‘A Rẹ T’ẹme Kpahe Ewoma Gbe Uyoyou’

EVAỌ ikpe jọ kẹle na, a raha odẹ Isẹri Jihova gaga no evaọ France. Ewegrẹ rai a rehọ erue gbe evuẹ ethọthọ tae raha kẹ ẹgbede na no. Evaọ emuhọ 1999, Isẹri Jihova evaọ France kpobi a ghale ima 12 erọ omobe-ovẹvẹ jọ nọ uzoẹme riẹ o ta nọ People of France, You Are Being Deceived! (Ahwo France, A be Viẹ Owhai Họ) A jọ omobe-ovẹvẹ nana za eme odẹ-oraha na dhe.

Umutho edẹ jọ nọ a ghale omobe-ovẹvẹ na no, Mr. Jean Bonhomme, ọbo imu gbe omọvo Ogbẹgwae Isuẹsu vẹre, o te vi ileta jọ nọ o kere se ẹgbede na kpohọ oria obe-usi ẹwho na. O kere nọ: “Isẹri Jihova a rẹ nyaziọ uwou mẹ n’oke ruoke. A rẹ nyaze te ta k’omẹ kpahe ewoma gbe uyoyou akpọ soso. . . . A rẹ rọ ọgbahọ ruọ uwou hu. A rẹ rehọ unu uwowolẹ t’ẹme jẹ roma kpotọ kezọ kẹ eme avro mẹ.”

Nọ ọ jẹ ta kpahe eriwo abọ-ẹzi ọrọ Isẹri Jihova, Mr. Bonhomme ọ ta nnọ: “Oma usino eware akpọ rai o rọ enwoma ha. Evaọ abọdekọ riẹ, iroro ogbori erọ isu jọ e rọ enwoma kẹ udhedhẹ ahwo gbe okugbe okogho-ahwo.”