Ẹrọwọ Ọ rẹ Sai Nwene Uzuazọ Ra

“O LỌHỌ gaga re ohwo o wo uruemu ezi ababọ Ọghẹnẹ.” Nọ eme ọ ohwo jọ nọ ọ se eriariẹ kpahe Ọghẹnẹ. Ọ ta nnọ ọ rehọ uruemu ẹfuọ okpehru wuhrẹ emọ riẹ n’otọ ze, a tẹ jẹ rehọ ute ukpehru otiọye na yọrọ emọ rai—aikpobi ababọ ẹrọwọ nọ a wo fihọ Ọghẹnẹ.

Kọ onana u dhesẹ nnọ ẹrọwọ nọ a re fihọ Ọghẹnẹ o w’iruo ho? U muẹro nnọ ere ohwo nana o roro. Yọ uzẹme inọ orọnikọ ohwo kpobi nọ ọ rọwo Ọghẹnẹ hẹ ọ nwane rọ ohwo oyoma ha. Pọl ukọ na ọ ta kpahe “otu Egedhọ na” enọ e riẹ Ọghẹnẹ hẹ rekiyọ a be “rọ ẹkẹ-ẹmema rai ru eware nọ e rọ eva uzi na gba.” (Ahwo Rom 2:14) A yẹ ohwo kpobi—kugbe enọ e siọ eriariẹ kpahe Ọghẹnẹ—avọ iroro-oziẹbro. Ibuobu e be daoma lele ekpakpọ iroro-oziẹbro rai a gbẹ make rọwo Ọghẹnẹ nọ ọ kẹ rai ẹgba ẹriẹ ewoma gbe eyoma ọyena ha.

Dede na, ẹrọwọ ọgaga fihọ Ọghẹnẹ—onọ u wo ehri no Ebaibol ze—o rọ ẹgba nọ ọ mae ga kẹ ewoma oruo vi iroro-oziẹbro nọ u wo uketha ha. Ẹrọwọ nọ o wo ehri no Ẹme Ọghẹnẹ ze, Ebaibol na, ọ rẹ rehọ ovuẹ kẹ iroro-oziẹbro na, ru ei fiẹ ro h’otọ viere evaọ evuhumu ewoma gbe eyoma. (Ahwo Hibru 5:14) Ofariẹ, ẹrọwọ ọ rẹ bọ ahwo ga re a yọrọ ute ukpehru evaọ otọ ọyawọ ọgaga. Wọhọ oriruo, evaọ etoke ikpe-udhusoi avọ 20 na, erẹwho buobu e ziọ otọ esuo ogbekuo no, nọ u gele ahwo ezi họ kpohọ eruo eware ugbarugba no. Dede na, ahwo nọ a wo uvi ẹrọwọ fihọ Ọghẹnẹ a se nọ a re siobọno ehri-izi rai, nọ izuazọ rai e tẹ make rọ awa dede. Fibae, ẹrọwọ nọ o no Ebaibol ze ọ rẹ sai nwene ahwo. O rẹ sai siwi izuazọ nọ i vru no je fiobọhọ k’ahwo whaha iruthọ iyoyoma. Roro kpahe iriruo jọ.

Ẹrọwọ Ọ rẹ Sai Nwene Uzuazọ Uviuwou

“Wha rehọ ẹrọwọ rai ru okpoware no.” Ere oguẹdhọ Oyibo jọ ọ ta okenọ o bruoziẹ ẹyọrọ emọ John gbe Tania. Okenọ ẹme John gbe Tania o bru otu isu na ze yọ a te rọo ho yọ uzuazọ uviuwou rai o tahaku. John, avọ ẹbẹbẹ ogbẹlọ imu gbe uruemu edhọfi, o te duomahọ ugbarugba re ọ ruẹse ruẹ ugho kẹ ekpere uruemu riẹ. O gbabọkẹ emọ riẹ gbe oni rai. Kọ oware “igbunu” vẹ o via?

Ẹdẹjọ, John o te yo ọmọ oniọvo riẹ nọ ọ be t’ẹme kpahe Aparadase. Avọ igbunu, ọ tẹ nọ ọsẹ gbe oni ọmọ na enọ. Ọsẹ gbe oni na yọ Isẹri Jihova, a te fiobọhọ kẹ John wuhrẹ kpahe iẹe no Ebaibol na ze. Ẹmẹrera, John avọ Tania a te wo ẹrọwọ nọ o no Ebaibol ze nọ u nwene izuazọ rai. A te ti kere obe orọo je fi ekpere iruemu rai kparobọ. Ahwo egọmeti nọ e kiẹ uviuwou rai riwi a tẹ ruẹ oware nọ o wọhọ nọ o hae sae via vẹre he—uviuwou evawere evaọ uwou okpakpatiẹ, oria nọ a kuenu kẹ nọ a sae jọ yọrọ emọ. Oguẹdhọ na ọ ta gba nọ o jiri ẹrọwọ ọkpokpọ John avọ Tania rọkẹ oware “igbunu” onana.

Ikilomita buobu no England, uvovo aye jọ evaọ Ekẹloma Ovatha-Ọre ọ be gwọlọ j’owọ re o kuomagbe usu enọ erọo rai e raha no. Ọ jẹ gwọlọ kuomagbe ima ahwo nọ erọo rai e rẹ fa k’ukpe k’ukpe. O yẹ ọmọ jọ no, rekọ ọzae riẹ ọ kpako vi ei gaga. Fiki onana, imoni riẹ a te je gele iei re ọ fa orọo na, o te ghine muọ owọ na họ ẹjẹ. Dede na, o je wuhrẹ Ebaibol kugbe omọvo Isẹri Jihova jọ. Okenọ Osẹri na o yo ẹme na, ọ tẹ fodẹ oware nọ Ebaibol na ọ ta kpahe orọo—wọhọ oriruo, inọ orọo yọ okẹ nọ u no obọ Ọghẹnẹ ze yọ o rọ oware nọ a re mu gbolo kufiẹ hẹ. (Matiu 19:4-6, 9) Aye na ọ tẹ jọ eva riẹ roro nọ, ‘U gbunu gaga inọ aye nana, ọrara, ọ be gwọlọ siwi uviuwou mai kpakiyọ enọ e kẹle omẹ a be gwọlọ taha iẹe ku.’ Ẹrọwọ ọkpokpọ riẹ nọ o wo t’obọ na o te fiobọhọ kẹe siwi orọo riẹ.

Oware uyoma ofa jọ nọ u bi kpomahọ uzuazọ uviuwou họ eva-ekparọ. Iyẹrẹ Okugbe Erẹwho jọ e ta nọ k’ukpe k’ukpe o tẹ kawo a bi keke aro fihọ kpare eva ima 45. Ọvuọvo eva-ekparọ eyena yọ okpẹtu. Eriariẹ Ebaibol i fiobọhọ kẹ aye jọ evaọ obọ Philippines siọ usu ahwo otiọye na ba ẹjọ.

Isẹri Jihova a nyaku aye na, ọ tẹ rehọ ibroshọ jọ nọ a re ro wuhrẹ Ebaibol nọ uzoẹme riẹ o rọ Eme Ọghẹnẹ Ọ Gwọlọ Mi Omai?,a o te muọ Ebaibol na họ ewuhrẹ. Emerae buobu evaọ obaro, ọ tẹ fodẹ oware nọ o lẹliẹ e riẹ je wuhrẹ Ebaibol na. Aye na o dihọ okenọ Isẹri na a kake nyaku ei, rekọ tei te ọzae riẹ a gwọlọ kpare eva na. Dede na, ifoto ọmọ nọ ọ rọ eva evaọ ẹwẹ-obe avọ 24 ọrọ ibroshọ na u duobọte aye na udu. Eme nọ Ebaibol ọ jọ obe na ta inọ uzuazọ yọ oware ofuafo keme ‘obọ Ọghẹnẹ ehri uzuazọ u no ze’ u ku rie eva rẹriẹ re ọ yọrọ eva na. (Olezi 36:9) Obọnana ọ rọ oni ọmọ nọ ọ rọ dhikẹ ziezi.

Ẹrọwọ O re Fiobọhọ kẹ Enọ A Rri Vo

Evaọ Ẹtiopia, ezae ivẹ nọ e gọ ekpere ẹgọ a ziọ ewuhrẹ egagọ Isẹri Jihova. Evaọ ekuhọ ewuhrẹ na, Osẹri jọ o te dhesẹ oma kẹ ae whẹtiẹ whẹtiẹ. Ezae na a tẹ yare ugho. Rekọ orọnikọ ugho Osẹri na ọ kẹ rae he rekọ oware nọ u woma viere. Ọ tuduhọ ae awọ re a fi ẹrọwọ họ Ọghẹnẹ, oware “nọ o ghare vi idọloro.” (1 Pita 1:7) Omọvo rai jọ ọ tẹ j’owọ muọ Ebaibol na họ ewuhrẹ. Onana u te nwene uzuazọ riẹ. Nọ ọ be rro evaọ ẹrọwọ na, ọ tẹ siọ evovo ba, idieda vrẹta, ọfariẹ-ogbe, gbe evovo ige. O te wuhrẹ epanọ ọ rẹ rọ ko unu riẹ viukpenọ ọ rẹ yare igho, yọ obọnana o bi yeri uzuazọ okpakpatiẹ.

Evaọ Itali, a bruoziẹ kpe ọzae ikpe 47 jọ re o kpohọ ega ikpe ikpe, a tẹ ka riẹ fihọ ẹsipito ẹdhoguo nọ a re jo siwi eruẹ. Omọvo Isẹri Jihova jọ nọ a kuvẹ nnọ ọ sae rueva uwou-odi na re ọ kẹ obufihọ abọ-ẹzi o te wuhrẹ Ebaibol kugbei. Ọzae na o te ru ẹnyaharo ọkpakpata. Ẹrọwọ o nwene uzuazọ riẹ te epanọ ahwo uwou-odi efa a jẹ rọ nyabru ei kẹ ohrẹ kpahe epanọ a re ro yeri kugbe ebẹbẹ rai. Ẹrọwọ riẹ nọ o no Ebaibol ze o lẹliẹ ahwo be kẹe adhẹẹ, ọghọ, gbe evaifihọ enọ i wuzou uwou-odi na.

Evaọ umutho ikpe nọ e vrẹ na, ebe-usi e be niyẹrẹ emo omoma nọ e rọ Africa. Oware nọ o be mai gbunu na họ emezae eboba nọ a bi wuhrẹ wọhọ isoja. A rẹ kẹ emọ nana imu, gb’oja kẹ ae, jẹ gbae họ re a dhomahọ iruemu olahiẹ mukpahe imoni rai re a jae riẹ nnọ uzuazọ rai o rọ ofẹ nọ a be họre kẹ na. Kọ ẹrọwọ nọ o no Ebaibol ze ọ ga te epanọ o re ro nwene izuazọ emoha itieye na? O tẹ kawo, u nwene ivẹ no.

Evaọ Liberia, Alex ọ jẹ hai fiobọhọ evaọ iruẹru Ichọche Kathọlik. Rekọ nọ ọ kpako te ikpe 13 no, o te kuomagbe otu ohọre jọ o te zihe ruọ osoja nọ ahwo kpobi a riẹ. Re ọ g’ẹro evaọ ohọre, o te dhomahọ iruẹru eda. Alex ọ ruẹ egbẹnyusu riẹ buobu nọ a kpe, rekọ ọ zọ. Evaọ 1997 ọ tẹ nyaku Isẹri Jihova yọ ọ ruẹ nnọ a gbolo ovao kẹe he. Ukpoye, a fiobọhọ kẹe wuhrẹ oware nọ Ebaibol na ọ ta kpahe ozighi. Alex o te no isoja. Nọ ẹrọwọ riẹ ọ be rro na, o te lele ujaje Ebaibol na: “Jọ osioma no oware uyoma re a ru onọ ukiẹrẹe, [jọ ọ] guọlọ udhedhẹ re o lele ei.”—1 Pita 3:11.

Oke onana, ọmọ jọ nọ ọ jọ isoja vẹre nọ a re se Samson ọ ziọ ẹwho nọ Alex ọ be rria enẹna. Ọ jọ ọgba-ile vẹre evaọ ichọche, rekọ evaọ 1993 ọ tẹ ruọ isoja je duomahọ ogbẹlọ imu, uruemu-imizi, gbe ọfariẹ-ogbe. Evaọ 1997 a te si ei no iruo isoja. Samson ọ tẹ ruọ edhere bi kpohọ Monrovia re o kuomagbe obọdẹ ẹgba omofọwẹ jọ rekọ ogbẹnyusu riẹ jọ ọ tẹ tuduhọ iẹe awọ re o wuhrẹ Ebaibol kugbe Isẹri Jihova, fikiere o te ti wo ẹrọwọ nọ o no Ebaibol ze. Onana o tẹ kẹe udu nọ o ro siobọno idhere ohọre riẹ. Obọnana Alex avọ Samson a be rria uzuazọ ofuafo orọ udhedhẹ. U te no ẹrọwọ nọ o no Ebaibol ze no, kọ oware jọ o sai nwene izuazọ nọ e whọhọ tenẹ?

Uvi Ẹrọwọ

Enana yọ ejọ gheghe evaọ usu iriruo buobu nọ a rẹ fodẹ ro dhesẹ ẹgba uvi ẹrọwọ nọ o no Ebaibol ze. Dede na, orọnikọ ahwo kpobi nọ a rọ ugbunu ta nnọ a rọwo Ọghẹnẹ a be rria te ute ukpehru Ebaibol na ha. Evaọ uzẹme, ahwo jọ nọ a se nnọ Ọghẹnẹ ọ be rria a rẹ sae rria izuazọ nọ e kpatiẹ vi ejọ nọ i se oma rai Ileleikristi. Onana o rọ ere keme ẹrọwọ nọ o no Ebaibol ze o gwọlọ vi ugbunu nọ a rẹ rọ ta nnọ ma rọwo Ọghẹnẹ ọvo.

Pọl ukọ na o se ẹrọwọ “umuẹro eware kpobi nọ ma bi rẹro rai na, odhesẹvia eware nọ ma te ruẹ hẹ.” (Ahwo Hibru 11:1) Fikiere, ẹrọwọ u kugbe evaifihọ egaga—onọ u wo owọ fihọ imuẹro egaga—kpahe eware nọ a te ruẹ hẹ. Maero u kugbe avro nọ a re wo vievie he kpahe ẹrria Ọghẹnẹ, inọ o wo isiuru kpahe omai, gbe nnọ ọ te ghale enọ i bi ru oreva riẹ. Ukọ na ọ tẹ jẹ ta nọ: “Ohwo kpobi nọ o bikẹle Ọghẹnẹ ọ rẹ rọwo nọ Ọghẹnẹ ọ rọ, jegbe ọ rẹ te hwosa kẹ e nọ e guọlọ e riẹ.”—Ahwo Hibru 11:6.

Otiọ ẹrọwọ ọnana ọye o nwene izuazọ John, Tania, gbe amọfa nọ a jọ uzoẹme nana t’ẹme te na. O wọ rae fieva kpobi họ Ẹme Ọghẹnẹ, Ebaibol na, kẹ uketha evaọ iroro-ejẹ. U fiobọhọ kẹ ae ru omolahiẹ ubroke re a siọ edhere ọthọthọ, onọ o lọhọ, ba ẹnya. Epanọ iriruo enana kpobi e hẹrioma te na, aikpobi i muhọ evaọ edhere ọvo na. Omọvo Isẹri Jihova jọ o wuhrẹ Ebaibol kugbe ahwo nana, a tẹ ruẹ uzẹme oware nọ Ebaibol na ọ ta: “Ẹme Ọghẹnẹ ọ rẹjọ bẹdẹ, avọ iruo.” (Ahwo Hibru 4:12) Ogaga Ẹme Ọghẹnẹ u fiobọhọ kẹ omomọvo rai re ọ bọ ẹrọwọ ọgaga nọ o nwene uzuazọ riẹ kpohọ abọ owoma.

Isẹri Jihova a bi ruiruo evaọ ekwotọ gbe ikoliko abade nọ i bu vi 230. A zizie owhẹ re who wuhrẹ Ebaibol na. Fikieme? Keme u mu rai ẹro nnọ ẹrọwọ nọ o no Ebaibol ze o ti nwene uzuazọ ra wowoma re.

[Oruvẹ-obotọ]

[Uwoho nọ o rrọ ẹwẹ-obe avọ 3]

Ẹrọwọ nọ o no Ebaibol ze o re nwene izuazọ kpohọ abọ owoma