Epanọ A rẹ Rehọ Omobe Nana Ruiruo

Evaọ ewẹ-ebe nọ e rrọ aro na, whọ te ruẹ oria Ebaibol rọkẹ ẹdẹ kpobi gbe eme ọkpahefihọ rai. Dede nọ oke kpobi evaọ okpẹdẹ na whọ sai ro se oria ikere gbe eme ọkpahefihọ na, ahwo buobu a ruẹ nọ a be mai wo erere noi ze nọ a te sei evaọ ohiohiẹ. Kẹsena a vẹ sai roro kpahe eware nọ a se na evaọ okpẹdẹ na. O rẹ mae kẹ erere nọ ahwo uviuwou a tẹ be hai sei kugbe. Iviuwou Ebẹtẹle nọ e rrọ akpọ na soso a be hai ru onana evaọ ohiohiẹ nọ a tẹ nwane re emu no.

A rehọ eme ọkpahefihọ na no uvitha Uwou-Eroro (w) na ze, erọ amara Ane 2016 rite Asa 2017. Inọmba (1, 2, 3, 4, hayo 5) nọ a kere lele uvitha orọ Uwou-Eroro u dhesẹ uzoẹme uwuhrẹ nọ a rehọ e riẹ no ze. Inọmba efa nọ i lele onana i dhesẹ idhe-eme nọ a rehọ ọkpahefihọ na no ze. (Rri oriruo nọ ọ rrọ obotọ na.) Whọ sae ruẹ evuẹ efa nọ i kiekpahe ẹme ọvona evaọ uzoẹme nọ a rehọ oria ikere na no ze. Whọ tẹ gwọlọ riẹ oria nọ uzoẹme uwuhrẹ na o jọ muhọ, rri uke hayo ẹwẹ-obe avivẹ uvitha Uwou-Eroro Na.