Whọ Rẹ Sae Thihakọ Rite Urere

“Ma rehọ oriori dhẹ ohrẹ nọ a fihọ kẹ omai na.”—AHWO HIBRU 12:1.

1, 2. Eme u dhesẹ re a thihakọ?

“WHA wo odiri ọwhawha,” ere Pọl ukọ na o kere se Ileleikristi Hibru erọ ikpe-udhusoi ọsosuọ. (Ahwo Hibru 10:36) Bi fiẹgbahọ epanọ okwakwa nana u wuzou te, Pita ukọ na ọ tẹ jẹ tudu họ Ileleikristi awọ nọ: ‘Rọ ithihakọ tua orọwọ rai.’ (2 Pita 1:5, 6) Rekọ ghinọ eme họ ithihakọ?

² Ofeme Griki gbe Oyibo jọ o fa ẹme Griki na kẹ “thihakọ” wọhọ “ẹdadamu ababọ ẹdhẹ . . . edikihẹ ga, etilẹmu.” Rọ kpahe ubiẹme Griki kẹ “ithihakọ,” obe jọ o ta nọ: “O rọ ẹzi nọ o re thihakọ eware, orọnikọ avọ odiri ọvo ho rekọ avọ ẹruore ọjaja . . . O rọ okwakwa nọ o rẹ lẹliẹ ọzae dikihẹ kothi rovao dhe ofou. Oye họ okwakwa nọ o rẹ rẹriẹ odawọ nọ o mae ga kpobi kpohọ oruaro keme o be ruẹ edada na vrẹ lafi kpohọ ute na.” Fikiere, ithihakọ e rẹ lẹliẹ ohwo dikihẹ ga evaọ aro ezadhe gbe ọbẹwẹ ababọ ekufiẹ ẹruore. Amono a mae gwọlọ okwakwa nana?

3, 4. (a) Ono o wo ẹgwọlọ ithihakọ? (b) Fikieme ma je thihakọ te urere?

³ Ileleikristi kpobi a rọ ọgbohrẹ nọ o gwọlọ ithihakọ. Evaọ ole ukpe 65 C.E., Pọl ukọ na o kere eme uduotahawọ nana se ibe oruiruo gbe ogbẹnya erẹ-ọnya ọrọ omarokpotọ riẹ Timoti: “Mẹ họre uvi ohọre na no, mẹ dhẹ ogbohrẹ na no, mẹ yọrọ orọwọ na no.” (2 Timoti 4:7) Ẹkwoma ẹme na “mẹ dhẹ ogbohrẹ na no,” Pọl ọ jẹ rehọ uzuazọ Oleleikristi riẹ dhesẹ ohrẹ, nọ u wo oria emuhọ gbe usi ekuhọ. Eva oke oyena, Pọl ọ rọ obokparọ dhẹ kẹle ekuhọ ohrẹ na no, yọ ọ be rọ aruọwha rri kparo kpohọ ewo osohwa na. Ọ ta haro nọ: “Nọ umuo oke na vrẹ a rehọ etu-uvie ẹrẹreokie na kpahe kẹ omẹ no, onọ Ọnowo na, obruoziẹ okiẹrẹe ọ rẹ te rọ kẹ omẹ eva Ẹdẹ ọyena.” (2 Timoti 4:8) U mu Pọl ẹro inọ o ti wo osohwa na keme o thihakọ rite urere. Kọ ẹvẹ kpahe omai nọ i kiọkọ?

⁴ Re o tuduhọ enọ i muọ ohrẹ na họ no, Pọl o kere nọ: “Ma rehọ oriori dhẹ ohrẹ nọ a fihọ kẹ omai na.” (Ahwo Hibru 12:1) Wọhọ Ileleikristi, ma ruọ ohrẹ ithihakọ nana okenọ ma rehọ oma mai mudhe kẹ Jihova Ọghẹnẹ ẹkwoma Jesu Kristi. Emamọ emuhọ evaọ edhere ọkwa-olele na u wuzou, rekọ oware nọ o mai wuzou họ re ma dhẹ ohrẹ na kuhọ. Jesu o whowho nọ: “Rekọ ọnọ o kiakọ te urere ọye a re ti siwẹ.” (Matiu 24:13) Osohwa nọ o be hẹrẹ enọ e dhẹ ohrẹ na t’uwou họ uzuazọ ebẹdẹ bẹdẹ! Fikiere, avọ ute evaọ iroro, ma re thihakọ te urere hrọ. Eme o ti fiobọhọ k’omai nyate ute oyena?

Emamọ Emuore—U Wuzou Hrọ

5, 6. (a) Re ma thihakọ evaọ ohrẹ uzuazọ na, eme ma re muẹrohọ? (b) Eruẹrẹfihotọ abọ-ẹzi vẹ ma re ro ruiruo, kọ fikieme?

⁵ Kẹle okpẹwho Kọrint, Grisi, họ oria ọ Arozaha Isthmia nọ a riẹ gaga na evaọ oke anwae. Pọl ọ riẹ nọ inievo obọ Kọrint a riẹ kpahe ọgbohrẹ gbe arozaha omuhrowo efa nọ e rẹ roma via evaọ etẹe na ziezi. Be ta kpahe oware nọ a riẹ no, ọ kareghẹhọ ae ohrẹ uzuazọ onọ a rọ na: “Wha gbẹ riẹ nọ e nọ i bi hrou oma ohrẹ-odhẹ ai kpobi a gbẹ dhẹ, rekọ omọvo o re mi osa? Fikiere wha dhẹ re osa na u te owhai obọ.” Pọl o fiẹgbahọ epanọ u wuzou te re a daji ohrẹ na jẹ thuẹ te ekuhọ. Rekọ eme o re fiobọhọ kẹ ai ru ere? O fibae nọ: “Ọgba-ohrẹ ọdhẹ kpobi ọ rẹ thọ oma riẹ vẹre eva koware koware.” Ẹhẹ, enọ e jẹ dhẹ-ohrẹ evaọ oke anwae na a je wuhrẹ gaga, yọrọ oma kpahe oware nọ a rẹ re jẹ da, jẹ kpọ owojẹ rai kpobi re a ruẹse kparobọ.—1 Ahwo Kọrint 9:24, 25.

⁶ Kọ ẹvẹ kpahe ohrẹ nọ Ileleikristi a rueva no na? Enẹ ọkpako jọ evaọ ukoko Isẹri Jihova jọ ọ ta: “Who re muẹrohọ emu abọ-ẹzi ra whọ tẹ gwọlọ thihakọ evaọ ohrẹ uzuazọ na.” Dai roro kpahe emu abọ-ẹzi nọ Jihova, “Ọghẹnẹ odiri” na, ọ k’omai no. (Ahwo Rom 15:5) Ehri emu abọ-ẹzi mai họ Ẹme riẹ, Ebaibol na. Kọ u gbe fo nọ ma yọrọ emamọ omaa isase Ebaibol? Ẹkwoma ‘ọrigbo ẹrọwọ gbe areghẹ’ na, Jihova ọ k’omai ebe ẹruoke nọ e nwani fo na Uwou-Eroro Na gbe Awake! gbe ebe efa nọ a kporo no Ebaibol ze. (Matiu 24:45) Ma tẹ roma totọ wuhrẹ enana e rẹ sae bọ omai ga evaọ abọ-ẹzi. Ẹhẹ, ma rẹ rehọ oke na—‘dẹ uvẹ oke na’—rọkẹ uwuhrẹ omobọ mai.—Ahwo Ẹfẹsọs 5:16.

7. (a) Fikieme u gbe ro te k’omai hi re ma riẹ kpahe igogo iwuhrẹ Ileleikristi ọvo? (b) Ẹvẹ ma sae rọ ‘ya kpohọ ẹkpako’?

⁷ Re ma daji edhere ọkwa-olele Ileleikristi na, u fo re ma nya vrẹ “uwuhrẹ oboba” na jẹ ‘ya kpohọ ẹkpako.’ (Ahwo Hibru 6:1) Fikiere ma re wo isiuru evaọ “okẹkẹe, [gbe] uthethei, gbe ekpehru gbe ekodo” uzẹme na je wo omokpokpọ no ‘emu ọgaga nọ ọ rọ kẹ enọ e kpako’ no na ze. (Ahwo Ẹfẹsọs 3:18; Ahwo Hibru 5:12-14) Wọhọ oriruo, rehọ ikere ene egbagba erọ uzuazọ Jesu evaọ otọakpọ na—Usiuwoma Matiu, Mak, Luk, gbe Jọn. Whọ tẹ roma totọ wuhrẹ ikere Usiuwoma nana ziezi, orọnikọ ma rẹ riẹ iruo nọ Jesu o ru gbe oghẹrẹ nọ ọ jọ ọvo ho rekọ ma rẹ jẹ riẹ iroro nọ e lẹle riẹ j’owọ na. Ere ma re ro wo “iroro Kristi.”—1 Ahwo Kọrint 2:16.

8. Ẹvẹ iwuhrẹ Ileleikristi i re ro fiobọhọ k’omai thihakọ evaọ ohrẹ uzuazọ na?

⁸ Pọl ọ hrẹ ibe enọ e rọwo nọ: “Fikiere jọ mai ohwo o he roro epanọ ọ rẹrọ jaja ọrivẹ riẹ oma, re o wo uyoyou, je ru iruo ezi kpobi, [wha] hẹ se oma ba e kugbe he, wọhọ epanọ uruemu otu jọ o rọ, rekọ whai ohwo ọ hẹ ta udu họ ohwo awọ, ofa riẹ, wha riẹ nọ ẹdẹ na ọ kẹlino.” (Ahwo Hibru 10:24, 25) Ẹvẹ iwuhrẹ Ileleikristi e rọ ehri uduotahawọ te! Yọ ẹvẹ o rọ omosasọ te re a jọ kugbe inievo iyoyou enọ i wo isiuru k’omai jẹ gwọlọ fiobọhọ k’omai thihakọ rite urere! Ma gwọlọ rri ọruẹrẹfihotọ oyoyou nana nọ o n’obọ Jihova ze na vo ho. Ẹkwoma ewuhrẹ omarokpotọ obọ mai gbe ekpohọ iwuhrẹ ẹsikpobi, joma “wo iroro wọhọ ọkpako.”—1 Ahwo Kọrint 14:20.

Iriughe nọ E Be k’Owhẹ Ọwhọ

9, 10. (a) Ẹvẹ iriughe e sae rọ jọ ehri uduotahawọ evaọ ohrẹ ithihakọ? (b) Eme họ ‘ẹgho ologbo isẹri nọ e wariẹ omai họ na’ nọ a jọ Ahwo Hibru 12:1 fodẹ na?

⁹ Epanọ ọdhẹ-ohrẹ ọ ruẹrẹ oma họ te kẹhẹ, eware e rẹ sae jọ edhere via nọ o re ro kpowọ họ otọ. Pọl ọ nọ inọ: “Wha jẹ dhẹ ziezi vẹre; ono ọ whaha owhai no wha gbẹ be rọwa uzẹme na ha?” (Ahwo Galesha 5:7) U muẹro nọ Ileleikristi Galesha na a muọ egbẹnyusu iyoma, yọ, fikiere, a te reghe no ohrẹ uzuazọ rai. Evaọ abọdekọ riẹ, uketha gbe uduotahawọ amọfa e sai ru ohrẹ na dina lọhọ. Onana o wọhọ okpomahọ nọ iriughe i re wo kpahe enọ e be dhẹ-ohrẹ na. Ogbotu na a re ru edo nọ o re fi ẹgba họ ọnọ ọ be dhẹ na oma no emuhọ rite ekuhọ. Ẹkoyẹ ọ iriughe na, onọ u kugbe igede ikporo avọ abọ ọtehe, o rẹ sae kẹ enọ e be dhẹ-ohrẹ na ẹgba viere nọ a bi te ekuhọ na. Evaọ uzẹme, iriughe nọ i wo ohrọ e rẹ sai fi ọwhọ họ enọ e rọ ohrẹ na oma.

¹⁰ Evaọ ohrẹ uzuazọ nọ Ileleikristi e rrọ na, amono họ iriughe na? Nọ ọ fodẹ isẹri ẹrọwọ Jihova taure oke Ileleikristi u te ti te no, wọhọ epanọ a kere fihọ Ahwo Hibru uzou avọ 11 na, Pọl o te kere nọ: “Fikiere epanọ isisẹri ewariẹ omai họ wọhọ ẹgho ologbo na, . . . [ joma] rehọ oriori dhẹ ohrẹ nọ a fihọ kẹ omai na.” (Ahwo Hibru 12:1) Ẹgho nọ ọ jọ etenẹ fodẹ rọ t’ẹme na, orọnikọ Pọl ọ rehọ ẹme Griki na dhesẹ ẹgho nọ ọ rro te umuo jọ họ. Ukpoye, onọ ọ rọ t’ẹme na, wọhọ epanọ ọfeme na W. E. Vine ọ ta, “u dhesẹ ẹgho nọ ọ rọ bizibizi nọ u ruru idhiwu na.” U re vevẹ, oware nọ Pọl o wo h’iroro na họ ogbotu isẹri—enọ i re buobu wọhọ ẹko ẹgho.

11, 12. (a) Ẹvẹ isẹri nọ e jọ taure oke Ileleikristi u te zi te a sae rọ tuduhọ omai awọ, wọhọ odẹme, re ma dhẹ ohrẹ na avọ ithihakọ? (b) Ẹvẹ ma sai ro wo erere vọvọ viere no ‘ẹgho ologbo isẹri na ze’?

¹¹ Kọ isẹri ẹrọwọ taure oke Ileleikristi u te ti te a sae jọ iriughe ọgbọ na nọ a rẹ ruẹ? Vievie. Aikpobi a whu no, be hẹrẹ ẹkparomatha. Rekọ, okenọ a jọ uzuazọ a jọ edhẹ-ohrẹ obokparọ, yọ iriruo rai e gbẹ rọ uzuazọ evaọ Ebaibol na. Nọ ma bi wuhrẹ Ikereakere na, ahwo ẹrọwọ nana a rẹ jọ vevẹ evaọ iroro mai jẹ tuduhọ omai awọ, wọhọ odẹme, re ma dhẹ ohrẹ na te ekuhọ.—Ahwo Rom 15:4.a

¹² Wọhọ oriruo, okenọ efe akpọ ọ tẹ be dawo omai, kọ eroro kpahe oghẹrẹ nọ Mosis ọ rọ siọ oruaro Ijipti o gbẹ tuduhọ omai awọ daji edhere na? Otẹrọnọ odawọ nọ ma rẹriẹ ovao dhe o ga vi ofa, ẹkareghẹhọ ẹdawọ ọgaga nọ Abraham ọ rẹriẹ ovao dhe okenọ a ta kẹe re ọ rehọ ọmọ riẹ Aiziki dheidhe o rẹ tuduhọ omai awọ re ma ruabọhọ ohọre ẹrọwọ na. Epanọ “ẹgho ologbo” nana e rẹ jaja omai oma te o roma hwa epanọ ma be rọ aro otoriẹ mai rue rai vẹ te.

13. Edhere vẹ Isẹri Jihova ọgbọna a be rọ tuduhọ omai awọ evaọ ohrẹ uzuazọ na?

¹³ Isẹri Jihova buobu e wariẹ omai họ nẹnẹ re. Ẹvẹ oriruo ẹrọwọ nọ Ileleikristi nọ a wholo na a kẹ o rro te no jegbe ezae gbe eyae “otu obuobu” na! (Eviavia 7:9) Ma rẹ sai se ikuigbe uzuazọ rai n’oke ruoke no emagazini nana gbe ebe ọ Watch Tower efa ze.b Nọ ma bi roro kpahe ẹrọwọ rai na, o rẹ tuduhọ omai awọ thihakọ rite urere. Yọ ẹvẹ u gbunu te re ma wo uketha egbẹnyusu ekpekpe gbe imoni enọ e be rọ ẹrọwọ gọ Jihova! Ẹhẹ, ma wo ahwo buobu nọ e rẹ tuduhọ omai awọ evaọ ohrẹ uzuazọ na.

J’Owọ Ra Avọ Areghẹ

14, 15. (a) Fikieme u je wuzou re ma j’owọ avọ areghẹ? (b) Fikieme ma je wo iroro evaọ efihọ ute mai?

¹⁴ Whọ tẹ be dh’ohrẹ ugbothabọ, whọ rẹ dhẹ avọ areghẹ. Emagazini New York Runner o ta nọ: “Whọ tẹ rọ ugidi muọ ohrẹ na họ, whọ sae dhẹe te ekuhọ họ. Ekuhọ riẹ o te jọ oma-uhrowo ukrẹkri evaọ ikilomita urere na hayo ekie evaọ edhere.” Ọzae jọ nọ ọ rẹ dhẹ ohrẹ ugbothabọ ọ kareghẹhọ nọ: “Oruẹme jọ evaọ ovuẹ jọ nọ me kpohọ evaọ omaruẹrẹhọ kẹ ohrẹ na ọ vẹvẹ unu gbiae inọ: ‘Whọ họrọ mu enọ e be dhẹ siawọ họ. Dhẹ oghẹrẹ nọ whọ rẹ dhẹ. Ogbẹrọ ere he eri o ve ti kpe owhẹ who ve ti kie.’ Eyo ohrẹ nana u fiobọhọ kẹ omẹ dhẹ ohrẹ na t’urere.”

¹⁵ Evaọ ohrẹ uzuazọ, idibo Ọghẹnẹ a rẹ ya gaga. (Luk 13:24) Ghele na, Jemis olele na o kere nọ: “Areghẹ nọ o nehru ze . . . o re roro didi.” (Jemis 3:17) Nọ emamọ oriruo amọfa ọ rẹ tuduhọ omai awọ re ma daoma viere na, iroro ididi i re fiobọhọ k’omai fi emamọ ute họ rọwokugbe ẹgba gbe iyero mai. Ikereakere na e kareghẹhọ omai nọ: “Rekọ jọ kohwo kohwo o dhesẹ iruo riẹ via, kẹsena o ve ti wo [ajiri] eva oma [obọriẹ] ọvo, o gbẹjọ orọ omọfa ha. Keme kohwo kohwo ọvuọ uye riẹ ọ rẹ te wha.”—Ahwo Galesha 6:4, 5.

16. Ẹvẹ omaurokpotọ u re ro fiobọhọ k’omai dh’ohrẹ na?

¹⁶ Eva Maeka 6:8, a nọ omai onọ nana nọ u re dhobọ te iroro: “Eme ỌNOWO na ọ jọ obọ rai gwọlọ rekọ . . . re wha jẹ rehọ oma kpotọ nya lele Ọghẹnẹ rai?” Omarokpotọ u kugbe ẹriẹ ọnyaba mai. Kọ ẹyao hayo owho o dina bru omai abọ dhe evaọ oware nọ ma be sai ru evaọ iruo Ọghẹnẹ? Jọ udu u no omai awọ họ. Jihova ọ be jẹ omodawọ gbe idheidhe mai rehọ ‘wọhọ onọ ma wo, orọnikọ onọ ma wo ho ho.’—2 Ahwo Kọrint 8:12; wawo Luk 21:1-4.

Fi Ẹro Ra Họ Osa Na

17, 18. Didi oware Jesu o fihọ aro nọ u fiobọhọ kẹe thihakọ urre oja na?

¹⁷ Evaọ eruvẹ kẹ Ileleikristi ahwo Kọrint ẹgwọlọ nọ a re ro thihakọ evaọ ohrẹ na, Pọl ọ fodẹ abọ ọfa ọrọ Arozaha Isthmia onọ u fo nọ a re muẹrohọ. Kpahe enọ i re w’obọ evaọ arozaha na, Pọl o kere nọ: “A [be dhẹ] fiki osa idodo akpọ gheghe nọ a re wo, rekọ omai o rọ ebẹdẹ bẹdẹ nọ o rẹ hiẹ hẹ. Whaọ orọnọ mẹ rẹ dhẹ gheghe he, mẹ be họre wọhọ ọnọ ọ be rehọ awọ tehe idedeghe he.” (1 Ahwo Kọrint 9:25, 26) Osa nọ a rẹ rọ kẹ enọ e kparobọ evaọ aruọza anwae eyena họ etu-uvie nọ a rehọ ẹbe nwa, hayo ẹbe eyaya—ghinọ “idodo akpọ gheghe.” Rekọ eme ọ be hẹrẹ Ileleikristi nọ i thihakọ te urere?

¹⁸ Be ta kpahe Oriwiruo mai, Jesu Kristi, Pọl ukọ na o kere nọ: “Ọ nọ ọ rehọ fiki oghọghọ nọ a kẹ riẹ ro thihakọ [uruveghe], ọ [daezọ] omovuọ họ, ọ tẹ keria obọze akaba uvie Ọghẹnẹ.” (Ahwo Hibru 12:2) Jesu o thihakọ te urere uzuazọ ohwo-akpọ riẹ ẹkwoma erri vrẹ ure oja na kpohọ osohwa riẹ, onọ u kugbe oghọghọ nọ o wo ọrọ obọ-uwo evaọ orufuọ odẹ Jihova, ẹtanigbo uviuwou ohwo-akpọ no uwhu, gbe esuo wọhọ Ovie gbe Ozerẹ Okpehru nọ o bi ti zihe ahwo-akpọ ẹmeoyo ziọ uzuazọ ebẹdẹ bẹdẹ evaọ otọakpọ aparadase na.—Matiu 6:9, 10; 20:28; Ahwo Hibru 7:23-26.

19. Eme ma rẹ kareghẹhọ nọ ma bi le edhere ọkwa-olele Ileleikristi na?

¹⁹ Roro oghọghọ nọ a fihọ k’omai nọ ma bi le edhere ọkwa-olele Ileleikristi na. Jihova ọ k’omai iruo evevọwẹ ọrọ ẹta usiuwoma Uvie Ọghẹnẹ gbe eriariẹ Ebaibol nọ i re siwi uzuazọ nọ ma rẹ rọ kẹ amọfa. (Matiu 28:19, 20) Ẹvẹ o rọ oghọghọ te re ma ruẹ ohwo nọ o ghine wo isiuru fihọ Ọghẹnẹ uzẹme na re ma je fiobọhọ kẹ ohwo ọyena ruọ ohrẹ uzuazọ na! Yọ makọ oghẹrẹ nọ a dede usiuwoma nọ ma be ta kẹ ae rehọ, o rọ uvẹ-ọghọ re ma w’abọ evaọ iruo nọ i kpomahọ orufuọ odẹ Jihova. Ma tẹ jọ usiuwoma na thihakọ makọ ababọ osegboja hayo ọwọsuọ enọ e rọ ẹkwotọ isẹri-ise mai na, ma re wo oghọghọ eva nọ ma re ru were Jihova. (Itẹ 27:11) Yọ obọdẹ osohwa nọ ọ y’eyaa riẹ k’omai họ uzuazọ ebẹdẹ bẹdẹ. Ẹvẹ oyena o te jọ oghọghọ te! U fo re ma roro kpahe eghale nana je thihakọ evaọ ohrẹ na.

Nọ Urere na O Be Kẹle Na

20. Ẹvẹ ohrẹ uzuazọ na o sae rọ bẹ viere nọ urere na o be kẹle na?

²⁰ Evaọ ohrẹ uzuazọ na, ma re muabọ kugbe ọwegrẹ ologbo mai, Setan Ẹdhọ na. Nọ ma be kẹle ekuhọ na, ọ be daoma viere re ọ sa omai awọ hayo si omai kpemu. (Eviavia 12:12, 17) Yọ o lọhọ họ re a jọ owhowho Uvie ẹrọwọ, ọrọ omarọkẹ ghelọ emo, ohọo, ẹyao, kugbe ọbẹwẹ efa kpobi nọ i kpokahọ “oke urere” na. (Daniẹl 12:4; Matiu 24:3-14; Luk 21:11; 2 Timoti 3:1-5) Ofariẹ, ẹsejọhọ o sae wọhọ nọ urere na u thabọ vi epanọ ma rẹro riẹ, maero otẹrọnọ ma muọ ohrẹ na họ ẹdhẹ ikpe buobu nọ e vrẹ. Ghele na, Ẹme Ọghẹnẹ ọ k’omai imuẹro inọ urere na o te ze. Jihova ọ ta nọ u ti lehie he. Urere na o kẹlino.—Habakuk 2:3; 2 Pita 3:9, 10.

21. (a) Eme ọ rẹ k’omai ẹgba nọ ma be ruabọhọ ohrẹ uzuazọ na? (b) Eme ọ rẹ jọ ọtamuo mai nọ urere na o be kẹle na?

²¹ Re ma kparobọ evaọ ohrẹ uzuazọ na, ma rẹ rehọ ẹgba no oware nọ Jihova ọ rọ uyoyou k’omai rọkẹ emu abọ-ẹzi mai ze. Ma tẹ jẹ gwọlọ uduotahawọ nọ ma rẹ sai wo kpobi evaọ usu-onya kugbe ibe enọ e rọwo, enọ e be dh’ohrẹ na re. O tẹ make rọnọ ukpokpoma ogaga hayo eware idudhe evaọ edhere i ru ohrẹ na bẹ viere, ma rẹ sai thihakọ te urere keme Jihova ọ rẹ kẹ “ogaga ulogbo nọ othesiwa.” (2 Ahwo Kọrint 4:7) Ẹvẹ o rọ omosasọ te re ma riẹ nọ Jihova ọ gwọlọ re ma dhẹ ohrẹ na t’uwou! Avọ ọtamuo ọgaga, joma “rehọ oriori dhẹ ohrẹ nọ a fihọ kẹ omai na,” avọ evaifihọ evọvọ inọ “ma te kọrọ ibi rai, otẹrọnọ oma o rọ omai hi.”—Ahwo Hibru 12:1; Ahwo Galesha 6:9.

[Footnotes]

Kọ Whọ Kareghẹhọ?

◻ Fikieme ma je thihakọ te urere?

◻ Eruẹrẹfihotọ Jihova vẹ ma re gbabọ kẹ hẹ?

◻ Fikieme u je wuzou re ma j’owọ mai avọ areghẹ?

◻ Didi oghọghọ a fihọ aro k’omai nọ ma be dh’ohrẹ na?

[Picture on page 28]

Wo uduotahawọ no iwuhrẹ Ileleikristi ze