishai họ Shishan, ọmọzae* Shishan kọ Alae. 32 Emezae Jeda nọ ọ rrọ oniọvo-ọmọzae Shamai họ Jita avọ Jonatan. Rekọ Jita o whu ababọ emezae nọ o yẹ. 33 Emezae Jonatan họ Pilẹt avọ Zeza. Enana họ uyẹ Jeramiẹl.

34 Shishan o wo emezae he, emetẹ ọvo. Whaọ Shishan o wo odibo jọ nọ ọ rrọ ohwo Ijipti nọ a je se Jaha. 35 Shishan ọ rehọ ọmọtẹ riẹ kẹ Jaha odibo riẹ re ọ jọ aye riẹ, ọmọtẹ na o te yẹ Atae kẹe. 36 Atae họ ọsẹ Netan. Netan họ ọsẹ Zebad. 37 Zebad họ ọsẹ Ẹflal. Ẹflal họ ọsẹ Obẹd. 38 Obẹd họ ọsẹ Jehu. Jehu họ ọsẹ Azaraya. 39 Azaraya họ ọsẹ Hilẹz. Hilẹz họ ọsẹ Ẹliesa. 40 Ẹliesa họ ọsẹ Sismae. Sismae họ ọsẹ Shalọm. 41 Shalọm họ ọsẹ Jẹkamaya. Jẹkamaya họ ọsẹ Ẹlishama.

42 Emezae Kelẹb,*+ oniọvo-ọmọzae Jeramiẹl họ Misha, ọmọ ọsosuọ riẹ, ọnọ ọ jọ ọsẹ Zif, gbe emezae Marishah ọsẹ Hebrọn. 43 Emezae Hebrọn họ Kora, Tapua, Rikẹm, gbe Shima. 44 Shima họ ọsẹ Reham nọ ọ rrọ ọsẹ Jọkiam. Rikẹm họ ọsẹ Shamai. 45 Ọmọzae Shamai họ Meọn. Meọn họ ọsẹ Bẹt-zọr.+ 46 Ọse Kelẹb nọ a re se Ifa o te yẹ Heran, Moza, gbe Gezẹz. Heran họ ọsẹ Gezẹz. 47 Emezae Jadai họ Rigẹm, Jotam, Gishan, Pẹlẹt, Ifa, gbe Sheyaf. 48 Ọse Kelẹb nọ a re se Meaka o te yẹ Shibar avọ Tehana. 49 Nọ u te oke jọ, o te yẹ Sheyaf ọsẹ Madmana+ gbe Shiva ọsẹ Makbina gbe Gibia.+ Ọmọtẹ Kelẹb+ họ Aksa.+ 50 Enana họ uyẹ Kelẹb.

Emezae Họr+ nọ ọ rrọ ọmọ ọsosuọ Efrata+ họ Shobal ọsẹ Kiriat-jierim,+ 51 Salma ọsẹ Bẹtlẹhẹm,+ gbe Heraf ọsẹ Bẹt-geda. 52 Shobal ọsẹ Kiriat-jierim o wo emezae: Haroa gbe abọvo ahwo Mẹnuhọt. 53 Inuwou Kiriat-jierim họ uyẹ Itri,+ uyẹ Puti, uyẹ Shumat, gbe uyẹ Mishra. Usu ahwo nana ahwo Zorat+ gbe ahwo Ẹshtaọl+ a no ze. 54 Emezae Salma họ Bẹtlẹhẹm,+ ahwo Nẹtofa, Atrọt-bẹt-joab, abọvo ahwo Manahat, gbe ahwo Zora. 55 Inuwou otu ikere-ebe nọ e jẹ rria Jebẹz họ uyẹ Taerat, uyẹ Shimeat, gbe uyẹ Sukat. Enana họ ahwo Kẹn+ nọ a no oma Hamat ọsẹ ahwo uwou Rikab+ ze.

3 Enana họ emezae Devidi nọ a yẹ kẹe evaọ Hebrọn:+ Amnọn+ họ ọmọ ọsosuọ, yọ Ahinoam+ ohwo Jezrẹl na họ oni riẹ; ọrọ avọ ivẹ họ Daniẹl, yọ Abigẹle+ ohwo Kamẹl na họ oni riẹ; 2 ọrọ avọ esa họ Absalọm,+ ọmọzae Meaka ọmọtẹ Talmae ovie Gẹshọ; ọrọ avọ ene họ Adonaejah+ ọmọzae Hagit. 3 ọrọ avọ isoi họ Shẹfataya, yọ Abaetal họ oni riẹ; ọrọ avọ ezeza họ Itriam, yọ Ẹgla aye Devidi họ oni riẹ. 4 Obọ Hebrọn a jọ yẹ emezae ezeza nana kẹe; yọ ọ jọ obei su ikpe ihrẹ gbe emerae ezeza, o te su ikpe ọgbagbesa evaọ Jerusalẹm.+

5 Emọ nọ a yẹ kẹe evaọ Jerusalẹm họ:+ Shimea, Shobab, Netan,+ gbe Solomọn;+ Bat-shiba+ ọmọtẹ Amiẹl họ oni emọ ene nana. 6 Emezae izii efa họ Ibha, Ẹlishama, Ẹlifelẹt, 7 Noga, Nifẹg, Jefaya, 8 Ẹlishama, Eliada, gbe Ẹlifelẹt. 9 Enana kpobi yọ emezae Devidi u te no emezae ese riẹ no, yọ Tama+ họ oniọvo-ọmọtẹ rai.

10 Ọmọzae Solomọn họ Rehoboam;+ Abaejah+ yọ ọmọzae riẹ, Asa+ ọmọzae riẹ, Jehoshafat+ ọmọzae riẹ, 11 Jehoram+ ọmọzae riẹ, Ehazaya+ ọmọzae riẹ, Jehoash+ ọmọzae riẹ, 12 Amazaya+ ọmọzae riẹ, Azaraya+ ọmọzae riẹ, Jotam+ ọmọzae riẹ, 13 Ehaz+ ọmọzae riẹ, Hẹzikaya+ ọmọzae riẹ, Manasẹ+ ọmọzae riẹ, 14 Amọn+ ọmọzae riẹ, Josaya+ ọmọzae riẹ. 15 Emezae Josaya họ Johenan ọmọ ọsosuọ, Jehoyakim+ ọmọ avọ ivẹ, Zẹdikaya+ ọmọ avọ esa, Shalọm ọmọ avọ ene. 16 Emezae Jehoyakim họ Jẹkonaya+ ọmọzae riẹ gbe Zẹdikaya ọmọzae riẹ. 17 Emezae Jẹkonaya, ọnọ ọ jọ uwou-odi na họ Shealtiẹl, 18 Malkaeram, Pedaya, Shinaza, Jẹkamaya, Hoshama, gbe Nẹdebaya. 19 Emezae Pedaya họ Zerubabẹl+ avọ Shimia; yọ emezae Zerubabẹl họ Mẹshulam avọ Hananaya (Shilomit yọ oniọvo-ọmọtẹ rai); 20 emezae isoi efa họ Hashuba, Ohẹl, Bẹrekaya, Hasedaya, gbe Jushab-hisẹd. 21 Yọ emezae Hananaya họ Pẹlataya avọ Jesheya; ọmọzae* Jesheya họ Refeya; ọmọzae* Refeya họ Anan; ọmọzae* Anan họ Obedaya; ọmọzae* Obedaya họ Shẹkenaya; 22 yọ emezae Shẹkenaya họ Shimaya gbe emezae Shimaya nọ a re se Hatọsh, Aigal, Baraya, Nearaya, gbe Shefat,—aikpobi imazeza. 23 Emezae Nearaya họ Ẹlio-inae, Hizkaya, gbe Azraekam, aimasa. 24 Yọ emezae Ẹlio-inae họ Họdavaya, Elayashib, Pẹleya, Akọb, Johenan, Delaya, gbe Anenae, imahrẹ.

4 Emezae Juda họ Pirẹz,+ Hẹzrọn,+ Kamae, Họr,+ gbe Shobal.+ 2 Rieya ọmọzae Shobal họ ọsẹ Jehat; Jehat họ ọsẹ Ahumae avọ Lehad. Enana họ inuwou ahwo Zorat.+ 3 Emezae ọsẹ Itam+ họ: Jezrẹl, Ishma, gbe Idbash (odẹ oniọvo-ọmọtẹ rai họ Hazelẹlponae), 4 yọ Pẹnuẹl họ ọsẹ Gidọ, Izẹ họ ọsẹ Husha. Enana họ emezae Họr,+ ọmọ ọsosuọ Efrata gbe ọsẹ Bẹtlẹhẹm.+ 5 Ashhọ+ ọsẹ Tekoa+ o wo eyae ivẹ, Hila avọ Neara. 6 Neara o yẹ Ahọzam, Hifa, Timẹnae, gbe Hahashterae kẹe. Emezae Neara ena. 7 Emezae Hila họ Zirẹt, Izha, gbe Ẹtnan. 8 Kọz họ ọsẹ Enọb, Zobiba, gbe inuwou Ahahẹl ọmọzae Herọm.

9 Jebẹz o wo ọghọ vi inievo-emezae riẹ; yọ oni riẹ o se rie Jebẹz,* ọ ta nọ: “Me yẹ riẹ avọ edada.” 10 Jebẹz o bo se Ọghẹnẹ Izrẹl inọ: “O, ghale omẹ je ru ẹkwotọ mẹ kẹre, je ru re obọ ra o jọ kugbe omẹ jẹ thọ omẹ no okpẹtu, re o siọ enwoma ba ẹwha se omẹ!” Fikiere Ọghẹnẹ o te ru oware nọ ọ yare na.

11 Kilub oniọvo-ọmọzae Shuha họ ọsẹ Miha, ọnọ ọ jọ ọsẹ Ẹshtọn. 12 Ẹshtọn họ ọsẹ Bẹt-refa, Pasiya, gbe Tẹhena, ọsẹ Iyẹr-nehash. Enana họ ezae Rika. 13 Emezae Kinaz họ Otniẹl+ avọ Seraya, yọ ọmọzae* Otniẹl họ Hetat. 14 Mionọtae họ ọsẹ Ọfra. Seraya họ ọsẹ Joab nọ ọ rrọ ọsẹ Ge-harashim,* a je se ai ere fikinọ ewena a jọ.

15 Emezae Kelẹb+ ọmọzae Jefunẹ họ Aeru, Ilah, gbe Neam; yọ ọmọzae* Ilah họ Kinaz. 16 Emezae Jehalẹlẹl họ Zif, Zaefa, Tiria, gbe Asarẹl. 17 Emezae Ẹzrah họ Jita, Mirẹd, Ifẹ, gbe Jelọn; o* dihọ o te yẹ Miriam, Shamai, gbe Ishba ọsẹ Ẹshtẹmoa. 18 (Aye riẹ nọ ọ rrọ ohwo Ju o yẹ Jirẹd ọsẹ Gidọ, Hiba ọsẹ Sokọ, gbe Jekutiẹl ọsẹ Zanoa.) Enana họ emezae Bitaya, ọmọtẹ Fẹro nọ Mirẹd ọ rehọ.

19 Emezae aye Hodaya, oniọvo-ọmọtẹ Neham họ esẹ Kaela ohwo uyẹ Gam gbe Ẹshtẹmoa ohwo Meakat. 20 Emezae Shaemọn họ Amnọn, Rina, Bẹn-henan, gbe Taelọn. Yọ emezae Ishai họ Zohẹt avọ Bẹn-zohẹt.

21 Emezae Shila+ ọmọzae Juda họ Ẹr ọsẹ Lika, Leyada ọsẹ Marishah, gbe inuwou ahwo nọ a re ru ehọ iwowoma, enọ e rrọ ahwo uwou Ashbiya, 22 gbe Jokim, ezae Kọziba, Joash, gbe Seraf, enọ i zihe ruọ ezae rọkẹ eyae ahwo Moab, gbe Jashubi-lihẹm. Iku nana yọ iku anwae nọ a kere fihotọ.* 23 Ahwo nana yọ emebẹ nọ e jẹ rria Nẹteyẹm gbe Gẹdira. A jẹ rria etẹe, yọ a je ru iruo kẹ ovie na.

24 Emezae Simiọn+ họ Nemuẹl, Jemin, Jerib, Zira, gbe Sheọl.+ 25 Shalọm yọ ọmọzae riẹ, Mibsam ọmọzae riẹ, gbe Mishma ọmọzae riẹ. 26 Emezae Mishma họ Hamuẹl ọmọzae riẹ, Zakọ ọmọzae riẹ, Shimia ọmọzae riẹ. 27 Shimia o yẹ emezae ikpegbezeza gbe emetẹ ezeza; rekọ inievo-emezae riẹ a yẹ emezae bu hu, yọ unuwou rai ọvuọvo u wo emezae bu te unu nọ ezae Juda i wo ho.+ 28 A jẹ rria Biẹ-shiba,+ Moleda,+ Heza-shual,+ 29 Bilha, Izẹm,+ Tolad, 30 Bẹthuẹl,+ Họma,+ Ziklag,+ 31 Bẹt-makabọt, Heza-susim,+ Bẹt-birae, gbe Sheareyẹm. Enana e jọ ikpewho rai rite okenọ Devidi o ro muhọ esuo.

32 Eria nọ a jẹ rria họ Itam, Eyin, Rimọn, Tokẹn, gbe Ashan,+ ikpewho isoi, 33 je kugbe iwhre rai nọ e wariẹ ikpewho nana họ rite ugbo obọ Bale. Enana họ uyẹ rai nọ a kere fihotọ gbe eria nọ a rria. 34 Mẹshobab, Jamlẹk, Josha ọmọzae Amazaya, 35 Joẹl, Jehu ọmọzae Joshibaya ọmọzae Seraya ọmọzae Asiẹl, 36 gbe Ẹlio-inae, Jekoba, Jeshohaya, Asaya, Adiẹl, Jesimiẹl, Benaya, 37 gbe Zaeza ọmọzae Shaefae ọmọzae Alọn ọmọzae Jedeya ọmọzae Shimrae ọmọzae Shimaya; 38 ahwo nana nọ a fodẹ edẹ rai na họ enọ e jọ isu evaọ inuwou rai, yọ unu ahwo uwou esẹ-esẹ rai i je vihọ. 39 A nya kpobọ unu nọ a rẹ rọ ruọ Gidọ, evaọ ofẹ ovatha-ọre ukiekpotọ na, re a gwọlọ ẹbe kẹ ithuru erao rai. 40 A tẹ te ruẹ emamọ ẹbe ọrọrọ, yọ otọ na o jọ lelele, dhedhẹ, jẹ jọ ababọ ukpokpoma. Ahwo uyẹ Ham+ a jẹ rria etẹe vẹre. 41 Ahwo nana nọ a fodẹ edẹ rai na a nyaze evaọ oke Hẹzikaya+ ovie Juda, a tẹ raha iwou-udhu ahwo uyẹ Ham gbe ahwo Mẹyunẹm nọ a jẹ rria etẹe no. A raha e rai muotọ rite ẹdẹ inẹnẹ na; a te mu oria rai họ ẹria keme ẹbe ọ jọ etẹe kẹ ithuru erao rai.

42 Ahwo orua Simiọn na jọ nọ a bu te ezae egba isoi (500), avọ emezae Ishai nọ a re se Pẹlataya, Nearaya, Refeya, gbe Uziẹl nọ i je su ai, a kpobọ Ugbehru Siya.+ 43 A te kpe ahwo Amalẹk+ nọ a kiọkọ nọ e dhẹ vabọ kpohọ etẹe, yọ a be rria etẹe rite ẹdẹ inẹnẹ na.

5 Enana họ emezae Rubẹn,+ ọmọ ọsosuọ Izrẹl. Ọye họ ọmọ ọsosuọ, rekọ fikinọ o zue ehwa ọsẹ riẹ,+ a tẹ rehọ ọkwa ọmọ ọsosuọ nọ ọ rrọ na kẹ emezae Josẹf+ ọmọzae Izrẹl, fikiere a gbe kere iei fihotọ wọhọ ọmọ ọsosuọ evaọ okerefihotọ othotha uyẹ rai hi. 2 Dede nọ Juda+ ọ rro vi inievo riẹ, yọ oma riẹ ọnọ ọ te jọ osu+ o no ze, Josẹf họ ọnọ o wo ọkwa ọmọ ọsosuọ na. 3 Emezae Rubẹn ọmọ ọsosuọ Izrẹl họ Henọk, Palu, Hẹzrọn, gbe Kamae.+ 4 Emezae Joẹl họ Shimaya ọmọzae riẹ, Gọg ọmọzae riẹ, Shimia ọmọzae riẹ, 5 Maeka ọmọzae riẹ, Rieya ọmọzae riẹ, Bale ọmọzae riẹ, 6 gbe Biẹrah ọmọzae riẹ, ọnọ Tilgat-pilniza+ ovie Asiria o mu kpohọ igbo; ọ jọ osu ahwo Rubẹn. 7 Inievo riẹ nọ a kere fihotọ evaọ okerefihotọ othotha uyẹ rai lele ọvuọ uviuwou rai họ Jeayẹl, ọnọ o wuzou, Zẹkaraya, 8 gbe Bila ọmọzae Ezaz ọmọzae Shima ọmọzae Joẹl, ọnọ ahwo uwou riẹ a jẹ rria Aroa+ je rite ugbo obọ Nibo gbe Bale-miọn.+ 9 Oria nọ a jẹ rria evaọ ofẹ ovatha-ọre u te ugbo obọ emuhọ udhude na evaọ obọ Ethẹ Yufretis,+ keme erao rai i vihọ gaga no evaọ ẹkwotọ Giliad.+ 10 Evaọ edẹ Sọl, a lele ahwo Hega fi ẹmo, a te fi ai kparobọ, fikiere a te mu iwou-udhu rai họ ẹria evaọ ẹkwotọ nọ ọ rrọ ofẹ ovatha-ọre Giliad soso.

11 Whaọ ahwo uyẹ Gad a jẹ rria kẹle ae evaọ ẹkwotọ Beshan rite ugbo obọ Saleka.+ 12 Joẹl họ ọnọ o wuzou, Shefam ọ tẹ rọ kẹle iẹe, yọ Jenae avọ Shefat a jọ isu re evaọ Beshan. 13 Inievo rai evaọ abọ inuwou abọ ọsẹ rai họ Maekẹl, Mẹshulam, Shiba, Jorai, Jekan, Zaeya, gbe Iba, aikpobi imahrẹ. 14 Enana họ emezae Abẹhel ọmọzae Hurae ọmọzae Jeroa ọmọzae Giliad ọmọzae Maekẹl ọmọzae Jeshishae ọmọzae Jadọ ọmọzae Buz. 15 Ehae ọmọzae Abdiẹl ọmọzae Gunae họ ọnọ o wuzou unuwou abọ ọsẹ rai. 16 A jẹ rria Giliad+ evaọ Beshan+ gbe ewho esese riẹ,* jegbe eria kpobi nọ ẹbe ọ jọ evaọ Sharọn. 17 A kere edẹ rai kpobi fihotọ evaọ okerefihotọ othotha uyẹ evaọ edẹ Jotam+ ovie Juda gbe evaọ edẹ Jeroboam*+ ovie Izrẹl.

18 Ahwo orua Rubẹn, ahwo orua Gad, gbe abọvo orua Manasẹ a wo egbaẹmo egaga idu udhuvẹ-gbene gbe egba ihrẹ gbe udhosa (44,760) evaọ ogbaẹmo rai, enọ e rẹ wha ejese gbe egbọdọ, avọ ize nọ a rọ thoma,* yọ a wuhrẹ i rai kẹ ẹmo. 19 A lele ahwo Hega,+ Jitọ, Nefish,+ gbe Nodab fi ẹmo. 20 Evaọ okenọ a je fi ẹmo na, Ọghẹnẹ o fiobọhọ kẹ ae, ọ tẹ rehọ ahwo Hega avọ ahwo kpobi nọ a jọ kugbe ae họ obọ rai, keme a bo se Ọghẹnẹ re o fiobọhọ kẹ ae evaọ ẹmo na, yọ o ru epanọ a yare keme a fievahọ iẹe.+ 21 A mu erao rai rehọ—ekamẹle idu udhuvẹ-gbikpe (50,000), igodẹ idu egba ivẹ gbe udhuvẹ-gbikpe (250,000), gbe eketekete idu ivẹ (2,000), jegbe ahwo* idu ẹgba ọvo (100,000). 22 Ahwo nọ a kpe a jọ buobu, keme Ọghẹnẹ uzẹme na họ ọnọ o fi ẹmo na.+ A tẹ jẹ rria oria rai na rite oke nọ a ro kpohọ igbo na.+

23 Ahwo abọvo orua Manasẹ+ a jẹ rria ẹkwotọ na no Beshan rite Bale-hamọn avọ Sina gbe Ugbehru Hẹmọn.+ A jọ buobu. 24 Ahwo nana họ enọ i wuzou inuwou abọ ọsẹ rai: Ifẹ, Ishai, Iliọ, Azriẹl, Jerimaya, Họdavaya, gbe Jadiẹl; a jọ egbaẹmo egaga, ezae nọ a riẹ odẹ, a te je wuzou inuwou abọ ọsẹ rai. 25 Rekọ a raha uzi Ọghẹnẹ esẹ-esẹ rai, a tẹ jẹ rehọ omarai kẹ eghẹnẹ ahwo ẹkwotọ na wọhọ igberẹ,+ enọ Ọghẹnẹ ọ raha kufiẹ kẹ ae. 26 Fikiere, Ọghẹnẹ Izrẹl o te duobọte udu* Pul ovie Asiria+ (koyehọ, Tilgat-pilniza+ ovie Asiria), o te mu ahwo orua Rubẹn, ahwo orua Gad, gbe abọvo orua Manasẹ na kpohọ igbo, ọ tẹ rehọ ae ziọ Hela, Hebọ, Hera, gbe ethẹ Gozan,+ oria nọ a rrọ rite ẹdẹ inẹnẹ na.

6 Emezae Livae+ họ Gẹshọn, Kohat,+ gbe Mẹrarae.+ 2 Emezae Kohat họ Amram, Izha,+ Hebrọn, gbe Uziẹl.+ 3 Emọ* Amram+ họ Erọn,+ Mosis,+ jegbe Miriam.+ Emezae Erọn họ Nedab, Abaihu,+ Ẹlieza,+ gbe Itama.+ 4 Ẹlieza họ ọsẹ Finihas;+ Finihas họ ọsẹ Abishua. 5 Abishua họ ọsẹ Bukai; Bukai họ ọsẹ Uzzai. 6 Uzzai họ ọsẹ Zerahaya; Zerahaya họ ọsẹ Mereyọt. 7 Mereyọt họ ọsẹ Amaraya; Amaraya họ ọsẹ Ahaetọb.+ 8 Ahaetọb họ ọsẹ Zedọk;+ Zedọk họ ọsẹ Ahimehaz.+ 9 Ahimehaz họ ọsẹ Azaraya; Azaraya họ ọsẹ Johenan. 10 Johenan họ ọsẹ Azaraya. Ọ jọ ozerẹ evaọ uwou nọ Solomọn ọ bọ evaọ Jerusalẹm.

11 Azaraya họ ọsẹ Amaraya; Amaraya họ ọsẹ Ahaetọb. 12 Ahaetọb họ ọsẹ Zedọk;+ Zedọk họ ọsẹ Shalọm. 13 Shalọm họ ọsẹ Hilkaya;+ Hilkaya họ ọsẹ Azaraya. 14 Azaraya họ ọsẹ Seraya;+ Seraya họ ọsẹ Jehozadak.+ 15 Jehozadak o kpohọ igbo okenọ Jihova ọ rọ ẹkwoma Nebukadneza mu Juda avọ Jerusalẹm kpohọ igbo.

16 Emezae Livae họ Gẹshọm,* Kohat, gbe Mẹrarae. 17 Edẹ emezae Gẹshọm ena: Libnae avọ Shimia.+ 18 Emezae Kohat họ Amram, Izha, Hebrọn, gbe Uziẹl.+ 19 Emezae Mẹrarae họ Mahlae avọ Mushae.

Enana họ inuwou ahwo Livae lele esẹ-esẹ rai:+ 20 Evaọ unuwou Gẹshọm,+ Libnae ọmọzae riẹ, Jehat ọmọzae riẹ, Zimma ọmọzae riẹ, 21 Joah ọmọzae riẹ, Idọ ọmọzae riẹ, Zira ọmọzae riẹ, Jiatarai ọmọzae riẹ. 22 Emezae* Kohat họ Aminadab ọmọzae riẹ, Kora+ ọmọzae riẹ, Assiọ ọmọzae riẹ, 23 Ẹlkena ọmọzae riẹ, Ebayasaf+ ọmọzae riẹ, Assiọ ọmọzae riẹ, 24 Tehat ọmọzae riẹ, Yuraẹl ọmọzae riẹ, Uzaya ọmọzae riẹ, gbe Sheọl ọmọzae riẹ. 25 Emezae Ẹlkena họ Amesae avọ Ahaemọt. 26 Rọ kpahe Ẹlkena, emezae Ẹlkena họ Zofae ọmọzae riẹ, Nehat ọmọzae riẹ, 27 Ẹlayab ọmọzae riẹ, Jeroham ọmọzae riẹ, Ẹlkena+ ọmọzae riẹ. 28 Emezae Samuẹle+ họ Joẹl ọmọ ọsosuọ, Abaejah kọ ọmọ avọ ivẹ.+ 29 Emezae* Mẹrarae họ Mahlae,+ Libnae ọmọzae riẹ, Shimia ọmọzae riẹ, Uzah ọmọzae riẹ, 30 Shimea ọmọzae riẹ, Hẹgaya ọmọzae riẹ, gbe Asaya ọmọzae riẹ.

31 Enana họ ahwo nọ Devidi o ro mu re a kpọ ile-esuọ evaọ uwou Jihova okenọ a wọ etehe ọvọ na fihọ etẹe no.+ 32 Ae a wo iruo ile-esuọ evaọ uwou-udhu na, koyehọ, uwou-udhu omakugbe na rite okenọ Solomọn ọ rọ bọ uwou Jihova evaọ Jerusalẹm,+ yọ a je ru iruo rai wọhọ epanọ a dhesẹ kẹ ae.+ 33 Ezae nana họ enọ i je lele emezae rai ru iruo: Evaọ ahwo Kohat, Himan+ ọso-ile na, ọmọzae Joẹl+ ọmọzae Samuẹle 34 ọmọzae Ẹlkena+ ọmọzae Jeroham ọmọzae Iliọ ọmọzae Toa 35 ọmọzae Zọf ọmọzae Ẹlkena ọmọzae Mehat ọmọzae Amesae 36 ọmọzae Ẹlkena ọmọzae Joẹl ọmọzae Azaraya ọmọzae Zẹfanaya 37 ọmọzae Tehat ọmọzae Assiọ ọmọzae Ebayasaf ọmọzae Kora 38 ọmọzae Izha ọmọzae Kohat ọmọzae Livae ọmọzae Izrẹl.

39 Esaf+ oniọvo-ọmọzae riẹ o je dikihẹ obọze riẹ; Esaf yọ ọmọzae Bẹrekaya ọmọzae Shimea 40 ọmọzae Maekẹl ọmọzae Baasiya ọmọzae Malkaejah 41 ọmọzae Ẹtnae ọmọzae Zira ọmọzae Adaya 42 ọmọzae Itan ọmọzae Zimma ọmọzae Shimia 43 ọmọzae Jehat ọmọzae Gẹshọm ọmọzae Livae.

44 Ahwo uyẹ Mẹrarae+ inievo-emezae rai a je dikihẹ ẹkpẹlobọ; Itan+ ọ jariẹ, ọnọ ọ rrọ ọmọzae Kishae ọmọzae Abdae ọmọzae Malọk 45 ọmọzae Hashabaya ọmọzae Amazaya ọmọzae Hilkaya 46 ọmọzae Amzae ọmọzae Benae ọmọzae Shima 47 ọmọzae Mahlae ọmọzae Mushae ọmọzae Mẹrarae ọmọzae Livae.

48 Inievo rai nọ e rrọ ahwo Livae họ enọ a ro mu* re a ru iruo kpobi nọ e rrọ uwou-udhu na, koyehọ uwou Ọghẹnẹ uzẹme na.+ 49 Erọn avọ emezae riẹ+ họ enọ i je ru idheidhe na kuye iwiri evaọ ehru agbada-idhe idhe emahọ na,+ yọ a jẹ mahe insẹnse evaọ ehru agbada-idhe insẹnse na,+ a tẹ jẹ rọ ere ru iruo nọ i wobọ kugbe eware nọ e mae rrọ ọrẹri, re a ru omavoro kẹ Izrẹl,+ wọhọ epaọ uzi kpobi nọ Mosis odibo Ọghẹnẹ uzẹme na o jie. 50 Enana họ ahwo uyẹ Erọn:+ Ẹlieza+ ọmọzae riẹ, Finihas ọmọzae riẹ, Abishua ọmọzae riẹ, 51 Bukai ọmọzae riẹ, Uzzai ọmọzae riẹ, Zerahaya ọmọzae riẹ, 52 Mereyọt ọmọzae riẹ, Amaraya ọmọzae riẹ, Ahaetọb+ ọmọzae riẹ, 53 Zedọk+ ọmọzae riẹ, gbe Ahimehaz ọmọzae riẹ.

54 Enana họ eria nọ a jẹ rria nọ a fa ivuẹ rai* fihọ evaọ ẹkwotọ rai: rọkẹ ahwo uyẹ Erọn nọ a rrọ unuwou ahwo Kohat, wọhọ epanọ ẹta ọsosuọ o kie kẹ ae, 55 a kẹ rai Hebrọn+ evaọ ẹkwotọ Juda, avọ etọ nọ erao e rẹ jọ re ẹbe nọ e wariẹ e riẹ họ. 56 Rekọ a tẹ rọ itẹwọ okpẹwho na avọ iwhre riẹ kẹ Kelẹb+ ọmọzae Jefunẹ. 57 A tẹ rehọ ikpewho* adhẹzọ+ kẹ ahwo uyẹ Erọn, koyehọ Hebrọn,+ gbe Libna+ avọ etọ riẹ nọ erao e rẹ jọ re ẹbe, Jata,+ Ẹshtẹmoa avọ etọ riẹ nọ erao e rẹ jọ re ẹbe,+ 58 Haelen avọ etọ riẹ nọ erao e rẹ jọ re ẹbe, Diba+ avọ etọ riẹ nọ erao e rẹ jọ re ẹbe, 59 Ashan+ avọ etọ riẹ nọ erao e rẹ jọ re ẹbe, gbe Bẹt-shimẹsh+ avọ etọ riẹ nọ erao e rẹ jọ re ẹbe; 60 a tẹ jẹ jọ orua Bẹnjamin kẹ ae Giba+ avọ etọ riẹ nọ erao e rẹ jọ re ẹbe, Alemẹt avọ etọ riẹ nọ erao e rẹ jọ re ẹbe, gbe Anatọt+ avọ etọ riẹ nọ erao e rẹ jọ re ẹbe. Ikpewho ikpegbesa họ ikpewho unuwou rai kpobi.+

61 A tẹ jọ inuwou erua efa gbe abọvo orua Manasẹ+ ghale* ikpewho ikpe kẹ ahwo Kohat nọ a kiọkọ.

62 A tẹ jọ orua Isaka, orua Asha, orua Naftalae, gbe orua Manasẹ evaọ Beshan+ kẹ iviuwou nọ e rrọ unuwou Gẹshọm ikpewho ikpegbesa.

63 A tẹ jọ orua Rubẹn, orua Gad, gbe orua Zẹbulọn+ kẹ iviuwou nọ e rrọ unuwou Mẹrarae ikpewho ikpegbivẹ.

64 Ere ahwo Izrẹl a rọ kẹ ahwo Livae ikpewho nana avọ etọ rai nọ erao e rẹ jọ re ẹbe.+ 65 Ofariẹ, a rehọ ẹta-ọma ghale ikpewho nana evaọ orua Juda, orua Simiọn, gbe orua Bẹnjamin, enọ a rehọ edẹ rai se.

66 Inuwou ahwo Kohat na jọ a jọ orua Ifremu wo ikpewho nọ e jọ ẹkwotọ rai.+ 67 A kẹ rai ikpewho* adhẹzọ, Shẹkẹm+ avọ etọ riẹ nọ erao e rẹ jọ re ẹbe evaọ ubrotọ igbehru Ifremu, Gizẹ+ avọ etọ riẹ nọ erao e rẹ jọ re ẹbe, 68 Jọkmiam avọ etọ riẹ nọ erao e rẹ jọ re ẹbe, Bẹt-horọn+ avọ etọ riẹ nọ erao e rẹ jọ re ẹbe, 69 Aijalọn+ avọ etọ riẹ nọ erao e rẹ jọ re ẹbe, gbe Gat-rimọn+ avọ etọ riẹ nọ erao e rẹ jọ re ẹbe; 70 a tẹ jọ abọvo orua Manasẹ kẹ iviuwou nọ i kiọkọ evaọ unuwou Kohat Ena avọ etọ riẹ nọ erao e rẹ jọ re ẹbe gbe Biliam avọ etọ riẹ nọ erao e rẹ jọ re ẹbe.

71 A jọ unuwou abọvo orua Manasẹ kẹ ahwo Gẹshọm Golan+ nọ o rrọ Beshan avọ etọ riẹ nọ erao e rẹ jọ re ẹbe, gbe Ashtarọt avọ etọ riẹ nọ erao e rẹ jọ re ẹbe;+ 72 a tẹ jọ orua Isaka kẹ ae Kidẹsh avọ etọ riẹ nọ erao e rẹ jọ re ẹbe, Daberat+ avọ etọ riẹ nọ erao e rẹ jọ re ẹbe,+ 73 Remọt avọ etọ riẹ nọ erao e rẹ jọ re ẹbe, gbe Enẹm avọ etọ riẹ nọ erao e rẹ jọ re ẹbe; 74 a tẹ jọ orua Asha kẹ ae Meshal avọ etọ riẹ nọ erao e rẹ jọ re ẹbe, Abdọn avọ etọ riẹ nọ erao e rẹ jọ re ẹbe,+ 75 Hukọk avọ etọ riẹ nọ erao e rẹ jọ re ẹbe, gbe Rihọb+ avọ etọ riẹ nọ erao e rẹ jọ re ẹbe; 76 a tẹ jẹ jọ orua Naftalae kẹ ae Kidẹsh+ nọ o rrọ Galili+ avọ etọ riẹ nọ erao e rẹ jọ re ẹbe, Hamọn avọ etọ riẹ nọ erao e rẹ jọ re ẹbe, gbe Kiriateyẹm avọ etọ riẹ nọ erao e rẹ jọ re ẹbe.

77 A jọ orua Zẹbulọn+ kẹ ahwo Mẹrarae nọ a kiọkọ Rimono avọ etọ riẹ nọ erao e rẹ jọ re ẹbe, Tebọ avọ etọ riẹ nọ erao e rẹ jọ re ẹbe; 78 yọ a jọ ẹkwotọ Jọdan evaọ Jẹriko nọ o rrọ ofẹ ovatha-ọre Jọdan evaọ orua Rubẹn kẹ ae Biza nọ o rrọ udhude na avọ etọ riẹ nọ erao e rẹ jọ re ẹbe, Jehaz+ avọ etọ riẹ nọ erao e rẹ jọ re ẹbe, 79 Kẹdemọt+ avọ etọ riẹ nọ erao e rẹ jọ re ẹbe, gbe Mẹfayat avọ etọ riẹ nọ erao e rẹ jọ re ẹbe; 80 a tẹ jọ orua Gad kẹ ae Remọt nọ o rrọ Giliad avọ etọ riẹ nọ erao e rẹ jọ re ẹbe, Mehaneyẹm+ avọ etọ riẹ nọ erao e rẹ jọ re ẹbe, 81 Hẹshbọn+ avọ etọ riẹ nọ erao e rẹ jọ re ẹbe, gbe Jeza+ avọ etọ riẹ nọ erao e rẹ jọ re ẹbe.

7 Whaọ emezae Isaka họ Tola, Pua, Jeshọb, gbe Shimrọn+—aimane. 2 Yọ emezae Tola họ Uzzai, Refeya, Jiriẹl, Jahmae, Ibsam, gbe Shimuẹl, enọ i wuzou inuwou abọ ọsẹ rai. Egbaẹmo egaga i no unuwou Tola ze, enọ i bu te idu udhegbivẹ gbe egba ezeza (22,600) evaọ oke Devidi. 3 Ahwo uyẹ* Uzzai họ Izrahaya gbe emezae Izrahaya: Maekẹl, Obedaya, Joẹl, gbe Ishaya—aimasoi na kpobi iletu.* 4 Yọ a wo egbaẹmo idu ọgbagbezeza (36,000) evaọ ogbaẹmo rai nọ e rẹ sai kpohọ ẹmo nọ e jọ kugbe ae, ahwo uyẹ rai nọ a no ọvuọ inuwou abọ ọsẹ rai ze, keme a wo eyae gbe emezae buobu. 5 Inievo-emezae rai evaọ inuwou Isaka kpobi nọ e jọ egbaẹmo egaga, a bu te idu udhone-gbihrẹ (87,000) wọhọ epanọ a kere fihọ okerefihotọ othotha uyẹ na.+

6 Emezae Bẹnjamin+ họ Bila,+ Bika,+ gbe Jedayahẹl+—aimasa. 7 Emezae Bila họ Ẹzbọn, Uzzai, Uziẹl, Jerimọt, gbe Arae,—aimasoi—enọ i wuzou inuwou abọ ọsẹ rai, egbaẹmo egaga, yọ ahwo idu udhegbivẹ gbe ọgbagbene (22,034) a kere fihotọ evaọ okerefihotọ othotha uyẹ rai.+ 8 Emezae Bika họ Zemaera, Joash, Ẹli-iza, Ẹlio-inae, Omri, Jeremọt, Abaejah, Anatọt, gbe Alemẹt—enana kpobi yọ emezae Bika. 9 Unu ahwo uyẹ rai nọ a jọ egbaẹmo egaga nọ i wuzou inuwou abọ ọsẹ rai nọ a kere fihotọ evaọ okerefihotọ othotha uyẹ rai o jọ idu udhe gbe egba ivẹ (20,200). 10 Emezae Jedayahẹl+ họ Bilhan gbe emezae Bilhan: Jiẹsh, Bẹnjamin, Ehud, Kẹneana, Zitan, Tashish, gbe Ahishaha. 11 Enana kpobi yọ emezae Jedayahẹl, enọ i wuzou inuwou esẹ-esẹ rai, egbaẹmo egaga idu ikpegbihrẹ gbe egba ivẹ (17,200) nọ e ruẹrẹ oma kpahe re a kuomagbe ogbaẹmo na kpohọ ẹmo.

12 Ahwo uyẹ Shọpim gbe ahwo uyẹ Họpim yọ emezae Iyẹr;+ ahwo Hushim yọ emezae Eha.

13 Emezae Naftalae+ họ Jaziẹl, Gunae, Jiza, gbe Shalọm—ahwo uyẹ* Bilha.+

14 Emezae Manasẹ+ họ: Azriẹl, ọnọ ọse riẹ nọ ọ rrọ ohwo Siria o yẹ. (Ọse na o yẹ Meka+ ọsẹ Giliad. 15 Meka o wo aye kẹ Họpim, o te je wo kẹ Shọpim, yọ odẹ oniọvo-ọmọtẹ riẹ họ Meaka.) Zẹlofẹhad+ họ odẹ ọrọ avọ ivẹ, rekọ emetẹ Zẹlofẹhad o yẹ.+ 16 Meaka, aye Meka o yẹ ọmọzae o te sei Pirẹsh; odẹ oniọvo-ọmọzae riẹ họ Shirẹsh; yọ emezae riẹ họ Yulam avọ Rikẹm. 17 Ọmọzae* Yulam họ Bidan. Enana họ emezae Giliad ọmọzae Meka ọmọzae Manasẹ. 18 Oniọvo-ọmọtẹ riẹ họ Hamolẹkẹt. Ọye o yẹ Ishhọd, Abi-iza, gbe Mala. 19 Emezae Shimaeda họ Ahayan, Shẹkẹm, Likhae, gbe Anayam.

20 Emezae Ifremu+ họ Shutela,+ Birẹd ọmọzae riẹ, Tehat ọmọzae riẹ, Ẹlieda ọmọzae riẹ, Tehat ọmọzae riẹ, 21 Zebad ọmọzae riẹ, Shutela ọmọzae riẹ, Izẹ, gbe Iliad. Ezae Gat+ nọ a yẹ evaọ ẹkwotọ na a kpe rai fikinọ a nyai mu erao rai rehọ. 22 Ifremu ọsẹ rai o te je weri evaọ edẹ buobu, inievo riẹ e tẹ jẹ nyaze te sasa iẹe oma. 23 Oyena o vrẹ no, o te lele aye riẹ wezẹ, o te dihọ, o te yẹ ọmọzae. Rekọ o te sei Bẹraya* keme okenọ okpẹtu ọ rọ jọ uwou riẹ aye na o ro yẹ. 24 Ọmọtẹ riẹ họ Shira, ọnọ ọ bọ Bẹt-horọn Obotọ+ gbe ọrọ Obehru,+ jegbe Ọzẹn-shira. 25 Yọ o wo Rifa ọmọzae riẹ, Rishẹf, Tila ọmọzae riẹ, Tehan ọmọzae riẹ, 26 Ledan ọmọzae riẹ, Amaehọd ọmọzae riẹ, Ẹlishama ọmọzae riẹ, 27 Nọn ọmọzae riẹ, gbe Joshua*+ ọmọzae riẹ.

28 Ewho ukuoriọ rai gbe iwhre rai họ Bẹtẹl+ avọ ewho esese riẹ,* yọ a wo Nearan evaọ ofẹ ovatha-ọre, a tẹ jọ ofẹ ukiediwo-ọre wo Gizẹ avọ ewho esese riẹ, gbe Shẹkẹm avọ ewho esese riẹ, rite ugbo obọ Aya* avọ ewho esese riẹ; 29 yọ eria nọ e kẹle ahwo uyẹ Manasẹ họ Bẹt-shian+ avọ ewho esese riẹ, Teanak+ avọ ewho esese riẹ, Mẹgido+ avọ ewho esese riẹ, gbe Dọr+ avọ ewho esese riẹ. Eria nana ahwo uyẹ Josẹf ọmọzae Izrẹl a jẹ rria.

30 Emezae Asha họ Imnah, Ishva, Ishvae, gbe Bẹraya,+ yọ oniọvo-ọmọtẹ rai họ Sira.+ 31 Emezae Bẹraya họ Hiba avọ Malkiẹl, ọsẹ Bezeat. 32 Hiba họ ọsẹ Jaflẹt, Shoma, gbe Hotam, jegbe Shua oniọvo-ọmọtẹ rai. 33 Emezae Jaflẹt họ Pesak, Bimhal, gbe Ashvat. Enana họ emezae Jaflẹt. 34 Emezae Shima* họ Ehae, Roga, Jehuba, gbe Eram. 35 Emezae Hilẹm* oniọvo-ọmọzae riẹ họ Zofah, Imna, Shilẹsh, gbe Emal. 36 Emezae Zofah họ Suwa, Hanefa, Shual, Birae, Imra, 37 Biza, Họd, Shama, Shilsha, Itran, gbe Biera. 38 Emezae Jita họ Jefunẹ, Pispa, gbe Era. 39 Emezae Ula họ Erah, Haniẹl, gbe Rizaya. 40 Enana kpobi yọ emezae Asha, enọ i wuzou inuwou abọ ọsẹ rai, enọ a salọ, egbaẹmo egaga, iletu nọ i wuzou; yọ unu rai nọ a kere fihotọ evaọ okerefihotọ othotha uyẹ na+ o jọ ezae idu udhegbezeza (26,000)+ nọ e jọ egbaẹmo nọ e rẹ sai kpohọ ẹmo.

8 Bẹnjamin+ họ ọsẹ Bila+ ọmọ ọsosuọ riẹ, Ashbẹl+ ọrọ avọ ivẹ, Ahara ọrọ avọ esa, 2 Noha ọrọ avọ ene, gbe Refa ọrọ avọ isoi. 3 Emezae Bila họ Adda, Gira,+ Abaehọd, 4 Abishua, Neaman, Ahoa, 5 Gira, Shifufam, gbe Huram. 6 Enana họ emezae Ehud, enọ i wuzou inuwou abọ ọsẹ ahwo nọ a jẹ rria Giba,+ enọ a mu kpohọ igbo evaọ obọ Manahat: 7 Neaman, Ahaejah, gbe Gira—ọye họ ọnọ o su rai okenọ a je kpohọ igbo, yọ ọye họ ọsẹ Uza gbe Ahaehọd. 8 Shehareyẹm o yẹ emọ evaọ ẹkwotọ* Moab okenọ o le ai no. Hushim avọ Beara họ eyae riẹ.* 9 Hodẹsh aye riẹ o yẹ Jobab, Zibia, Misha, Malkam, 10 Jiẹz, Sekaya, gbe Mẹmah kẹe. Enana họ emezae riẹ, enọ i wuzou inuwou abọ ọsẹ rai.

11 Hushim o yẹ Abaetọb avọ Ẹlpel kẹe. 12 Emezae Ẹlpel họ Iba, Maesham, Shimẹd (ọnọ ọ bọ Ono+ avọ Lọd+ gbe ewho esese riẹ),* 13 Bẹraya, gbe Shima. Enana họ enọ i wuzou inuwou abọ ọsẹ ahwo nọ a jẹ rria Aijalọn.+ Ahwo nana họ enọ i le ahwo nọ a jẹ rria Gat no. 14 Yọ ahwo nana a jariẹ, Ahaeyo, Sheshak, Jeremọt, 15 Zebadaya, Erad, Ida, 16 Maekẹl, Ishpa, Joha, emezae Bẹraya; 17 gbe Zebadaya, Mẹshulam, Hizkae, Hiba, 18 Ishmerai, Izlaya, Jobab, emezae Ẹlpel; 19 gbe Jekim, Zikrae, Zabdae, 20 Ẹli-inai, Zileta, Iliọ, 21 Adaya, Bẹreya, Shimrat, emezae Shimia; 22 gbe Ishpan, Iba, Iliọ, 23 Abdọn, Zikrae, Henan, 24 Hananaya, Ilam, Antotaejah, 25 Ifdiya, Pẹnuẹl, emezae Sheshak; 26 gbe Shamsherai, Shiharaya, Atalaya, 27 Jerẹshaya, Elaejah, Zikrae, emezae Jeroham. 28 Enana họ ahwo uyẹ rai nọ a wuzou inuwou abọ ọsẹ rai. Ezae nana nọ i wuzou na e jẹ rria Jerusalẹm.

29 Jeayẹl ọsẹ Gibiọn ọ jẹ rria Gibiọn.+ Meaka họ odẹ aye riẹ.+ 30 Ọmọzae ọsosuọ riẹ họ Abdọn, enọ a yẹ tu ei họ Zọr, Kish, Bale, Nedab, 31 Gidọ, Ahaeyo, gbe Zikẹ. 32 Miklọt họ ọsẹ Shimiah. Yọ aikpobi a jẹ rria kẹle inievo rai evaọ Jerusalẹm, je kugbe inievo rai edekọ.

33 Nẹr+ họ ọsẹ Kish; Kish họ ọsẹ Sọl;+ Sọl họ ọsẹ Jonatan,+ Malkae-shua,+ Abinadab,+ gbe Ẹshbale.*+ 34 Ọmọzae Jonatan họ Mẹrib-bale.*+ Mẹrib-bale họ ọsẹ Maeka.+ 35 Emezae Maeka họ Paetọn, Mẹlẹk, Tariya, gbe Ehaz. 36 Ehaz họ ọsẹ Jehoada; Jehoada họ ọsẹ Alemẹt, Azmevẹt, gbe Zimrae. Zimrae họ ọsẹ Moza. 37 Moza họ ọsẹ Binia, Refah ọmọzae riẹ, Ẹliesa ọmọzae riẹ, Ezẹl ọmọzae riẹ. 38 Ezẹl o wo emezae ezeza, yọ edẹ rai họ Azraekam, Bokeru, Ishmẹl, Shiraya, Obedaya, gbe Henan. Ahwo nana kpobi yọ emezae Ezẹl. 39 Emezae Ishẹk oniọvo-ọmọzae riẹ họ Yulam ọmọ ọsosuọ riẹ, Jiẹsh ọrọ avọ ivẹ, gbe Ẹlifelẹt ọrọ avọ esa. 40 Emezae Yulam a jọ egbaẹmo egaga nọ e rẹ sae vẹ uze,* yọ a wo emezae gbe emọ-iruọmọ-emezae buobu, nọ i te udhuhrẹ-gbikpe (150). Ahwo nana kpobi yọ ahwo uyẹ Bẹnjamin.

9 A kere edẹ ahwo Izrẹl na kpobi fihotọ othotha lele uyẹ rai, yọ a kere i rai fihọ Obe Ivie Izrẹl na. A mu Juda kpohọ igbo Babilọn fiki izieraha riẹ.+ 2 Ahwo ọsosuọ nọ a zihe ze te rria ikpewho ukuoriọ rai họ ahwo Izrẹl jọ, izerẹ na, ahwo Livae, gbe idibo etẹmpol* na.+ 3 Ahwo jọ evaọ uyẹ Juda,+ Bẹnjamin, Ifremu, gbe Manasẹ+ a jẹ rria Jerusalẹm: 4 Yutai ọmọzae Amaehọd ọmọzae Omri ọmọzae Imrae ọmọzae Benae, ọnọ o no uyẹ Pirẹz+ ọmọzae Juda ze. 5 Evaọ usu emọ Shailo, Asaya nọ ọ rrọ ọmọ ọsosuọ avọ emezae riẹ. 6 Evaọ usu emezae Zira,+ Jeuẹl gbe inievo rai nọ i bu te egba ezeza gbe udhone-gbikpe (690).

7 Evaọ uyẹ Bẹnjamin, Salu ọmọzae Mẹshulam ọmọzae Họdavaya ọmọzae Hasẹnua, 8 Ibniaya ọmọzae Jeroham, Ilah ọmọzae Uzzai ọmọzae Mikrae, gbe Mẹshulam ọmọzae Shẹfataya ọmọzae Ruẹl ọmọzae Ibnaejah. 9 Yọ inievo rai nọ a gbẹ rrọ uyẹ ovona a bu te egba izii gbe udhuvẹ gbe ikpegbezeza (956). Ezae nana kpobi e jọ enọ i wuzou inuwou abọ ọsẹ rai.*

10 Enọ e jariẹ evaọ usu izerẹ na họ, Jedeya, Jehoyarib, Jekin,+ 11 Azaraya ọmọzae Hilkaya ọmọzae Mẹshulam ọmọzae Zedọk ọmọzae Mereyọt ọmọzae Ahaetọb, osu evaọ uwou* Ọghẹnẹ uzẹme na, 12 Adaya ọmọzae Jeroham ọmọzae Pashọ ọmọzae Malkaejah, Meyasae ọmọzae Adiẹl ọmọzae Jazera ọmọzae Mẹshulam ọmọzae Mẹshilẹmẹt ọmọzae Ima, 13 gbe inievo rai, enọ i wuzou inuwou abọ ọsẹ rai, a bu te ahwo odu ọvo gbe egba ihrẹ gbe udhosa (1,760), ezae egaga nọ i te ziezi, enọ e rẹ sai ru iruo uwou Ọghẹnẹ uzẹme na.

14 Enọ e jariẹ evaọ usu ahwo Livae na họ, Shimaya+ ọmọzae Hashọb ọmọzae Azraekam ọmọzae Hashabaya nọ o no uyẹ Mẹrarae ze; 15 gbe Bakbakka, Hirẹsh, Gelal, Matanaya ọmọzae Maeka ọmọzae Zikrae ọmọzae Esaf, 16 Obedaya ọmọzae Shimaya ọmọzae Gelal ọmọzae Jedutọn, gbe Bẹrekaya ọmọzae Asa ọmọzae Ẹlkena, ọnọ ọ jẹ rria iwhre ahwo Nẹtofa.+

17 Irou-unuẹthẹ*+ na họ Shalọm, Akọb, Talmọn, Ahaeman, yọ Shalọm oniọvo-ọmọzae rai họ ọnọ o wuzou, 18 rite oke yena, ọ jẹ hae jọ unuẹthẹ ovie na nọ u rri obọ ovatha-ọre.+ Ahwo nana họ enọ e jọ irou-unuẹthẹ* ivuẹ ahwo Livae. 19 Shalọm ọmọzae Kore ọmọzae Ebayasaf ọmọzae Kora, avọ inievo-emezae riẹ evaọ unuwou abọ ọsẹ riẹ, ahwo Kora na, họ enọ e jẹ rẹrote iruo odibọgba na, iriẹthẹ uwou-udhu na, yọ esẹ rai họ enọ e jẹ rẹrote evuẹ Jihova, ae a je rou* oria nọ a rẹ rọ ruọ eva na. 20 Finihas+ ọmọzae Ẹlieza+ họ ọnọ ọ jọ osu rai evaọ okenọ u kpemu; Jihova ọ jọ kugbei. 21 Zẹkaraya+ ọmọzae Mẹshelemaya họ ọnọ ọ jọ orou-unuẹthẹ* unu nọ a rẹ rọ ruọ uwou-udhu omakugbe na.

22 Ahwo kpobi nọ a salọ re a jọ irou-unuẹthẹ* evaọ aro iwou na a bu te egba ivẹ gbe ikpegbivẹ (212). Epanọ a ro kere ai fihọ okerefihotọ othotha uyẹ rai a jẹ rọ rria iwhre rai.+ Devidi avọ Samuẹle ọruẹ-ude+ na họ enọ i fi ahwo nana họ iruo nọ e gwọlọ ahwo nọ a re fievahọ na. 23 Ae omarai avọ emezae rai họ enọ e jẹ rẹrote iruo nọ a rẹ jọ rou inuethẹ uwou Jihova na,+ koyehọ uwou-udhu na. 24 Irou-unuẹthẹ* na e jọ ofẹ ene na—ofẹ ovatha-ọre, ofẹ ukiediwo-ọre, ofẹ ẹkpẹlobọ ovatha-ọre, gbe ofẹ obọze ovatha-ọre.+ 25 No oke te oke, inievo-emezae rai i re no iwhre rai ze ti lele ai ru iruo edẹ ihrẹ. 26 Irou-unuẹthẹ* ene nọ i te ziezi* e jọ iruo nọ e gwọlọ ahwo nọ a re fievahọ na. Ahwo Livae a jọ, yọ ae a jẹ rẹrote ibriwou* na gbe eria ekwakwa-aghae uwou Ọghẹnẹ uzẹme na.+ 27 A rẹ jọ ọvuọ oria riẹ evaọ aso na wariẹ uwou Ọghẹnẹ uzẹme na họ, keme ae a jẹ rẹrote iruo irou na, yọ ae a je kru usiavẹ na, a ve je rovie ethẹ uwou na kohiohiẹ kohiohiẹ.

28 Ejọ rai e jẹ rẹrote ekwakwa+ nọ a je ro ru iruo na; a re kele ai okenọ a tẹ rehọ ae ze gbe okenọ a tẹ be rehọ ae vrẹ. 29 A rọ ejọ rai mu re a rẹrote ekwakwa na, ekwakwa ọrẹri na kpobi,+ gbe emamọ eflawa iwuwuru na,+ enwaene na,+ ewhri na,+ frankinsẹns na,+ gbe ewhri balsam na.+ 30 Emezae izerẹ na jọ e rẹ gua udẹ nọ a rehọ ewhri balsam ru na. 31 Yọ Matataya ohwo Livae na, ọnọ ọ rrọ ọmọ ọsosuọ Shalọm ohwo Kora na, ọ jọ iruo nọ e gwọlọ ahwo nọ a re fievahọ na, yọ ọye ọ jẹ rẹrote iruo ikeki nọ a rẹ rehọ imidhe ekpakpala there.+ 32 Inievo-emezae rai jọ nọ e jọ ahwo Kohat a jẹ rẹrote ebrẹdi nọ a re fihọ ehru ohwohwo na,*+ a rẹ ruẹrẹ ae họ evaọ ẹdijala kpobi.+

33 Enana họ eso-ile na, enọ i wuzou inuwou abọ ọsẹ ahwo Livae evaọ ibriwou emuọriọ na, enọ a kẹ iruo efa ha; keme te aso te uvo a rẹ jọ iruo. 34 Enana họ ahwo nọ i wuzou inuwou abọ ọsẹ ahwo Livae wọhọ epanọ a kere fihọ okerefihotọ othotha uyẹ na. Ahwo nana a jẹ rria Jerusalẹm.

35 Jeayẹl ọsẹ Gibiọn ọ jẹ rria Gibiọn.+ Meaka họ odẹ aye riẹ. 36 Ọmọzae ọsosuọ riẹ họ Abdọn, enọ a yẹ tu ei họ Zọr, Kish, Bale, Nẹr, Nedab, 37 Gidọ, Ahaeyo, Zẹkaraya, gbe Miklọt. 38 Miklọt họ ọsẹ Shimiam. Yọ aikpobi a jẹ rria kẹle inievo rai evaọ Jerusalẹm, je kugbe inievo rai edekọ. 39 Nẹr+ họ ọsẹ Kish; Kish họ ọsẹ Sọl;+ Sọl họ ọsẹ Jonatan,+ Malkae-shua,+ Abinadab,+ gbe Ẹshbale. 40 Ọmọzae Jonatan họ Mẹrib-bale.+ Mẹrib-bale họ ọsẹ Maeka.+ 41 Emezae Maeka họ Paetọn, Mẹlẹk, Taria, gbe Ehaz. 42 Ehaz họ ọsẹ Jera; Jera họ ọsẹ Alemẹt, Azmevẹt, gbe Zimrae. Zimrae họ ọsẹ Moza. 43 Moza họ ọsẹ Binia gbe Refeya ọmọzae riẹ, Ẹliesa ọmọzae riẹ, Ezẹl ọmọzae riẹ. 44 Ezẹl o wo emezae ezeza, yọ odẹ rai họ Azraekam, Bokeru, Ishmẹl, Shiraya, Obedaya, gbe Henan. Enana họ emezae Ezẹl.

10 Whaọ ahwo Filistia a jẹ họre ahwo Izrẹl. Ahwo Izrẹl a tẹ dhẹ kẹ ahwo Filistia na, a te kpe ahwo Izrẹl buobu evaọ Ugbehru Gilboa.+ 2 Ahwo Filistia na a tẹ rọ tua Sọl avọ emezae riẹ kpekpekpe, ahwo Filistia a te kpe Jonatan, Abinadab, gbe Malkae-shua,+ emezae Sọl. 3 Ẹmo na o te tunyẹ Sọl, enọ e rẹ sa ose e tẹ ruẹ e riẹ, a tẹ nwae oma.+ 4 Sọl ọ tẹ ta kẹ ọnọ ọ rẹ wha ekwakwa ẹmo riẹ nọ: “Yolo ọgbọdọ ra ze re whọ rehọ iẹe duwu omẹ kpe, re ahwo nana nọ a yawo ho na a gbẹ nyaze te lahiẹ omẹ+ hẹ.”* Rekọ ọnọ ọ rẹ wha ekwakwa ẹmo riẹ na ọ jẹ rọwo ho, keme ozọ u je mu ei gaga. Fikiere Sọl ọ tẹ tọlọ ọgbọdọ na, o te kie fihọ ehru riẹ.+ 5 Nọ ọnọ ọ rẹ wha ekwakwa ẹmo Sọl ọ ruẹ nọ o whu no, ọyomariẹ o te kie fihọ ehru ọgbọdọ obọriẹ, o te whu. 6 Ere Sọl avọ emezae esa riẹ a ro whu, yọ ahwo uwou riẹ kpobi a whu kugbe.+ 7 Nọ ahwo Izrẹl kpobi nọ a jọ ukiekpotọ* na a ruẹ nọ ahwo na kpobi a dhẹ no, yọ Sọl avọ emezae riẹ a whu no, a te mu ikpewho rai họ ẹdhẹ no; ahwo Filistia a tẹ nyaze, a te mu ae họ ẹria.

8 Okiokiọ riẹ nọ ahwo Filistia na a nyaze re a kwa eware ahwo nọ a kpe na rehọ, a tẹ ruẹ Sọl avọ emezae riẹ nọ i whu fihọ ehru Ugbehru Gilboa.+ 9 A tẹ ba eware nọ e riẹe oma no, a te bru uzou riẹ jẹ tọlọ ẹgọ-ẹmo* riẹ, a tẹ vuẹ se ahwo ẹkwotọ Filistia soso inọ a vaha usi na evaọ iwou edhọ+ rai gbe evaọ udevie ahwo na. 10 Kẹsena a te fi ẹgọ-ẹmo riẹ na họ uwou* ọghẹnẹ rai, a tẹ jẹ uzou riẹ fihọ oria jọ evaọ uwou Degọn.+

11 Nọ ahwo kpobi nọ a rrọ Jebẹsh+ evaọ Giliad a yo eware kpobi nọ ahwo Filistia a ru Sọl,+ 12 egbaẹmo na kpobi e tẹ nya, a tẹ wọ ori Sọl avọ iri emezae riẹ. A tẹ wọ ae ziọ Jebẹsh, a te ki igbenwa rai fihọ otọ ure ulogbo na evaọ Jebẹsh,+ a tẹ siọ emuọriọ ba edẹ ihrẹ.

13 Ere Sọl o ro whu fikinọ ọ ghẹmeeyo kẹ Jihova, o ru lele ẹme Jihova ha,+ ọ tẹ jẹ nyae nekpẹ mi ohwo nọ o re lele izi ta ẹme+ 14 ukpenọ ọ rẹ nekpẹ mi Jihova. Fikiere O te kpei no, ọ tẹ rehọ esuo uvie na kẹ Devidi ọmọzae Jẹsi.+

11 Nọ u te oke jọ, ahwo Izrẹl kpobi a te kokohọ bru Devidi ze evaọ Hebrọn,+ a tẹ ta nọ: “Rri! Mai yọ ugbonwa gbe uwo obọra.*+ 2 Evaọ oke nọ u kpemu nọ Sọl ọ jọ ovie, whẹ họ ọnọ ọ jẹ hae wha ahwo Izrẹl kpohọ ẹmo.*+ Yọ Jihova Ọghẹnẹ ra ọ ta kẹ owhẹ nọ: ‘Whọ te rẹrote ahwo mẹ Izrẹl, whọ vẹ te jẹ jọ osu ahwo mẹ Izrẹl.’”+ 3 Fikiere ekpako Izrẹl kpobi e tẹ nyabru ovie na ze evaọ Hebrọn, Devidi ọ tẹ jọ Hebrọn re ọvọ kugbe ai evaọ aro Jihova. Kẹsena a te wholo Devidi re ọ jọ ovie Izrẹl+ wọhọ epaọ ẹme Jihova nọ ọ rọ ẹkwoma Samuẹle ta.+

4 Uwhremu na Devidi avọ Izrẹl soso a tẹ wọ ẹmo kpohọ Jerusalẹm, koyehọ Jebus,+ oria nọ ahwo Jebus+ a jẹ rria evaọ ẹkwotọ na. 5 Ahwo nọ a jẹ rria Jebus a je se Devidi ẹkoko nọ: “Whọ te sai te obonẹ vievie he!”+ Rekọ Devidi ọ tẹ vẹruọ oria omofọwẹ Zayọn,+ onọ a bi se Okpẹwho Devidi+ enẹna. 6 Devidi ọ tẹ ta nọ: “Ohwo kpobi nọ ọ te kaki kpe ahwo Jebus na o ti zihe ruọ oletu* gbe okpohwo-esuo.” Joab+ ọmọzae Zeruya ọ tẹ kake nya, o te zihe ruọ oletu. 7 Kẹsena Devidi o te mu oria omofọwẹ na họ ẹria. Oyejabọ nọ a ro sei Okpẹwho Devidi na. 8 Devidi o te mu okpẹwho na họ ẹbọ wariẹ, no umuo Ukpehru* na vrẹ kpohọ eria nọ e wariẹ e riẹ họ, Joab ọ tẹ ruẹrẹ abọ okpẹwho na nọ o kiọkọ. 9 Ere Devidi o je ro dhe ẹruẹro,+ yọ Jihova olori egbaẹmo na ọ jọ kugbei.

10 Whaọ enana họ egbaẹmo egaga Devidi, enọ e jẹ thae uke gaga evaọ uvie riẹ, kugbe ahwo Izrẹl kpobi, re a rehọ iẹe mu ovie wọhọ epaọ ẹme Jihova nọ ọ ta kpahe Izrẹl.+ 11 Edẹ egbaẹmo egaga Devidi ena: Jashobiẹm+ ọmọzae ohwo uyẹ Hakmonae, ọnọ o wuzou egbaẹmo egaga esa na.+ Evaọ ẹdẹ jọ ọ rehọ ozuẹ riẹ kpe ahwo egba esa (300).+ 12 Ọnọ ọ rọ kẹle iẹe kọ Ẹlieza+ ọmọzae Dodo, ohwo uyẹ Ahohae+ na. Ọ jọ usu egbaẹmo egaga esa na. 13 Ọ jọ kugbe Devidi evaọ Pas-damim,+ oria nọ ahwo Filistia a jọ kokohọ kẹ ẹmo. Whaọ ẹkẹ otọ jọ ọ jariẹ nọ ebali e vọ, yọ ahwo na a dhẹ no fiki ahwo Filistia na. 14 Rekọ ọ tẹ dadamu udevie udhu na, ọ tẹ whaha ae re a siọ udhu na ba ẹruọ, o te je kpe ahwo Filistia na. Ere Jihova o ro ru ai wo obokparọ ulogbo.*+

15 Ezae esa evaọ usu ezae ọgba nọ i wuzou na e tẹ nya kpobọ utho na bru Devidi evaọ obọ eghogho-utho Adọlam,+ evaọ oke yena yọ ogbaẹmo ahwo Filistia o fa evuẹ fihọ Ukiekpotọ* Rẹfeyẹm.+ 16 Oke yena yọ Devidi ọ rrọ oria nọ u siomano na, yọ utu isoja ahwo Filistia o rrọ Bẹtlẹhẹm. 17 Kẹsena Devidi o te weroma gaga nọ: “Dodokọ mẹ rẹ sae ruẹ ame ọgọdọ-ame* nọ ọ kẹle unuẹthẹ Bẹtlẹhẹm+ na da!” 18 Fikiere egbaẹmo esa na e tẹ rọ ogaga ruọ evuẹ egbaẹmo Filistia na, a tẹ jọ ọgọdọ-ame* nọ ọ kẹle unuẹthẹ Bẹtlẹhẹm na vo ame, a tẹ rehọ iẹe se Devidi; rekọ Devidi ọ rọwo dae he, o te ku ei fihọ otọ kẹ Jihova. 19 Ọ ta nọ: “Nọ oware nọ mẹ rẹ sai ru vievie he keme o rẹ were Ọghẹnẹ mẹ hẹ! Kọ mẹ rẹ da azẹ ezae nana nọ i fi uzuazọ* rai họ ọza na?+ Keme a fi uzuazọ* rai họ ọza nyai voi ze.” Fikiere ọ gbẹ rọwo da ame na ha. Enana họ eware nọ egbaẹmo egaga esa riẹ i ru.

20 Abishae+ oniọvo-ọmọzae Joab+ o te zihe ruọ ọnọ o wuzou egbaẹmo esa efa; ọ rehọ ozuẹ riẹ kpe ahwo egba esa (300), a tẹ riẹe odẹ wọhọ epanọ a riẹ egbaẹmo egaga esa ọsosuọ na.+ 21 Evaọ usu egbaẹmo esa edekọ na, ọye ọ mae viodẹ vi imava nọ i kiọkọ na, yọ ọye o wuzou rai; ghele na ọkwa riẹ o te ọrọ egbaẹmo esa ọsosuọ na ha.

22 Benaya+ ọmọzae Jehoyada ọ jọ ọzae nọ ọ gudu* nọ o ru ikpeware buobu evaọ Kabziẹl.+ O kpe emezae ivẹ Eriẹl ọrọ Moab, ọ tẹ jẹ ruọ eva ọgọdọ ame ọyaya evaọ ẹdẹ nọ ekpalekpa-ame i ro kie gaga, o te kpe okpohrokpo.+ 23 O te je kpe ohwo Ijipti jọ nọ ọ rro thesiwa, ọnọ o theri te ikiubiti isoi.*+ Dede nọ ohwo Ijipti na o kru ozuẹ họ obọ, onọ o wọhọ ọkpọ ọgbogbodo ahwo nọ a re fi ilulu họ ekpọ ro zuo ehọ,+ ọkpọ gheghe Benaya o kru họ obọ bru ei, o te fru ozuẹ na mi ei, ọ tẹ rehọ ozuẹ obọriẹ kpei.+ 24 Eware nana Benaya ọmọzae Jehoyada o ru, yọ a riẹ riẹ odẹ wọhọ egbaẹmo egaga esa na. 25 Dede nọ ọ viodẹ vi ezae ọgba na, ọkwa riẹ o te ọrọ egbaẹmo esa+ na ha. Rekọ Devidi o fi rie họ ọnọ o wuzou egbaẹmo nọ i re rou rie.*

26 Enọ e jọ egbaẹmo egaga evaọ usu egbaẹmo na họ Asahẹl+ oniọvo-ọmọzae Joab, Ẹlhenan ọmọzae Dodo ọrọ Bẹtlẹhẹm,+ 27 Shamọt ohwo Herọ na, Hilẹz ohwo Pẹlon na, 28 Aera+ ọmọzae Ikẹsh ohwo Tekoa na, Abi-iza+ ohwo Anatọt na, 29 Sibekae+ ohwo Husha na, Aelae ohwo uyẹ Ahohae na, 30 Meharae+ ohwo Nẹtofa na, Hilẹd+ ọmọzae Beanah ohwo Nẹtofa na, 31 Aetae ọmọzae Raebae ohwo Gibiah ọrọ ahwo orua Bẹnjamin,+ Benaya ohwo Piratọn na, 32 Hurai ọrọ ito* Geash,+ Abayẹl ohwo Abat na, 33 Azmevẹt ohwo Bahurim na, Elayaba ohwo Shealbọn na, 34 emezae Heshẹm ohwo Gaezọn na, Jonatan ọmọzae Shegi ohwo Hara na, 35 Ahayam ọmọzae Seka ohwo Hara na, Ẹlaefal ọmọzae Ọr, 36 Hifa ohwo Mẹkira na, Ahaejah ohwo Pẹlon na, 37 Hẹzrọ ohwo Kamẹl na, Nearae ọmọzae Ẹzbae, 38 Joẹl oniọvo-ọmọzae Netan, Mibha ọmọzae Hẹgrae, 39 Zilẹk ohwo Ammọn na, Neharae ohwo Biẹrọt na, ọnọ ọ rẹ wha ekwakwa ẹmo Joab ọmọzae Zeruya; 40 Aera ohwo Itri na, Gerẹb ohwo Itri na, 41 Uraya+ ohwo Hit na, Zebad ọmọzae Alae, 42 Adina ọmọzae Shaeza ohwo orua Rubẹn na, ọnọ o wuzou ahwo orua Rubẹn, gbe ahwo ọgba nọ a rrọ kugbei; 43 Henan ọmọzae Meaka, Joshafat ohwo Mitni na, 44 Uzayah ohwo Ashtarọt na, Shema avọ Jeayẹl, emezae Hotam ohwo Aroa na; 45 Jedayahẹl ọmọzae Shimrae, gbe Joha oniọvo-ọmọzae riẹ ohwo Tiz na; 46 Iliọ ohwo Mehav na, Jeribai avọ Joshavaya emezae Ẹlneam, gbe Itma ohwo Moab na; 47 Iliọ, Obẹd, gbe Jaasayẹl ohwo Mẹzoba na.

12 Ezae nana họ enọ e nyabru Devidi ze evaọ Ziklag+ okenọ ọ jẹ sai no oria ruọ oria avọ ufuoma ha fiki Sọl+ ọmọzae Kish, yọ a jọ usu egbaẹmo egaga nọ i je fiobọhọ kẹe evaọ ẹmo.+ 2 A wha uze, yọ a rẹ sae rehọ obọze gbe ẹkpẹlobọ+ veghe udeme ro fi ibitho+ hayo sa ese nọ a fihọ uze. Imoni Sọl a jọ, ohwo Bẹnjamin+ na. 3 Ọnọ o wuzou họ Ahayiza, je kugbe Joash, emezae ivẹ Shimeya ohwo Gibiah+ na; Jizial avọ Pẹlẹt emezae Azmevẹt,+ Bẹraka, Jehu ohwo Anatọt na, 4 Ishmeya ohwo Gibiọn+ na, ọgbaẹmo ọgaga evaọ usu egbaẹmo ọgba na,+ o te je wuzou egbaẹmo ọgba na; jegbe Jerimaya, Jehazaẹl, Johenan, Jozebad ohwo Gẹdira na, 5 Ẹluzai, Jerimọt, Bielaya, Shẹmaraya, Shẹfataya ohwo Herẹf na, 6 Ẹlkena, Ishaya, Azarẹl, Joiza, gbe Jashobiẹm, ohwo Kora+ na; 7 gbe Joila avọ Zebadaya emezae Jeroham ohwo Gidọ.

8 Ahwo orua Gad na jọ a ruọ abọ Devidi evaọ oria nọ u siomano nọ o jọ udhude na;+ egbaẹmo egaga a jọ, isoja nọ a wuhrẹ kẹ ẹmo, enọ i dikihẹ ruẹrẹ oma kpahe avọ ojese ulogbo gbe ozuẹ nọ a kru họ obọ, ovao rai o wọhọ erọ ikpohrokpo, yọ a re siawọ wọhọ igbosu nọ e rrọ ehru igbehru. 9 Izẹ họ ọnọ o wuzou rai, Obedaya kọ ohwo avọ ivẹ, Ẹlayab ọrọ avọ esa, 10 Mishmana ọrọ avọ ene, Jerimaya ọrọ avọ isoi, 11 Atae ọrọ avọ ezeza, Iliọ ọrọ avọ ihrẹ, 12 Johenan ọrọ avọ eree, Ẹlzebad ọrọ avọ izii, 13 Jerimaya ọrọ avọ ikpe, Makbanae ọrọ avọ ikpegbọvo. 14 Ahwo orua Gad+ a jọ, enọ i wuzou ogbaẹmo na. Ọnọ ọ mae yẹlẹ evaọ usu rai ọ rẹ sai mudhe kẹ ahwo udhusoi (100), yọ ọnọ ọ mae goma ọ rẹ sai mudhe kẹ ahwo odu ọvo (1,000).+ 15 Ezae nana họ enọ a fa ethẹ Jọdan na vrẹ evaọ amara ọsosuọ, okenọ ethẹ na ọ rọ vọ ruọ okpa, a te le ahwo kpobi nọ a jẹ rria ikiekpotọ na kpohọ ofẹ ovatha-ọre gbe ofẹ ukiediwo-ọre.

16 Ezae orua Bẹnjamin avọ Juda jọ a nyabru Devidi ze re evaọ oria nọ u siomano nọ ọ jọ na.+ 17 Devidi ọ tẹ nya lahwe bru ai, ọ tẹ ta kẹ ae nọ: “Otẹrọnọ wha nyaze avọ udhedhẹ re wha fiobọhọ kẹ omẹ, udu mẹ o te jọ kugbe owhai. Rekọ otẹrọnọ wha nyaze re wha vivie omẹ kẹ ewegrẹ mẹ yọ abọ mẹ o ru oware ovo thọ họ, jọ Ọghẹnẹ esẹ-esẹ mai ọ ruẹ e riẹ je bruoziẹ.”+ 18 Kẹsena ẹzi Ọghẹnẹ ọ tẹ ruọ Amesae+ oma,* ọnọ o wuzou ahwo ọgba na, ọ tẹ ta nọ:

“Mai yọ ahwo ra, O Devidi, yọ ma rrọ kugbe owhẹ, O ọmọzae Jẹsi.+

Fikiere Devidi o te dede ae rehọ, o te fi ae họ usu enọ i wuzou egbaẹmo na.

19 Ahwo orua Manasẹ na jọ a ruọ abọ Devidi re evaọ okenọ o ro lele ahwo Filistia ze ti fi Sọl ẹmo; rekọ o fiobọhọ kẹ ahwo Filistia na ha, keme nọ a gba ẹgwae no, ilori ahwo Filistia+ a te vi ei vrẹ, inọ: “Ọ te ruọ abọ Sọl olori riẹ, yọ oyena o te wha uwhu se omai.”+ 20 Okenọ o kpobọ Ziklag,+ ahwo orua Manasẹ nana họ enọ e ziọ abọ riẹ: Adnah, Jozebad, Jedayahẹl, Maekẹl, Jozebad, Elaihu, gbe Zileta, enọ i wuzou itu ahwo idu Manasẹ.+ 21 A fiobọhọ kẹ Devidi họre egbaẹmo nọ e wọ ze te kwa eware, keme aikpobi a jọ egba, ezae nọ e gudu,+ a te zihe ruọ iletu evaọ ogbaẹmo na. 22 No ẹdẹ ruọ ẹdẹ ahwo a jẹ nyabru Devidi ze+ re a fiobọhọ kẹe, bẹsenọ a ro zihe ruọ ogbaẹmo ulogbo wọhọ ogbaẹmo Ọghẹnẹ.+

23 Onana họ unu ahwo nọ i wuzou otu nọ e ruẹrẹ oma kpahe kẹ ẹmo nọ e nyabru Devidi ze evaọ Hebrọn+ re a rehọ uvie Sọl kẹ Devidi wọhọ epanọ Jihova ọ ta.+ 24 Ezae Juda nọ e wha ojese ulogbo avọ ozuẹ i bu te idu ezeza gbe egba eree (6,800), enọ e ruẹrẹ oma kpahe kẹ ẹmo. 25 Evaọ orua Simiọn, ezae nọ e jọ egba nọ e gudu evaọ ogbaẹmo na a bu te idu ihrẹ gbe ẹgba ọvo (7,100).

26 Evaọ orua Livae, ezae idu ene gbe egba ezeza (4,600). 27 Jehoyada+ họ ọnọ ọ jọ osu emezae Erọn,+ yọ ahwo idu esa gbe egba ihrẹ (3,700) e jọ kugbei, 28 jegbe Zedọk,+ ọmoha nọ ọ rrọ ọgba jẹ gudu, avọ iletu udhegbivẹ nọ i no unuwou abọ ọsẹ riẹ ze.

29 Evaọ orua Bẹnjamin, nọ e rrọ imoni Sọl,+ idu esa (3,000) e jariẹ, yọ enọ e jọ abọ uwou Sọl vẹre e mai bu evaọ usu rai. 30 Evaọ orua Ifremu, ezae idu udhe gbe egba eree (20,800) e jariẹ, enọ e jọ egba jẹ gudu nọ a riẹ odẹ evaọ inuwou abọ ọsẹ rai.

31 Evaọ abọvo orua Manasẹ, ezae idu ikpegberee (18,000) e jariẹ, enọ a fodẹ edẹ rai re a nyaze te rehọ Devidi mu ovie. 32 Evaọ orua Isaka, enọ i wo otoriẹ etoke na jẹ riẹ oware nọ u fo nọ Izrẹl o re ru, ezae egba ivẹ (200) rai nọ i wuzou e jariẹ, yọ imoni rai kpobi e jọ otọ rai. 33 Evaọ orua Zẹbulọn, ahwo idu udhuvẹ-gbikpe (50,000) nọ e rẹ sae jọ egbaẹmo, nọ i re dhe uhie ẹmo họ avọ ekwakwa ẹmo kpobi e jariẹ, aikpobi a rọ eva rai kpobi kuomagbe Devidi.* 34 Evaọ orua Naftalae, iletu odu ọvo (1,000) e jariẹ, yọ egbaẹmo idu ọgbagbihrẹ (37,000) nọ i kru ojese ulogbo gbe ozuẹ e jọ kugbe ai. 35 Evaọ orua Dan, enọ i re dhe uhie ẹmo họ i bu te idu udhegberee gbe egba ezeza (28,600). 36 Evaọ orua Asha, enọ e rẹ sae jọ ogbaẹmo na re a dhe uhie ẹmo họ a bu te idu udhuvẹ (40,000).

37 Evaọ orua Rubẹn, orua Gad, gbe abọvo orua Manasẹ nọ i no abọdekọ Jọdan+ ze, isoja idu udhozeza (120,000) nọ i wo oghẹrẹ ekwakwa ẹmo kpobi e jariẹ. 38 Ahwo nana kpobi a jọ ezae nọ i re fi ẹmo, nọ i re kuomagbe dhe uhie ẹmo họ; a rọ udu rai kpobi nyabru Devidi ze evaọ Hebrọn re a rehọ iẹe mu ovie kẹ Izrẹl soso, yọ ahwo Izrẹl nọ i kiọkọ kpobi a jọ okugbe ọvo* evaọ epanọ a rẹ rọ rehọ Devidi mu ovie.+ 39 A jọ etẹe kugbe Devidi edẹ esa, be re jẹ da, keme imoni rai e ruẹrẹ eware kpahe kẹ ae no. 40 Yọ enọ e kẹle rai, makọ enọ e jọ ugbo obọ Isaka, Zẹbulọn, gbe Naftalae dede, a jẹ rehọ eketekete, ekamẹle, isi, gbe iruẹ wọ emuore ze—eflawa, ikeki ifigi gbe erọ resin, enwaene, ewhri, gbe iruẹ avọ igodẹ buobu gaga, keme oghọghọ o jọ Izrẹl.

13 Devidi o te se iletu itu ahwo idu na avọ itu ahwo udhusoi na gbe osu kpobi.+ 2 Devidi ọ tẹ ta kẹ ukoko ahwo Izrẹl na soso nọ: “Otẹrọnọ u kiehọ owhai oma, yọ o were Jihova Ọghẹnẹ mai, joma vi uwou se imoni mai nọ i kiọkọ evaọ ibrotọ Izrẹl kpobi, je ro se izerẹ na gbe ahwo Livae na evaọ ikpewho rai+ nọ i wo etọ nọ erao e rẹ jọ re ẹbe re a nyaze ti kuomagbe omai. 3 Re ma rehọ etehe ọvọ+ Ọghẹnẹ mai zihe ze.” Keme a jẹ rẹrotei evaọ oke Sọl+ ho. 4 Ukoko na soso o tẹ rọwo nọ a re ru ere, keme u kiehọ ahwo na kpobi oma. 5 Fikiere Devidi o te koko Izrẹl soso họ, no obọ ethẹ* Ijipti ze rite ugbo obọ Libo-hemat,*+ re a wọ etehe ọvọ Ọghẹnẹ uzẹme na no obọ Kiriat-jierim+ ze.

6 Devidi avọ Izrẹl soso a te kpobọ Beala,+ koyehọ Kiriat-jierim, orọ Juda, re a rehọ etehe ọvọ Ọghẹnẹ uzẹme na, Jihova, no obei ze, ọnọ ọ keria agbara-uvie riẹ evaọ obehru* chẹrub na,+ oria nọ a rẹ jọ bo se odẹ riẹ. 7 Rekọ a tẹ wọ etehe ọvọ Ọghẹnẹ uzẹme na họ ehru akẹkẹ ọkpokpọ,+ a tẹ wọe no uwou Abinadab ze, yọ Uzah avọ Ahaeyo a be nya lele akẹkẹ na.+ 8 Devidi avọ Izrẹl soso a tẹ jẹ rehọ ogaga rai kpobi gbe ehaa evaọ aro Ọghẹnẹ uzẹme na avọ ile, ekpata-ifi, oghẹrẹ ekpata-ifi efa, ejẹjẹ,+ igogo,+ gbe egba.+ 9 Rekọ nọ a te oria Kaedọn nọ a rẹ jọ si ibi no igbe ekakọ na, Uzah ọ tẹ rriẹ obọ riẹ, o te kru etehe ọvọ na, keme iruẹ na i je ti gele etehe ọvọ na kie. 10 Fikiere Jihova o te mu ofu gaga kẹ Uzah, Ọ tẹ tehe iẹe kpe fihọ otọ fikinọ ọ rriẹ obọ riẹ ro kru etehe ọvọ+ na, o te whu fihọ etẹe evaọ aro Ọghẹnẹ.+ 11 Rekọ eva e tẹ dha Devidi fikinọ Jihova o mu ofu ọgaga kẹ Uzah; yọ a bi se oria yena Pirẹz-uzah* rite ẹdẹ inẹnẹ na.

12 Fikiere ozọ Ọghẹnẹ uzẹme na u te mu Devidi evaọ ẹdẹ yena, ọ tẹ ta nọ: “Ẹvẹ mẹ sae rọ wọ etehe ọvọ Ọghẹnẹ uzẹme na ziọ obomẹ?”+ 13 Devidi ọ gbẹ wọ etehe ọvọ na ziọ oria nọ ọ jẹ rria evaọ Okpẹwho Devidi hi, rekọ ọ tẹ ta nọ a wọe kpohọ uwou Obẹd-idọm, ohwo Gat na. 14 Etehe ọvọ Ọghẹnẹ uzẹme na ọ jọ kugbe ahwo uwou Obẹd-idọm, ọ jọ uwou riẹ emerae esa, Jihova ọ tẹ jẹ ghale ahwo uwou Obẹd-idọm gbe eware kpobi nọ o wo.+

14 Haeram+ ovie Taya o te vi enyukọ bru Devidi, o te je vi ite-ire sida, te ahwo nọ a rẹ rọ itho bọ iwou,* gbe ewena ire ro sei re a bọ uwou* kẹe.+ 2 Devidi ọ riẹ nọ Jihova ọ rehọ e riẹ dikihẹ gaga no re ọ jọ ovie Izrẹl,+ keme ọ kpare uvie riẹ kpehru no fiki ahwo Riẹ, Izrẹl.+

3 Devidi ọ jọ Jerusalẹm rehọ eyae efa,+ Devidi o te yẹ emezae gbe emetẹ efa.+ 4 Edẹ emọ nọ a yẹ kẹe evaọ Jerusalẹm họ:+ Shamua, Shobab, Netan,+ Solomọn,+ 5 Ibha, Elaeshua, Ẹlpelẹt, 6 Noga, Nifẹg, Jefaya, 7 Ẹlishama, Belayada, gbe Ẹlifelẹt.

8 Nọ ahwo Filistia a yo nọ a wholo Devidi no re ọ jọ ovie Izrẹl soso,+ ahwo Filistia kpobi a tẹ wọ ze te gwọlọ Devidi.+ Nọ Devidi o yo kpahe iẹe, ọ tẹ wọ ohọre bru ae. 9 Kẹsena ahwo Filistia na a tẹ nyaze, a tẹ jẹ vẹruọ Ukiekpotọ* Rẹfeyẹm.+ 10 Devidi ọ tẹ nekpẹ mi Ọghẹnẹ nọ: “Kọ mẹ nyae họre ahwo Filistia na? Kọ whọ te rehọ ae họ omẹ obọ?” Jihova ọ tẹ ta kẹe nọ: “Nya, mẹ te rehọ ae họ owhẹ obọ.”+ 11 Fikiere Devidi o te kpobọ Bale-perezim,+ ọ tẹ jọ etẹe kpe ai. Devidi ọ tẹ ta nọ: “Ọghẹnẹ uzẹme na ọ rehọ obọ mẹ fi ewegrẹ mẹ kparobọ no wọhọ ame nọ o zurie ugbẹhẹ fihọ otọ.” Oyejabọ nọ a ro se odẹ oria yena Bale-perezim.* 12 Ahwo Filistia na a tẹ dhẹ siọ eghẹnẹ rai ba etẹe, nọ Devidi ọ kẹ udu na, a tẹ rọ erae mahe ae no.+

13 Uwhremu na, ahwo Filistia a tẹ wariẹ wọ ohọre ziọ ukiekpotọ* na.+ 14 Devidi ọ tẹ wariẹ nekpẹ mi Ọghẹnẹ, rekọ Ọghẹnẹ uzẹme na ọ tẹ ta kẹe nọ: “Whọ nya ovavo bru ai hi. Ukpoye, nya wariẹ họ kpobọ emu rai, re whọ vẹruọ ae evaọ aro ire beka na.+ 15 Nọ who te yo edo onya ahwo evaọ ehru ire beka na, whọ vẹ vẹruọ ae, keme Ọghẹnẹ uzẹme na ọ karo kẹ owhẹ no re o kpe ogbaẹmo ahwo Filistia na.”+ 16 Fikiere Devidi o te ru epanọ Ọghẹnẹ uzẹme na o jie uzi kẹe na dẹẹ,+ a te kpe ogbaẹmo ahwo Filistia na kuku otọ no Gibiọn rite obọ Gizẹ.+ 17 Odẹ Devidi u te do ruọ ekwotọ na kpobi, Jihova o te ru ozọ riẹ je mu erẹwho na kpobi.+

15 Devidi ọ tẹ ruabọhọ jẹ bọ iwou kẹ omariẹ evaọ Okpẹwho Devidi, ọ tẹ ruẹrẹ oria họ kẹ etehe ọvọ Ọghẹnẹ uzẹme na jẹ rehọ uwou-udhu vi kẹe.+ 2 Oke yena Devidi ọ rọ ta nọ: “Omọfa ọ rẹ wọ etehe ọvọ Ọghẹnẹ uzẹme na ha ajokpaọ ahwo Livae na, keme ae họ enọ Jihova ọ salọ re a wọ etehe ọvọ Jihova jẹ gbodibo kẹe ẹsikpobi.”+ 3 Kẹsena Devidi o te koko Izrẹl soso họ evaọ Jerusalẹm re a wọ etehe ọvọ Jihova na kpohọ oria nọ ọ ruẹrẹhọ kẹe na.+

4 Ahwo nana họ enọ Devidi o kokohọ evaọ uyẹ Erọn+ gbe ahwo Livae na:+ 5 evaọ unuwou Kohat, Yuraẹl ọnọ o wuzou avọ imoni udhozeza (120) riẹ; 6 evaọ unuwou Mẹrarae, Asaya+ ọnọ o wuzou avọ imoni egba ivẹ gbe udhe (220) riẹ; 7 evaọ unuwou Gẹshọm, Joẹl+ ọnọ o wuzou avọ imoni udhozeza-gbikpe (130) riẹ; 8 evaọ uyẹ Ẹlizefan,+ Shimaya ọnọ o wuzou avọ imoni egba ivẹ (200) riẹ; 9 evaọ uyẹ Hebrọn, Iliọ ọnọ o wuzou avọ imoni udhone riẹ; 10 evaọ uyẹ Uziẹl,+ Aminadab ọnọ o wuzou avọ imoni udhusoi gbe ikpegbivẹ (112) riẹ. 11 Ofariẹ, Devidi o se Zedọk+ avọ Abayata+ izerẹ na gbe Yuraẹl, Asaya, Joẹl, Shimaya, Iliọ, gbe Aminadab, enọ e rrọ ahwo Livae, 12 ọ tẹ ta kẹ ae nọ: “Whai họ enọ i wuzou inuwou abọ ọsẹ ahwo Livae na. Wha ru omarai fo, te owhai te imoni rai, re wha wọ etehe ọvọ Jihova Ọghẹnẹ Izrẹl ziọ oria nọ mẹ ruẹrẹhọ kẹe na. 13 Fikinọ whai họ enọ e wọ riẹ evaọ oke ọsosuọ họ,+ Jihova Ọghẹnẹ mai o te mu ofu ọgaga kẹ omai,+ keme ma kiẹ kpahe oghẹrẹ nọ u fo nọ a rẹ rọ wọe he.”+ 14 Fikiere izerẹ na avọ ahwo Livae na a te ru omarai fo re a wọ etehe ọvọ Jihova Ọghẹnẹ Izrẹl ze.

15 Kẹsena ahwo Livae na a tẹ rọ ekpọ wọ etehe ọvọ Ọghẹnẹ uzẹme na họ ikoko rai,+ nwane wọhọ epaọ ẹme Jihova nọ Mosis o ro jie uzi. 16 Kẹsena Devidi ọ tẹ ta kẹ enọ i wuzou ahwo Livae na inọ a rehọ imoni rai nọ e rrọ eso-ile na mu re a so ile avọ oghọghọ, je kporo ekwakwa ikporakporo nana: ekpata-ifi, ekpata,+ gbe igogo.+

17 Fikiere ahwo Livae na a tẹ salọ Himan+ ọmọzae Joẹl, yọ evaọ udevie imoni riẹ, a salọ Esaf+ ọmọzae Bẹrekaya, evaọ unuwou Mẹrarae imoni rai, a tẹ salọ Itan+ ọmọzae Kusheya. 18 Imoni rai nọ e rrọ utu avọ ivẹ+ nọ e jọ kugbe ai họ, Zẹkaraya, Bẹn, Je-eziẹl, Shemiramọt, Jehayẹl, Ọnae, Ẹlayab, Benaya, Measaya, Matataya, Ẹlifelẹhu, gbe Mikniya avọ Obẹd-idọm gbe Jeayẹl irou-unuẹthẹ* na. 19 Himan,+ Esaf,+ gbe Itan eso-ile na họ enọ i re kporo igogo ekọpa na;+ 20 yọ Zẹkaraya, Eziẹl, Shemiramọt, Jehayẹl, Ọnae, Ẹlayab, Measaya, gbe Benaya a je kporo ekpata-ifi na lele edo Alamọt;*+ 21 yọ Matataya,+ Ẹlifelẹhu, Mikniya, Obẹd-idọm, Jeayẹl, gbe Azazaya a je kporo ekpata na lele edo Shẹminit,*+ re a kpọ ile na. 22 Kẹnanaya+ ọnọ o wuzou ahwo Livae na họ ọnọ ọ kpọ oghẹrẹ nọ a rẹ wọ etehe ọvọ na, keme ọ riẹ kpahe iẹe ziezi, 23 yọ Bẹrekaya avọ Ẹlkena họ enọ i je rou etehe ọvọ na. 24 Shẹbanaya, Joshafat, Nẹtanẹl, Amesae, Zẹkaraya, Benaya, gbe Ẹli-iza izerẹ na a te je kporo egba na do ruarua evaọ aro etehe ọvọ Ọghẹnẹ uzẹme na,+ yọ Obẹd-idọm avọ Jehaya a je rou etehe ọvọ na re.

25 Kẹsena Devidi avọ ekpako Izrẹl gbe iletu itu ahwo idu na a tẹ jẹ nya lele etehe ọvọ Jihova na nọ a be wọe no obọ uwou Obẹd-idọm+ ze na avọ oghọghọ+ na. 26 Fikinọ Ọghẹnẹ uzẹme na o fiobọhọ kẹ ahwo Livae nọ e wọ etehe ọvọ Jihova na, a tẹ rọ iruẹ ihrẹ gbe igbo ihrẹ dhe idhe.+ 27 Devidi o fi ewu ohọ uwowoma nọ o wo abọ họ họ oma, yọ ere ọvona ahwo Livae nọ e wọ etehe ọvọ na kpobi a ru re, gbe eso-ile na, gbe Kẹnanaya ọnọ ọ jẹ kpọ oghẹrẹ nọ a rẹ wọ etehe ọvọ na avọ eso-ile na; Devidi o te je ku ẹfọd nọ a rọ ohọ-olọlọhọ ko họ.+ 28 Ahwo Izrẹl na kpobi a tẹ jẹ wọ etehe ọvọ Jihova na ze avọ edo oghọghọ,+ avọ edo onware, egba,+ igogo, yọ a bi kporo ekpata-ifi gbe ekpata do gaga.+

29 Rekọ nọ a wọ etehe ọvọ Jihova na te Okpẹwho Devidi+ no, Maekal+ ọmọtẹ Sọl ọ tẹ jọ unwido rri ziọ otọ, ọ tẹ ruẹ Devidi ovie na nọ o bi duola je bi gbe ehaa; ọ tẹ jẹ jẹe kufiẹ evaọ udu riẹ.+

16 Ere a rọ rehọ etehe ọvọ Ọghẹnẹ uzẹme na ze, a tẹ wọe fihọ obeva uwou-udhu nọ Devidi ọ bọ kẹe;+ a te dhe idhe emahọ gbe idhe ọriẹyeri evaọ aro Ọghẹnẹ uzẹme na.+ 2 Nọ Devidi o dhe idhe emahọ+ gbe idhe ọriẹyeri+ na no, ọ tẹ rehọ odẹ Jihova lẹ ẹro eghale kẹ ahwo na. 3 U no ere no, ọ ghale ebrẹdi ogheghelie, ikeki ideti,* gbe ikeki resin kẹ ahwo Izrẹl kpobi, te ọzae te aye. 4 Kẹsena ọ tẹ rehọ ahwo Livae na jọ mu re a gbodibo evaọ aro etehe ọvọ Jihova na,+ re a rọ orro kẹ,* yere, je jiri Jihova Ọghẹnẹ Izrẹl. 5 Esaf+ ọ jọ ọnọ o wuzou, Zẹkaraya ọ tẹ rọ kẹle iẹe; yọ Jeayẹl, Shemiramọt, Jehayẹl, Matataya, Ẹlayab, Benaya, Obẹd-idọm, gbe Jeayẹl+ a je kporo ekpata-ifi gbe ekpata+ na; yọ Esaf họ ọnọ o je kporo igogo+ na, 6 Benaya avọ Jehazaẹl izerẹ na a te je kporo egba na kẹse kẹse evaọ aro etehe ọvọ Ọghẹnẹ uzẹme na.

7 Ẹdẹ yena họ ẹdẹ ọsosuọ nọ Devidi o ro kere ole ujiro kẹ Jihova, ọ tẹ ta kẹ Esaf+ avọ imoni riẹ re a so ẹe, inọ:

10 Wha rehọ odẹ ọrẹri riẹ seha.+

Jọ udu ahwo nọ a be gwọlọ Jihova o ghọghọ.+

11 Wha gwọlọ Jihova+ avọ ẹgba riẹ.

Wha gwọlọ ovao riẹ* kẹse kẹse.+

14 Ọye họ Jihova Ọghẹnẹ mai.+

Iziẹibro riẹ i re kpomahọ otọakpọ na soso.+

23 Wha so ile kẹ Jihova, whai ahwo otọakpọ na kpobi!

Wha whowho esiwo riẹ kẹdẹ kẹdẹ!+

25 Keme Jihova ọ rrọ ruaro, yọ ọye ọ mai fo ejiro.

O re mu ọwhewhe vi eghẹnẹ efa kpobi.+

Wha guzou kpotọ kẹ* Jihova avọ ẹgọ ọrẹri nọ wha whẹhọ.*+

30 Wha nuhu evaọ aro riẹ, whai ahwo otọakpọ na kpobi!

Ọ rehọ otọakpọ* na vi kothi; a rẹ sai goi no ẹta ha.*+

Ahwo na kpobi a te kuenu nọ, “Ami!”* a te jiri Jihova.

37 Kẹsena Devidi ọ tẹ nyasiọ Esaf+ avọ imoni riẹ ba etẹe evaọ aro etehe ọvọ Jihova na re a gbodibo kẹse kẹse evaọ aro etehe ọvọ+ na, wọhọ epanọ a ruẹrẹ fihọ nọ a re ru kẹdẹ kẹdẹ.+ 38 Obẹd-idọm avọ imoni riẹ, enọ i bu te udhosa-gberee, gbe Obẹd-idọm ọmọzae Jedutọn, avọ Hosa a jọ irou-unuẹthẹ;* 39 yọ Zedọk+ ozerẹ na avọ ibe izerẹ riẹ a jọ aro uwou-udhu Jihova nọ o rrọ oria ukpehru na evaọ Gibiọn+ 40 re a dhe idhe emahọ kẹ Jihova kẹse kẹse evaọ agbada-idhe idhe emahọ na, te ohiohiẹ te owọwọ, re a je ru oware kpobi nọ a kere fihọ Uzi Jihova nọ o jie kẹ ahwo Izrẹl.+ 41 Ahwo nọ a jọ kugbe ae họ, Himan avọ Jedutọn+ gbe ahwo nọ a kiọkọ nọ a salọ, enọ a fodẹ edẹ rai re a yere Jihova,+ keme “uyoyou riẹ nọ o rẹ hiẹ hẹ o rẹ jọ bẹdẹ bẹdẹ”;+ 42 yọ Himan+ avọ Jedutọn a jọ kugbe ai re a kporo egba na, igogo na, gbe ekwakwa nọ a re ro jiri* Ọghẹnẹ uzẹme na; yọ emezae Jedutọn+ e jọ obọ unuighẹ na. 43 Kẹsena ahwo na kpobi a te kpobọ uwou rai, Devidi ọ tẹ nyae lẹ ẹro eghale kẹ ahwo uwou riẹ.

17 Nọ Devidi ọ nwani mu uwou* riẹ họ ẹria no, ọ tẹ ta kẹ Netan+ ọruẹaro na nọ: “Whaọ mẹ be rria uwou ire sida,+ yọ etehe ọvọ Jihova ọ rrọ otọ uwou-udhu nọ a rehọ ehọ bọ.”+ 2 Netan ọ tẹ kpahe kẹ Devidi nọ: “Ru oware kpobi nọ o rrọ owhẹ udu, keme Ọghẹnẹ uzẹme na ọ rrọ kugbe owhẹ.”

3 Evaọ asoaso yena, ẹme Ọghẹnẹ o te bru Netan ze, inọ: 4 “Nya re whọ ta kẹ Devidi odibo mẹ nọ, ‘Enẹ Jihova ọ ta: “Whẹ họ ọnọ ọ te bọ uwou kẹ omẹ nọ mẹ rẹ rria ha.+ 5 Keme mẹ re rria uwou ẹdẹvo ho anwẹnọ mẹ rọ rehọ Izrẹl ze rite inẹnẹ na, rekọ me bi no uwou-udhu ruọ uwou-udhu, je bi no oria ruọ oria.*+ 6 Evaọ etoke nọ me je ro lele ahwo Izrẹl kpobi nya na, kọ u wo ẹdẹ jọ nọ mẹ nọ ọjọ evaọ usu ibruoziẹ nọ me ro mu re a rẹrote ahwo mẹ inọ, ‘Fikieme wha gbẹ re bọ uwou ire sida kẹ omẹ hẹ?’”’

7 “Fikiere ta eme nana kẹ Devidi odibo mẹ inọ, ‘Enẹ Jihova olori egbaẹmo ọ ta: “Mẹ rehọ owhẹ no obọ ẹwọ ze, no obọ igodẹ nọ who je su ze, re whọ jọ osu kẹ ahwo mẹ Izrẹl.+ 8 Mẹ te jọ kugbe owhẹ evaọ oria kpobi nọ whọ nya,+ yọ me ti kpe ewegrẹ ra kpobi no kẹ owhẹ;+ me ti ru owhẹ wo odẹ wọhọ odẹ ikpahwo otọakpọ na.+ 9 Mẹ te kẹ ahwo mẹ Izrẹl oria nọ a rẹ rria, a te rria etẹe yọ a gbe ti kpokpo ai ofa ha; ahwo omuomu a ti gbe kienyẹ ai* ofa ha wọhọ epanọ a je ru ai evaọ oke nọ u kpemu,+ 10 no anwọ oke nọ mẹ rọ rehọ ibruoziẹ mu kẹ ahwo mẹ Izrẹl ze.+ Me ti fi ewegrẹ ra kpobi kparobọ.+ U te no ere no, mẹ be ta kẹ owhẹ nọ, ‘Jihova ọ te bọ uwou kẹ owhẹ.’*

11 “‘“Okenọ edẹ ra i te re no, nọ whọ jẹ nyai kuomagbe esẹ-esẹ ra no, mẹ te rehọ ọmọ* ra mu, omọvo emezae ra jọ,+ yọ me ti ru uvie riẹ dikihẹ gaga.+ 12 Ọye họ ọnọ ọ te bọ uwou kẹ omẹ,+ yọ mẹ te rehọ agbara-uvie riẹ dikihẹ gaga bẹdẹ bẹdẹ.+ 13 Mẹ te jọ ọsẹ riẹ, ọ vẹ te jọ ọmọzae mẹ.+ Mẹ te siọ uyoyou mẹ nọ o rẹ hiẹ hẹ ba edhesẹ kẹe he,+ wọhọ epanọ mẹ se riẹ ba edhesẹ kẹ ọnọ o su no taure who te ti muhọ esuo na.+ 14 Me ti ru ei dikihẹ evaọ uwou mẹ gbe evaọ uvie mẹ bẹdẹ bẹdẹ,+ yọ agbara-uvie riẹ o te jọ bẹdẹ bẹdẹ.”’”+

15 Netan ọ tẹ ta eme nana kpobi gbe eruẹaruẹ nana kpobi kẹ Devidi.

16 Fikiere Devidi ovie na ọ tẹ ruọ eva, ọ tẹ keria aro Jihova, ọ tẹ ta nọ: “Kọ mẹ yọ ono, O Jihova Ọghẹnẹ? Kọ amono họ ahwo uwou mẹ nọ who ro ru eware nana kpobi kẹ omẹ?+ 17 Whọ jọ etẹe serihọ họ, O Ọghẹnẹ, whọ tẹ jẹ ta kpahe eware nọ e te via kẹ uwou odibo ra evaọ obaro thethabọ;+ who te je rri omẹ wọhọ ẹsenọ mẹ rrọ ohwo nọ u fo nọ a rẹ gbẹ kpare kpehru,* O Jihova Ọghẹnẹ. 18 Kọ eme ọfa mẹ Devidi odibo ra ọ rẹ gbẹ sae ta kpahe ọghọ nọ whọ kẹ omẹ no, kpakiyọ whọ riẹ odibo ra te otọ?+ 19 O Jihova, who ru eware ilogbo nana kpobi ẹkwoma oruaro ra nọ who dhesẹ via fiki odibo ra gbe fikinọ o rọwokugbe udu* ra.+ 20 O Jihova, ohwo nọ ọ wọhọ owhẹ ọ rrọ họ,+ yọ u te no owhẹ no Ọghẹnẹ ọfa ọ rrọ họ;+ eware kpobi nọ ma rọ ezọ mai yo e kẹ imuẹro onana. 21 Kọ orẹwho ọfa vẹ evaọ otọakpọ na o wọhọ Izrẹl, ahwo ra?+ Ọghẹnẹ uzẹme na ọ nya, ọ tẹ ta ai no igbo fikinọ ahwo riẹ a rrọ.+ Whọ rọ ẹkwoma ikpeware gbe eware nọ i re mu ọwhewhe nọ who ru wo odẹ kẹ omara,+ who te le erẹwho no kẹ ahwo ra,+ enọ whọ ta no igbo Ijipti ze. 22 Who ru ahwo ra Izrẹl fihọ ahwo obọra no bẹdẹ bẹdẹ;+ whẹ, O Jihova, who zihe ruọ Ọghẹnẹ rai.+ 23 Enẹna, O Jihova, jọ eyaa nọ whọ ya kpahe odibo ra avọ uwou riẹ u rugba bẹdẹ bẹdẹ, re who ru epanọ whọ ya na gba ẹrẹrẹe.+ 24 Jọ odẹ ra o jọ ribri,* re a jẹ kpare iẹe kpehru+ bẹdẹ bẹdẹ, re ahwo a ruẹse ta nọ, ‘Jihova olori egbaẹmo, Ọghẹnẹ Izrẹl, yọ Ọghẹnẹ kẹ Izrẹl,’ yọ ajọ uwou Devidi odibo ra u dikihẹ gaga evaọ aro ra.+ 25 Keme whẹ Ọghẹnẹ mẹ, who rovie ẹjiroro ra nọ whọ rọ gwọlọ bọ uwou kẹ odibo ra* via kẹe no. Oyejabọ nọ odibo ra o ro wo udu be lẹ olẹ nana se owhẹ na. 26 Avro ọ riẹ hẹ, O Jihova, whẹ họ Ọghẹnẹ uzẹme na, yọ whọ ya eyaa nọ who ti ru eware iwoma nana kẹ odibo ra. 27 Fikiere, jọ o ruọ owhẹ re whọ ghale uwou odibo ra, jọ uwou odibo ra o jọ bẹdẹ bẹdẹ evaọ aro ra, keme whẹ, O Jihova, whọ ghale uwou odibo ra no, yọ eghale na e rrọ bẹdẹ bẹdẹ.”

18 Nọ oke jọ o vrẹ no, Devidi o te lele ahwo Filistia họre, o te fi ai kparobọ, o te mi ahwo Filistia+ na Gat+ avọ iwhre riẹ.* 2 Kẹsena o te fi Moab kparobọ,+ ahwo Moab na a te zihe ruọ idibo Devidi, a tẹ jẹ hwa azọhọ kẹe.+

3 Devidi o fi Hadẹdiza+ ovie Zoba+ kparobọ kẹle Hemat+ evaọ okenọ ọ jọ edhere jẹ nyai ru epanọ o re ro ru udu-esuo riẹ dikihẹ evaọ obọ Ethẹ Yufretis+ na. 4 Devidi o mu ekẹkẹ odu ọvo (1,000), edhẹ-enyenya idu ihrẹ (7,000), gbe isoja owotọ idu udhe (20,000) riẹ rehọ.+ Kẹsena Devidi o te wiri awọ enyenya ekẹkẹ na kpobi kiọkọ udhusoi (100) ọvo.+ 5 Nọ ahwo Siria obọ Damaskọs a nyaze ti fiobọhọ kẹ Hadẹdiza ovie Zoba, Devidi o te kpe ahwo Siria idu udhegbivẹ (22,000).+ 6 Kẹsena Devidi o te fi itu isoja sa-sa họ Damaskọs ọrọ Siria, ahwo Siria na a te zihe ruọ idibo Devidi, a tẹ jẹ hwa azọhọ kẹe. Jihova ọ jẹ kẹ Devidi obokparọ* evaọ oria kpobi nọ ọ nya.+ 7 U no ere no, Devidi o mi idibo Hadẹdiza ejese igoru igheghelie nọ e jarae obọ, ọ tẹ rehọ ai ziọ Jerusalẹm. 8 Devidi ovie na ọ jọ Tibhat gbe Kọn, ikpewho Hadẹdiza, kwa ekọpa buobu rehọ. Ekọpa na Solomọn o ro ru Abade ekọpa na,+ ipila na, gbe ekwakwa ekọpa na.+

9 Nọ Tou ovie Hemat o yo nọ Devidi o fi ogbaẹmo Hadẹdiza+ ovie Zoba soso kparobọ no,+ 10 ọ tẹ nwani vi Hedoram ọmọzae riẹ bru Devidi ovie na re ọ nọe epanọ eware e rrọ kẹe, re o je yere iei fikinọ ọ họre Hadẹdiza je fi ei kparobọ no (keme Hadẹdiza ọ jẹ hai fi Tou ẹmo gaga), yọ ọ wha oghẹrẹ ekwakwa isiliva, igoru, gbe ekọpa kpobi ze. 11 Devidi ovie na ọ tẹ rehọ eware nana* kẹ Jihova,+ wọhọ epanọ o ru isiliva gbe igoru nọ ọ rehọ no erẹwho na kpobi ze na: no obọ Edọm gbe Moab ze, no obọ ahwo Ammọn,+ ahwo Filistia,+ gbe ahwo Amalẹk+ ze.

12 Abishae+ ọmọzae Zeruya+ o kpe ahwo Edọm idu ikpegberee (18,000) evaọ Ukiekpotọ Uwhei na.+ 13 O te fi itu isoja sa-sa họ Edọm, ahwo Edọm kpobi a te zihe ruọ idibo Devidi.+ Jihova ọ jẹ kẹ Devidi obokparọ* evaọ oria kpobi nọ ọ nya.+ 14 Devidi o te gbe je su Izrẹl soso,+ yọ o je bru uvioziẹ kẹ ahwo riẹ kpobi avọ ẹrẹreokie.+ 15 Joab ọmọzae Zeruya ọ jọ oletu ogbaẹmo na,+ Jehoshafat+ ọmọzae Ahaelọd ọ tẹ jọ ọnọ o re kere eware fihọ otọ, 16 Zedọk ọmọzae Ahaetọb avọ Ahimẹlẹk ọmọzae Abayata a jọ izerẹ, Shavsha ọ tẹ jọ okere-obe. 17 Benaya ọmọzae Jehoyada o wuzou ahwo Kẹrẹt+ gbe ahwo Pẹlẹt+ na. Emezae Devidi e tẹ jọ ethabọ ọsosuọ ovie na.

19 Uwhremu na, Nehash ovie ahwo Ammọn o te whu, ọmọzae riẹ o te zihe ruọ ovie evaọ ẹta riẹ.+ 2 Fikiere Devidi ọ tẹ ta nọ: “Me ti dhesẹ uyoyou nọ o rẹ hiẹ hẹ+ kẹ Henọn ọmọzae Nehash, keme ọsẹ riẹ o dhesẹ uyoyou nọ o rẹ hiẹ hẹ kẹ omẹ.” Fikiere Devidi o te vi enyukọ re a nyae sasa iẹe oma fiki ọsẹ riẹ nọ o whu na. Rekọ nọ idibo Devidi a ziọ ẹkwotọ ahwo Ammọn+ na re a sasa Henọn oma, 3 ikpahwo-esuo ahwo Ammọn a tẹ ta kẹ Henọn nọ: “Kọ who roro nọ Devidi ọ gwọlọ kẹ ọsẹ ra ọghọ o ro vi ahwo ze te sasa owhẹ oma? Kọ ogbẹrọnọ o vi idibo riẹ bru owhẹ ze re ọ romatotọ kiẹ ẹkwotọ na riwi jẹ riẹ epanọ eware e rrọ re ọ sai fi owhẹ kparobọ?” 4 Fikiere Henọn o te kru idibo Devidi na, ọ tẹ nware etuagba rai no+ jẹ jọ umuo ikebe bru iwu rai ibro ivẹ, o te siobọno ai vrẹ. 5 Nọ a vuẹ Devidi kpahe ezae na, ọ tẹ nwani vi amọfa nyai zere ai, keme oware nọ a ru ezae nana yọ oware omovuọ gaga; ovie na ọ tẹ ta kẹ ae nọ: “Wha daji Jẹriko+ bẹsenọ etuagba rai i re di ze no, kẹsena wha ve zihe ze.”

6 Nọ u te oke jọ, ahwo Ammọn a tẹ ruẹ nọ a bi tu Devidi oma, fikiere Henọn avọ ahwo Ammọn na a tẹ rehọ etalẹnte* isiliva odu ọvo (1,000) nyae haya ekẹkẹ avọ edhẹ-enyenya no obọ Mẹsopotemia,* Eram-meaka, gbe Zoba+ ze. 7 Ere a rọ haya ekẹkẹ idu ọgbagbivẹ (32,000), a tẹ jẹ haya ovie Meaka avọ ahwo riẹ kugbe. Kẹsena a tẹ wọ ze, a tẹ fa evuẹ fihọ aro Mẹdeba.+ Ahwo Ammọn na a te kokohọ no ikpewho rai ze, a tẹ nyaze kẹ ẹmo na.

8 Nọ Devidi o yo kpahe iẹe, o te vi Joab+ avọ ogbaẹmo na soso, te egbaẹmo riẹ nọ e mae ga nya.+ 9 Ahwo Ammọn a tẹ wọ lahwe, a te dhe uhie ẹmo họ evaọ oria nọ a rẹ rọ ruọ okpẹwho na, yọ ivie nọ e nyaze na a rrọ oria rai sa evaọ okegbe ovevẹ na.

10 Nọ Joab ọ ruẹ nọ egbaẹmo na e be họrọ bru ei ze evaọ obaro gbe obemu, ọ tẹ salọ egbaẹmo jọ nọ e mae riẹ ẹmo efi evaọ Izrẹl, a te dhe uhie ẹmo họ re a nyabru ahwo Siria na.+ 11 O te fi ezae nọ i kiọkọ họ otọ* Abishae oniọvo riẹ re o dhe ai họ uhie ẹmo,+ a vẹ nyabru ahwo Ammọn. 12 Ọ tẹ ta nọ: “Otẹrọnọ ahwo Siria+ na a be ga obọ vi omẹ, whọ rẹ nyaze te thọ omẹ hrọ; rekọ otẹrọnọ ahwo Ammọn a be ga obọ vi owhẹ, mẹ te thọ owhẹ. 13 Ma re kru oma ga je wo udu+ fiki ahwo mai gbe fiki ikpewho Ọghẹnẹ mai, Jihova o ti ru onọ u kiehọ evaọ aro riẹ.”

14 Kẹsena Joab avọ ezae nọ e rrọ kugbei a te si kẹle ahwo Siria na re a fi ẹmo, rekọ ahwo Siria na a tẹ dhẹ kẹe.+ 15 Nọ ahwo Ammọn a ruẹ nọ ahwo Siria a dhẹ no, ai omarai a tẹ dhẹ kẹ Abishae oniọvo riẹ re, a tẹ ruọ okpẹwho na. Kẹsena Joab ọ tẹ ziọ Jerusalẹm.

16 Nọ ahwo Siria na a ruẹ nọ Izrẹl o fi rai kparobọ no, a te vi enyukọ re a se ahwo Siria nọ a rrọ ubrotọ Ethẹ*+ na kokohọ, yọ Shofak nọ ọ rrọ oletu ogbaẹmo Hadẹdiza ọ wha rai nya.+

17 Nọ a vuẹ Devidi kpahe onana, ọ tẹ nwani koko Izrẹl soso họ, a tẹ fa Jọdan na vrẹ, a tẹ nyabru ae je dhe uhie ẹmo họ re a họre ae. Devidi o dhe uhie ẹmo họ re ọ họre ahwo Siria na, a te lele iei fi ẹmo.+ 18 Rekọ ahwo Siria na a tẹ dhẹ kẹ Izrẹl; Devidi o te kpe ahwo Siria idu ihrẹ (7,000) nọ e rẹ dhẹ ekẹkẹ gbe isoja owotọ idu udhuvẹ (40,000) rai, o te kpe Shofak oletu ogbaẹmo na no. 19 Nọ idibo Hadẹdiza a ruẹ nọ ahwo Izrẹl a fi rai kparobọ no,+ a te ru udhedhẹ kugbe Devidi vẹrẹ vẹrẹ, a tẹ jọ otọ esuo riẹ;+ ahwo Siria a gbẹ rọwo fiobọhọ kẹ ahwo Ammọn ofa ha.

20 Evaọ emuhọ ukpe na,* evaọ okenọ ivie i re ro kpohọ ẹmo, Joab+ ọ tẹ wha egbaẹmo kpohọ ẹmo, ọ tẹ raha ẹkwotọ ahwo Ammọn no; ọ tẹ nyaze ti ko Raba họ,+ rekọ Devidi ọ tẹ jọ Jerusalẹm.+ Joab ọ họre Raba, ọ tẹ raha iẹe fihọ otọ.+ 2 Kẹsena Devidi ọ tẹ ba etu-uvie Malkam no uzou riẹ, ọ tẹ ruẹ nọ etu na ọ gbẹdẹ te etalẹnte* igoru ọvo, yọ u wo itho eghaghae; a te ku ei họ Devidi uzou. Ọ tẹ jẹ jọ okpẹwho na kwa egbo-ẹmo buobu gbidi gbidi rehọ.+ 3 Ọ tẹ rehọ ahwo nọ a jọ okpẹwho na noi ze, ọ tẹ kẹ ae iruo+ nọ a rẹ jọ bru itho, gbe iruo nọ a rẹ jọ rehọ ekwakwa ayọno edada gbe iwhe ro ru iruo. Ere Devidi o ru ikpewho ahwo Ammọn kpobi. Ukuhọ riẹ, Devidi avọ egbaẹmo na kpobi a te zihe kpobọ Jerusalẹm.

4 Nọ onana o vrẹ no, ẹmo ọ tẹ jọ Gizẹ du lahwe evaọ udevie ahwo Izrẹl avọ ahwo Filistia. Evaọ oke yena Sibekae+ ohwo Husha na o te kpe Sipae, ọnọ ọ rrọ ohwo uyẹ Rẹfeyẹm,+ a te fi ai kparobọ.

5 Ahwo Izrẹl avọ ahwo Filistia a tẹ jẹ wariẹ fi ẹmo, Ẹlhenan ọmọzae Jeya o te kpe Lamai oniọvo-ọmọzae Goliat+ ohwo Gat na, ọnọ ozuẹ riẹ o wo ọkpọ nọ o wọhọ ọkpọ ọgbogbodo ahwo nọ a re fi ilulu họ ekpọ ro zuo ehọ.+

6 Ẹmo ọ tẹ jẹ wariẹ du lahwe evaọ Gat,+ oria nọ ọzae jọ nọ ọ rro thesiwa+ ọ jọ, o wo iziabọ ezeza evaọ obọ ọvuọvo, gbe iziawọ ezeza evaọ owọ ọvuọvo, aikpobi udhegbene; yọ ohwo uyẹ Rẹfeyẹm ọ jọ re.+ 7 Ọ jẹ poviẹ+ Izrẹl. Fikiere Jonatan ọmọzae Shimia,+ oniọvo-ọmọzae Devidi o te duwu iei kpe.

8 Ahwo nana yọ ahwo uyẹ Rẹfeyẹm+ evaọ Gat,+ yọ Devidi avọ idibo riẹ a rehọ obọ rai kpe ai.

21 Kẹsena Setan* o te dikihẹ wọso Izrẹl, o te ru Devidi kele ahwo Izrẹl.+ 2 Fikiere Devidi ọ tẹ ta kẹ Joab+ avọ iletu ahwo na nọ: “Wha nya re wha kele ahwo Izrẹl no Biẹ-shiba rite Dan;+ kẹsena wha vẹ niyẹrẹ kẹ omẹ re mẹ ruẹse riẹ unu rai.” 3 Rekọ Joab ọ tẹ ta nọ: “Jọ Jihova o ru ahwo riẹ vihọ isia udhusoi (100)! Olori mẹ ovie, kọ ogbẹrọnọ idibo olori mẹ ahwo na kpobi a rrọ? Kọ fikieme olori mẹ ọ rọ gwọlọ ru oware nana? Kọ fikieme o re ro ru Izrẹl reabe?”

4 Rekọ ẹme ovie na o te gbe ẹme Joab họ otọ. Fikiere Joab ọ tẹ nyavrẹ, ọ tẹ nya Izrẹl soso duwu. Nọ o ru ere no, o te zihe ziọ Jerusalẹm.+ 5 Joab ọ tẹ rehọ unu ahwo nọ a kere fihotọ na kẹ Devidi. Ezae Izrẹl kpobi nọ e rẹ wha egbọdọ i bu te ima ọvo gbe idu ẹgba ọvo (1,100,000), yọ ezae Juda nọ e rẹ wha egbọdọ i bu te idu egba ene gbe udhosa-gbikpe (470,000).+ 6 Rekọ a kere ahwo orua Livae gbe Bẹnjamin fihotọ kugbe ai hi,+ keme ẹme ovie na ọ jọ tọtọtọ kẹ Joab.+

7 Whaọ oware nana o dha Ọghẹnẹ uzẹme na eva gaga, fikiere ọ tẹ kẹ Izrẹl uye. 8 Kẹsena Devidi ọ tẹ ta kẹ Ọghẹnẹ uzẹme na nọ: “Mẹ rọ oware nana nọ me ru na raha uzi+ ulogbo no. Enẹna, ivie rehọ oruthọ odibo ra rọvrẹ riẹ,+ keme oware nọ me ru na u ghẹ gaga.”+ 9 Jihova ọ tẹ ta ẹme kẹ Gad,+ ọruẹ-ude Devidi, inọ: 10 “Nya re whọ ta kẹ Devidi nọ, ‘Enẹ Jihova ọ ta: “Mẹ be kẹ owhẹ eware esa nọ whọ rẹ jọ salọ. Salọ onọ me re ru owhẹ.”’” 11 Fikiere Gad ọ tẹ nyabru Devidi ze, ọ tẹ ta kẹe nọ: “Enẹ Jihova ọ ta, ‘Salọ ojọ, 12 sọ ohọo u re mu ikpe esa,+ hayo ewegrẹ ra i re hwere owhẹ kufiẹ evaọ emerae esa, yọ ọgbọdọ ewegrẹ ra ọ rọ kpahe owhẹ,+ hayo ọgbọdọ Jihova nọ o rẹ wha uye ze evaọ edẹ esa, koyehọ, okpẹyao nọ o re vo nọ ọ rẹ jọ ẹkwotọ na,+ avọ ukọ-odhiwu Jihova nọ ọ rẹ wha ọraha+ ziọ ẹkwotọ Izrẹl soso.’ Enẹna, roro oware nọ mẹ rẹ nyae vuẹ Ọnọ o vi omẹ ze.” 13 Fikiere Devidi ọ tẹ ta kẹ Gad nọ: “O be kẹ omẹ uye gaga. Ivie, jọ me kie fihọ obọ Jihova, keme ọ rẹ re ohrọ gaga;+ rekọ whọ jọ omẹ kie fihọ obọ ohwo-akpọ họ.”+

14 Jihova o te vi okpẹyao nọ o re vo+ ruọ Izrẹl, ahwo idu udhosa-gbikpe (70,000) a tẹ jọ Izrẹl whu.+ 15 U no ere no, Ọghẹnẹ uzẹme na o vi ukọ-odhiwu kpobọ Jerusalẹm re ọ raha iẹe no; rekọ nọ Jihova ọ ruẹ nọ ọ gwọlọ mu ere họ eru, okpẹtu na o tẹ dae,*+ ọ tẹ ta kẹ ukọ-odhiwu nọ ọ be wha ọraha ze na nọ: “U te no!+ Enẹna, fi obọ họ otọ.” Oke yena yọ ukọ-odhiwu Jihova o dikihẹ kẹle oria nọ Ọnan+ ohwo Jebus+ na ọ rẹ jọ si ibi no igbe ekakọ.

16 Nọ Devidi ọ kpare aro riẹ, ọ tẹ ruẹ ukọ-odhiwu Jihova nọ o dikihẹ udevie otọakpọ na avọ idhiwu na, yọ o kru ọgbọdọ+ họ obọ nọ ọ rriẹ rri Jerusalẹm. Devidi avọ ekpako na nọ i ku ehọ-ekpa* họ oma,+ a tẹ nwani kie vovao tuotọ.+ 17 Devidi ọ tẹ ta kẹ Ọghẹnẹ uzẹme na nọ: “Kọ ogbẹrọnọ mẹ họ ohwo nọ ọ ta nọ a kele ahwo na? Mẹ họ ọnọ ọ raha uzi, mẹ họ ọnọ o ru thọ;+ rekọ eme igodẹ nana i ru? O Jihova Ọghẹnẹ mẹ, ivie jọ obọ ra o rọsuọ omẹ avọ uwou ọsẹ mẹ; who du kẹ ahwo ra uye ogaga nana ha.”+

18 Ukọ-odhiwu Jihova ọ tẹ vuẹ Gad+ nọ ọ ta kẹ Devidi re ọ nyae bọ agbada-idhe kẹ Jihova evaọ oria nọ Ọnan ohwo Jebus na ọ rẹ jọ si ibi no igbe ekakọ na.+ 19 Fikiere Devidi ọ tẹ nya wọhọ epanọ Gad ọ rehọ odẹ Jihova ta na. 20 Whaọ evaọ oke yena, Ọnan o je si iwhiti no igbe rai. Nọ o kuomarẹriẹ, ọ tẹ ruẹ ukọ-odhiwu na, emezae ene riẹ nọ e jọ kugbei a te dhere. 21 Nọ Devidi ọ nyabru ei ze, Ọnan ọ tẹ kpare ovao, ọ tẹ ruẹ Devidi, ọ tẹ nwane nya lahwe no oria nọ a rẹ jọ si ibi no igbe ekakọ na ze, o te kigwẹ vovao tuotọ kẹ Devidi. 22 Devidi ọ tẹ ta kẹ Ọnan nọ: “Zẹ* oria nọ whọ rẹ jọ si ibi no igbe ekakọ na kẹ omẹ, re mẹ bọ agbada-idhe fihọ iẹe kẹ Jihova. Zẹe kẹ omẹ unuigho nọ u fo nọ a rẹ zẹe, re uye ogaga na nọ u bi te ahwo na o ruẹsi serihọ.”+ 23 Rekọ Ọnan ọ tẹ ta kẹ Devidi nọ: “Rehọ iẹe wọhọ oware obọra, re olori mẹ ovie na o ru oware nọ u kiehọ iẹe oma.* Rri, mẹ be rehọ iruẹ ze kẹ idhe emahọ na, gbe ewẹ ekpala nọ a re ro si ibi no igbe ekakọ+ na re a ro koko erae họ, jegbe iwhiti rọkẹ idhe ibi ekakọ. Mẹ be rehọ aikpobi kẹ owhẹ.”

24 Rekọ Devidi ovie na ọ tẹ ta kẹ Ọnan nọ: “Ijo, mẹ rẹ rehọ unuigho nọ u fo nọ a rẹ dẹe rọ dẹe mi owhẹ hrọ, keme mẹ te rehọ oware ra mẹ vẹ rehọ iẹe kẹ Jihova ha, hayo dhe idhe emahọ ababọ oware nọ o rẹ rehọ mi omẹ hẹ.”+ 25 Fikiere Devidi ọ tẹ rọ igoru nọ e gbẹdẹ te shẹkẹl* igoru egba ezeza (600) kẹ Ọnan. 26 Devidi ọ tẹ bọ agbada-idhe+ fihọ etẹe kẹ Jihova, o te dhe idhe emahọ gbe idhe ọriẹyeri. O te bo se Jihova, ọnọ ọ kẹ riẹ uyo ẹkwoma erae nọ o vi+ no obọ idhiwu na ze te mahe idhe emahọ na evaọ ehru agbada-idhe na. 27 Kẹsena Jihova ọ tẹ ta kẹ ukọ-odhiwu+ na nọ o zihe ọgbọdọ riẹ fihọ owa. 28 Evaọ oke yena nọ Devidi ọ ruẹ nọ Jihova ọ kẹ riẹ uyo evaọ oria nọ Ọnan ohwo Jebus na ọ rẹ jọ si ibi no igbe ekakọ na, ọ tẹ gbẹ jẹ hai dhe idhe evaọ etẹe. 29 Rekọ evaọ oke yena uwou-udhu Jihova nọ Mosis ọ bọ evaọ obọ udhude na avọ agbada-idhe idhe emahọ na e jọ oria ukpehru na evaọ Gibiọn.+ 30 Rekọ Devidi ọ re sae nyae jọ aro riẹ nekpẹ mi Ọghẹnẹ hẹ, keme ozọ u je mu ei gaga fiki ọgbọdọ ukọ-odhiwu Jihova.

22 Kẹsena Devidi ọ tẹ ta nọ: “Onana họ uwou Jihova Ọghẹnẹ uzẹme na, gbe agbada-idhe nọ ahwo Izrẹl a rẹ jọ dhe idhe emahọ.”+

2 Devidi ọ tẹ ta nọ a se erara+ nọ e jẹ rria ẹkwotọ Izrẹl kokohọ, o te fi ai họ re a jọ enọ i re bru itho, re a bru itho jẹ kare ae ruẹrẹhọ kẹ ebabọ uwou Ọghẹnẹ uzẹme na.+ 3 Devidi ọ tẹ jẹ ruẹrẹ eyọno buobu họ nọ a re ro ru ibubẹ nọ a rẹ rọ tehe ethẹ inuethẹ na gbe ekwakwa nọ a rẹ rọ whẹ eware kugbe, jegbe ekọpa buobu nọ i bu vi ẹwawọ,+ 4 gbe ite-ire sida+ nọ i wo unu hu, keme ahwo Saedọn+ avọ ahwo Taya+ a rehọ ite-ire sida buobu se Devidi. 5 Devidi ọ tẹ ta nọ: “Solomọn ọmọzae mẹ yọ uzoge gheghe, ọ re riẹ oware ovo ho,*+ yọ uwou nọ a te bọ kẹ Jihova na o rẹ jọ onọ u re mu urirẹ gaga,+ re a jọ erẹwho kpobi+ riẹ kpahe oruaro gbe erru+ riẹ. Fikiere, mẹ te ruẹrẹ eware kpahe kẹe.” Ere Devidi ọ rọ ruẹrẹ ekwakwa buobu kpahe taure o te ti whu.

6 Ofariẹ, Devidi o se Solomọn ọmọzae riẹ, ọ tẹ ta kẹe nọ ọ bọ uwou kẹ Jihova Ọghẹnẹ Izrẹl. 7 Devidi ọ ta kẹ Solomọn ọmọzae riẹ nọ: “Rọkẹ omẹ, mẹ jọ udu mẹ wo isiuru nọ mẹ rẹ bọ uwou kẹ odẹ Jihova Ọghẹnẹ mẹ.+ 8 Rekọ ẹme Jihova o te bru omẹ ze inọ, ‘Who kpe azẹ gaga no, yọ who fi emo buobu no. Whọ te bọ uwou kẹ odẹ mẹ hẹ,+ keme whọ jọ otọakpọ na kpe azẹ gaga no evaọ aro mẹ. 9 Rri! Who ti yẹ ọmọzae,+ ọnọ ọ te jọ ohwo udhedhẹ,* yọ me ti ru ei wo omofọwẹ evaọ obọ ewegrẹ riẹ kpobi nọ e wariẹ e riẹ họ,+ keme Solomọn*+ ọ te jọ odẹ riẹ, yọ me ti ru Izrẹl wo udhedhẹ gbe omofọwẹ evaọ oke riẹ.+ 10 Ọye họ ọnọ ọ te bọ uwou kẹ odẹ mẹ.+ Ọ te jọ ọmọzae mẹ, mẹ vẹ te jọ ọsẹ riẹ.+ Mẹ te rehọ agbara-uvie esuo riẹ dikihẹ gaga evaọ Izrẹl bẹdẹ bẹdẹ.’+

11 “Enẹna, ọmọzae mẹ, jọ Jihova ọ jọ kugbe owhẹ, jọ eware e riẹ nya kẹ owhẹ, re whọ bọ uwou Jihova Ọghẹnẹ ra, nwane wọhọ epanọ ọ ta kpahe owhẹ na.+ 12 Jọ Jihova ọ thakpe kẹ owhẹ areghẹ gbe otoriẹ+ okenọ ọ te kẹ owhẹ udu nọ who re ro su Izrẹl, re whọ ruẹsi koko uzi Jihova Ọghẹnẹ ra.+ 13 Eware e te riẹ nya kẹ owhẹ otẹrọnọ whọ romatotọ lele izi+ gbe iziẹibro Jihova nọ ọ ta kẹ Mosis nọ ọ kẹ Izrẹl.+ Wo udu je kru oma ga. Jọ ozọ u mu owhẹ hẹ hayo who guegue he.+ 14 Whaọ mẹ ruẹ uye gaga ruẹrẹ etalẹnte* igoru idu ẹgba ọvo (100,000) họ no rọkẹ uwou Jihova, jegbe etalẹnte isiliva ima ọvo (1,000,000) gbe ekọpa avọ eyọno buobu+ nọ i te epanọ a sae rọ wawọ ae he, mẹ tẹ jẹ ruẹrẹ ite-ire gbe itho họ no,+ rekọ who ti fiba ae. 15 Iruiruo buobu e rrọ kugbe owhẹ, koyehọ enọ i re bru itho, enọ e rẹ rọ itho ma eware,+ ewena ire, gbe oghẹrẹ iruiruo kpobi nọ i wo onaa iruo.+ 16 Igoru, isiliva, ekọpa, gbe eyọno na i bu vi ẹwawọ.+ Kparoma re who mu iruo na họ, ajọ Jihova ọ jọ kugbe owhẹ.”+

17 Kẹsena Devidi ọ tẹ ta kẹ ikpahwo-esuo Izrẹl kpobi re a fiobọhọ kẹ Solomọn ọmọzae riẹ, ọ ta nọ: 18 “Kọ Jihova Ọghẹnẹ rai ọ gbẹ rrọ kugbe owhai jẹ kẹ owhai omofọwẹ evaọ ofẹ kpobi no? Keme ọ rehọ ahwo nọ a be rria ẹkwotọ na họ omẹ obọ no, yọ ẹkwotọ na ọ rrọ otọ Jihova gbe otọ ahwo riẹ no. 19 Enẹna wha gbaemu inọ wha rẹ rehọ udu gbe uzuazọ* rai kpobi gwọlọ Jihova Ọghẹnẹ rai+ je mu aruẹri Jihova Ọghẹnẹ uzẹme na họ ẹbọ,+ re wha ruẹse rehọ etehe ọvọ Jihova gbe ekwakwa ọrẹri Ọghẹnẹ uzẹme na+ ziọ uwou nọ a bọ kẹ odẹ Jihova na.”+

23 Nọ Devidi ọ kpako no jẹ kẹle obọ ekuhọ uzuazọ riẹ no,* ọ tẹ rehọ Solomọn ọmọzae riẹ mu ovie Izrẹl.+ 2 O te koko ikpahwo-esuo Izrẹl kpobi họ, izerẹ na,+ gbe ahwo Livae na.+ 3 A te kele ahwo Livae nọ a rrọ umuo ikpe ọgba kpohọ ehru;+ nọ a kele ai omomọvo a bu te idu ọgbagberee (38,000). 4 Evaọ usu ahwo nana, ahwo idu udhegbene (24,000) e jọ enọ e jẹ rẹrote iruo uwou Jihova, yọ iletu gbe ibruoziẹ idu ezeza (6,000) e jariẹ,+ 5 idu ene (4,000) e jọ irou-unuẹthẹ,*+ yọ idu ene (4,000) e jẹ rehọ ekwakwa ikporakporo na kẹ Jihova ujiro,+ enọ Devidi ọ ta kpahe nọ, “Me ru rai re a rehọ ae kẹ ujiro.”

6 Kẹsena Devidi ọ tẹ ruẹrẹ ae họ* itu-itu+ lele inuwou emezae Livae: Gẹshọn, Kohat, gbe Mẹrarae.+ 7 Ahwo unuwou Gẹshọn họ, Ledan avọ Shimia. 8 Emezae Ledan họ Jehayẹl ọnọ o wuzou, Zitam, gbe Joẹl,+ aimasa. 9 Emezae Shimia họ Shilomọt, Heziẹl, gbe Heran, aimasa. Enana họ enọ i wuzou inuwou abọ ọsẹ nọ i no uwou Ledan ze. 10 Yọ emezae Shimia họ Jehat, Zaena, Jiẹsh, gbe Bẹraya. Imane nana họ emezae Shimia. 11 Jehat ọ jọ ọnọ o wuzou, Zaezah ọ tẹ rọ kẹle iẹe. Rekọ fikinọ Jiẹsh avọ Bẹraya a wo emezae bu hu, a te kele ai fihọ unuwou abọ ọsẹ ọvo jẹ kẹ ae ẹko iruo ọvo.

12 Emezae Kohat họ Amram, Izha,+ Hebrọn, gbe Uziẹl,+ aimane. 13 Emezae Amram họ Erọn+ avọ Mosis.+ Rekọ a salọ Erọn kẹ iruo nọ o re ru ribri,+ o re ru Ọrẹri Erẹri na fo, tei te emezae riẹ, a re dhe idhe evaọ aro Jihova, a rẹ gbodibo kẹe, a vẹ jẹ rọ odẹ riẹ lẹ ẹro eghale ẹsikpobi.+ 14 Rọ kpahe Mosis ohwo Ọghẹnẹ uzẹme na, a kele emezae riẹ kugbe ahwo orua Livae. 15 Emezae Mosis họ Gẹshọm+ avọ Ẹli-iza.+ 16 Evaọ usu emezae Gẹshọm, Shibuẹl+ ọ jọ ọnọ o wuzou. 17 Evaọ uyẹ* Ẹli-iza, Rehabaya+ ọ jọ ọnọ o wuzou; Ẹli-iza o wo emezae efa ha, rekọ emezae Rehabaya e jọ buobu gaga. 18 Evaọ usu emezae Izha,+ Shilomit+ ọ jọ ọnọ o wuzou. 19 Emezae Hebrọn họ Jeraya ọnọ o wuzou, Amaraya ọrọ avọ ivẹ, Jehazaẹl ọrọ avọ esa, gbe Jẹkamiam+ ọrọ avọ ene. 20 Emezae Uziẹl+ họ Maeka ọnọ o wuzou, gbe Ishaya ọrọ avọ ivẹ.

21 Emezae Mẹrarae họ Mahlae avọ Mushae.+ Emezae Mahlae họ Ẹlieza avọ Kish. 22 Ẹlieza o te whu, rekọ o yẹ emezae he, emetẹ ọvo. Fikiere emezae Kish, imoni* rai e tẹ rehọ ai re a jọ eyae rai. 23 Emezae Mushae họ Mahlae, Ida, gbe Jeremọt, aimasa.

24 Enana họ emezae Livae nọ a kere fihotọ evaọ ọvuọ unuwou abọ ọsẹ rai, gbe enọ i wuzou inuwou abọ ọsẹ rai, enọ e rrọ umuo ikpe udhe kpohọ ehru nọ a kele je kere edẹ rai fihotọ re a ru iruo odibọgba evaọ uwou Jihova. 25 Keme Devidi ọ ta nọ: “Jihova Ọghẹnẹ Izrẹl ọ kẹ ahwo riẹ omofọwẹ no,+ yọ ọ te rria Jerusalẹm bẹdẹ bẹdẹ.+ 26 Ofariẹ, ahwo Livae na a gbẹ te hae wọ uwou-udhu na hayo okwakwa ọvo evaọ usu ekwakwa nọ a re ro ru iruo evaọ eva riẹ hẹ.”+ 27 Keme wọhọ epaọ izi urere nọ Devidi o jie, a kele ahwo Livae nọ e jọ umuo ikpe udhe kpohọ ehru. 28 Iruo rai họ re a fiobọhọ kẹ emezae Erọn+ evaọ iruo nọ a re ru evaọ uwou Jihova na, re a rẹrote ighẹ sa-sa+ nọ e rrọ uwou na, ibriwou emuọriọ na, erufuọ oware ọrẹri kpobi, gbe iruo kpobi nọ o gwọlọ nọ a re ru evaọ uwou Ọghẹnẹ uzẹme na. 29 A je fiobọhọ evaọ iruo ebrẹdi nọ a re fihọ ehru ohwohwo na,*+ emamọ eflawa iwuwuru nọ e jọ rọkẹ idhe ibi ekakọ na, ebrẹdi nọ ọ kare ẹvi+ nọ a re ru kpakpala na, ikeki omodhe ọkpakpala na, ebrẹdi nọ a rẹ rọ ewhri gua na,+ gbe eware kpobi nọ a rẹ wawọ re a riẹ epanọ i bu te, gbe enọ a rẹ ma re a riẹ epanọ e rro te. 30 A re dikihẹ kohiohiẹ kohiohiẹ+ re a yere je jiri Jihova, yọ ere ọvona a je ru evaọ owọwọ+ re. 31 A jẹ hai fiobọhọ evaọ oke kpobi nọ a te bi dhe idhe emahọ kẹ Jihova evaọ Edijala,+ edẹ ehaa ọvẹre ọkpokpọ,+ gbe etoke ezi ehaa,+ lele unu ahwo nọ a fodẹ evaọ izi nọ i kiekpahe ae, yọ ere a je ru kẹse kẹse evaọ aro Jihova. 32 U te no ere no, a je ru iruo rai nọ a kẹ rai evaọ uwou-udhu omakugbe na, oria ọrẹri na, gbe enọ a je ro fiobọhọ kẹ inievo rai emezae Erọn evaọ iruo nọ a je ru evaọ uwou Jihova.

24 Whaọ itu nọ a ghale uyẹ Erọn fihọ ena: Emezae Erọn họ Nedab, Abaihu,+ Ẹlieza, gbe Itama.+ 2 Rekọ Nedab avọ Abaihu a kake rọ ọsẹ rai whu,+ yọ a yẹ ọmọzae ọvuọvo ho; rekọ Ẹlieza+ avọ Itama a gbẹ jọ izerẹ. 3 Devidi jegbe Zedọk+ nọ ọ rrọ usu emezae Ẹlieza gbe Ahimẹlẹk nọ ọ rrọ usu emezae Itama a tẹ ghale ae fihọ itu-itu rọkẹ iruo rai. 4 Fikinọ emezae Ẹlieza i wo ahwo nọ a wuzou bu vi emezae Itama, a tẹ rọ ere ghale ae: Emezae Ẹlieza i wo ahwo ikpegbezeza nọ i wuzou inuwou abọ ọsẹ rai, emezae Itama i te wo imaree nọ i wuzou inuwou abọ ọsẹ rai.

5 U no ere no, a tẹ rọ ẹta-ọma ghale ae,+ a salọ ahwo na fihọ itu ivẹ unọjọ utọjọ, keme iletu oria ọrẹri na gbe iletu Ọghẹnẹ uzẹme na e jọ udevie emezae Ẹlieza gbe emezae Itama. 6 Kẹsena Shimaya ọmọzae Nẹtanẹl okere-obe ahwo Livae na o te kere edẹ rai evaọ iraro ovie na, ikpahwo-esuo na, Zedọk+ ozerẹ na, Ahimẹlẹk+ ọmọzae Abayata,+ gbe enọ i wuzou inuwou abọ ọsẹ erọ izerẹ na avọ ahwo Livae na, a tẹ salọ unuwou abọ ọsẹ ọvo rọkẹ Ẹlieza, a tẹ jẹ salọ ọvo kẹ Itama.

7 Ẹta ọsosuọ o kie fihọ kẹ Jehoyarib; ọrọ avọ ivẹ rọkẹ Jedeya, 8 ọrọ avọ esa rọkẹ Herẹm, ọrọ avọ ene rọkẹ Siyorẹm, 9 ọrọ avọ isoi rọkẹ Malkaejah, ọrọ avọ ezeza rọkẹ Mijamin, 10 ọrọ avọ ihrẹ rọkẹ Hakọz, ọrọ avọ eree rọkẹ Abaejah,+ 11 ọrọ avọ izii rọkẹ Jeshua, ọrọ avọ ikpe rọkẹ Shẹkenaya, 12 ọrọ avọ ikpegbọvo rọkẹ Elayashib, ọrọ avọ ikpegbivẹ rọkẹ Jekim, 13 ọrọ avọ ikpegbesa rọkẹ Hupa, ọrọ avọ ikpegbene rọkẹ Jeshẹbeab, 14 ọrọ avọ ikpegbisoi rọkẹ Bilga, ọrọ avọ ikpegbezeza rọkẹ Ima, 15 ọrọ avọ ikpegbihrẹ rọkẹ Hiza, ọrọ avọ ikpegberee rọkẹ Hapizẹz, 16 ọrọ avọ ikpegbizii rọkẹ Pẹtahaya, ọrọ avọ udhe rọkẹ Jehezkẹl, 17 ọrọ avọ udhegbọvo rọkẹ Jekin, ọrọ avọ udhegbivẹ rọkẹ Gemul, 18 ọrọ avọ udhegbesa rọkẹ Delaya, ọrọ avọ udhegbene rọkẹ Meyazaya.

19 Enana họ ọruẹrẹfihotọ iruo rai+ nọ a re ru nọ a tẹ nyaze uwou Jihova wọhọ epaọ uzi nọ Erọn ọsẹ-esẹ rai o fihọ, nwane wọhọ epanọ Jihova Ọghẹnẹ Izrẹl o jie uzi kẹe.

20 Ahwo Livae nọ a kiọkọ ena: evaọ emezae Amram,+ Shubaẹl+ ọ jariẹ; evaọ emezae Shubaẹl, Jediya; 21 erọ Rehabaya:+ evaọ emezae Rehabaya, Ishaya o wuzou; 22 evaọ uyẹ Izha, Shilomọt;+ evaọ emezae Shilomọt, Jehat; 23 yọ evaọ emezae Hebrọn, Jeraya+ o wuzou, Amaraya ọrọ avọ ivẹ, Jehazaẹl ọrọ avọ esa, Jẹkamiam ọrọ avọ ene; 24 evaọ emezae Uziẹl, Maeka; evaọ emezae Maeka, Shemẹ. 25 Oniọvo-ọmọzae Maeka họ Ishaya; evaọ emezae Ishaya, Zẹkaraya.

26 Emezae Mẹrarae+ họ Mahlae avọ Mushae; evaọ emezae Jeazaya, Bino. 27 Emezae Mẹrarae ena: Jeazaya o yẹ Bino, Shoham, Zakọ, gbe Ibrae; 28 evaọ emezae Mahlae, Ẹlieza, ọnọ o yẹ ọmọzae ọvuọvo ho;+ 29 erọ Kish: evaọ emezae Kish, Jeramiẹl; 30 yọ emezae Mushae họ Mahlae, Ida, gbe Jerimọt.

Enana họ emezae Livae lele inuwou abọ ọsẹ rai. 31 Yọ ae omarai a ma ẹta+ re wọhọ epanọ emezae Erọn inievo-emezae rai i ru evaọ iraro Devidi ovie na, Zedọk, Ahimẹlẹk, gbe enọ i wuzou inuwou abọ ọsẹ erọ izerẹ na avọ ahwo Livae na. Rọ kpahe inuwou abọ ọsẹ na, oghẹrẹ ovona dẹẹ a ru kẹ ọnọ o wuzou gbe ọnọ ọ rrọ oniọvo ọmaha riẹ.

25 Nọ u no ere no, Devidi avọ enọ i wuzou itu ahwo nọ a re ru iruo na a tẹ jọ usu emezae Esaf, Himan, gbe Jedutọn+ salọ ejọ re a hai kporo ekpata, ekpata-ifi,+ gbe igogo+ rọ ruẹaro. Edẹ ezae nọ a kẹ iruo nana họ, 2 evaọ emezae Esaf: Zakọ, Josẹf, Nẹtanaya, gbe Asherila, emezae Esaf nọ e jọ otọ ekpakpọ Esaf, enọ e jẹ ruẹaro wọhọ epanọ ovie na ọ kpọ rai. 3 Erọ Jedutọn,+ emezae Jedutọn, ae họ: Gẹdelaya, Zirae, Jesheya, Shimia, Hashabaya, gbe Matataya,+ imazeza, enọ e jọ otọ Jedutọn ọsẹ rai, enọ e jẹ rehọ akpata ruẹaro, yọ a bi yere je jiri Jihova.+ 4 Erọ Himan,+ emezae Himan, ae họ: Bukaya, Matanaya, Uziẹl, Shibuẹl, Jerimọt, Hananaya, Hanenae, Elayata, Gidaltae, Romamtai-iza, Joshbekasha, Malotae, Hota, gbe Maheziọt. 5 Enana kpobi yọ emezae Himan, ọnọ ọ jọ ọruẹ-ude ovie na evaọ eware nọ i kpomahọ Ọghẹnẹ uzẹme na nọ e rẹ wha orro sei;* fikiere Ọghẹnẹ uzẹme na ọ tẹ kẹ Himan emezae ikpegbene gbe emetẹ esa. 6 Ahwo nana kpobi a jẹ rehọ igogo, ekpata-ifi, gbe ekpata+ so ile evaọ uwou Jihova evaọ otọ ekpakpọ ọsẹ rai, keme iruo yena a je ru evaọ uwou Ọghẹnẹ uzẹme na.

Esaf, Jedutọn, gbe Himan a jọ otọ ekpakpọ ovie na.

7 Ae omarai avọ inievo rai nọ a wuhrẹ re a so ile kẹ Jihova a bu te egba ivẹ gbe udhone-gberee (288), aikpobi egba-ile. 8 A tẹ ma ẹta+ re a riẹ iruo nọ a rẹ kẹ ae, te ọsese te ologbo, te ọgba-ile te ọnọ o bi wuhrẹ.

9 Ẹta ọsosuọ o kie fihọ kẹ Josẹf+ ọmọzae Esaf, ọrọ avọ ivẹ rọkẹ Gẹdelaya+ (tei te inievo-emezae riẹ avọ emezae riẹ, ahwo ikpegbivẹ); 10 ọrọ avọ esa rọkẹ Zakọ,+ emezae riẹ avọ inievo-emezae riẹ, ahwo ikpegbivẹ; 11 ọrọ avọ ene rọkẹ Izrae, emezae riẹ avọ inievo-emezae riẹ, ahwo ikpegbivẹ; 12 ọrọ avọ isoi rọkẹ Nẹtanaya,+ emezae riẹ avọ inievo-emezae riẹ, ahwo ikpegbivẹ; 13 ọrọ avọ ezeza rọkẹ Bukaya, emezae riẹ avọ inievo-emezae riẹ, ahwo ikpegbivẹ; 14 ọrọ avọ ihrẹ rọkẹ Jesharila, emezae riẹ avọ inievo-emezae riẹ, ahwo ikpegbivẹ; 15 ọrọ avọ eree rọkẹ Jesheya, emezae riẹ avọ inievo-emezae riẹ, ahwo ikpegbivẹ; 16 ọrọ avọ izii rọkẹ Matanaya, emezae riẹ avọ inievo-emezae riẹ, ahwo ikpegbivẹ; 17 ọrọ avọ ikpe rọkẹ Shimia, emezae riẹ avọ inievo-emezae riẹ, ahwo ikpegbivẹ; 18 ọrọ avọ ikpegbọvo rọkẹ Azarẹl, emezae riẹ avọ inievo-emezae riẹ, ahwo ikpegbivẹ; 19 ọrọ avọ ikpegbivẹ rọkẹ Hashabaya, emezae riẹ avọ inievo-emezae riẹ, ahwo ikpegbivẹ; 20 ọrọ avọ ikpegbesa rọkẹ Shubaẹl,+ emezae riẹ avọ inievo-emezae riẹ, ahwo ikpegbivẹ; 21 ọrọ avọ ikpegbene rọkẹ Matataya, emezae riẹ avọ inievo-emezae riẹ, ahwo ikpegbivẹ; 22 ọrọ avọ ikpegbisoi rọkẹ Jeremọt, emezae riẹ avọ inievo-emezae riẹ, ahwo ikpegbivẹ; 23 ọrọ avọ ikpegbezeza rọkẹ Hananaya, emezae riẹ avọ inievo-emezae riẹ, ahwo ikpegbivẹ; 24 ọrọ avọ ikpegbihrẹ rọkẹ Joshbekasha, emezae riẹ avọ inievo-emezae riẹ, ahwo ikpegbivẹ; 25 ọrọ avọ ikpegberee rọkẹ Hanenae, emezae riẹ avọ inievo-emezae riẹ, ahwo ikpegbivẹ; 26 ọrọ avọ ikpegbizii rọkẹ Malotae, emezae riẹ avọ inievo-emezae riẹ, ahwo ikpegbivẹ; 27 ọrọ avọ udhe rọkẹ Elayata, emezae riẹ avọ inievo-emezae riẹ, ahwo ikpegbivẹ; 28 ọrọ avọ udhegbọvo rọkẹ Hota, emezae riẹ avọ inievo-emezae riẹ, ahwo ikpegbivẹ; 29 ọrọ avọ udhegbivẹ rọkẹ Gidaltae,+ emezae riẹ avọ inievo-emezae riẹ, ahwo ikpegbivẹ; 30 ọrọ avọ udhegbesa rọkẹ Maheziọt,+ emezae riẹ avọ inievo-emezae riẹ, ahwo ikpegbivẹ; 31 ọrọ avọ udhegbene rọkẹ Romamtai-iza,+ emezae riẹ avọ inievo-emezae riẹ, ahwo ikpegbivẹ.

26 Enẹ a ghale irou-unuẹthẹ* na:+ evaọ uyẹ Kora, Mẹshelemaya+ ọmọzae Kore nọ ọ rrọ usu emezae Esaf. 2 Mẹshelemaya o wo emezae, ae họ: Zẹkaraya ọmọ ọsosuọ, Jedayahẹl ọrọ avọ ivẹ, Zebadaya ọrọ avọ esa, Jatniẹl ọrọ avọ ene, 3 Ilam ọrọ avọ isoi, Jehohenan ọrọ avọ ezeza, Ẹlaeho-inai ọrọ avọ ihrẹ. 4 Obẹd-idọm o wo emezae, ae họ: Shimaya ọmọ ọsosuọ, Jehozabad ọrọ avọ ivẹ, Joah ọrọ avọ esa, Seka ọrọ avọ ene, Nẹtanẹl ọrọ avọ isoi, 5 Amiẹl ọrọ avọ ezeza, Isaka ọrọ avọ ihrẹ, gbe Pi-ọletae ọrọ avọ eree; keme Ọghẹnẹ ọ ghale riẹ.

6 A yẹ emezae kẹ Shimaya ọmọzae riẹ, enọ e jọ isu unuwou abọ ọsẹ rai, keme ezae egaga nọ i te ziezi a jọ. 7 Emezae Shimaya họ: Ọtnae, Refaẹl, Obẹd, gbe Ẹlzebad; yọ Elaihu avọ Sẹmakaya inievo-emezae riẹ a jọ ezae nọ i te ziezi re. 8 Ahwo nana kpobi yọ emọ nọ emezae Obẹd-idọm i yẹ; ae omarai avọ emezae rai gbe imoni rai a jọ ezae nọ i te ziezi je fo kẹ iruo na, ahwo udhosa-gbivẹ nọ Obẹd-idọm o wo. 9 Mẹshelemaya+ o wo emezae gbe imoni, ezae ikpegberee nọ i te ziezi. 10 Hosa ọmọzae Mẹrarae o wo emezae. Shimrae ọ jọ ọnọ o wuzou, keme ọsẹ riẹ ọ rehọ e riẹ mu ọnọ o wuzou dede nọ ọye họ ọmọ ọsosuọ họ, 11 Hilkaya ọrọ avọ ivẹ, Tebalaya ọrọ avọ esa, Zẹkaraya ọrọ avọ ene. Emezae Hosa gbe imoni riẹ kpobi ahwo ikpegbesa.

12 Evaọ itu irou-unuẹthẹ* nana, a kẹ enọ i wuzou na iruo wọhọ epanọ a kẹ imoni rai, re a gbodibo evaọ uwou Jihova. 13 Fikiere a tẹ ma ẹta+ evaọ inuwou abọ ọsẹ rai, te evaọ unuwou osese te ologbo, re a riẹ ohwo nọ ọ te jọ unuẹthẹ ovuovo. 14 Kẹsena ẹta nọ a ma fiki unuẹthẹ ofẹ ovatha-ọre, o te kie fihọ kẹ Shẹlẹmaya. A tẹ ma ẹta fiki Zẹkaraya ọmọzae riẹ, ọnọ ọ jọ ọkiroro* owareghẹ, ọriẹ o te kie fihọ orọ ofẹ ẹkpẹlobọ ovatha-ọre. 15 Orọ ofẹ obọze ovatha-ọre u te kie fihọ kẹ Obẹd-idọm, a tẹ rehọ iwou nọ a rẹ jọ sẹro* eware na kẹ emezae riẹ+ re a rou. 16 Orọ ofẹ ukiediwo-ọre nọ o kẹle Unuẹthẹ Shalekẹt evaọ akotọ edhere ologbo nọ ọ nya kpohọ obehru na u te kie fihọ kẹ Shọpim avọ Hosa,+ utu iroiro jọ o kẹle utu iroiro odekọ; 17 imazeza ahwo Livae a jẹ jọ ofẹ ovatha-ọre na; evaọ ofẹ ẹkpẹlobọ ovatha-ọre imane kẹdẹ kẹdẹ, yọ evaọ ofẹ obọze ovatha-ọre imane kẹdẹ kẹdẹ; yọ itu ivẹ nọ e jọ imimava i je rou iwou nọ a rẹ jọ sẹro* eware na;+ 18 imane e jẹ jọ edhere ologbo na+ rou uwou ipila nọ u rri ukiediwo-ọre na, yọ imava e jọ eva uwou ipila na. 19 Enana họ itu irou-unuẹthẹ* nọ i no unuwou Kora avọ unuwou Mẹrarae ze.

20 Evaọ usu ahwo Livae, Ahaejah o wuzou eria ekwakwa-aghae uwou Ọghẹnẹ uzẹme na gbe eria ekwakwa-aghae nọ a re fi eware nọ a ru họ ọrẹri*+ no họ. 21 Emezae Ledan: evaọ emezae Ledan ohwo uyẹ Gẹshọn na, enọ i wuzou inuwou abọ ọsẹ nọ i no oma Ledan ohwo uyẹ Gẹshọn na ze họ Jehayalae,+ 22 gbe emezae Jehayalae, Zitam avọ Joẹl oniọvo-ọmọzae riẹ. Ae a jẹ rẹrote eria ekwakwa-aghae uwou Jihova.+ 23 Evaọ uyẹ Amram, uyẹ Izha, uyẹ Hebrọn, gbe uyẹ Uziẹl,+ 24 Shibuẹl ọmọzae Gẹshọm ọmọzae Mosis họ ọnọ ọ jọ osu nọ ọ jẹ rẹrote iwou nọ a rẹ jọ sẹro* eware na. 25 Rọ kpahe inievo-emezae riẹ, evaọ emọ Ẹli-iza,+ Rehabaya+ ọmọzae riẹ ọ jariẹ, Jesheya ọmọzae riẹ, Joram ọmọzae riẹ, Zikrae ọmọzae riẹ, gbe Shilomọt ọmọzae riẹ. 26 Shilomọt nana avọ inievo-emezae riẹ a jẹ rẹrote eria kpobi nọ a re fi ekwakwa-aghae nọ a ru họ ọrẹri no họ,+ enọ Devidi ovie na,+ ahwo nọ a wuzou inuwou abọ ọsẹ na,+ iletu itu ahwo idu na avọ erọ itu ahwo udhusoi na, gbe iletu ogbaẹmo na a ru họ ọrẹri no. 27 A ru eware jọ nọ a kwa no ẹmo+ ze na+ fihọ ọrẹri re a rọ rẹrote uwou Jihova; 28 jegbe eware kpobi nọ Samuẹle ọruẹ-ude na,+ Sọl ọmọzae Kish, Abna+ ọmọzae Nẹr, gbe Joab+ ọmọzae Zeruya+ a ru họ ọrẹri. A fi oware kpobi nọ ohwo kpobi o ru họ ọrẹri no họ otọ Shilomit avọ inievo-emezae riẹ re a rẹrote ae.

29 Evaọ uyẹ Izha,+ a kẹ Kẹnanaya avọ emezae riẹ iruo ẹruọsa sa-sa evaọ otafe uwou Ọghẹnẹ nọ a rọ jọ isu gbe ibruoziẹ+ evaọ Izrẹl.

30 Evaọ uyẹ Hebrọn,+ Hashabaya avọ imoni riẹ, ezae odu ọvo gbe egba ihrẹ (1,700) nọ i te ziezi họ enọ e jọ isu-esese Izrẹl evaọ ubrotọ ofẹ ukiediwo-ọre Jọdan nọ e jẹ rẹrote iruo Jihova kpobi gbe iruo ovie na. 31 Evaọ uyẹ Hebrọn, Jiraejah+ họ ọnọ o wuzou ahwo Hebrọn evaọ uyẹ nọ unuwou abọ ọsẹ rai u no ze. Evaọ ukpe avọ udhuvẹ esuo Devidi+ a rọ gwọlọ ae via, a tẹ jọ udevie rai ruẹ ezae egaga nọ i te ziezi evaọ Jeza+ nọ ọ rrọ Giliad. 32 Imoni riẹ i bu te idu ivẹ gbe egba ihrẹ (2,700), ezae nọ i te ziezi, enọ i wuzou inuwou abọ ọsẹ rai. Fikiere Devidi ovie na ọ tẹ rehọ ai mu enọ i wuzou ahwo orua Rubẹn, ahwo orua Gad, gbe abọvo orua Manasẹ evaọ ẹme kpobi nọ o kiekpahe Ọghẹnẹ uzẹme na gbe ẹme ovie na.

27 Onana họ unu ahwo Izrẹl, koyehọ, enọ i wuzou inuwou abọ ọsẹ, iletu itu ahwo idu avọ erọ itu ahwo udhusoi,+ gbe iletu rai nọ i je ru iruo kẹ ovie na+ evaọ ẹme kpobi nọ o kiekpahe itu nọ e jẹ hae nyaze je zihe kpo kamara kamara evaọ emerae kpobi nọ e rrọ ukpe na; ahwo idu udhegbene (24,000) e jọ utu ovuovo.

2 Ọnọ o wuzou utu ọsosuọ nọ u re ru iruo evaọ amara ọsosuọ họ Jashobiẹm+ ọmọzae Zabdiẹl, yọ ahwo idu udhegbene (24,000) e jọ utu riẹ. 3 Evaọ usu emezae Pirẹz,+ ọye o wuzou enọ i wuzou itu ahwo nọ a fihọ re i ru iruo evaọ amara ọsosuọ na. 4 Ọnọ o wuzou utu amara avọ ivẹ họ Dodae+ ohwo uyẹ Ahohae+ na, Miklọt ọ jọ osu, yọ ahwo idu udhegbene (24,000) e jọ utu riẹ. 5 Oletu utu avọ esa nọ a fihọ re u ru iruo evaọ amara avọ esa họ Benaya+ ọmọzae Jehoyada+ olori izerẹ na, yọ ahwo idu udhegbene (24,000) e jọ utu riẹ. 6 Benaya nana ọ jọ ọgbaẹmo ọgaga evaọ usu egbaẹmo ọgba na, yọ ọye o wuzou egbaẹmo ọgba na, Amizabad ọmọzae riẹ họ ọnọ o wuzou utu riẹ. 7 Oletu utu avọ ene rọkẹ amara avọ ene họ Asahẹl+ oniọvo-ọmọzae Joab,+ Zebadaya ọmọzae riẹ ọ rọ kẹle iẹe, yọ ahwo idu udhegbene (24,000) e jọ utu riẹ. 8 Oletu utu avọ isoi rọkẹ amara avọ isoi họ Shamhọt ohwo uyẹ Izra na, yọ ahwo idu udhegbene (24,000) e jọ utu riẹ. 9 Oletu utu avọ ezeza rọkẹ amara avọ ezeza họ Aera+ ọmọzae Ikẹsh ohwo Tekoa+ na, yọ ahwo idu udhegbene (24,000) e jọ utu riẹ. 10 Oletu utu avọ ihrẹ rọkẹ amara avọ ihrẹ họ Hilẹz+ ohwo Pẹlon ọrọ orua Ifremu, yọ ahwo idu udhegbene (24,000) e jọ utu riẹ. 11 Oletu utu avọ eree rọkẹ amara avọ eree họ Sibekae+ ohwo Husha ọrọ uyẹ Zira,+ yọ ahwo idu udhegbene (24,000) e jọ utu riẹ. 12 Oletu utu avọ izii rọkẹ amara avọ izii họ Abi-iza+ ohwo Anatọt+ ọrọ orua Bẹnjamin, yọ ahwo idu udhegbene (24,000) e jọ utu riẹ. 13 Oletu utu avọ ikpe rọkẹ amara avọ ikpe họ Meharae+ ohwo Nẹtofa ọrọ uyẹ Zira,+ yọ ahwo idu udhegbene (24,000) e jọ utu riẹ. 14 Oletu utu avọ ikpegbọvo rọkẹ amara avọ ikpegbọvo họ Benaya+ ohwo Piratọn ọrọ emezae Ifremu, yọ ahwo idu udhegbene (24,000) e jọ utu riẹ. 15 Oletu utu avọ ikpegbivẹ rọkẹ amara avọ ikpegbivẹ họ Hẹldae ohwo Nẹtofa ọrọ unuwou Otniẹl, yọ ahwo idu udhegbene (24,000) e jọ utu riẹ.

16 Ahwo nana họ isu erua Izrẹl: Evaọ orua Rubẹn, Ẹli-iza ọmọzae Zikrae ọ jọ osu; evaọ orua Simiọn, Shẹfataya ọmọzae Meaka; 17 evaọ orua Livae, Hashabaya ọmọzae Kẹmuẹl; evaọ uyẹ Erọn, Zedọk; 18 evaọ orua Juda, Elaihu,+ oniọvo-ọmọzae Devidi jọ; evaọ orua Isaka, Omri ọmọzae Maekẹl; 19 evaọ orua Zẹbulọn, Ishmeya ọmọzae Obedaya; evaọ orua Naftalae, Jerimọt ọmọzae Azriẹl; 20 evaọ orua Ifremu, Hoshia ọmọzae Azazaya; evaọ abọvo orua Manasẹ, Joẹl ọmọzae Pedaya; 21 evaọ abọvo orua Manasẹ nọ o rrọ Giliad, Idọ ọmọzae Zẹkaraya; evaọ orua Bẹnjamin, Jaasayẹl ọmọzae Abna;+ 22 evaọ orua Dan, Azarẹl ọmọzae Jeroham. Ahwo nana họ enọ e jọ ikpahwo-esuo erua Izrẹl.

23 Devidi o kele ahwo nọ a jọ ikpe udhe kpohọ otọ họ, keme Jihova ọ ya eyaa nọ o ti ru Izrẹl jọ buobu wọhọ isi obọ ehru* na.+ 24 Joab ọmọzae Zeruya o mu ahwo na họ ekele no vẹre, rekọ o kele i rai re he; Ọghẹnẹ o te mu ofu kẹ Izrẹl* fiki ahwo na nọ a kele na,+ a gbe kere unu ahwo na fihọ iku eware nọ e via evaọ oke Devidi ovie na ha.

25 Azmevẹt ọmọzae Adiẹl ọ jẹ rẹrote eria ekwakwa-aghae ovie na.+ Jonatan ọmọzae Uzaya ọ tẹ jẹ rẹrote iwou nọ a rẹ jọ sẹro eware* evaọ obọ idhu na, evaọ ikpewho na, evaọ iwhre na, gbe evaọ iwou ikpehru na. 26 Ẹzrae ọmọzae Kilub o wuzou ewhẹrẹ na. 27 Shimia ohwo Rema na ọ jẹ rẹrote egbọ evaene na; Zabdae ohwo Sifmọt ọ jẹ rẹrote eria nọ a re fi enwaene* nọ a rehọ ibi evaene na ru họ. 28 Bale-henan ohwo Gida na ọ jẹ rẹrote egbọ olivi gbe ire sikamọ+ nọ e jọ Shefila* na;+ Joash ọ jẹ rẹrote iwou nọ iwhri e rẹ jọ. 29 Shitrae ohwo Sharọn na ọ jẹ rẹrote ewa erao nọ e rẹ re ẹbe evaọ Sharọn,+ yọ Shefat ọmọzae Adlai ọ jẹ rẹrote ewa erao evaọ ikiekpotọ epraprara na. 30 Obil ohwo Ishmẹl na ọ jẹ rẹrote ekamẹle na; Jediya ohwo Mẹrọnọt na ọ jẹ rẹrote eketekete* na. 31 Jeziz ohwo Hega na ọ jẹ rẹrote ithuru erao na. Ahwo nana kpobi họ enọ i wuzou eware nọ Devidi ovie na o wo.

32 Jonatan,+ ọmọ oniọvo Devidi ọ jọ ọkiroro,* ọzae nọ o wo otoriẹ, ọ tẹ jẹ jọ okere-obe, yọ Jehayẹl ọmọzae Hakmonae ọ jẹ rẹrote emezae ovie na.+ 33 Ahitofẹl+ ọ jọ ọkiroro* ovie na, Hushae+ ohwo uyẹ Akae na ọ tẹ jọ ogbẹnyusu ovie na.* 34 U te no Ahitofẹl no, amọfa nọ e jariẹ họ Jehoyada ọmọzae Benaya+ gbe Abayata;+ yọ Joab+ ọ jọ oletu ogbaẹmo ovie na.

28 Kẹsena Devidi o te se ikpahwo-esuo Izrẹl kpobi kokohọ ziọ Jerusalẹm, koyehọ: ikpahwo-esuo erua na, iletu itu+ nọ i re ru iruo kẹ ovie na, iletu itu ahwo idu na avọ erọ itu ahwo udhusoi na,+ enọ i wuzou eware ovie na kpobi gbe erao riẹ+ gbe erọ emezae riẹ,+ jegbe iruiruo ighẹ na gbe ọzae kpobi nọ ọ rrọ ọgba je te ziezi.+ 2 Devidi ovie na ọ tẹ kpama dikihẹ, ọ tẹ ta nọ:

“Wha gaviezọ kẹ omẹ, imoni mẹ gbe ahwo mẹ. Mẹ jọ udu mẹ wo isiuru nọ mẹ rẹ bọ uwou nọ o rẹ jọ oria eriosehọ kẹ etehe ọvọ Jihova, o vẹ jẹ jọ akpala nọ Ọghẹnẹ mai ọ rẹ rọ awọ kpahe,+ yọ mẹ ruẹrẹ eware kpahe kẹ ebabọ na.+ 3 Rekọ Ọghẹnẹ uzẹme na ọ ta kẹ omẹ nọ, ‘Whọ te bọ uwou kẹ odẹ mẹ hẹ,+ keme whẹ yọ ohwo nọ o fi emo buobu no, who te je kpe azẹ gaga no.’+ 4 Rekọ Jihova Ọghẹnẹ Izrẹl ọ salọ omẹ evaọ usu ahwo uwou ọsẹ mẹ kpobi re mẹ jọ ovie Izrẹl bẹdẹ bẹdẹ,+ keme ọ salọ Juda re ọ jọ osu,+ yọ evaọ uwou Juda, uwou ọsẹ mẹ+ ọ salọ, evaọ usu emezae ọsẹ mẹ, mẹ họ ọnọ o kuenu kẹ, re ọ rehọ omẹ mu ovie kẹ Izrẹl soso.+ 5 Yọ evaọ usu emezae mẹ kpobi—keme Jihova ọ kẹ omẹ emezae buobu+—Solomọn ọmọzae mẹ+ ọ salọ re ọ keria agbara-uvie esuo Jihova evaọ Izrẹl.+

6 “Ọ ta kẹ omẹ nọ, ‘Solomọn ọmọzae ra họ ọnọ ọ te bọ uwou mẹ gbe ighẹ sa-sa nọ e te jọ uwou mẹ, keme mẹ salọ e riẹ no re ọ jọ ọmọzae mẹ, yọ mẹ te jọ ọsẹ riẹ.+ 7 Mẹ te rehọ esuo uvie riẹ dikihẹ gaga bẹdẹ bẹdẹ+ otẹrọnọ ọ gba riẹ mu nọ o re gbe koko ijaje mẹ jegbe iziẹibro mẹ,+ wọhọ epanọ o bi ru enẹna.’ 8 Fikiere mẹ be jọ iraro Izrẹl soso, ogbotu ahwo Jihova ta ẹme nana, onọ Ọghẹnẹ mai ọ be rọ ezọ riẹ yo, inọ: Wha romatotọ koko jẹ kiẹ gwọlọ ijaje Jihova Ọghẹnẹ rai kpobi, re wha ruẹse gbẹ jọ otọ uwoma na,+ wha ve je kpeze iei kẹ emọ rai re o jọ ukuoriọ rai bẹdẹ bẹdẹ.

9 “Rọkẹ owhẹ, Solomọn ọmọzae mẹ, riẹ Ọghẹnẹ ọsẹ ra re whọ rọ udu ra kpobi+ gbe uzuazọ* evawere* gọe, keme Jihova ọ rẹ kiẹ udu kpobi riwi,+ yọ ọ rẹ riẹ ẹjiroro kpobi nọ o lẹliẹ ohwo wo oghẹrẹ iroro jọ.+ Otẹrọnọ whọ kiẹ gwọlọ iẹe, o ti ru re whọ ruẹ e riẹ,+ rekọ whọ tẹ nyasiọ iẹe ba, ọ te siọ owhẹ bẹdẹ bẹdẹ.+ 10 Enẹna muẹrohotọ, keme Jihova ọ salọ owhẹ no re whọ bọ uwou nọ o rẹ jọ oria aruẹri. Wo udu re who mu iruo họ.”

11 Kẹsena Devidi ọ tẹ kẹ Solomọn ọmọzae riẹ omaa+ nọ a te rọ bọ ọmọgwa+ uwou na gbe orọ ibriwou sa-sa uwou na, iwou riẹ nọ a rẹ jọ sẹro eware, ibriwou obehru riẹ, ibriwou obeva riẹ, gbe uwou ururu ẹruẹrẹhọ na.*+ 12 Ọ kẹ riẹ omaa ebabọ oware kpobi nọ a rọ ẹkwoma ẹzi Ọghẹnẹ dhesẹ kẹe, koyehọ omaa nọ a rẹ rọ bọ ighẹ sa-sa+ nọ e te jọ uwou Jihova na, ibriwou emuọriọ kpobi nọ e te wariẹe họ, eria ekwakwa-aghae nọ e te jọ uwou Ọghẹnẹ uzẹme na, gbe eria ekwakwa-aghae nọ a ru họ ọrẹri* no;+ 13 ọ tẹ jẹ kẹe ithubro kpahe itu izerẹ na+ gbe itu ahwo Livae na, kpahe oghẹrẹ iruo kpobi nọ a re ru evaọ uwou Jihova, jẹ kpahe ekwakwa kpobi nọ a re ro ru iruo evaọ uwou Jihova; 14 ọ tẹ jẹ fodẹ epanọ igoru na e rẹ gbẹdẹ te, igoru nọ a re ro ru ekwakwa kpobi nọ a re ro ru oghoghẹrẹ iruo sa-sa na, epanọ ekwakwa isiliva na kpobi e rẹ gbẹdẹ te, jegbe ekwakwa kpobi nọ a re ro ru oghoghẹrẹ iruo sa-sa na; 15 ọ tẹ jẹ fodẹ epanọ ekpọ-edada ikpẹ igoru+ na avọ ikpẹ igoru rai e rẹ gbẹdẹ te, epanọ ekpọ-edada ikpẹ na avọ ikpẹ rai e rẹ gbẹdẹ te, jegbe epanọ ekpọ-edada ikpẹ isiliva na e rẹ gbẹdẹ te, koyehọ ọkpọ-edada ukpẹ ọvuọvo avọ ikpẹ riẹ wọhọ epaọ iruo nọ a rẹ rehọ iẹe ru; 16 jegbe epanọ igoru nọ a re ro ru emẹjẹ ebrẹdi nọ a re fihọ ehru ohwohwo na*+ e rẹ gbẹdẹ te, enọ a re ro ru emẹjẹ ọvuọvo, jegbe isiliva nọ a re ro ru emẹjẹ isiliva na, 17 enọ a re ro ru efọko na, imidhe ikokodo na, igho-ame ilogbo erọ emamọ igoru na, gbe epanọ imidhe ikokodo esese igoru+ na ọvuọvo e rẹ gbẹdẹ te, gbe epanọ imidhe ikokodo esese isiliva na ọvuọvo e rẹ gbẹdẹ te. 18 Ọ tẹ jẹ fodẹ epanọ igoru nọ a ru fo no nọ a re ro ru agbada-idhe insẹnse+ na e rẹ gbẹdẹ te, gbe onọ a re ro ru uwoho akẹkẹ na,+ koyehọ, chẹrub+ igoru ivẹ nọ e gha ibekpe rai fihọ je ruru etehe ọvọ Jihova na. 19 Devidi ọ tẹ ta nọ: “Obọ Jihova o jọ ehru mẹ, o te ru omẹ wo otoriẹ udidi nọ mẹ sai ro kere oware kpobi nọ o rrọ omaa ebabọ+ uwou na fihotọ.”+

20 Kẹsena Devidi ọ tẹ ta kẹ Solomọn ọmọzae riẹ nọ: “Wo udu je kru oma ga re who mu iruo họ. Jọ ozọ u mu owhẹ hẹ hayo who guegue he, keme Jihova Ọghẹnẹ, Ọghẹnẹ mẹ, ọ rrọ kugbe owhẹ.+ Ọ te nyasiọ owhẹ ba hayo gbabọkẹ owhẹ hẹ,+ rekọ ọ te jọ kugbe owhẹ bẹsenọ iruo uwou Jihova na kpobi i re re no. 21 Yọ itu izerẹ+ na gbe itu ahwo Livae+ na nọ i re ru iruo uwou Ọghẹnẹ uzẹme na kpobi e rrọ etenẹ na. Who te je wo iruiruo nọ i wo onaa nọ u no eva ze nọ a re ru oghẹrẹ iruo kpobi,+ jegbe ikpahwo-esuo+ na gbe ahwo na kpobi nọ a ti ru oware kpobi nọ whọ ta.”

29 Kẹsena Devidi ovie na ọ tẹ ta kẹ ogbotu ahwo na kpobi nọ: “Solomọn ọmọzae mẹ, ọnọ Ọghẹnẹ ọ salọ na+ ọ gbẹ maha yọ ọ re riẹ oware ovo ho,+ yọ iruo na e rrọ ruaro, keme orọnikọ etẹmpol* nọ a be bọ kẹ ohwo-akpọ họ, rekọ rọkẹ Jihova Ọghẹnẹ.+ 2 Yọ mẹ daoma mẹ kpobi ruẹrẹ eware họ kẹ uwou Ọghẹnẹ mẹ no, mẹ ruẹrẹ igoru họ kẹ eware igoru, isiliva rọkẹ eware isiliva, ekọpa rọkẹ eware ekọpa, eyọno rọkẹ eware ayọno,+ gbe ite-ire+ rọkẹ eware nọ a te rọ ire ru, itho oniks, gbe itho nọ a rẹ rọ isimeti ma kugbe, itho esese nọ i wo oghoghẹrẹ ekọlọ nọ a rẹ rọ whẹ erru họ oria, oghẹrẹ utho oghaghae kpobi, gbe itho alabasta nọ i bu gaga. 3 Ofariẹ, fiki evawere nọ me wo kpahe uwou Ọghẹnẹ mẹ,+ mẹ be jẹ rehọ igoru gbe isiliva obọmẹ ze+ rọkẹ uwou Ọghẹnẹ mẹ ro fiba eware kpobi nọ mẹ ruẹrẹhọ no re a rọ bọ uwou ọrẹri na, 4 koyehọ etalẹnte* igoru idu esa (3,000) nọ a rehọ no obọ Ofaya+ ze, gbe etalẹnte isiliva idu ihrẹ (7,000) nọ a ru fo no, enọ a re ro ruru igbẹhẹ uwou na, 5 igoru na rọkẹ eware igoru, isiliva na rọkẹ eware isiliva, jẹ rọkẹ iruo kpobi nọ ewena i ti ru. Enẹna, ono ọ gwọlọ rọ unevaze nya lahwe nẹnẹ na re ọ kẹ Jihova okẹ?”+

6 Fikiere ikpahwo-esuo inuwou abọ ọsẹ na, ikpahwo-esuo erua Izrẹl, iletu itu ahwo idu gbe erọ itu ahwo udhusoi na,+ gbe iletu nọ i wuzou iruo ovie+ na a tẹ rọ unevaze nya lahwe. 7 A tẹ zọhọ eware nana ze rọkẹ iruo uwou Ọghẹnẹ uzẹme na: etalẹnte igoru idu isoi (5,000), edariki* idu ikpe (10,000), etalẹnte isiliva idu ikpe (10,000), etalẹnte ekọpa idu ikpegberee (18,000), gbe etalẹnte ayọno idu ẹgba ọvo (100,000). 8 Ohwo kpobi nọ o wo itho eghaghae ọ tẹ rehọ ae ziọ oria ekwakwa-aghae uwou Jihova, yọ Jehayẹl+ ohwo uyẹ Gẹshọn+ ọ jẹ rẹrote ai. 9 Ahwo na a tẹ jẹ ghọghọ fiki ekẹ unevaze nana nọ a rọ ze na, keme udu rai kpobi+ a rọ rehọ ekẹ unevaze na kẹ Jihova, yọ Devidi ovie na ọ ghọghọ gaga re.

10 Kẹsena Devidi ọ tẹ jọ iraro ogbotu na kpobi jiri Jihova. Devidi ọ ta nọ: “Jọ a jiri owhẹ bẹdẹ bẹdẹ,* O Jihova Ọghẹnẹ Izrẹl ọsẹ mai. 11 O Jihova, whọ rrọ ruaro,+ who wo ẹgba,+ who wo erru, who re mu urirẹ, who te je wo oruaro,*+ keme eware kpobi nọ e rrọ idhiwu gbe otọakpọ na era.+ O Jihova,+ whẹ o wo uvie na. Whẹ họ Ọnọ o ru omara wuzou eware kpobi. 12 Obọ ra efe gbe oruaro i no ze,+ who bi su eware kpobi,+ yọ ogaga+ gbe ẹgba+ e rrọ owhẹ obọ, obọ ra o rẹ sai ru ohwo jọ ruaro,+ o rẹ jẹ kẹ ahwo kpobi ẹgba.+ 13 Enẹna, O Ọghẹnẹ mai, ma yere owhẹ je bi jiri odẹ owoma ra.

14 “Ghele na, mẹ yọ ono, kọ ahwo mẹ yọ amono nọ ma sae be rọ kẹ okẹ unevaze utiona? Keme obọ ra eware kpobi i no ze, yọ eware nọ i no obọ ra ze ma kẹ owhẹ na. 15 Keme mai yọ erara gbe enọ e rrọ ukane evaọ aro ra, wọhọ esẹ-esẹ mai kpobi.+ Keme edẹ uzuazọ mai evaọ otọakpọ na e wọhọ uwoho,+ i wo ẹruore he. 16 O Jihova Ọghẹnẹ mai, ekwakwa efe nana kpobi nọ ma ruẹrẹhọ no re ma rọ bọ uwou kẹ odẹ ọrẹri ra na obọ ra i no ze, yọ whẹ o wo rai kpobi. 17 O Ọghẹnẹ mẹ, mẹ riẹ vevẹ nọ whọ rẹ kiẹ udu na riwi,+ yọ ẹgbakiete* ọ rẹ were owhẹ.+ Udu mẹ kpobi* mẹ rọ rehọ unevaze kẹ ekẹ nana kpobi na, yọ eva e were omẹ gaga nọ mẹ rọ ruẹ ahwo ra nọ a rrọ etenẹ na nọ a be kẹ owhẹ ekẹ unevaze. 18 O Jihova, Ọghẹnẹ Abraham, Aiziki, gbe Izrẹl, enọ e rrọ esẹ-esẹ mai, ru re isiuru gbe iroro nana e gbẹ jọ udu ahwo ra bẹdẹ bẹdẹ, re whọ kpọ udu rai bru owhẹ ze.+ 19 Re who ru Solomọn ọmọzae mẹ rehọ udu riẹ kpobi+ kẹ owhẹ, re ọ ruẹsi koko ijaje ra,+ ekareghẹhọ ra, gbe izi ra, o ve ru eware nana kpobi jẹ bọ etẹmpol* nọ mẹ ruẹrẹ eware họ kẹ no na.”+

20 Kẹsena Devidi ọ tẹ ta kẹ ogbotu ahwo na kpobi nọ: “Enẹna wha jiri Jihova Ọghẹnẹ rai.” Ogbotu na soso a te jiri Jihova Ọghẹnẹ esẹ-esẹ rai, a te kigwẹ je kiẹzẹ vovao tuotọ kẹ Jihova gbe ovie na. 21 A tẹ ruabọhọ je dhe idhe kẹ Jihova avọ idhe emahọ+ nọ a je dhe kẹ Jihova rite ẹdẹ nọ o lele i rie, eware nọ a ro dhe idhe na họ, iruẹ odu ọvo (1,000), igbo odu ọvo (1,000), imigodẹ ezae odu ọvo (1,000), avọ idhe udi rai;+ a dhe idhe buobu rọkẹ Izrẹl soso.+ 22 Evaọ ẹdẹ yena a ruabọhọ jẹ re jẹ da evaọ aro Jihova yọ a be ghọghọ gaga,+ a tẹ rọ Solomọn ọmọzae Devidi mu ovie orọ avọ isiava je wholo iei evaọ aro Jihova re ọ jọ osu,+ a te je wholo Zedọk re ọ jọ ozerẹ.+ 23 Solomọn ọ tẹ keria agbara-uvie Jihova+ wọhọ ovie evaọ ẹta Devidi ọsẹ riẹ, yọ eware e riẹ nya kẹe, yọ ahwo Izrẹl kpobi a je yoẹme kẹe. 24 Ikpahwo-esuo+ na kpobi, egbaẹmo egaga+ na, gbe emezae Devidi ovie+ na kpobi a rehọ omarai kpotọ kẹ Solomọn ovie na. 25 Jihova o ru Solomọn kpehru gaga evaọ aro ahwo Izrẹl kpobi, ọ tẹ jẹ kẹe oruaro esuo uvie, utionọ ovie Izrẹl ọvuọvo o ri wo vẹre he.+

26 Ere Devidi ọmọzae Jẹsi o ro su Izrẹl soso, 27 yọ etoke* nọ o su evaọ Izrẹl o jọ ikpe udhuvẹ. Ọ jọ Hebrọn su ikpe ihrẹ,+ ọ tẹ jọ Jerusalẹm su ikpe ọgbagbesa.+ 28 Ọ who gaga o te ti whu, ọ rria uzuazọ uthethei+ nọ o da riẹ ẹro,* o te je wo efe, gbe oruaro nọ e da riẹ ẹro; Solomọn ọmọzae riẹ o te zihe ruọ ovie evaọ ẹta riẹ.+ 29 Rọ kpahe iku uzuazọ Devidi, no emuhọ rite ekuhọ, a kere i rai fihọ usu eme Samuẹle ọruẹ-ude na, Netan+ ọruẹaro na, gbe Gad+ ọruẹ-ude na, 30 je kugbe iruẹru esuo riẹ kpobi, ogaga riẹ, gbe eware nọ e via evaọ oke yena nọ i kiekpahe ọyomariẹ gbe Izrẹl jegbe ekwotọ-ivie kpobi nọ e wariẹ e rai họ.