A “Dhozọ Ọghẹnẹ” Uzẹme na

OKENỌ emọ Izrẹl a jọ igbo evaọ Ijipti, a fi eyae nọ i je yẹ eyae Hibru na, Shifra avọ Pua fihọ uyero okpẹtu. Re a sai bru ubu ahwo orẹwho ofa dhe, Fẹro o te j’uzi kẹ eyae enana nọ: “Okenọ wha bi ru iruo eyae-iyẹ rọkẹ eyae Hibru na . . . , otẹrọnọ ọmọzae, wha kpe i no.”—Ọnyano 1:15, 16.

Shifra avọ Pua a “dhozọ Ọghẹnẹ,” a tẹ wharo “a gbe ru wọhọ epanọ ovie obọ Ijipti ọ ta kẹ ae na ha.” Ukpoye, a vu emọ emezae na wa, dede nọ edikihẹ aruọwha nana o fi rai họ enwoma. Jihova “o te ri [iyẹ-eyae] na ziezi,” ọ tẹ hwa ae osa kẹ iruo esiwo uzuazọ rai na.—Ọnyano 1:17-21.

Ikuigbe nana i dhesẹ ovuhumuo Jihova kẹ enọ e be gọe. Ọ hẹ sai rri oware nọ Shifra avọ Pua a ru na wọhọ emamọ iruo gheghe, dede nọ o rọ iruo aruọwha. Whaọ, uvumọ aye aruro nọ o re kpe ọmọfofa ọ rọ họ! Dede na, Jihova o roro i rie inọ ahwo jọ, fiki ozodhẹ ahwo, a ru eware etọtọ no. Ma riẹ nọ oware nọ o wọ iyẹ-eyae nana orọnikọ uruemu ẹwo ọvo ho rekọ ozodhẹ gbe omarọkẹ Ọghẹnẹ.

Ẹvẹ ma rẹ ghọghọ te re ma gọ Ọghẹnẹ nọ o bi muẹrohọ iruo ẹrọwọ mai! Uzẹme, ẹsejọhọ ma te rẹriẹ ovao ku odawọ ẹrọwọ nọ o jọ otọ kẹ Shifra avọ Pua na ha. Ghele na, nọ ma te dikihẹ ga kẹ oware nọ u kiete—makọ evaọ obọ isukulu, eva oria iruo, hayo evaọ uyero ofa—Jihova o re rri uyoyou omarokpotọ mai vo ho. Ukpoye, o re zihe ruọ ọnọ ọ rẹ “hwosa kẹ e nọ e guọlọ e riẹ.” (Ahwo Hibru 11:6) Ẹhẹ, “Ọghẹnẹ ọ kare ọ rọ ẹrẹreokie he nọ iruo rai i re vẹro ho gbe uyoyou nọ owha be rehọ fiki riẹ ruẹ gbe epanọ wha be ga erezi na, wọhọ epa o nọ wha ruẹabọhọ na.”—Ahwo Hibru 6:10.

[Picture on page 32]

KỌ WHỌ GWỌLỌ DEDE EVUẸ EFA REHỌ?

Makọ evaọ akpọ ukpokpoma ọnana dede, whọ rẹ sai wo evawere no eriariẹ egbagba Ebaibol kpahe Ọghẹnẹ ze, Uvie riẹ, gbe ẹjiroro igbunu riẹ kẹ ohwo-akpọ. Whọ tẹ gwọlọ dede evuẹ efa rehọ hayo whọ tẹ gwọlọ re ohwo jọ ọ nyaze ti ru uwuhrẹ Ebaibol ọvọvẹ kugbe owhẹ, ivie na kere se Watch Tower, P.M.B. 1090, Benin City, Edo State, Nigeria, hayo oria adrẹse nọ u fo evaọ ẹwẹ-obe avọ 2 na.