Epanọ A ro Siwi Mosis Ọmọfofa Na

RRI ọmọfofa nọ ọ be viẹ na, yọ o kru uziobọ ọmọtẹ na. Ọnana yọ Mosis. Kọ whọ riẹ ohwo nọ ọmọtẹ owowoma na ọ rọ? Yọ ọmọtẹ-ovie Ohwo-Ijipti, ọmọtẹ obọ Fẹro.

Oni Mosis o si ọmọfofa riẹ no bẹsenọ ọrọ kpako te emera esa, keme ọ gwọlọ nọ Ahwo-Ijipti a kpei hi. Rekọ ọ riẹ nọ ẹsejọhọ a re ti duku Mosis, fikiere o te ru onana re o ro siwie’i.

Ọ rehọ ekete ọ tẹ ruẹriẹe oghẹrẹ nọ ame o gbe fi ruẹ eva ha. Kẹsena o te fi Mosis hiẹ eva, o te fi ekete na họ ẹbe othethei nọ ọrọ akotọ Ethẹ Nael. A tẹ ta kẹ Miriam, oniọvo ọmọtẹ Mosis, re o dikihẹ kẹle re ọ ruẹ oware nọ o rẹ via.

U ri krihi, ọmọtẹ Fẹro ọ tẹ nyaze obọ Ethẹ Nael re ọ họ. Ẹsiẹvo na, ọ tẹ ruẹ ekete na eva ẹbe othethei na. O te se omọvo idibo emetẹ riẹ: ‘Nya e tọlọ ekete ọyena se omẹ.’ Nọ ọmọtẹ-ovie na oje rovie ekete na, k’inọ erru, ọmọ nọ ọ ruẹ! Mosis ọ sese na ọ be viẹ, ohrọ riẹ o tẹ re ọmọtẹ-ovie na. Ọ gwọlọ nọ a re kpei hi.

Koyehọ Miriam ọ dhẹ ze. Whọ sae rue riẹ eva ifoto na. Miriam ọ tẹ nọ ọmọtẹ Fẹro: ‘Kọ mẹ nya i se aye Ahwo-Izrẹl jọ re ọ yọrọ ọmọ na k’owhẹ?’

‘Iviena ru ere,’ họ ẹme nọ ọmọtẹ-ovie na ọ ta.

Fikiere Miriam ọ tẹ dhẹ vẹrẹ nya e vuẹ oni riẹ. Nọ oni Mosis ọ jẹ nya bru ọmọtẹ-ovie na ze, ọmọtẹ-ovie ọ tẹ ta nọ: ‘Rehọ ọmọfofa ọnana re whọ yọriẹe k’omẹ; mẹ te hwosa k’owhẹ.’

Fikiere oni Mosis ọ tẹ sẹro ọmọ obọ riẹ. Uwhruemuna, nọ Mosis ọ kpako te no, ọ tẹ rehiẹe se ọmọtẹ Fẹro nọ ọ rehọ eriẹ wọhọ ọmọzae obọ riẹ. Ere o nya nọ Mosis ọrọ whẹro eva uwou Fẹro.