Ẹvẹ Whọ Sai ro Dhesẹ Uvi Omarokpotọ?

UVI omarokpotọ o ghare gaga evaọ aro Ọghẹnẹ. Jemis o kere nọ: “Ọghẹnẹ o mukpahe otu-eheri, rekọ ọ rẹ rehọ aruoriwo kẹ enọ eromakpotọ.” (Jemis 4:6) Jemis ọ be jọ etenẹ t’ẹme kpahe iroro sa-sa nọ e rọ Ikereakere Hibru na. “Makọ epanọ ỌNOWO okpehru te na [o re muẹrohọ] imiwhrori, rekọ otu ibruoma-oro ọ riẹ rae eva ugbo.” “Ahwo nọ a be ya-oma a re ti hrẹ ai kpotọ; ajokpa ỌNOWO na ọvo a re ti ru rua.” “Rọ kẹ enọ i re se ẹkoko, eye [Ọghẹnẹ] o re se ẹkoko, rekọ enọ e rọ oma kpotọ ọ rẹ re ai ohrọ.”—Olezi 138:6; Aizaya 2:11; Itẹ 3:34.

Pita ukọ na ọ tudu họ ahwo awọ kpahe omarokpotọ re. O kere nọ: “Whai kpobi a rehọ oma-urokpotọ gọ-ẹgọ kẹ ohwo ohwo; keme ‘Ọghẹnẹ o re hrẹ obroma-oro, rekọ ọ vẹ rọ aruoriwo kẹ enọ e roma-kpotọ.”—1 Pita 5:5.

Oriruo Kristi ọrọ Omarokpotọ

Whọ rẹ sae nọ inọ, Didi erere hayo ewoma o re no omarokpotọ ze? Rọ kẹ ohwo nọ ọ gwọlọ jọ Oleleikristi uzẹme, uyo na u wuzou gaga—re a romakpotọ họ re a jọ wọhọ Kristi. Jesu o dhesẹ omarokpotọ riẹ ẹkwoma unevaze nọ ọ rọ jẹ obọdẹ owha-iruo riẹ rehọ re o no odhiwu ziọ otọakpọ, o te zihe ruọ ohwo gheghe, kpotọ vi enjẹle na. (Ahwo Hibru 2:7) Dede nọ ọ jọ Ọmọ Ọghẹnẹ, o thihakọ omovuọ nọ ewegrẹ egagọ riẹ a wọ fihọ iẹe uzou. O kru oma riẹ evaọ okenọ a je gu ei ẹdhọ, dede nọ ọ rẹ sai bo se obufihọ enjẹle buobu.—Matiu 26:53.

Ukuhọ riẹ, a tẹ kare Jesu avọ omovuọ fihọ ure oja, ghele o kru ẹrọwọ kẹ Ọsẹ riẹ. Pọl ọ tẹ sai kere kpahe iẹe nọ: “Wha jọ ẹjiroro nana ọjọ eva rai, ọnọ wha wo eva Kristi Jesu, ọnọ avọ Ọghẹnẹ a gbẹjọ ẹruọvo, dede na o kele i rie gbe odẹ-oro nọ avọ Ọghẹnẹ a rẹ jọ ẹrẹe he, rekọ o se omariẹ gbe oware ovo ho, ọ tẹ rehọ oghẹrẹ oma odibo, a te je yẹi wọhọ ohwo. A tẹ jẹ ruẹ uruemu riẹ nọ ohwo nọ o hrẹ oma riẹ kpotọ ọ tẹ rọwo whu, whu uwhu [ure oja, NW ].”—Ahwo Filipai 2:5-8.

Fikiere ẹvẹ ma sai ro dhesẹ uvi omarokpotọ? Nọ eware e tẹ via, ẹvẹ ma sai ro dhesẹ uruemu omarokpotọ viukpọ orọ omoya?

Oghẹrẹ nọ Ohwo Omarokpotọ O re Ru

Joma roro kpahe omarokpotọ evaọ obọ iruo, makọ evaọ eria iruo mai hayo evaọ iruo Ileleikristi. Re a sai ruiruo ziezi, a rẹ gwọlọ esẹro, isu-iruo, gbe ega-iruo. U re fo re ohwo jọ ọ jiroro. Didi uruemu who bi dhesẹ? Kọ who re roro nọ: “Eme o bi roro oma riẹ fihọ nọ ọ jẹ ta oware nọ me re ru k’omẹ? Me kri vi ei no evaọ iruo nana.” Ẹhẹ, who te wo omoya, who re veghe uzou kẹ ẹmeoyo. Evaọ abọdekọ riẹ, ohwo omarokpotọ ọ rẹ “rehọ mẹ-ọvo-ọria hayo eheri ru oware ovo ho, rekọ eva oma urokpotọ [o re] roro amọfa ro vi oma [riẹ].”—Ahwo Filipai 2:3.

Eme who re ru otẹrọnọ ohwo nọ ọ maha vi owhẹ hayo aye ọ kẹ ohrẹ? Who te wo omarokpotọ, who re rri rie vo ho. Who te wo omoya, whọ rẹ siẹe ovavo. Kọ o rẹ mae were owhẹ re a mu k’owhẹ ujiro nọ o rẹ wha ọraha s’owhẹ hayo kọ uvi ohrẹ nọ o rẹ bọ owhẹ ga?—Itẹ 27:9; 29:5.

Kọ whọ rẹ sai thihakọ nọ who te zere okpẹtu? Omarokpotọ u re fiobọhọ k’owhẹ thihakọ ẹbẹbẹ, wọhọ epanọ Job o ru. Who te wo omoya, whọ rẹ kaki muofu je veghe uzou nọ ẹbẹbẹ ọsese kpobi ọ tẹ roma via.—Job 1:22; 2:10; 27:2-5.

Omarokpotọ U re You jẹ rọ Vrẹ

O rẹ jọ ahwo jọ unu gbẹgbẹdẹ re a ta nọ, “Ivie. Me ru thọ. Whọ ta gba.” Fikieme? Omoya! Ghele na, unuwou oruọzewọ u re furie ẹwhọ orọo.

Kọ whọ rẹ kake rọ vrẹ okenọ omọfa o te ru owhẹ thọ? Hayo, evaọ omoya ra, who re wo ẹgo, ẹsejọ evaọ edẹ hayo emerae buobu, nọ who re ro gbolo ovao kẹ ọnọ who roro nọ o ru owhẹ thọ na? Hayo kọ who re tube kru egrẹ họ eva re who ru ohwo na oware uyoma? A kpe ahwo jọ no fiki egrẹ nọ a wo kẹ ai. Amọfa kọ odẹ ohwo na a rẹ raha. Wo ohẹriẹ, ohwo omarokpotọ o re wo uyoyou gbe erọvrẹ. Fikieme? Keme uyoyou u re kru ẹgo ho. U no Jihova eva ze re ọ rọ vrẹ emọ Izrẹl otẹrọnọ a roma kpotọ. Olele omarokpotọ Jesu ọ rẹ kake rọ vrẹ, makọ unuẹse buobu!—Joẹl 2:12-14; Matiu 18:21, 22; 1 Ahwo Kọrint 13:5.

Ohwo omarokpotọ ‘ọ rẹ karo evaọ edhesẹ adhẹẹ kẹ amọfa.’ (Ahwo Rom 12:10) New International Version u se nọ: “Kẹ amọfa adhẹẹ vi omobọ ra.” Kọ who re jiri amọfa je wo ovuhumuo kẹ ẹgba gbe eriariẹ rai? Hayo kọ who re vivie gwọlọ ẹthọthọ nọ whọ rẹ rọ raha odẹ rai? Ẹhẹ, kọ whọ rẹ sai ghine jiri amọfa? Otẹrọnọ onana o rọ ẹbẹbẹ k’owhẹ, ẹsejọhọ ẹbẹbẹ ra họ ozodhẹ gbe omoya.

Ohwo omoya ọ rẹ kare odiri. Ohwo omarokpotọ o re wo odiri gbe ithihakọ. Kọ ẹvẹ kpahe owhẹ? Kọ umutho oware nọ a ru owhẹ thọ kpobi o rẹ d’owhẹ t’onwa? Koyehọ who wo ithihakọ họ. Who te wo omarokpotọ, whọ rẹ nwani s’oma ra gboja hrọ họ. Kareghẹhọ oware nọ o via okenọ ilele Jesu a s’oma rai gboja hrọ—a tẹ jẹ whẹwhọ kpahe ohwo nọ ọ mae rro. O thọrọ e rae ẹro no nnọ aikpobi na “idibo nọ ifiokaha”!—Luk 17:10; 22:24; Mak 10:35-37, 41.

Okere-obe French jọ, Voltaire, o dhesẹ omarokpotọ wọhọ “ẹkpatiẹ ẹwẹ . . . ifue omoya.” Ẹhẹ, omarokpotọ họ udu nọ a re hrẹ kpotọ. Ohwo omarokpotọ o re hrẹ ẹzi riẹ kpotọ, ọ rẹ yoma ha. Ọ rẹ k’amọfa adhẹẹ gaga jẹ yọrọ oma riẹ.

Fikiere, eme ma jẹ daoma roma kpotọ? Keme Ọghẹnẹ ọ rẹ jẹ omarokpotọ rehọ je fiobọhọ k’omai wo uketha riẹ. Oware jọ nọ Jihova o je “you [Daniẹl] gaga” na họ fiki omarokpotọ riẹ, o te vi ẹnjẹle bru ei avọ eruẹaruẹ! (Daniẹl 9:23; 10:11, 19) Omarokpotọ o rẹ wha irere buobu ze. U re ru owhẹ wo emamọ egbẹnyusu nọ i you owhẹ. Rro vi ere, o rẹ wha oghale Jihova ze. “Osohwa omaurokpotọ avọ ozodhẹ ỌNOWO na họ efe, adhẹẹ gbe uzuazọ.”—Itẹ 22:4.

[Picture on page 7]

Ẹme unuwou ohwo omarokpotọ o rẹ lẹliẹ uzuazọ kpatiẹ viere