2000—Yọ Ukpe Oka?
KỌ OBỌDẸ oware jọ o riẹ kpahe ukpe 2000 na? Ahwo nọ a be rria erẹwho Ukiediwo-Ọre a bi rri rie wọhọ ukpe ọsosuọ ọrọ odu-ikpe avesa na. Ahwo a be ruẹrẹ oma kpahe gaga kẹ ehaa riẹ. A be rehọ ighọjọ ilogbo ẹlẹtriki rọ hwa nọ i ti kele emaharo na bẹsenọ odu-ikpe ọkpokpọ na o re te. A be m’omaa ọ epati Aso-Horiọ Ukpe Okpokpọ na. A bi ghoro iwu nọ a kere eme ọ ekuhọ odu-ikpe fihọ evaọ iwou-eki gbe eria eki ikpewho.
Ichọche, te ilogbo te esese, i ti kuomagbe ehaa ukpe soso na. Evaọ emuhọ ukpe n’otha, a bi rẹro nọ Pope John Paul II o ti kpohọ Izrẹl re o su ahwo Roman Kathọlik evaọ oware nọ a bi se “ehaa oghọghọ odu-ikpe ọrọ Ichọche Roman Kathọlik.” A ta nọ iriughe nọ i te ima ivẹ gbe ubro rite ima ezeza, te egba-egagọ gbe enọ oma o be kpakpa, a be jiroro nọ a ti weze kpohọ Izrẹl evaọ ukpe n’otha.
Fikieme ahwo buobu a be rọ jiroro nọ a re kpohọ Izrẹl? Be rọ unu ipopu na ta, Roger Cardinal Etchegaray, oletu Vatican, ọ ta nọ: “Ukpe 2000 na yọ ehaa ọ Kristi gbe uzuazọ riẹ evaọ otọ nana. Fikiere u kiehọ re Ipopu na ọ nyaze etenẹ.” Ẹvẹ ukpe 2000 u ro w’obọ kpahe Kristi? A rri ukpe 2000 na wọhọ uzedhọ ukpe avọ 2,000 no oke eyẹ Kristi ze. Rekọ uzẹme o rọ? Ma te ruẹ.
Ukpe 2000 u tube wuzou viere kẹ ẹko ahwo ichọche jọ. U mu rai ẹro inọ evaọ ukpe n’otha na, Jesu o ti zihe kpohọ Ugbehru Olivi yọ a ti fiẹmo ọ Amagẹdọn, onọ a jọ obe Eviavia t’ẹme kpahe na, evaọ ukiekpotọ Mẹgido. (Eviavia 16:14-16) Evaọ irẹro eviavia enana, udhusoi buobu erọ ahwo United States a be zẹ iwou rai gbe ekwakwa rai buobu no jẹ be kwa kpohọ obọ Izrẹl. Rọkẹ erere enọ e sae te nya siọ iwou rai ba ha, a ta nnọ ọtausiuwoma ologbo United States jọ ọ y’eyaa nnọ o ti whowho ẹtha Jesu evaọ etẹlivisiọne—vevẹ!
Evaọ ekwotọ Ukiediwo-Ọre, omaa nọ a ti ro dede odu-ikpe avesa na o be ga haro. Rekọ ahwo evaọ ekwotọ efa a bi yeri uzuazọ rai vrẹ. Ahwo nana—enọ e mae bu evaọ akpọ na—a rọwo ho inọ Jesu obọ Nazarẹt na họ Mesaya na. Yọ a rọwo ikelakele edẹ B.C.-A.D. na ha.a Wọhọ oriruo, ahwo Muslim buobu a wo ukeledẹ obọ rai, onọ u dhesẹ nnọ ukpe n’otha na o te jọ 1420—orọnikọ 2000 ho. Ahwo Muslim a bi kele ikpe na no ẹdẹ nọ ọruẹaro na Muḥammad o ro no Mecca kpobọ Medina. Evaọ oma rai kpobi, ahwo evaọ akpọ na kpobi a wo ikeledẹ 40 nọ a bi ro ruiruo.
Kọ u fo re ukpe 2000 u wo otofa jọ kẹ Ileleikristi? Kọ January 1, 2000, o ghinẹ rọ ẹdẹ ologbo jọ? Ma te k’iyo enọ nana evaọ uzoẹme n’otha na.
[Footnotes]
a Evaọ ekele B.C.-A.D. na, a re dhesẹ eware nọ e via taure oke eyẹ Jesu o te te wọhọ ikpe ọ “B.C.” (taure Kristi ọ tẹ jọ); eware nọ e via nọ a yẹi no evaọ ikpe ọ “A.D.” (Anno Domini—“evaọ ukpe Olori mai”). Rekọ, ewena-isukulu jọ nọ e riẹ ziezi a be fodẹ “B.C.E.” (re Ekele Oke nana o te ti te) gbe “C.E.” (Ekele Oke mai onana).