7 Wuhrẹ Emọ Ra re A Wo Emamọ Uruemu

OWARE NỌ U DHESẸ

Oghẹrẹ uruemu nọ o ohwo o bi dhesẹ oye a rẹ rọ riẹ oghẹrẹ ohwo nọ ọ rrọ. Wọhọ oriruo, kọ whẹ yọ ohwo nọ ọ rẹ daoma ta uzẹme evaọ oware kpobi? O tẹ rrọ ere, whọ te gwọlọ nọ ere emọ ra a rẹ jọ re.

U te no ere no, who re je wuhrẹ ae epanọ a rẹ rọ ga obọ iruo je wo ororokẹ kẹ amọfa, yọ u fo nọ a re wuhrẹ ai re a wo iruemu itienana no emaha ze.

EHRI-UZI EBAIBOL: “Wuhrẹ ọmọ edhere nọ u fo nọ ọ rẹ nya; makọ okenọ ọ kpako no dede o re noi hi.”​—Itẹ 22:6.

OWARE NỌ U RO WUZOU

Evaọ akpọ nana nọ a be jọ ku eware gaga na, o roja re emọ i wo emamọ uruemu. Oni jọ nọ a re se Karyn ọ ta nọ, “Emọ a rẹ sae jọ ifonu rri ikpehre eware nọ e rẹ sae raha emamọ uruemu rai no. Whẹ avọ ọmọ ra wha sae jọ oria ọvona yọ o bi rri ikpehre eware evaọ ifonu riẹ rekọ whọ rẹ riẹ hẹ!”

EHRI-UZI EBAIBOL: “Ahwo nọ a kpako [a re] wuhrẹ ẹgba orimuo rai . . . re a sai vuhu oware uwoma gbe uyoma.”​—Ahwo Hibru 5:14.

Wuhrẹ emọ ra re a dhesẹ emamọ uruemu kẹ amọfa. Whọ rẹ sai wuhrẹ ae epanọ a rẹ rọ ta eme wọhọ “ivie” nọ a tẹ gwọlọ nọ a ru oware jọ kẹ ae, epanọ a rẹ rọ ta nọ “whẹ kobiruo,” hayo digwẹ. Whọ sai je wuhrẹ ae epanọ a re ro wo ọdawẹ je roro kẹ amọfa. Iruemu itienana i wuzou gaga keme evaọ oke mai na, ifonu gbe eware itieye na efa i wuzou kẹ ahwo vi ahwo-akpọ ibe rai dede.

EHRI-UZI EBAIBOL: “Nwane wọhọ epanọ wha gwọlọ nọ ahwo a ru kẹ owhai, wha ru epọvo na kẹ ae re.”​—Luk 6:31.

OWARE NỌ WHỌ RẸ SAI RU

Vuẹ ae eware nọ u fo nọ a rẹ whaha. Ekiakiẹ jọ nọ a ru i dhesẹ nọ izoge nọ a wuhrẹ notọ ze inọ o thọ re imava nọ e re rọo ho a wezẹ kugbe ae a rẹ mae whaha ọfariẹ-ogbe.

OWARE JỌ NỌ U RE FIOBỌHỌ: Whọ tẹ gwọlọ wuhrẹ ọmọ ra oware jọ, whọ rẹ sae rehọ oware jọ nọ o via kẹle ro mu ẹme họ kugbei. Wọhọ oriruo, otẹrọnọ wha jọ etẹlẹvisiọno hayo iredio yo usi jọ inọ ohwo jọ ọ rehọ evedha kpe ohwo jọ, whọ rẹ sae ta nọ: “Kinọ ofu nọ ohwo o re koko họ eva kpahe ohwo-akpọ ibe riẹ? Eme who roro nọ ọ rẹ wha oware utionana ze?”

“U fo nọ a re wuhrẹ ọmọ re ọ riẹ oware nọ u woma gbe onọ u yoma re ọ sae riẹ onọ o re ru.”​—Brandon.

Wuhrẹ ai epanọ a sai ro ru eware kẹ amọfa. Nọ emọ e tẹ make gbẹ rrọ emaha dede, a rẹ sai wuhrẹ ai epanọ a rẹ rọ kẹ amọfa adhẹẹ. Wọhọ oriruo, a sai wuhrẹ ai inọ u fo re a ta nọ “ivie olẹ” nọ a tẹ be yare oware, je digwẹ hayo ta nọ “whẹ kobiruo” nọ a te ru oware kẹ ae. Obe na Parenting Without Borders o ta nọ: “Nọ emọ e tẹ riẹ nọ u fo nọ a rẹ gwọlọ ewoma amọfa re, wọhọ ahwo uviuwou rai, emọ isukulu rai, gbe ahwo nọ a gbẹ be rria oria, u ti ru nọ a te hae rọ rehọ iroro obọrai ru ewoma kẹ amọfa re, orọnikọ omobọ rai ọvo ho.

OWARE JỌ NỌ U RE FIOBỌHỌ: Kẹ emọ ra iruo nọ a re ru evaọ uwou na, a vẹ rọ ere wuhrẹ oghẹrẹ nọ a re ro ru eware kẹ amọfa.

“Nọ emọ mai e tẹ be hai ru oware evaọ uwou nọ a gbẹ rrọ kugbe omai na, u re fiobọhọ kẹ ae nọ a tẹ ruọ orọ obọrai no, keme uruemu nana o tẹ reria ae obọ no, u re ru nọ a sae rọ rẹrote eware ziezi ẹdẹfa.”​—Tara.