Ekiakiẹ Nọ E Mai Woma Kpaobọ Nọ Whọ Rẹ Sai Ru

KỌ WHẸ yọ Oleleikristi? O tẹ rrọ ere, kiyọ whọ rrọ usu ahwo nọ a bu vi ima-idu ivẹ (2,000,000,000) nọ a bi se omarai Ileleikristi, koyehọ nọ a tẹ ghale iẹe, omọvo evaọ usu imasa o bi se omariẹ Oleleikristi evaọ akpọ na. Nẹnẹ, egagọ buobu e riẹ nọ i bi se omarai Ileleikristi, rekiyọ a wo ọvuọ iwuhrẹ gbe eriwo riẹ. O sae jọ nọ eware nọ whọ rọwo i wo ohẹriẹ no erọ amọfa nọ a bi se omarai Ileleikristi. Kọ oware nọ ohwo ọ rọwo u gine muẹme? U muẹme otẹrọnọ whọ ginẹ gwọlọ ru lele oghẹrẹ nọ a dhesẹ Ileleikristi evaọ Ebaibol na.

A riẹ ilele ọsosuọ Jesu fihọ “Ileleikristi.” (Iruẹru Ikọ 11:26) O gbẹ gwọlọ nọ a rọ odẹ ofa se ai hi, keme ae ọvo a jọ Ileleikristi evaọ oke yena. Ileleikristi a re ru lele iwuhrẹ gbe ekpọvio Jesu Kristi, ọnọ ọ to egagọ Ileleikristi họ. Kọ ichọche ra i bi ru ere? Kọ who roro nọ ichọche ra i bi wuhrẹ eware nọ Jesu o wuhrẹ gbe eware nọ Ileleikristi oke anwae a rọwo? Ẹvẹ whọ sae rọ riẹ sọ ichọche ra i bi gine wuhrẹ eware nọ Jesu o wuhrẹ? Edhere nọ whọ sae rọ riẹ họ, Ebaibol na nọ whọ rẹ rọ kiẹ eware nọ a bi wuhrẹ riwi.

Dai roro kpahe onana: Jesu Kristi o wo adhẹẹ kẹ Ikereakere na gaga keme ọ riẹ nọ Ẹme Ọghẹnẹ. Otu nọ ọ jẹ rehọ iwuhrẹ obọrai wuhrẹ ahwo bi gbabọkẹ iwuhrẹ Ebaibol na, eva rai e were Jesu vievie he. (Mak 7:9-13) Fikiere ma sae ta nọ Ebaibol na ilele Jesu oke anwae a jẹ rehọ iwuhrẹ rai no ze. U fo nọ Oleleikristi kpobi ọ rẹ nọ omariẹ nọ, ‘Kọ iwuhrẹ ichọche mẹ e rọwokugbe Ebaibol na?’ Re whọ sae kuyo onọ yena, iviena rehọ Ebaibol na kiẹ iwuhrẹ ichọche ra riwi.

Jesu ọ ta nọ ma gọ Ọghẹnẹ evaọ edhere uzẹme, yọ Ebaibol na uzẹme yena o rrọ. (Jọn 4:24; 17:17) Yọ Pọl ukọ na ọ ta nọ re ma sai wo esiwo, ma re “wo eriariẹ egbagba uzẹme na.” (1 Timoti 2:4) Fikiere u wuzou gaga re iwuhrẹ mai e rọwokugbe eriariẹ egbagba Ebaibol na. O gbẹ rrọ ere he, yọ uzuazọ mai o rrọ ọza!

EPANỌ MA SAE RỌ REHỌ EBAIBOL NA KIẸ EWARE NỌ MA RỌWO RIWI

Iviena se enọ ezeza nọ e rrọ obotọ na, je muẹrohọ iyo nọ Ebaibol na ọ kẹ. Jọ Ebaibol na se eria ikere nọ a fodẹ na, je roro kpahe iyo nọ Ebaibol na ọ kẹ. Kẹsena whọ vẹ nọ omara nọ, ‘Kọ iwuhrẹ ichọche mẹ e rọwokugbe ẹme nọ Ebaibol na ọ ta na?’

Onana u ti fiobọhọ kẹ owhẹ ru ekiakiẹ nọ e mai woma kpaobọ. Kọ o ruọ owhẹ nọ whọ rẹ rọ Ebaibol na kiẹ eware efa nọ a bi wuhrẹ owhẹ evaọ ichọche ra riwi? O te were Isẹri Jihova re a fiobọhọ kẹ owhẹ ru onana. Iviena ta kẹ Osẹri Jihova jọ re o wuhrẹ Ebaibol na kugbe owhẹ ọvọvẹ. Hayo kpohọ oria Itanẹte mai, jw.org/iso.

1 ONỌ: Ono họ Ọghẹnẹ?

UYO: Jihova nọ ọ rrọ Ọsẹ Jesu họ, Ọghẹnẹ Erumeru nọ ọ ma eware kpobi.

ẸME NỌ EBAIBOL NA Ọ TA:

“Ma be hai yere Ọghẹnẹ, Ọsẹ Olori mai Jesu Kristi ẹsikpobi nọ ma tẹ be lẹ roro owhai.”—Ahwo Kọlọsi 1:3.

“Who te, Jihova Ọghẹnẹ mai, re a jiri owhẹ fiki oruaro gbe ọghọ gbe ogaga ra, keme whẹ ọ ma eware kpobi.”—Eviavia 4:11.

Je rri Ahwo Rom 10:13; 1 Timoti 1:17.

2 ONỌ: Ono họ Jesu Kristi?

UYO: Jesu họ Ọmọ ọsosuọ Ọghẹnẹ. Ọghẹnẹ họ ọnọ ọ ma Jesu, fikiere Jesu o wo emuhọ. Ọghẹnẹ ọ rro vi Jesu, fikiere Jesu o re yoẹme kẹe.

ẸME NỌ EBAIBOL NA Ọ TA:

“Ọsẹ na ọ rro vi omẹ.”—Jọn 14:28.

“[Jesu] họ uwoho Ọghẹnẹ nọ a rẹ ruẹ hẹ na, ọmọ ọsosuọ evaọ emama kpobi.”—Ahwo Kọlọsi 1:15

Je rri Matiu 26:39; 1 Ahwo Kọrint 15:28.

3 ONỌ: Eme họ ẹzi ọfuafo na?

UYO: Ẹzi ọfuafo na yọ ogaga nọ Ọghẹnẹ o re ro ruiruo. Ẹzi ọfuafo na yọ ohwo ho, keme ọ rẹ sae vọ ohwo oma, yọ ọ rẹ sae kẹ ohwo ẹgba.

ẸME NỌ EBAIBOL NA Ọ TA:

“Epanọ Ẹlizabẹt o ro yo uyere Meri na, ọmọ nọ ọ rrọ edhede riẹ o te nuhu oma, ẹzi ọfuafo ọ tẹ vọ Ẹlizabẹt oma.”—Luk 1:41.

“Wha ti wo ogaga nọ ẹzi ọfuafo na o te bru owhai ze no.”—Iruẹru Ikọ 1:8.

Je rri Emuhọ 1:2; Iruẹru Ikọ 2:1-4; 10:38.

4 ONỌ: Eme họ Uvie Ọghẹnẹ??

UYO: Uvie Ọghẹnẹ yọ egọmeti obọ odhiwu. Jesu họ ovie Uvie Ọghẹnẹ. Kẹle na, Uvie Ọghẹnẹ u ti ru nọ ahwo a ti ro ru oreva Ọghẹnẹ evaọ otọakpọ na soso.

ẸME NỌ EBAIBOL NA Ọ TA:

“Ukọ-odhiwu avọ ihrẹ o te kporo ọgba riẹ. Me te yo edo irru eruarua jọ evaọ obọ odhiwu nọ e be ta nọ: ‘Uvie akpọ na u zihe ruọ Uvie Olori mai gbe orọ Kristi riẹ no, yọ O ti su wọhọ ovie bẹdẹ bẹdẹ.’”—Eviavia 11:15.

Je rri Daniẹl 2:44; Matiu 6:9, 10.

5 ONỌ: Kọ ahwo owoma kpobi a ti kpohọ odhiwu?

ANSWER: UYO: Ijo. Umutho ahwo jọ ọvo nọ a se “uthuru okakao,” ae Ọghẹnẹ ọ salọ re a kpohọ odhiwu. A ti zihe ruọ ivie nọ i ti lele Jesu su otọakpọ na.

ẸME NỌ EBAIBOL NA Ọ TA:

“Ozọ u mu owhai hi, uthuru okakao, keme o ruọ Ọsẹ rai no inọ ọ rẹ kẹ owhai Uvie na.”—Luk 12:32.

“A te jọ izerẹ kẹ Ọghẹnẹ gbe Kristi, yọ a te jọ ivie nọ i ti lele iei su.”—Eviavia 20:6.

Je rri Eviavia 14:1, 3.

6 ONỌ: Didi ẹjiroro Ọghẹnẹ o wo kẹ otọakpọ na gbe ahwo-akpọ?

UYO: Nọ Uvie Ọghẹnẹ o tẹ ze no, akpọ na kpobi o ti zihe ruọ aparadase nọ ahwo owoma a te rria avọ omokpokpọ, udhedhẹ ebẹdẹ bẹdẹ, gbe uzuazọ nọ u wo oba ha.

ẸME NỌ EBAIBOL NA Ọ TA:

“Enọ e rọ oma kpotọ, e rẹ te rọ otọ na reuku; oma o rẹ te were ae evaọ omofọwẹ.”—Olezi 37:10, 11.

“O ti ririe irui-oviẹ kpobi no aro rai, uwhu o gbẹ te jọ ofa ha, yọ uweri hayo oviẹ hayo edada e gbẹ te jọ ofa ha. Eware ọsosuọ na e vrẹ no.”—Eviavia 21:3, 4.

Je rri Olezi 37:29; 2 Pita 3:13.