Eme Ọghẹnẹ Ọ Gwọlọ Mi Omai?
“Uyoyou Ọghẹnẹ ona, nnọ ma re koko ijaje riẹ. Whaọ ijaje riẹ erọ owha ogbẹgbẹdẹ hẹ.”—1 JỌN 5:3.
1, 2. Fikieme o gbẹ rọ oware igbunu hu inọ Ọghẹnẹ o wo ẹgwọlọ kẹ ahwo nọ e gwọlọ gọe avọ ọjẹrehọ?
“EGAGỌ mẹ i woma k’omẹ!” O gbẹ rọnọ ere ahwo a be hae ta na? Evaọ uzẹme, onọ na o hae jọ nọ, “Kọ egagọ mẹ e be were Ọghẹnẹ eva?” Ẹhẹ, Ọghẹnẹ o wo ẹgwọlọ kẹ ahwo nọ a gwọlọ gọe avọ ọjẹrehọ. Kọ oyena u re gbe omai unu? Vievie. Ma rehiẹe nọ who wo uwou owowoma, ọnọ whọ rehọ igho buobu ruẹrẹhọ kẹle. Kọ ohwo kpobi whọ rẹ kẹ uvẹ re ọ riae? Ijo! Ohwo nọ ọ te rria ae kpobi ọ rẹ nyate ẹgwọlọ ra.
2 Epọvo na re, Jihova Ọghẹnẹ ọ rehọ uwou otọakpọ ọnana kẹ uviuwou ohwo-akpọ. Evaọ otọ esuo Uvie riẹ, a te “ruẹrẹ” otọakpọ na—zihe iei ruọ aparadase owowoma. Jihova o ti ru onana. Avọ eware buobu nọ i vru mi ei no, ọ rehọ Ọmọ ọvo riẹ kẹ re ọ sai ru ei lọhọ. Ababọ avro, Ọghẹnẹ o re wo ẹgwọlọ kẹ ahwo nọ e te rria etẹe!—Olezi 115:16; Matiu 6:9, 10; Jọn 3:16.
3. Ẹvẹ Solomọn o ro ku oware nọ Ọghẹnẹ ọ gwọlọ mi omai họ?
3 Ẹvẹ ma sai ro duku eware nọ Ọghẹnẹ ọ gwọlọ? Jihova ọ kẹ Solomọn Ovie areghẹ na ẹgba re o ru ẹme na kpẹre kpahe oware nọ Ọ gwọlọ mi omai. Nọ o roro kpahe eware kpobi nọ o le no—nọ i kugbe efe, ebabọ iwou, isiuru ikporakporo, gbe uyoyou obẹlẹ—Solomọn o te ti vuhumu nọ: ‘Ukuhọ eme na ona; a yo rai kpobi no. Dhẹozọ Ọghẹnẹ, who koko izi riẹ; keme onana họ iruo kpobi nọ i te ohwo e ruo.’—Ọtausiuwoma Na 12:13.
“Ijaje Riẹ Erọ Owha Ogbẹgbẹdẹ Hẹ”
4-6. (a) Eme họ otofa gheghe ubiẹme Grik nọ a fa “owha ogbẹgbẹdẹ” na? (b) Kọ fikieme ma jẹ sae ta nọ ijaje Ọghẹnẹ e rọ owha ogbẹgbẹdẹ hẹ?
4 “Koko izi riẹ.” No emuhọ ze, oye họ oware nọ Ọghẹnẹ ọ gwọlọ mi omai. Kọ oyena u bu ga hrọ nọ ọ rẹ nọ mi omai? Dazigbe. Jọn ukọ na ọ fodẹ oware omosasọ jọ k’omai kpahe ujaje Ọghẹnẹ, hayo ẹgwọlọ riẹ. O kere nọ: ‘Uyoyou Ọghẹnẹ ona, nnọ ma re koko ijaje riẹ. Whaọ ijaje riẹ erọ owha ogbẹgbẹdẹ hẹ.’—1 Jọn 5:3.
5 Ẹme Grik nọ a jọ etenẹ fa fihọ “owha ogbẹgbẹdẹ” na otofa gheghe riẹ u dhesẹ “ẹgbẹdẹ.” U kpoma họ oware nọ a rẹ sai ru vori hi, hayo onọ o rẹ jọ gaga re a ru gba. Eva Matiu 23:4, a rehọ e riẹ ro dhesẹ ‘ewha egbẹgbẹdẹ,’ ijaje ohwo-akpọ gbe iruemu anwae, enọ otu ikere-ebe gbe Farisi na a fihọ uzou ahwo. Kọ who wo otoriẹ oware nọ Jọn ukọ ọ kpako na ọ be ta na no? Ijaje Ọghẹnẹ e rọ owha ogbẹgbẹdẹ hẹ, hayo kọ e rẹ bẹ ekoko gbe he. (Wawo Iziewariẹ 30:11.) Ukpoye, nọ ma te you Ọghẹnẹ, ẹnyate ẹgwọlọ riẹ u re ru omai wo evawere. O rẹ k’omai uvẹ aghare nọ ma re ro dhesẹ uyoyou mai kẹ Jihova.
6 Re ma dhesẹ uyoyou mai kẹ Ọghẹnẹ, u fo re ma riẹ uzedhe oware nọ ọ gwọlọ mi omai. Enẹna joma roro kpahe ẹgwọlọ isoi Ọghẹnẹ. Nọ ma be t’ẹme kpahe ẹgwọlọ enana, wo oware nọ Jọn o kere na họ iroro: ‘Ijaje Ọghẹnẹ e rọ owha ogbẹgbẹdẹ hẹ.’
Wo Eriariẹ Ọghẹnẹ
7. Eme esiwo mai o roma hwa?
7 Ẹgwọlọ ọsosuọ họ ewo eriariẹ Ọghẹnẹ. Roro kpahe eme ọ Jesu nọ a kere evaọ Jọn uzou 17. Etoke na o jọ aso urere uzuazọ Jesu wọhọ ohwo-akpọ. Jesu ọ raha abọ owọwọ na buobu no be ruẹrẹ ikọ riẹ họ kẹ emuvrẹ riẹ. O je roro kpahe obaro rai, obaro ebẹdẹ bẹdẹ rai. Ọ kpare aro riẹ kpehru, ọ tẹ lẹ kẹ ai. Eva owọ avọ 3, ma se nọ: “Onana họ uzuazọ ebẹdẹ bẹdẹ, re a riẹ owhẹ nọ whẹ ọvo họ uvi Ọghẹnẹ, gbe Jesu Kristi ọnọ who vi.” Ẹhẹ, usiwo rai o roma hwa ‘ewo eriariẹ’ Ọghẹnẹ gbe ọrọ Kristi. Oyena u kie kpahe omai re. Re ma wo usiwo, ma re wo eriariẹ itieye na hrọ.
8. Eme u dhesẹ re a ‘wo eriariẹ’ Ọghẹnẹ?
8 Rekọ eme u dhesẹ re a ‘wo eriariẹ’ Ọghẹnẹ? Ẹme Grik nọ a jọ etenẹ fa fihọ ‘ewo eriariẹ’ na u dhesẹ nọ “re a te riẹ, vuhumu,” hayo “re a wo otoriẹ gbagba.” Muẹrohọ re, inọ ẹme na ‘ewo eriariẹ’ u dhesẹ nọ onana yọ onọ u w’oba ha. Fikiere re a wo eriariẹ Ọghẹnẹ u dhesẹ nọ re a riẹe gheghe he rekọ re a riẹe ziezi, re a jọ uvi ogbẹnyusu kugbei. Usu onya kugbe Ọghẹnẹ o rẹ wha eriariẹ nọ i re viharo kpahiẹe ze. Onana o rẹ nyaharo ribri, keme ma sai wuhrẹ eware kpobi kpahe Jihova ha.—Ahwo Rom 11:33.
9. Eme ma rẹ sai wuhrẹ kpahe Jihova no obe emama ze?
9 Oghẹrẹ vẹ ma sai ro wo eriariẹ Ọghẹnẹ? Ebe ivẹ e riẹ nọ e rẹ sae fiobọhọ k’omai. Ọvo jọ họ obe emama. Eware nọ Jihova ọ ma—te enọ i wo uzuazọ gbe enọ i wo uzuazọ họ—e k’omai otoriẹ kpahe oghẹrẹ ohwo nọ ọ rọ. (Ahwo Rom 1:20) Roro kpahe iriruo jọ. Edo ame nọ o bi kie no ugbehru ze, ẹtehe ekpalekpa ame nọ ofou ọ be wọ eva abade, eriwo isi buobu evaọ obehru eva evevẹ aso—kọ eware eyena kpobi i gbe wuhrẹ omai nọ Jihova yọ Ọghẹnẹ nọ o wo “ẹgba ologbo”? (Aizaya 40:26) Ehwẹ ọmọ nọ o bi rri ọmọ-arakọ nọ o bi le uweli obọ riẹ hayo ọmọ-ologbo nọ ọ be rehọ uvovo zaharo—kọ oyena u gbe dhesẹ nọ Jihova, ‘Ọghẹnẹ evawere na,’ o wo oma ehwẹ? (1 Timoti 1:11) Awere emamọ emu, emamọ ore idodo evaọ alare, emamọ ekọlọ ẹzi ọlọlọhọ, edo evra nọ e be suile evaọ ezi uvo, oma ogbalọ ọnọ who you—kọ ma gbe wuhrẹ no eware eyena ze nọ Ọnọma omai yọ Ọghẹnẹ uyoyou, ọnọ ọ gwọlọ nọ ma reawere uzuazọ?—1 Jọn 4:8.
10, 11. (a) Didi eware kpahe Jihova gbe ẹjiroro riẹ ma rẹ sai wuhrẹ no obe emama ze he? (b) Iyo enọ vẹ a rẹ sae jọ Ebaibol na ọvo ruẹ?
10 Ghele, u wo umuo nọ ma rẹ sae wuhrẹ kpahe Jihova no obe emama ze. Re a dhesiẹe: Eme họ odẹ Ọghẹnẹ? Fikieme ọ jẹ ma otọakpọ na je fi ohwo hiẹe? Fikieme Ọghẹnẹ ọ jẹ kẹ emuemu uvẹ? Eme o rọ obaro k’omai? Rọkẹ iyo enọ eyena, ma re kpohọ obe avivẹ nọ ọ kẹ eriariẹ Ọghẹnẹ hrọ—Ebaibol na. Evaọ ewẹ-ebe riẹ, Jihova ọ fere eware via kpahe omobọ riẹ, kugbe odẹ riẹ, uruemu riẹ, gbe ẹjiroro riẹ—evuẹ nọ ma rẹ sai wuhrẹ no oria ọfa ze he.—Ọnyano 34:6, 7; Olezi 83:18; Emọs 3:7.
11 Evaọ Ikereakere na, Jihova ọ kẹ eriariẹ nọ i wuzou kpahe amọfa nọ u fo nọ ma rẹ riẹ kpahe re. Wọhọ oriruo, ono họ Jesu Kristi, kọ abọ vẹ o wo evaọ erugba ẹjiroro Jihova? (Iruẹru 4:12) Ono họ Setan Ẹdhọ na? Evaọ idhere vẹ o bi ro su ahwo thọ? Ẹvẹ ma sae rọ whaha esu thọ riẹ? (1 Pita 5:8) Iyo enọ nana nọ i re siwi uzuazọ na a rẹ rue rai evaọ Ebaibol na ọvo.
12. Ẹvẹ who re dhesẹ oware nọ o soriẹ nọ o gbẹ rọ owha ogbẹgbẹdẹ hẹ re a wo eriariẹ Ọghẹnẹ gbe ẹjiroro riẹ?
12 Kọ o rọ owha ogbẹgbẹdẹ re a wo eriariẹ itieye na kpahe Ọghẹnẹ gbe ẹjiroro riẹ? Vievie! Kọ whọ sae kareghẹhọ epanọ o jọ owhẹ oma nọ who wuhrẹ nọ odẹ Ọghẹnẹ họ Jihova, inọ Uvie riẹ u ti zihe Aparadase ze otọakpọ ọnana, inọ ọ rehọ Ọmọ riẹ nọ o you kẹ wọhọ ẹtanigbo kẹ izieraha mai, gbe izẹme eghaghae efa? O gbẹ jọ wọhọ ẹsenọ a si ubere ogbori no aro ra who te mu eware họ ẹruẹ vevẹ no umuo oke oyena ze? Ewo eriariẹ Ọghẹnẹ o rọ owha ogbẹgbẹdẹ hẹ. O rọ awere!—Olezi 1:1-3; 119:97.
Ẹnyate Ute Ọghẹnẹ
13, 14. (a) Nọ ma bi wo eriariẹ Ọghẹnẹ na, didi inwene u fo nọ ma re ru evaọ izuazọ mai? (b) Didi iruemu igbegbe Ọghẹnẹ ọ gwọlọ nọ ma re sioma no?
13 Nọ ma bi wo eriariẹ Ọghẹnẹ na, ma ve ti vuhumu inọ u fo re ma ru inwene evaọ izuazọ mai. Onana u te su omai te ẹgwọlọ avivẹ: Ma rẹ nyate ute Ọghẹnẹ hrọ kẹ uruemu ezi jẹ jẹ uzẹme riẹ rehọ. Eme họ uzẹme? Kọ u ghine muẹme kẹ Ọghẹnẹ kpahe oware nọ ma bi ru gbe onọ ma rọwo? Ahwo buobu nẹnẹ a roro ere he. Iyẹrẹ nọ Ichọche England a kporo evaọ 1995 a jiroro nọ a re riwi ọriakugbe ọzae avọ aye ababọ orọo wọhọ uzioraha ha. “Ẹme na ‘ẹria evaọ uzioraha’ o rẹ wha omovuọ ze yọ u re fiobọhọ họ,” erei ibishọp ichọche jọ ọ ta.
14 Fikiere, kọ “ẹria evaọ uzioraha” o gbẹ ghinẹ rọ uzioraha? Jihova ọ vuẹ omai vevẹ epanọ o rẹ jariẹ oma kpahe uruemu utioye na. Ẹme riẹ, Ebaibol na, ọ ta nọ: “Wha jọ orọo o jọ oware adhẹwẹ eva udevie rai kpobi, wha zue ehwa orọo rai hi; keme Ọghẹnẹ o re ti guẹdhọ ibruẹhwae gbe igberedia.” (Ahwo Hibru 13:4) Owezẹ ọzae avọ aye taure a tẹ te rọo o rẹ sae jọ uzioraha kẹ isu-egagọ gbe ikpichọche he, rekọ yọ uzioraha ulogbo evaọ aro Ọghẹnẹ! Ere ọvona kugbe ẹnwae-obro, ẹnwaobro-udevie-inievo, gbe ezae-dueza. (Iziewariẹ 18:6; 1 Ahwo Kọrint 6:9, 10) Ọghẹnẹ ọ gwọlọ nọ ma sioma no iruemu itieye na kpobi, enọ o riwi wọhọ iruemu igbegbe na.
15. Ẹvẹ ẹgwọlọ Ọghẹnẹ u ro w’abọ kpahe edhere nọ ma re yeri kugbe amọfa gbe oware nọ ma rọwo?
15 Ghele, u te he, re a sioma no iruemu nọ Ọghẹnẹ o riwi wọhọ uzioraha. Ẹgwọlọ Ọghẹnẹ u w’obọ kugbe epanọ ma re ru amọfa re. Evaọ uviuwou na, o rẹro nọ ọzae avọ aye a re wo uyoyou gbe adhẹẹ kẹ ohwohwo. Ọghẹnẹ ọ gwọlọ nọ esẹ gbe ini a sẹro ẹgwọlọ iwo, ẹzi, gbe isiuru emọ rai. Ọ ta kẹ emọ nọ a yoẹme esẹ gbe ini rai. (Itẹ 22:6; Ahwo Kọlọsi 3:18-21) Kọ ẹvẹ kpahe erọwọ mai? Jihova Ọghẹnẹ ọ gwọlọ nọ ma whaha erọwọ gbe uruemu-ẹwho nọ i no egagọ erue ze hayo enọ i mukpahe iwuhrẹ ivevẹ Ebaibol na.—Iziewariẹ 18:9-13; 2 Ahwo Kọrint 6:14-17.
16. Dhesẹ epanọ o gbẹ rọ rọ owha ogbẹgbẹdẹ hẹ re a nyate ute Ọghẹnẹ kẹ uruemu ezi re a jẹ jẹ uzẹme riẹ rehọ.
16 Kọ o rọ owha ogbẹgbẹdẹ k’omai re ma nyate ute Ọghẹnẹ kẹ uruemu ezi re ma jẹ jẹ uzẹme riẹ rehọ? O rẹ jọ ere he nọ ma te roro kpahe irere riẹ—erọo nọ ọzae avọ aye a jọ you je fievahọ ohwohwo viukpọ erọo nọ e vahabọ fikiọ ababọ evaifihọ; iwou nọ emọ a jọ riẹ nọ esẹ gbe ini rai a you rai jẹ gwọlọ ai, viukpọ iviuwou nọ emọ a re jo roro nọ a mukpahe ai, gbabọ kẹ ai, nọ a jọ gwọlọ ai hi; ẹgba iroro efuafo gbe omokpokpọ viukpọ iroro obrukpe gbe oma nọ ẹnya ọ AIDS ọ da fia no hayo eyao igberẹ-ibro efa. O rọ vevẹ inọ ẹgwọlọ Jihova o rẹ whaha omai oware ovo nọ o rẹ lẹliẹ omai reawere uzuazọ họ!—Iziewariẹ 10:12, 13.
Dhesẹ Adhẹẹ kẹ Uzuazọ gbe Azẹ
17. Ẹvẹ Jihova o rri uzuazọ gbe azẹ fihọ?
17 Nọ whọ be rehọ uzuazọ ra rọwokugbe ute Ọghẹnẹ na, who re ti vuhumu epanọ uzuazọ o ghinẹ ghare te. Joma t’ẹme kpahe ẹgwọlọ avesa Ọghẹnẹ. Ma re dhesẹ adhẹẹ kẹ uzuazọ gbe azẹ hrọ. Uzuazọ o rọ ghaghae kẹ Jihova. O rẹ jọ erei, keme ọye họ Ehri uzuazọ. (Olezi 36:9) Whaọ, makọ uzuazọ ọmọ nọ ọ rọ eva oni riẹ dede ọ rọ ghaghae kẹ Jihova! (Ọnyano 21:22, 23) Azẹ u dikihẹ kẹ uzuazọ. Fikiere, azẹ ọ rọ ghaghae re evaọ aro Ọghẹnẹ. (Iruo-Izerẹ 17:14) U re gbe gb’omai unu hu inọ Ọghẹnẹ ọ gwọlọ nọ ma rri uzuazọ gbe azẹ wọhọ epanọ o rri rie.
18. Eme eriwo Jihova kpahe uzuazọ gbe azẹ o gwọlọ mi omai?
18 Eme adhẹẹ rọ kẹ uzuazọ gbe azẹ o gwọlọ mi omai? Wọhọ Ileleikristi, ma rẹ rehọ izuazọ mai je ijehwẹ fiki omosasọ họ. Ma rẹ yọrọ oma kpahe enwoma, fikiere u re mu omai ẹro nọ imoto gbe iwou mai e kare enwoma. (Iziewariẹ 22:8) Ma re se utaba ha, re ibi ure bẹtẹl he, hayo lọ imu egaga fiki omawere he. (2 Ahwo Kọrint 7:1) Yọ fikinọ ma rẹ gaviezọ kẹ Ọghẹnẹ nọ ọ ta nọ ‘sioma no azẹ,’ ma rẹ kuvẹ re a se azẹ họ oma mai hi. (Iruẹru 15:28, 29) Dede nọ ma you uzuazọ, ma rẹ daoma siwi uzuazọ mai enẹna ẹkwoma uzi Ọghẹnẹ nọ ma rẹ thọ jẹ rehọ erei fi ẹruore uzuazọ ebẹdẹ bẹdẹ mai họ awa ha!—Matiu 16:25.
19. Dhesẹ epanọ ma re ro wo erere no edhesẹ adhẹẹ kẹ uzuazọ gbe azẹ ze.
19 Kọ o rọ owha ogbẹgbẹdẹ re ma rri uzuazọ gbe azẹ ghaghae? Vievie! Roro kpahe iẹe. Kọ o rọ owha ogbẹgbẹdẹ re ohwo o wo ufuoma no ẹyao ọta irue nọ evovo utaba o rẹ wha ze? O rọ owha ogbẹgbẹdẹ re a dhẹvabọ no imu egaga nọ e rẹ reria ẹvori gbe ugboma na? Kọ o rọ owha ogbẹgbẹdẹ re ohwo ọ whaha ẹyao AIDS, ẹyao edhẹ, hayo eyao efa nọ i re no azẹ nọ a re sefihọ oma ze? Uzẹme, re ma whaha iruemu hayo iruẹru enwoma o rọ kẹ ewoma omobọ mai.—Aizaya 48:17.
20. Ẹvẹ uviuwou jọ a ro wo erere no ewo eriwo Ọghẹnẹ ze ọrọ uzuazọ?
20 Roro kpahe oriruo ọnana. Ikpe kakao nọ i kpemu, Osẹri aye jọ nọ o dihọ te emera esa gbe ubro no o te je hwẹ azẹ evaọ owọwọ jọ a tẹ wọe vẹrẹ vẹrẹ kpohọ ẹsipito. Nọ edọkita na o rri rie no, ẹme edọkita na o te fi ruọ aye na ezọ okenọ ọ jẹ vuẹ enọso jọ inọ a te kpae eva na no. Nọ ọ riẹ epanọ Jihova o rri uzuazọ ọnọ a ri yẹ hẹ no, ọ tẹ se thahethahe nọ a rẹ kpae eva na ha, ọ tẹ ta kẹ edọkita na nọ: “Otẹrọnọ ọmọ na ọ rọ uzuazọ, nyasiẹe ba etẹe!” Aye na o te gbe je hwẹ azẹ evaọ otiẹse, rekọ emerae buobu e vrẹ no o te yẹ ọmọzae nọ emera riẹ e gba ha avọ omakpokpọ ọnọ ọ kpako te ikpe 17 no enẹna. Aye na ọ tẹ ta nọ: “Ma gbiku oware nana kpobi kẹ ọmọzae mai no, ọ tẹ ta nọ eva e were riẹ inọ ma gbolo i rie fihọ ezuzu hu. Ọ riẹ nọ egagọ Jihova mai họ oware nọ u ru rie nọ ọ jẹ rọ uzuazọ nẹnẹ na.” Avọ imuẹro, ewo eriwo Ọghẹnẹ kpahe uzuazọ o jọ owha ogbẹgbẹdẹ kẹ uviuwou onana ha!
Ẹgọ Kugbe Ahwo Okugbe Jihova
21, 22. (a) Amono Jihova ọ gwọlọ nọ ma re kuomagbe gọe? (b) Ẹvẹ a re ro vuhu ahwo okugbe Ọghẹnẹ mu?
21 Orọnikọ mai ọvo họ ahwo nọ a bi ru inwene nọ a gwọlọ re ma rehọ izuazọ mai rọwokugbe ute Ọghẹnẹ hẹ. Jihova o wo ahwo evaọ otọakpọ ọnana, yọ ọ gwọlọ nọ ma gọe kugbe ai. Onana o rehọ omai ziọ ẹgwọlọ avene. Ma rẹ gọ Jihova kugbe ukoko riẹ nọ ẹzi ọ be kpọ hrọ.
22 Oghẹrẹ vẹ a sae ro vuhu ahwo ukoko Ọghẹnẹ mu? Wọhọ ute nọ a dhesẹ evaọ Ikereakere na, a re wo uvi uyoyou evaọ udevie rai, a re wo adhẹẹ odidi kẹ Ebaibol na, a rẹ kẹ odẹ Ọghẹnẹ adhẹẹ, a rẹ ta usiuwoma kpahe Uvie riẹ, yọ a rẹ jọ abọ akpọ omuomu ọnana ha. (Matiu 6:9; 24:14; Jọn 13:34, 35; 17:16, 17) Ukoko ọvuọvo ọye ọ rọ akpọ ọnana nọ o wo eka Egagọ-Ahwo-Ikristi uzẹme enana—Isẹri Jihova!
23, 24. Ẹvẹ ma sai ro dhesẹ nọ o rọ owha ogbẹgbẹdẹ hẹ re a gọ Jihova kugbe ahwo okugbe riẹ?
23 Kọ o rọ owha ogbẹgbẹdẹ re a gọ Jihova kugbe ahwo ukoko riẹ? Ijo, vievie! Ukpoye, uvẹ ulogbo o rọ re a wo uyoyou gbe uketha ọ uviuwou akpọ soso ọrọ inievo emezae gbe emetẹ Ileleikristi. (1 Pita 2:17) Dae rehiẹe nọ whọ zọ no okọ nọ u zue, whọ tẹ ruẹ nọ whọ rọ eva ame, whọ be daoma re whọ seba ekiedi. Okenọ abọ ọ rọ owhẹ no, ohwo jọ ọ tẹ riobọ k’owhẹ no okọ-adhẹzọ ze. Ẹhẹ, amọfa nọ a zọ no a riẹ! Evaọ okọ-adhẹzọ na, whẹ avọ amọfa a tẹ be rehọ unọjọ u tọjọ bi kpohọ okpa, yọ wha be wọ amọfa nọ a zọ evaọ edhere.
24 Kọ ogbẹrọnọ oghẹrẹ eyero ọvona ma rọ na? A si omai no “ame” enwoma akpọ omuomu ọnana kpohọ “okọ-adhẹzọ” ukoko otọakpọ Jihova no. Evaọ udevie riẹ, ma be gọ kugbe ohwohwo nọ ma bi bi kpohọ “okpa” ọ akpọ okiẹrẹe ọkpokpọ na. Otẹrọnọ otunyẹ uzuazọ e rẹ lẹliẹ oma lọhọ omai evaọ edhere, ẹvẹ oma o rẹ were omai te nọ ma bi wo obufihọ gbe ọbọga usu ibe Ileleikristi uzẹme na!—Itẹ 17:17.
25. (a) Didi owha-iruo ma wo kpahe ahwo nọ e gbẹ rọ “ame” akpọ omuomu ọnana? (b) Didi ẹgwọlọ Ọghẹnẹ ma te t’ẹme te evaọ uwuhrẹ notha na?
25 Kọ, ẹvẹ kpahe amọfa—ahwo oruọzewọ enọ e gbẹ rọ evaọ “ame” na? Ma wo owha-iruo nọ ma re ro fiobọhọ kẹ ae re a ruọ ukoko Jihova, ogbẹ rọ erei? (1 Timoti 2:3, 4) A gwọlọ obọfihọ re a wuhrẹ oware nọ Ọghẹnẹ ọ gwọlọ. Onana o rehọ omai te ẹgwọlọ avọ isoi Ọghẹnẹ. Ma rẹ jọ ahwo nọ e rẹ rehọ omarokpotọ whowho Uvie Ọghẹnẹ hrọ. Oware nọ onana u w’obọ kpahe ma te t’ẹme tei evaọ uwuhrẹ mai notha.
Kọ Whọ Kareghẹhọ?
◻ Fikieme ijaje Ọghẹnẹ e gbẹ rọ owha-ogbẹgbẹdẹ hẹ?
◻ Ẹvẹ ma re ro wo eriariẹ Ọghẹnẹ?
◻ Fikieme o gbẹ rọ owha ogbẹgbẹdẹ hẹ re ma nyate ute Ọghẹnẹ kẹ uvi uruemu re ma jẹ jẹ uzẹme riẹ rehọ?
◻ Eme eriwo Ọghẹnẹ kpahe uzuazọ gbe azẹ o gwọlọ mi omai?
◻ Amono Ọghẹnẹ ọ gwọlọ nọ ma re kuomagbe gọe, kọ ẹvẹ a re ro vuhu ai?
[Pictures on page 9]
Ma wuhrẹ kpahe Jihova no obe emama ze je no Ebaibol na ze
[Credit Line]
Edhe: Ọrọ udu-ekere ọ Australian International Public Relations; adaka: Safari-Zoo of Ramat-Gan, Tel Aviv