MALAKAE

1 Ẹme nọ Ọghẹnẹ o whowho via:

Ẹme Jihova nọ ọ rehọ Malakae* ta kẹ Izrẹl:

2 “Me dhesẹ uyoyou kẹ owhai no,”+ ere Jihova ọ ta.

Rekọ wha be ta nọ: “Oghẹrẹ vẹ who ro dhesẹ uyoyou kẹ omai no?”

Jihova ọ ta nọ, “Kọ ogbẹrọnọ Esọ yọ oniọvo Jekọp?+ Rekọ Jekọp me you, 3 me te mukpahe Esọ;+ yọ me ru igbehru riẹ zihe ruọ oria ofofe+ jẹ siọ ukuoriọ riẹ ba kẹ ikozi nọ e rrọ udhude.”+

4 “Dede nọ Edọm ọ be ta nọ, ‘A raha omai kuotọ no, rekọ ma ti zihe, ma vẹ wariẹ bọ eria nọ a raha no na,’ enẹ Jihova olori egbaẹmo ọ ta, ‘A te bọ, rekọ me ti kporo ai fihọ otọ, a ve ti se ai “ẹkwotọ umuomu” jegbe “ahwo nọ Jihova o brukpe no bẹdẹ bẹdẹ.”+ 5 Ibiaro obọrai e te ruẹ e riẹ, wha vẹ te ta nọ: “Jọ a kpare Jihova kpehru evaọ ẹkwotọ Izrẹl soso.”’”

6 “‘Ọmọzae ọ rẹ kẹ ọsẹ riẹ ọghọ,+ odibo ọ vẹ jẹ kẹ olori riẹ ọghọ. Fikiere, otẹrọnọ mẹ yọ ọsẹ,+ kọ ọghọ nọ u fo nọ wha rẹ kẹ omẹ ọ rrọ?+ Yọ otẹrọnọ mẹ yọ olori,* kọ ozodhẹ* nọ u fo nọ wha re wo kẹ omẹ o rrọ?’ ere Jihova olori egbaẹmo ọ ta kẹ owhai izerẹ nọ i bi rri odẹ mẹ vo.+

“‘Rekọ wha be ta nọ: “Oghẹrẹ vẹ ma ro rri odẹ ra vo?”’

7 “‘Ẹkwoma emu* nọ ọ raha no nọ wha be rehọ ziọ agbada-idhe mẹ.’

“‘Yọ wha be ta nọ: “Oghẹrẹ vẹ ma rọ kẹ owhẹ emu nọ ọ raha no?”’

“‘Ẹkwoma ẹme nọ wha be ta nọ: “Emẹjẹ Jihova+ yọ oware nọ a re rri vo.” 8 Yọ wha tẹ rehọ arao nọ o tuaro ze bi ro dhe idhe, wha rẹ ta nọ: “Oware ovo o jariẹ thọ họ.” Nọ wha tẹ rehọ arao nọ ọ ko hayo ọnọ ọ be mọ ze, wha rẹ ta nọ: “Oware ovo o jariẹ thọ họ.”’”+

“Ivie, wha dae rehọ ai bru ọba rai. Kọ eva rai e te were iẹe hayo kọ o ti dede owhai rehọ avọ aruoriwo?” ere Jihova olori egbaẹmo ọ ta.

9 “Whaọ enẹna, ivie wha lẹ Ọghẹnẹ* re o wo aruoriwo kẹ omai. Nọ orọnọ oghẹrẹ ekẹ itieye na i bi no obọ rai ze na, kọ o ti dede owhai rehọ avọ aruoriwo?” ere Jihova olori egbaẹmo ọ ta.

10 “Kọ ono evaọ usu rai ọ rẹ rọ unevaze si ethẹ* na họ?+ Wha re tube koko erae họ agbada-idhe mẹ ababọ osa nọ wha re mi hi.+ Eva rai e be were omẹ vievie he,” ere Jihova olori egbaẹmo ọ ta, “yọ uvumọ okẹ nọ u bi no obọ rai ze nọ o be were omẹ o rrọ họ.”+

11 “Odẹ mẹ o te jọ ruaro evaọ udevie erẹwho na, no obonọ ọre ọ rẹ va no ze rite obonọ o re jo kiediwi.*+ A te jọ oria kpobi ru iwiri idhe kuye, yọ a te kẹ ekẹ nọ e rẹ wha orro se odẹ mẹ, okẹ ofuafo; keme odẹ mẹ o te jọ ruaro evaọ udevie erẹwho na,”+ ere Jihova olori egbaẹmo ọ ta.

12 “Rekọ wha bi zue ei*+ ẹkwoma ẹme nọ wha be ta nọ, ‘Emẹjẹ Jihova o gbeku no, ibi-ire riẹ, koyehọ emu nọ ọ rrọ ehru riẹ o fioka ha.’+ 13 Wha tẹ jẹ be ta nọ, ‘Rri! Uye na o ga kẹhẹ!’ yọ wha bi nyinwe họ iẹe,” ere Jihova olori egbaẹmo ọ ta. “Yọ wha be rehọ erao nọ a tho, enọ e ko, gbe enọ e be mọ ze. Ẹhẹ, eware itieye wha be rọ ze nọ okẹ! Kọ me re mi owhai eware itieye na no obọ?”+ ere Jihova ọ ta.

14 “Uye u te ohwo ẹghẹ nọ o wo arao ọzae nọ ọ rrọ omakọkọ evaọ uthuru riẹ, rekọ nọ ọ tẹ ya eyaa, ọ vẹ rehọ arao nọ ọ be mọ* ro dhe idhe kẹ Jihova. Mẹ yọ Ovie ologbo,”+ ere Jihova olori egbaẹmo ọ ta, “yọ odẹ mẹ u ti mu ọwhewhe evaọ udevie erẹwho na.”+

2 “O whai izerẹ, whai ujaje nana o rrọ kẹ.+ 2 Otẹrọnọ wha gbẹ rọwo gaviezọ jẹ rehọ iẹe te udu re wha kẹ odẹ mẹ orro ho,” ere Jihova olori egbaẹmo ọ ta, “me ti vi uye na se owhai,+ yọ me ti zihe eghale rai ruọ iye.+ Me tube zihe eghale na ruọ iye no, keme wha be rehọ iẹe te udu hu.”

3 “Rri! Mẹ te rọ fiki rai raha* ubi nọ wha kọ,+ yọ mẹ te frẹ isọ erao vọ ovao rai, isọ erao nọ wha ro dhe idhe evaọ ehaa rai; yọ a te whẹ owhai avọ isọ na kufiẹ.* 4 Wha vẹ te riẹ nọ mẹ kẹ owhai ujaje nana re ọvọ nọ mẹ re kugbe Livae ọ seba ẹraha,”+ ere Jihova olori egbaẹmo ọ ta.

5 “Ọvọ nọ mẹ re kugbei ọ jọ ọrọ uzuazọ gbe udhedhẹ, onọ mẹ kẹ riẹ, jẹ kẹe ozodhẹ* kugbe. Ẹhẹ, o wo ozodhẹ kẹ omẹ, o te je wo adhẹẹ kẹ odẹ mẹ. 6 Uzi* uzẹme o jọ unu riẹ,+ yọ a jọ igbenu riẹ ruẹ uvumọ ẹme omuomu hu. O lele omẹ nya evaọ udhedhẹ gbe ẹrẹreokie,+ yọ o ku ahwo buobu rẹriẹ no edhere oyoma. 7 Keme u fo nọ ozerẹ ọ rẹ rọ igbenu riẹ sẹro eriariẹ, yọ unu riẹ u fo nọ ahwo a rẹ jọ gwọlọ uzi* na,+ fikinọ ọnyukọ Jihova olori egbaẹmo ọ rrọ.

8 “Rekọ whai omarai wha no edhere na no. Wha ru ahwo buobu zoruẹ no evaọ oghẹrẹ nọ wha bi koko uzi* na.+ Wha raha ọvọ nọ mẹ re kugbe Livae no,”+ ere Jihova olori egbaẹmo ọ ta. 9 “Fikiere me ti ru owhai fihọ enọ a re rri vo je hrẹ owhai kpotọ evaọ aro ahwo na kpobi, keme wha nya evaọ idhere mẹ hẹ, wha te je dhesẹ ọriẹwẹ evaọ ekoko uzi na.”+

10 “Kọ ogbẹrọnọ ọsẹ ọvo+ mai kpobi ma wo? Kọ ogbẹrọnọ Ọghẹnẹ ọvo ọ ma omai? Kọ fikieme ma be rọ rehọ ẹghẹ lele ohwohwo yeri,+ bi zue ọvọ esẹ-esẹ mai? 11 Juda o ru oware ẹghẹ no, yọ a jọ Izrẹl gbe Jerusalẹm ru oware otọtọ jọ no; keme Juda o zue oria ọrẹri* Jihova no,+ oria nọ O you, ọ tẹ jẹ rehọ ọmọtẹ ọghẹnẹ orẹwho ọfa re ọ jọ aye riẹ.+ 12 Jihova o ti kpe ohwo kpobi nọ ọ jọ iwou-udhu Jekọp ru onana no, makọ oghẹrẹ ohwo kpobi nọ ọ rrọ kẹhẹ,* ọ tẹ make rehọ okẹ nọ a re ro dhe idhe se Jihova olori egbaẹmo+ dede.”

13 “Oware ofa* jọ o riẹ nọ wha bi ru re, nọ o wha riẹ ze nọ irui-oviẹ gbe oviẹ gbe ime-idio e rọ vọ agbada-idhe Jihova, fikiere ọ gbẹ be daezọ okẹ rai nọ wha bi ro dhe idhe he hayo rri uvumọ oware nọ o rrọ obọ rai avọ aruoriwo ho.+ 14 Yọ wha be ta nọ, ‘Fikieme o jẹ rrọ ere?’ Fikinọ Jihova họ osẹri evaọ udevie ra avọ aye ra nọ whọ rehọ evaọ oke uzoge ra, ọnọ whọ rọ ẹghẹ lele yeri, dede nọ ọrivẹ ra gbe aye ra nọ wha gbẹ re ọvọ* ọ rrọ.+ 15 Rekọ ọjọ ọ jariẹ nọ o ru ere he, keme ẹzi na nọ o kiọkọ ọ jariẹ oma. Kọ eme ọyena ọ jẹ gwọlọ? Ọmọ* Ọghẹnẹ. Fikiere yọroma kpahe iroro gbe uruemu ra,* whọ rehọ ẹghẹ lele aye ra nọ whọ rehọ evaọ oke uzoge ra yeri hi. 16 Keme me mukpahe* orọo-ofa,”+ ere Jihova Ọghẹnẹ Izrẹl ọ ta, “gbe ọnọ ọ rẹ rehọ ozighi ruru ewu riẹ,”* ere Jihova olori egbaẹmo ọ ta. “Jẹ yọroma kpahe iroro gbe uruemu ra,* who ru ẹghẹ vievie he.+

17 “Wha rehọ eme rai ru oma rrọ Jihova no.+ Rekọ wha be ta nọ, ‘Oghẹrẹ vẹ ma ro ru oma rrọe no?’ Ẹkwoma ẹme nọ wha be ta nọ, ‘Ohwo kpobi nọ o bi ru eyoma yọ emamọ ohwo evaọ aro Jihova, yọ eva ohwo otiọye na e rẹ were iẹe,’+ hayo ẹkwoma ẹme nọ wha be ta nọ, ‘Bovẹ Ọghẹnẹ uvioziẹ na ọ rrọ?’”

3 “Rri! Me bi vi ọnyukọ mẹ ze, yọ ọ te ruẹrẹ edhere kpahe kẹ omẹ.+ Olori uzẹme nọ wha be gwọlọ na ọ te nyaze etẹmpol riẹ idudhe;+ ọnyukọ ọvọ na ọ te nyaze, ọnọ wha be rọ evawere rẹro riẹ na. Rri! Ọ te seba ẹnyaze he,” ere Jihova olori egbaẹmo ọ ta.

2 “Rekọ ono ọ te sai thihakọ ẹdẹ nọ ọ te rọ nyaze na, yọ ono ọ te sai dikihẹ nọ ọ tẹ romavia no? Keme ọ te jọ wọhọ erae ohwo nọ ọ rẹ rọ erae ru oware fo jẹ jọ wọhọ odha+ ahwo nọ a rẹ fọrọ iwu. 3 Yọ ọ te keria wọhọ ohwo nọ ọ rẹ rọ erae ghra isiliva je ru ei fo,+ o ve ti ru emezae Livae fo; ọ te ghra uluhu no ae oma* wọhọ igoru gbe isiliva, a ve ti zihe ruọ ahwo Jihova nọ e be kẹ okẹ nọ a re ro dhe idhe evaọ ẹrẹreokie. 4 Okẹ nọ a re ro dhe idhe nọ Juda avọ Jerusalẹm a te rehọ ze o te were Jihova wọhọ epanọ o jọ evaọ oke krẹkri nọ u kpemu gbe evaọ ikpe nọ e vrẹ kri gaga no.+

5 “Mẹ te nyaze ti gu owhai ẹdhọ, yọ me ti bruoziẹ vẹrẹ vẹrẹ kpe egbẹva,+ ibruẹnwae, enọ i re duwu iyei ọrue,+ enọ e rẹ wha ohwo nọ a rehọ iruo re,+ enọ e rẹ wha aye-uku re, enọ e rẹ wha ọmọ nọ o wo ọsẹ hẹ* re,+ jegbe ahwo nọ a rẹ rọwo fiobọhọ kẹ ohwo orẹwho ọfa ha.*+ Ahwo nana a be dhozọ mẹ hẹ,” ere Jihova olori egbaẹmo ọ ta.

6 “Keme mẹ họ Jihova; me re nwene he.*+ Whai yọ emọ Jekọp; wha ri whu muotọ họ. 7 No anwọ oke esẹ-esẹ rai ze wha rọ nyasiọ izi mẹ ba nọ wha bi ro koko ai hi.+ Wha zihe bru omẹ ze, me ti zihe bru owhai ze,”+ ere Jihova olori egbaẹmo ọ ta.

Rekọ wha be ta nọ: “Oghẹrẹ ezihe ze vẹ whọ be ta?”

8 “Kọ ohwo-akpọ gheghe ọ sai tho oware mi Ọghẹnẹ? Rekọ wha bi tho eware mẹ.”

Yọ wha be ta nọ: “Oghẹrẹ vẹ ma ro tho eware ra?”

“Wha be hwa abọvo abakpe he, yọ wha be rehọ azọhọ unevaze na ze he. 9 Uye o te siọ owhai ba ete he,* keme wha bi tho eware mẹ, ẹhẹ, orẹwho na soso u bi ru ere. 10 Wha rehọ abọvo abakpe na soso ziọ uwou nọ a rẹ jọ sẹro eware na,*+ re emu ọ jọ uwou mẹ;+ ivie, wha dawo omẹ evaọ onana,” ere Jihova olori egbaẹmo ọ ta, “re wha rri sọ me ti rovie inuethẹ ame obọ idhiwu na kẹ owhai hi,+ me ve ti ku eghale* ku owhai bẹsenọ oware ovo o gbẹ te kare owhai hi.”+

11 “Mẹ te whọku ọnọ ọ rẹ re eware muotọ na* kẹ owhai, ọ gbẹ te raha ubi otọ rai hi, yọ ire evaene nọ e rrọ udhu rai e te jọ ababọ ubi hi,”+ ere Jihova olori egbaẹmo ọ ta.

12 “Erẹwho na kpobi i ti whowho nọ who wo evawere,+ keme who ti zihe ruọ ẹkwotọ evawere,” ere Jihova olori egbaẹmo ọ ta.

13 “Eme nọ wha ta kpahe omẹ i yoma gaga,” ere Jihova ọ ta.

Rekọ wha be ta nọ: “Oghẹrẹ vẹ ma rọ ta eme iyoma kpahe owhẹ no evaọ udevie mai?”+

14 “Wha be ta nọ, ‘Erere ọvo ọ rrọ Ọghẹnẹ ọgọ họ.+ Didi erere o te omai no evaọ izi riẹ nọ ma bi koko jẹ be nya uwuweri evaọ aro Jihova olori egbaẹmo? 15 Whaọ enẹna, ahwo omorro họ enọ ma bi rri nọ a wo evawere. U te no ere no, eware e be riẹ nya kẹ ahwo nọ a bi ru umuomu.+ A bi keke aro fihọ dawo Ọghẹnẹ yọ oware ovo o be via kẹ ae he.’”

16 Evaọ oke yena, ahwo nọ a be dhozọ Jihova a je lele ohwohwo ta ẹme, duọ ohwo duọ ọvuọ ọrivẹ riẹ, yọ Jihova ọ jẹ gaviezọ je bi yo ẹme nọ a be ta. A te kere ahwo nọ a be dhozọ Jihova gbe enọ i bi roro didi kpahe odẹ riẹ*+ fihọ obe ekareghẹhọ evaọ aro riẹ.+

17 “A te jọ ahwo mẹ,”+ ere Jihova olori egbaẹmo ọ ta, “evaọ ẹdẹ nọ me ti ru ai họ okwakwa obọdẹ*+ mẹ. Me ti dhesẹ ọdawẹ kẹ ae, nwane wọhọ epanọ ọsẹ o re dhesẹ ọdawẹ kẹ ọmọzae riẹ nọ o bi yoẹme kẹe na.+ 18 Wha vẹ te wariẹ ruẹ ohẹriẹ nọ o rrọ udevie ohwo okiẹrẹe avọ ohwo omuomu,+ gbe ohẹriẹ nọ o rrọ udevie ohwo nọ ọ be gọ Ọghẹnẹ avọ ọnọ ọ be gọe he.”

4 “Rri! ẹdẹ na ọ be tha, ọ be ware nwenwenwe wọhọ umuwou-erae,+ okenọ ahwo omorro kpobi gbe ahwo kpobi nọ a bi ru umuomu a te rọ jọ wọhọ ẹbe ọyaya. Ẹdẹ nọ ọ be tha na ọ te mahe ai no,” ere Jihova olori egbaẹmo ọ ta, “yọ a ti gbe wo uvumọ owọ hayo ogha ha. 2 Rekọ whai enọ e be kẹ odẹ mẹ ọghọ,* ọre ẹrẹreokie o ti lo mu owhai, yọ usiwo u ti no elo* riẹ ze; wha ve ti duola kpenẹ avọ enẹ wọhọ emọ-iruẹ epoporiẹ.”

3 “Wha ti thihi irumuomu na nyaotọ, keme a te jọ wọhọ ovu evaọ evawọ rai evaọ ẹdẹ nọ mẹ te jowọ na,” ere Jihova olori egbaẹmo ọ ta.

4 “Wha kareghẹhọ Uzi Mosis odibo mẹ, koyehọ ijaje gbe iziẹibro nọ mẹ kẹ evaọ Horẹb inọ ahwo Izrẹl kpobi a re koko.+

5 “Rri! Me bi vi Elaejah ọruẹaro na+ se owhai taure ẹdẹ ologbo Jihova nọ o re mu ọwhewhe na ọ tẹ te ze.+ 6 Yọ o ti ku udu esẹ rẹriẹ bru emezae rai,+ je ti ku udu emezae rẹriẹ bru esẹ rai, re mẹ gbẹ nyaze te tehe otọakpọ na re mẹ raha iẹe no ho.”

(Ekuhọ efafa Ikereakere Hibru avọ Aramaik na, onọ Ikereakere Griki Ileleikristi u ti lele)