Ichọche na E Feva

“Ipopu O Gu Ichọche Na Ẹdhọ.” “Otokiẹ-Okienyẹ avọ Omukpahe Ahwo Ju—Ichọche na O Be Ruẹrẹ ‘Mea Culpa’a Riẹ Họ.” “ ‘Mea Culpa’ kẹ Etoke Okpemuotọ Na.” “Egagọ Methodist O Wounu kẹ Ahwo Amerind erọ Ugbothabọ Ukiediwo-Ọre.”

KỌ WHO se oghẹrẹ izoeme itiena no ẹdẹjọ? O wọhọ nọ ichọche na a be rọwo afuẹwẹ rai kperekpere je bi wounu kẹ eware nọ a ru no evaọ ikpe-udhusoi buobu nọ i kpemu no na. Ẹgba-iyẹrẹ o be fodẹ mea culpa efa nọ ipopu na o bi dhe ẹfẹfa.

Okenọ Ipopu na Ọ rọ Yare Erọvrẹ

Evaọ udevie 1980 avọ 1996, John Paul II ‘o vuhu iruthọ Ichọche na kpobi mu hayo ọ yare erọvrẹ,’ o tẹ kawo, rite isia 94, ere ọtota Vatican, Luigi Accattoli, ọ ta evaọ obe riẹ Quando il papa chiede perdono (Okenọ Ipopu na Ọ tẹ Yare Erọvrẹ). Wọhọ epanọ Accattoli ọ ta, “evaọ Ichọche Kathọlik na, ipopu na ọvo họ ọnọ ọ rẹ sae ru mea culpa.” Yọ ọ feva no, be ta kpahe iruthọ buobu nọ ichọche Kathọlik i ru no—Ohọre-Egagọ, emo, ẹthọ isu-egeva, omohẹriẹ evaọ ichọche na, Omukpahe Ahwo Ju, Otọkiẹ-Okienyẹ, Otu-Ugbarugba, gbe ohẹriẹ-ovioma. Evaọ obe ovuẹ jọ nọ a vi evaọ 1994 se isu-ichọche na (onọ otu jọ a roro wọhọ obe ọ isu-ichọche nọ o mai wuzou kpobi), John Paul II ọ tẹ j’iroro “evaefa ẹgbede ọrọ imuemu ikpe idu enana kpobi.”

Isu-ichọche buobu a lele oriruo ipopu na no. Evaọ December 1994 obe-usi Itali na Il Giornale o n’iyẹrẹ nọ: “Ibishọpo America buobu a roma via evaọ etẹlivisiọne a tẹ yare erọvrẹ vevẹ.” Erọvrẹ eme? Rọ kẹ erivo ọrọ ẹbẹbẹ ọfariẹ-ogbe izerẹ kugbe emaha na, nọ o wha ọraha buobu ze se emoha nọ u kpomahọ no. Evaọ January 1995 obe-usi na La Repubblica o tẹ n’iyẹrẹ kpahe “owojẹ nọ a te ruẹ obọ riẹ hẹ evaọ ikuigbe Kathọlik”—a t’ẹme kpahe ẹbẹbẹ abọ nọ Pope Pius XII o ro muoma kpahe Etoke Okpemuotọ na. Evaọ January 1995 obe-usi ovo na o n’iyẹrẹ nnọ osu-ichọche German ọ yare erọvrẹ kẹ “iruthọ buobu” erọ Roman Kathọlik na enọ e thọ emuemu Nazi na uke. Ichọche Protẹstant buobu a be fo omobọ rai re.

Fikieme?

Ebaibol na ọ tudu họ omai awọ re ma yare erọvrẹ okenọ ma te ruthọ, yọ ahwo buobu a bi jiri ichọche na nọ a tẹ be fo omobọ rai. (Jemis 5:16) Rekọ fikieme ichọche na a bi ro ru onana? Ẹvẹ u re kpomahọ ubiẹro nọ ma re ro riwi ai?

[Footnote]