Eghale Hayo Eka—Iriruo K’omai Nẹnẹ

“Whaọ eware nana kpobi evia kẹ ae re ojọ ozọ-usio rọ kẹ ae; rekọ a kere ai re e jọ unu ovẹvẹ rọ kẹ omai, e nọ orugba ige nọ e vrẹ no o bruze.”—1 AHWO KỌRINT 10:11.

1. Nwane wọhọ epanọ ohwo ọ rẹ kiẹ okwakwa riwẹ na, didi ọkiẹriwo ma re ru?

OWARE nọ a rẹ sae ruẹ hẹ fikinọ a rehọ ọbia raliẹ, ere ekagba i re mu okwakwa nọ a rọ utehru ru họ ẹre no. O rẹ dina kri taure ekagba na e tẹ te re lahwe. Epọvo na re, uruemu gbe ẹgwọlọ udu ohwo u re muọ ekagba họ emu taure onana o tẹ te wha okpẹtu ze hayo taure amọfa a te ti muẹro hiẹe. Epanọ ma rẹ kiẹ okwakwa riwẹ na sọ u mu ekagba họ emu no, ere ẹkiẹriwo udu mai ẹsikpobi o sae rọ wha ẹyọrọ ekiete Oleleikristi mai ze. Ẹme na họ, ma rẹ sai wo eghale Ọghẹnẹ jẹ sae whaha eka Ọghẹnẹ. Ahwo jọ a re roro nọ eghale gbe eka nọ a whowho kẹ Izrẹl anwae na i kpomahọ omai nọ e be rria oke urere eware enana tere he. (Joshua 8:34, 35; Matiu 13:49, 50; 24:3) Rekọ, ere o rọ họ. Ma rẹ sai wo erere gaga no iriruo unuovẹvẹ nọ i kpomahọ Izrẹl ze, enọ a kere fihọ otọ evaọ 1 Ahwo Kọrint uzou 10 na.

2. Eme 1 Ahwo Kọrint 10:5, 6 o ta kpahe oware nọ Izrẹl ọ rọ ẹro ruẹ evaọ igbrẹwọ na?

² Pọl ukọ na ọ rehọ emọ Izrẹl evaọ otọ Mosis rọ wawo Ileleikristi evaọ otọ Kristi. (1 Ahwo Kọrint 10:1-4) Otẹrọnọ ahwo Izrẹl na a yoẹme a hae te ro Ẹkuotọ Eyaa na, “ibuobu rai e were Ọghẹnẹ ziezi hi; keme a jọ eva udhude ku ai fiẹ.” Fikiere Pọl ọ tẹ ta kẹ ibe Ileleikristi nọ: “Eware nana e rọ unu ovẹvẹ kẹ omai re eware iyoma e se omai uru ba esio, wọhọ epanọ u si rai uru.” (1 Ahwo Kọrint 10:5, 6, ẹjẹlẹ ibieme na ọmai.) Urusio o rẹ rro evaọ obọ eva, fikiere u fo re ma yoẹme kẹ iriruo unuovẹvẹ nọ Pọl ọ kẹ na.

Unuovẹvẹ Kpahe Ẹdhọgọ

3. Ẹvẹ emọ Izrẹl a rọ thuzi kpahe ọmọ-eruẹ oro na?

³ Unuovẹvẹ ọsosuọ Pọl họ: “Wha jọ egedhọ gbe he wọhọ epanọ otu rai jọ a jọ, wọhọ epanọ a kere nọ, ‘Ahwo a keria a jẹ re da, a vẹ kparoma kọ eha igbe.’ ” (1 Ahwo Kọrint 10:7, ẹjẹlẹ ibieme na ọmai.) Oriruo unuovẹvẹ onana họ orọ Izrẹl nọ i je zihe kpohọ idhere Ijipti nọ a ma ẹmema ọmọ-eruẹ oro ẹdhọgọ. (Ọnyano, uzou 32) Stivin olele na o dhesẹ ehri ẹbẹbẹ na: “Ọye [Mosis, ohwo ẹro Ọghẹnẹ] esẹ mai i je yo ẹme riẹ hẹ, a te wo udu uyoma kẹ e, a je le ei no evie rai, a tẹ jọ eva rai kurẹriẹ kpohọ Ijipti. A jẹ ta kẹ Erọn nọ, ‘Ma emedhọ kẹ omai nọ e rẹ karo kẹ omai: keme na Mosis ọnana ọnọ o su omai vrẹ no otọ Ijipti ze na, ma riẹ oware nọ u ru riei hi.’ Ọ jẹ ma ẹmẹdhọ wọhọ eruẹ, a je dhe idhe kẹe evaọ edẹ eyena, a tẹ jẹ ghọghọ fiki iruo nọ a rehọ abọ rai ru.” (Iruẹru 7:39-41) Muẹrohọ nọ evaọ “eva rai” emọ Izrẹl ifogori na a jọ kru isiuru ethọthọ nọ u su kpohọ edhọgọ. A “ma ẹmẹdhọ wọhọ eruẹ, a je dhe idhe kẹe.” Ofariẹ, a “tẹ jẹ ghọghọ fiki iruo nọ a rehọ abọ rai ru.” Ikporakporo e jariẹ, ile-esuọ, ile-igbe, emuọriọ, idieda. Uzẹme, ẹdhọgọ na o je siuru avọ oghọghọ.

4, 5. Didi iruemu ẹdhọgọ u fo nọ ma rẹ whaha?

⁴ Ijipti inẹnẹ—akpọ Setan na—ọ be gọ arozaha. (1 Jọn 5:19; Eviavia 11:8) Ọ be gọ otu ọ arozaha, egba-ile, ahwo ilogbo arozaha, je kugbe ile-igbe rai, ikporakporo rai, eriwo omawere gbe akpọriọ rai. Ahwo buobu a dhoma rai họ arozaha nọ o vrẹta no yọ a gbẹ be ta nọ a be gọ Jihova. Okenọ a tẹ whọku Oleleikristi fiki iruthọ, a rẹ sae ruẹ nọ o whrehe no evaọ ẹzi fiki idi egaga, ile-igbe riẹ, gbe omawere evaọ oghẹrẹ jọ nọ u dina wo abọ kugbe ẹdhọgọ. (Ọnyano 32:5, 6, 17, 18) Oma-sasa jọ u re kiehọ jẹ were oma. Ghele, ikporakporo akpọ na buobu nẹnẹ, ile-igbe rai, ughe, gbe ividio e be wha ogbekuo isiuru iwo haro.

⁵ Ileleikristi uzẹme a rẹ rọ oma kẹ egagọ emedhọ họ. (2 Ahwo Kọrint 6:16; 1 Jọn 5:21) Jọ omai omomọvo o muẹro họ otọ re oma-sasa ẹdhọgọ o se omai obọ ba ẹreria re ma ruẹse whaha uye-oruẹ eyoma akpọriọ edhere akpọ na. Ma tẹ rehọ oma mai kẹ ọwhẹruọ akpọ na, isiuru gbe uruemu enwoma e rẹ sae bọmu iroro gbe udu mai. A gbẹ kpọ ai họ họ, enana e rẹ sae whae ze nọ ma je ‘zulẹ evaọ igbrẹwọ’ eyero Setan na.

6. Didi owojẹ uwoma u fo nọ ma rẹ jẹ kpahe aroza oma-sasa?

⁶ Wọhọ Mosis evaọ etoke ọmọ-eruẹ oro na, ‘ọrigbo nọ o wo ẹrọwọ avọ areghẹ’ na ọ be ta nọ: “Ono ọ rọ abọ ỌNOWO na? Nya bru omẹ ze.” Re ma jẹ owọ ziezi ro dhesẹ nọ ma dikihẹ abọ egagọ uzẹme gaga u re siwi uzuazọ. Orua Mosis ọ Livai a j’owọ vẹrẹ vẹrẹ re a voro ọwhẹruọ oyoma no. (Matiu 24:45-47; Ọnyano 32:26-28) Fikiere, roma totọ kiẹ arozaha oma-sasa ra riwi ziezi, ikporakporo ra, ividio, gbe eware itieye na. Otẹrọnọ u gbeku evaọ oghẹrẹ jọ, dikihẹ abọ Jihova. Evaọ olẹ nọ whọ rẹ jọ rẹro so Ọghẹnẹ, ru inwene evaọ ẹsalọ aroza oma-sasa gbe ikporakporo ra, re whọ raha ekwakwa nọ e rẹ raha ẹzi, nwane wọhọ epanọ Mosis o ru ọmọ-eruẹ oro na.—Ọnyano 32:20; Iziewariẹ 9:21.

7. Ẹvẹ ma sae rọ thọ ubiudu ẹwoho na?

⁷ Ẹvẹ ma rẹ rọ whaha ekagba nọ i re mu udu na? Ẹkwoma ewuhrẹ Ẹme Ọghẹnẹ whawha, jẹ kuvẹ kẹ izẹme riẹ re e nya didi kpohọ iroro gbe idu mai. (Ahwo Rom 12:1, 2) Uzẹme, ma re kpohọ iwuhrẹ Oleleikristi oke kpobi. (Ahwo Hibru 10:24, 25) Re ma thakpi kpohọ iwuhrẹ na ọvo o rẹ wọhọ ẹralọ oria ekagba na. Onana o rẹ lẹliẹ omai jọ jajaja evaọ ubroke, rekọ u re ku ehri ẹbẹbẹ na họ họ. Ikpoye, evaọ oma oruẹrẹ kpahe, eroro-didi, gbe abọ nọ ma re wo evaọ iwuhrẹ na, ma rẹ sai si ekwakwa ekagba nọ i gbe kiọkọ udu mai no riẹriẹriẹ. Onana u re fiobọhọ k’omai yoẹme kẹ Ẹme Ọghẹnẹ jẹ k’omai ẹgba re ma thihakọ edawọ ẹrọwọ mai jẹ ‘gbunu evaọ abọ kpobi.’—Jemis 1:3, 4; Itẹ 15:28.

Unuovẹvẹ Kpahe Igberẹ-Ibro

8-10. (a) Didi oriruo unuovẹvẹ a t’ẹme te evaọ 1 Ahwo Kọrint 10:8? (b) Ẹvẹ a sai ro fi eme Jesu nọ e rọ Matiu 5:27, 28 na họ iruo avọ erere?

⁸ Evaọ oriruo ọfa nọ Pọl ọ fodẹ, a hrẹ omai nọ: “Ma rẹ sae rọ oma mai kẹ igberẹ-ibro ho, wọhọ epanọ otu rai jọ o ru, nọ ahwo odu udhegbesa a je kie whu eva ẹdẹ ọvo.”a (1 Ahwo Kọrint 10:8) Ukọ na ọ jẹ riobọ kpohọ okenọ emọ Izrẹl a ro ruwẹ kẹ eghẹnẹ erue je “lele emetẹ Moab bru igberẹ.” (Ikeleakele 25:1-9) Igberẹ-ibro o rẹ wha uwhu tha! Re ma kuvẹ kẹ iroro gbe isiuru igbegbe re e jọ udu mai ẹsikpobi o wọhọ uvẹ nọ ma rẹ kẹ re udu na “u mu ekagba.” Jesu ọ ta nọ: “Wha yo nọ a ta nọ, ‘Who bruẹnwae he’. Rekọ mẹ ta kẹ owhai, kohwo kohwo nọ o re ri aye rite ẹguọlọ riẹ, ọ jọ eva lele ie bruẹnwae no.”—Matiu 5:27, 28.

⁹ Rọwo kugbe uzẹme kpahe enwoma ‘eriwo aye rite ẹgwọlọ’ họ iyẹrẹ nọ i no iroro etọtọ enjẹle aghẹmeeyo ze taure Ẹvo ẹdẹ Noa o te zi te. (Emuhọ 6:1, 2) Jẹ kareghẹhọ inọ oware okpẹtu ulogbo jọ nọ o via evaọ uzuazọ Devidi Ovie na họ aye nọ ọ rọ ẹro oyoma je riwi erieriwo. (2 Samuẹle 11:1-4) Wo ohẹriẹ, Job ọzae okiẹrẹe uwou-orọo na ‘ọ riọvọ kugbe ibiaro riẹ re ọ se isiuru ba ewo kẹ ọmọtẹ,’ fikiere ọ tẹ whaha ọfariẹ-ogbe je dhesẹ oma riẹ wọhọ ọnọ o kru ekiete riẹ. (Job 31:1-3, 6-11) A rẹ sae rọ ibiaro na dhesẹ unwido udu na. Yọ udu ogbekuo eware imuomu buobu i re no tha.—Mak 7:20-23.

¹⁰ Ma te fi eme Jesu họ iruo, ma rẹ kuvẹ re iroro ethọthọ e ziọ udu mai odode he ẹkwoma eriwo ifoto-ẹbẹba hayo ewo iroro ọfariẹ-ogbe kpahe ibe Oleleikristi, ibe-iruiruo, hayo omọfa ha. A rẹ rọ eririe si ekagba no utehru hu. Fikiere, whọ rọ abọ lọlọhọ ririe iroro gbe owojẹ ọfariẹ-ogbe no ho epaọ ẹsenọ e rọ oware okakao. J’owọ ulogbo re who si iroro ọfariẹ-ogbe n’eva. (Wawo Matiu 5:29, 30.) Pọl ọ hrẹ ibe enọ e rọwo inọ: “Kpe abọ akpọ nọ e rọ oma rai no: igberedia, egbegbe, uru-usio nọ o rẹ vrẹ ẹta, eware iyoma eguọlọ gbe eware amọfa eguọlọ, onọ orọ edhọ egọ. Fiki enana ofu Ọghẹnẹ ọ jẹ be tha.” Ẹhẹ, fikiere eware itieye na wọhọ ọfariẹ-ogbe, “ofu Ọghẹnẹ ọ jẹ be tha” wọhọ odhesẹvia eka riẹ. Fikiere u fo re ma “kpe” ugboma mai no kpahe eware enana.—Ahwo Kọlọsi 3:5, 6.

Unuovẹvẹ Kpahe Inoma Ọkparesuọ

11, 12. (a) Didi unuovẹvẹ a kẹ eva 1 Ahwo Kọrint 10:9, kọ eme ọ via nọ a t’ẹme fodẹ? (b) Ẹvẹ unuovẹvẹ Pọl u re kpomahọ omai?

¹¹ Pọl ọ tẹ gbẹ vẹvẹ unu nọ: “Ma fi Jihova họ odawọ họ, wọhọ epanọ otu jọ a fi rie họ odawọ, nọ eraomuomu i ro kpe ai.” (1 Ahwo Kọrint 10:9, NW ) Nọ a jẹ nya evaọ igbrẹwọ na kẹle uwhru Edọm no, emọ Izrẹl “a tẹ ta [ẹme] oyoma kpahe Ọghẹnẹ avọ Mosis, ‘Keme whọ jẹ rehọ omai no otọ Ijipti ze ti whu evaọ igbrẹwọ? Keme emu gbe ame e riẹ hẹ, yọ emu nana nọ o wo otọhọ na [emana nọ a rọ edhere ugbunu kẹ ai na] ọ vẹso omai no.’ ” (Ikeleakele 21:4, 5) Dai roro iei! Emọ Izrẹl eyena a jẹ t’ẹme “oyoma kpahe Ọghẹnẹ,” bi se okẹ riẹ oware nọ u wotọ họ!

¹² Ẹkwoma inoma-iguo rai, emọ Izrẹl na a tẹ jẹ dawo odiri Jihova. A kẹ rai uye, keme Jihova o vi eraomuomu iyoma ziọ udevie rai, yọ fiki ẹrowo eraomuomu na ibuobu rai a te whu. Nọ ahwo na a kurẹriẹ no fiki olẹ Mosis, uye na u te kuhọ. (Ikeleakele 21:6-9) Uzẹme oware onana nọ o via na o rẹ jọ unuovẹvẹ k’omai re ma whaha ẹzi ọkparesuọ, inoma-iguo, maero kpahe Ọghẹnẹ gbe ọruẹrẹfihotọ esuo riẹ.

Unuovẹvẹ Kpahe Eguago

13. Eme 1 Ahwo Kọrint 10:10 o vẹvẹ unu kpahe, kọ ọkparesuọ vẹ Pọl o wo họ iroro?

¹³ Jẹ fodẹ oriruo urere riẹ kpahe emọ Izrẹl evaọ igbrẹwọ na, Pọl o kere nọ: “Hayo ẹguọ gbe he, wọhọ epanọ otu rai jọ ọ go nọ a jẹ rọ ọraha raha ae.” (1 Ahwo Kọrint 10:10) Ọkparesuọ ọ roma via okenọ Kora, Dethan, Abiram, gbe ilele rai a j’owọ mukpahe Ọghẹnẹ je fi avro họ udu-esuo Mosis avọ Erọn. (Ikeleakele 16:1-3) Nọ a kpe ewọsuọ na no, emọ Izrẹl a te muhọ ẹgo. Oware nọ o so onana ze họ a je roro inọ ekpe ewọsuọ enana o thọ. Ikeleakele 16:41 o ta nọ: “Rekọ okeokiọ riẹ ogbotu ahwo Izrẹl na kpobi a tẹ go kpahe Mosis avọ Erọn, anọ, ‘Wha kpe ahwo ỌNOWO na no.’ ” Fiki epanọ a gu inoma kpahe ẹdhọ okiẹrẹe nọ a whaharo evaọ okiọye, ahwo 14,700 ọrọ emọ Izrẹl a te whu fiki uye nọ Ọghẹnẹ ọ kẹ rai.—Ikeleakele 16:49.

14, 15. (a) Eme họ emuemu jọ ọrọ “ahwo nọ a kare erọ Ọghẹnẹ” enọ e bẹbẹ ruọ ukoko na? (b) Eme a rẹ sai wuhrẹ no oware nọ o via kẹ Kora ze?

¹⁴ Evaọ ikpe-udhusoi ọsosuọ C.E., “ahwo nọ a kare erọ Ọghẹnẹ” enọ e bẹbẹ ruọ ukoko Ileleikristi na a te dhesẹ oma rai via wọhọ iwuhrẹ erue jegbe enọ e rẹ gua-imimẹ. Ezae enana a “be hẹ jẹ otu nọ owuzou fiẹ, jẹ be rehọ otu ehru jijehwẹ,” ezae nọ a kẹ ẹzi evaọ okioye nọ a mu ẹruọsa ẹzi ukoko na h’obọ. Kpahe ikọ-erue eyena nọ e riẹ Ọghẹnẹ hẹ na, Jud olele na ọ tẹ jẹ ta nọ: “Enana họ enọ e rẹ gua-imimẹ, iguiguegu, nọ i re lele urusio-iwo rai.” (Jud 3, 4, 8, 16) Nẹnẹ, ahwo jọ a riẹe nọ e rẹ gua-imimẹ fikinọ a kuvẹ re uruemu ekagba ẹzi o mu udu rai. Ẹsibuobu a rẹ tẹrovi sebaẹgba ahwo nọ e be sẹro evaọ ukoko na jẹ go kpahe ai. Eguago gbe inoma-iguo rai o rẹ tubẹ wọ ai kpohọ ẹwọso ebe nọ ‘ọrigbo ẹrọwọ’ na o bi kporo.

¹⁵ U kiehọ re a nọ uvi enọ kpahe uzoẹme Ikereakere. Rekọ ẹvẹ otẹrọnọ ma wo uruemu othọthọ nọ u dhesẹ oma via evaọ ẹmeọta abọ-oyoma evaọ udevie egbẹnyusu ekpekpe? U re fo re ma nọ omobọ mai inọ, ‘Diẹse ẹgo ọnana o ti su kpohọ? Kọ o gbẹ mae rọ oware areghẹ re mẹ seba ẹgo jẹ rọ omarokpotọ lẹ kẹ areghẹ?’ (Jemis 1:5-8; Jud 17-21) Kora avọ ahwo nọ e jẹ thaeuke, enọ e wọso udu-esuo Mosis avọ Erọn, ẹsejọhọ a wo imuẹro inọ eriwo rai ọ rọ gbagba te epanọ a gbẹ rọ kiẹ iroro rai riwi hi. Ghele na, a roro thọ gaga. Yọ ere o jọ re kpahe emọ Izrẹl enọ e jẹ go kpahe uwhu Kora gbe otu ekparesuọ edekọ na. Ẹvẹ o rọ oware areghẹ te re iriruo itieye na e w’omai re ma kiẹ iroro mai riwi, si ẹgo hayo inoma-iguo no eva, re ma jẹ kẹ Jihova uvẹ re ọ kpọ omai họ!—Olezi 17:1-3.

Wuhrẹ, jẹ Reawere Eghale Na

16. Eme họ ẹjiroro uthubro nọ o rọ 1 Ahwo Kọrint 10:11, 12 na?

¹⁶ Evaọ otọ ọkpọvio Ọghẹnẹ, Pọl o te kuọ ovuẹ ekele unuovẹvẹ riẹ na họ avọ uthubro nana: “Whaọ eware nana kpobi evia kẹ ae re ojọ ozọ-usio rọ kẹ ae; rekọ a kere ai re e jọ unu ovẹvẹ rọ kẹ omai, e nọ orugba ige nọ e vrẹ no o bruze. Fikiere wha jọ ọ nọ o roro nọ o dikihẹ whawha ọ yọrọ oma riẹ, ogbẹrọ ere he o re ti kie.” (1 Ahwo Kọrint 10:11, 12) Wha joma riwi edikihẹ mai evaọ ukoko Ileleikristi na vo ho.

17. Ma te muẹrohọ iroro ethọthọ evaọ udu mai, eme ma re ru?

¹⁷ Wọhọ epanọ utehru o rẹ sai mu ekagba na, ere mai emọ Adamu imuomu na a reuku ẹgwọlọ eyoma oruo. (Emuhọ 8:21; Ahwo Rom 5:12) Fikiere, udu u re whrehe omai hi nọ ma te muẹrohọ iroro ethọthọ evaọ udu mai. Ikpoye, joma j’owọ uwoma. Nọ a te fi utehru họ oria ọvuavo hayo oria ewhrọwhrọ, o rẹ nwani mu ekagba vẹrẹ. Ma gwọlọ whaha oma u kpefihọ kẹ ‘ofou’ akpọ Setan, avọ aroza oma-sasa ọtọtọ riẹ, igberẹ-ibro odode riẹ, gbe iroro ogbekuo riẹ.—Ahwo Ẹfẹsọs 2:1, 2.

18. Eme Jihova o ru no kpahe iroro ethọthọ ohwo-akpọ?

¹⁸ Jihova ọ kẹ ohwo-akpọ ẹgba nọ ọ rẹ rọ whaha iroro ethọthọ nọ ma reuku riẹ na. Ọ kẹ Ọmọ ọvuọvo riẹ re ahwo nọ e rọwo riẹ a ruẹse wo uzuazọ ebẹdẹ bẹdẹ. (Jọn 3:16) Ma te lele ithihi Jesu kpekpekpe je dhesẹ uruemu Kristi, ma rẹ jọ oghale kẹ amọfa. (1 Pita 2:21) Ma re je wo eghale Ọghẹnẹ re, orọnikọ eka ha.

19. Ẹvẹ ma sai ro wo erere no eroro kpahe iriruo Ikereakere na ze?

¹⁹ Dede nọ a kuọ omai nẹnẹ na dhere no ẹthọthọ họ nwane wọhọ epanọ emọ Izrẹl anwae a jọ, ma wo Ẹme ọgbagba Ọghẹnẹ nọ a kere nọ ọ rẹ thọ omai. No ewẹ-ebe riẹ ze ma wuhrẹ kpahe eyeri Jihova kugbe ohwo-akpọ jegbe ekwakwa riẹ nọ Jesu o dhesẹ via, ‘ọnọ ọ rọ odhesẹvia oruaro Ọghẹnẹ, gbe ọrọ ẹro oma Riẹ.’ (Ahwo Hibru 1:1-3; Jọn 14:9, 10) Ẹkwoma olẹ gbe ewuhrẹ omarokpotọ Ikereakere na ze, ma rẹ sai wo “iroro Kristi.” (1 Ahwo Kọrint 2:16) Nọ ma tẹ nya ku edawọ ẹrọwọ mai efa, ma rẹ sai wo erere no eroro kpahe iriruo Ikereakere anwae na ze, jẹ maero ro no oriruo obọdẹ Jesu Kristi ze. Ma te ru ere, ma te ruẹ ekela Ọghẹnẹ hẹ. Ikpoye, ma te reawere aruoriwo Jihova nẹnẹ gbe eghale riẹ bẹdẹ bẹdẹ.

[Footnotes]

Ẹvẹ Whọ te k’Uyo?

◻ Ẹvẹ ma re fi ohrẹ Pọl họ iruo re ma siọ egedhọ ba ẹjọ?

◻ Eme ma rẹ sai ru re ma yoẹme kẹ unuovẹvẹ ukọ na kpahe igberẹ-ibro?

◻ Fikieme ma jẹ whaha eguago gbe inoma-iguo?

◻ Ẹvẹ ma sai ro wo eghale Ọghẹnẹ, orọnikọ eka riẹ hẹ?

[Picture on page 9]

Ma tẹ gwọlọ eghale Ọghẹnẹ, ma rẹ whaha ẹdhọgọ

[Pictures on page 11]

Wọhọ epanọ u fo re a si ekagba no, joma jẹ emamọ owọ re ma si isiuru ethọthọ no idu mai