Oghẹrẹ oriruo vẹ who bi fihọ otọ kẹ emọ ra?
RỌKẸ ESẸGBINI
8 Fi Emamọ Oriruo Họ Otọ kẹ Emọ Ra
OWARE NỌ U DHESẸ
Esẹgbini nọ i bi fi emamọ oriruo họ otọ kẹ emọ rai a re ru eware nọ a bi wuhrẹ emọ rai nọ a ru. Wọhọ oriruo, dae rehọ iẹe nọ whọ be hae ta kẹ emọ ra nọ a ta uzẹme, rekọ ẹdẹjọ nọ ohwo jọ ọ jẹ nọ owhẹ ze, fikinọ whọ gwọlọ lele ohwo na ta ẹme he, whọ tẹ vuẹ ọmọ ra inọ ọ ta kẹe nọ whẹ rrọ uwou ho. Kọ ẹvẹ ọmọ na ọ sae rọ ta uzẹme na?
“Ẹme jọ nọ ahwo a rẹ ta gaga họ, ‘Whọ rọ aro kele omẹ ha, thakpi ru oware nọ mẹ ta.’ Rekọ a sae rehọ oghẹrẹ otioye na rọ yọrọ ọmọ họ. Keme emọ a rẹ gwọlọ rọ aro kele esẹgbini rai gaga evaọ oghẹrẹ nọ a rẹ ta ẹme je ru eware nwane wọhọ epanọ uvovo o re se ame rehọ na.”—David.
EHRI-UZI EBAIBOL: “Whẹ nọ ọ be ta nọ, ‘Who tho uji hi,’ kọ who bi tho uji?”—Ahwo Rom 2:21.
OWARE NỌ U RO WUZOU
Esẹgbini họ ahwo nọ emọ, makọ enọ i te izoge no dede, a rẹ mae rọ aro kele. Fikiere whẹ họ uzedhe ohwo nọ u fo nọ o re wuhrẹ ọmọ ra fihọ emamọ edhere. Rekọ re whọ sai ru ere, o gwọlọ nọ whẹ omara who re wo iruemu nọ whọ gwọlọ nọ a wo na.
“Ẹsejọ ma re dhe oware ọvo ẹwẹwariẹ kẹ emọ mai, yọ ma re roro nọ a bi fi ozọ họ otọ họ. Rekọ ẹdẹ nọ whọ gbẹ nwani ru oware nọ whọ be ta kẹ ae na ha, emọ na a rẹ nọ owhẹ unu. Emọ a re fiẹrohọ oware kpobi nọ ma bi ru ma tẹ maki roro nọ a bi muẹrohọ họ.”—Nicole.
EHRI-UZI EBAIBOL: “Areghẹ nọ o no obọ ehru ze . . . o wo eviẹhọ họ.”—Jemis 3:17.
OWARE NỌ WHỌ RẸ SAI RU
Roro kpahe eware nọ whẹ omara whọ be hai ru. Oghẹrẹ ifimu vẹ whọ be hai rri? Oghẹrẹ vẹ whọ be hai ru ọzae hayo aye ra gbe emọ ra? Oghẹrẹ ahwo vẹ who bi lele nyusu? Kọ whọ be hai roro kẹ amọfa? Ẹme na họ, kọ oghẹrẹ nọ whọ be gwọlọ nọ emọ ra a jọ na, ere whọ rrọ?
“Mẹ avọ ọzae mẹ ma rẹ vuẹ emọ mai nọ a ru eware nọ ma bi ru hu hu.”—Christine.
Hai wounu nọ who te ruthọ. Emọ ra a riẹ nọ ohwo ọvo ọ riẹ hẹ nọ o re ruthọ họ. Fikiere whọ tẹ be hai wounu kẹ ọzae hayo aye gbe emọ ra, yọ who bi wuhrẹ emọ ra nọ u fo re a hae ta uzẹme jẹ romakpotọ.
“U fo nọ emọ mai a rẹ hae ruẹ nọ ma rẹ rọwo iruthọ mai je wounu. Rekọ ma gbẹ be hai ru ere he, ae omarai a te hae rọwo iruthọ rai gbe he.”—Robin.
“Mai esẹgbini họ ahwo nọ emọ mai a rẹ mae rọ aro kele oriruo rai keme ma rrọ kugbe ai ẹsikpobi. Fikiere oghẹrẹ nọ ma bi yeri uzuazọ mai o wọhọ obe nọ ma bi rovie ro wuhrẹ emọ mai ẹsikpobi.”—Wendell.