Iwhowho Uvie A N’iyẹrẹ
Isẹri E Ruọ Ẹgbede Evaọ France
NO IRIOKE Edisoi-Oka, January 29, 1999, rite urere oka na, Isẹri Jihova evaọ France a rọ ọwhọ vaha ima 12 erọ obe-ovẹvẹ jọ nọ uzoẹme riẹ o rọ Ahwo France, A Be Viẹ Owhai Họ! evaọ iyẹrẹ gbe uwhremu na n’uwou ruọ uwou. Eme ọ wha ewhowho otiọye na ze?
Evaọ ẹgwa jọ nọ a gba evaọ Paris ohiohiẹ Edisoi-Oka ọyena, a ta oware nọ o so ewhowho na ze. Ọtota Osẹri jọ ọ ta nọ: “Oware nọ ma gwọlọ ru nẹnẹ na họ re ma dhesẹ oma mai via re ma furie eme ọtaraha nọ a be vaha kpahe omai. Ma rọwo nọ wha sai gu omai ẹdhọ, rekọ ma gbẹ te gaviezọ kẹ erue gbe eme nọ e be raha odẹ mai hi.”
Dede nọ Isẹri Jihova họ egagọ Ileleikristi ilogbo avesa evaọ France, a whọku je kpokpo emọ Isẹri buobu no evaọ isukulu. A le ekpako jọ no iruo je guegue ai fiki egagọ rai no. Ugbunu gaga inọ, a tubẹ gwọlọ nọ a re mi ai abọ 60 evaọ udhusoi ọrọ azọhọ unevaze nọ a wo evaọ egagọ rai. Ẹvẹ ewhowho na o ro duobọte omohẹriẹ nana?
Obe-ovẹvẹ na u whowho nọ: “Isẹri Jihova 250,000 gbe egbẹnyusu rai nọ e be rria France a SIỌ edhere ofruriọ nọ a ro kele egagọ Oleleikristi rai, onọ o rọ France no anwọ 1900 ze, kugbe egagọ imuozọ anwọ 1995. . . . A SIỌ ukpokpoma nọ a be kẹ ae na.” Eme ọtaraha nọ a gba họ Isẹri na uzou no evaọ France gbe edhere eviẹhọ nọ otu ọtaraha a be rọ jọ ẹgbede raha odẹ rai a fere rai via. Obe-ovẹvẹ na u ku rie họ nnọ: “Nẹnẹ, bu vi ima ivẹ Isẹri Jihova gbe egbẹnyusu rai e be rria Europe. A rẹ rọ adhẹẹ kẹ izi Orẹwho nọ a jẹ rrọ emotọ ẹkwoma ekoko izi Usiuwoma na. Ahwo France, uzẹme na ona. O rọ owha-iruo mai re ma tae via wọhọ epanọ o ghinẹ rọ!”
Emamọ Uyo Okpakpata
A ghale ima ọ obe-ovẹvẹ na kẹ ahwo evaọ ẹdẹ ọsosuọ na. Evaọ Paris ọvo, evaọ ọretuzou, Isẹri nọ i bu vi 7,000 a fi ebe-evẹvẹ nọ i bu vi ima 1.3 họ obọ ahwo no. Re a ruẹ Isẹri buobu tere nọ e be ghale ebe-evẹvẹ evaọ iyẹrẹ yọ orọ ọsosuọ kẹ ahwo na. Ekwakwa awhusi, kugbe ebe-usi orẹwho soso gbe erọ okegbe avọ etẹlivisiọne, e t’ẹme ezi kpahe ewhowho na. Obe-usi na Le Progrès de Lyon u muẹrohọ nọ: “Owojẹ nana . . . u rovie orithọ ẹme jọ via. Evaọ ikpe ikpe nọ e vrẹ na, ubiẹme na ‘ẹko’ . . . u wo otofa ẹkpẹlobọ, imuozọ, gbe omonwa. . . . Isẹri Jihova a rọ ẹko imuozọ nọ ọ rẹ raha okegbe he.”
Ahwo nọ a riẹ Isẹri Jihova a wo ovuhumuo kẹ oma udhedhẹ rai gbe adhẹẹ odidi rai kẹ izi nọ a fihọ. Fikiere, ahwo buobu evaọ iyẹrẹ na a dhesẹ ovuhumuo gbe uketha rai kẹ idu Isẹri buobu enọ i w’obọ evaọ ewhowho na. Ifonu, evuẹ nọ a rọ emashini ro vi, gbe ileta nọ i no obọ ahwo nọ a be kẹ uyere fiki obe-ovẹvẹ na e tẹ nwani muhọ ẹlahwe. Maero, a kẹ otu oruọzewọ uvẹ re a yo uzẹme na kpahe Isẹri na wo ohẹriẹ no eme erue gbe igheghẹ na, yọ enọ a raha erọwọ rai no a sae ta oware nọ a rri ghaghae na via.