Kọ Ubiẹme na “Oleleikristi” O Bi Ku Otofa Riẹ Fiẹ?

EME u dhesẹ re a jọ Oleleikristi? Didi uyo whọ rẹ kẹ? A nọ oghẹrẹ ahwo sa-sa nọ a salọ no erẹwho sa-sa ze onọ oyena, yọ enana họ iyo jọ nọ a kẹ:

“Re a lele Jesu jẹ raro kele iei.”

“Re a jọ omamọ ohwo jẹ ghale eware kugbe amọfa.”

“Re a jẹ Kristi rehọ wọhọ Olori gbe Osiwi.”

“Re a kpohọ Emase, lẹ olẹ Ekele-Ifiare, jẹ re ibrẹdi gbe udi emu-owọwọ na.”

“Mẹ rọwo ho inọ who re kpohọ ichọche re whọ tẹ jọ Oleleikristi.”

Makọ ebe-ọfeme dede e kẹ otofa igbunu buobu. Evaọ uzẹme, obe jọ u wo otofa ikpe rọkẹ ubiẹme na “Oleleikristi,” nọ i no “ẹrọwo fihọ hayo omakugbe egagọ Jesu Kristi” rite “ohwo nọ ọ rrọ kpatiẹ.” Agbẹta nọ ibuobu a je wo ẹbẹbẹ re a dhesẹ oware nọ Oleleikristi u dhesẹ na.

Uruemu Uvẹ Nọ A Kẹ

Nẹnẹ na, evaọ udevie enọ i se omarai Ileleikristi—makọ evaọ udevie enọ e keria akpala ọvo na evaọ ichọche—whọ rẹ sai duku eriwo sa-sa kpahe ewuhrẹ wọhọ ekere Ebaibol na evaọ otọ ẹzi Ọghẹnẹ, ewuhrẹ eghrorotha na, omadhehọ ichọche evaọ esuo-ohrowo, gbe ẹghale ẹrọwọ ohwo kugbe amọfa. Avro uruemu, kpahe izoẹme wọhọ eva-ekparọ, ezae-duezae, gbe ọzae avọ aye nọ a be rria kugbe ababọ orọo, ẹsibuobu enana e rẹ wha ẹwhọ ọgaga ze. Uruemu nọ o rrọ emu onana họ uvẹ nọ a kẹ.

Wọhọ oriruo, kẹle na ogbẹgwae ichọche Protẹstant jọ a votu re a thọ ichọche na uke “re a rehọ ọzae jọ nọ a riẹ wọhọ ọnọ o re duezae mu ọkpako wọhọ omọvo jọ orọ ugboma esuo riẹ,” ere obe nọ a re se Christian Century ọ niyẹrẹ. Iwuhrẹ-egagọ jọ a tubẹ kẹ eriwo na nọ ẹrọwọ fihọ Jesu u wuzou kẹ usiwo ho. A rọwo nọ ahwo Ju, ahwo Muslim, gbe amọfa “a sai ti kpohọ obọ odhiwu re [wọhọ Ileleikristi],” ere The New York Times ọ niyẹrẹ.

Dai roro iei, Osu-Ọgbahọ nọ ọ be ta ewoma esuo-omobọ ohwo hayo osu-omoma nọ ọ be wha esuo-evega haro hayo ohwo nọ ọ be rẹrote okegbe nọ o bi fiobọhọ ko irre ugbeko. Whọ sae ta nọ, “Ohwo yena ọ sae ghinẹ jọ Osu-Ọgbahọ hayo osu-omoma hayo ohwo nọ ọ be rẹrote okegbe he”—whọ ta gba. Ghele na, okenọ who te roro kpahe oghoghẹrẹ eriwo nọ enọ i se omarai Ileleikristi nẹnẹ a wo, whọ te ruẹ iwuhrẹ nọ e hẹrioma no ohwohwo gaga gbe enọ i mukpahe oware nọ Ọnọ ọ Fa Egagọ-Ileleikristi, Jesu Kristi, o wuhrẹ. Eme oyena u dhesẹ kpahe oghẹrẹ ọ Egagọ-Ileleikristi nọ a rọ?—1 Ahwo Kọrint 1:10.

Okpakpa re a nwene iwuhrẹ Ileleikristi re i kiehọ uruemu etoke na u wo ikuigbe othethei, wọhọ epanọ ma te ruẹ na. Ẹvẹ Ọghẹnẹ avọ Jesu a roro kpahe inwene itieye na? Kọ ichọche nọ i re wuhrẹ iwuhrẹ nọ Kristi o wuhrẹ hẹ a sai ghine se omarai Ileleikristi? Ma te t’ẹme te enọ enana evaọ uzoẹme n’otha na.