Gbẹ Hai Ru Ewoma
“Keme ubi elo na eva ewoma te onọ ukiete gbe uzẹme a jẹ rue riẹ.”—AHWO ẸFẸSỌS 5:9.
1. Ẹvẹ ima ahwo buobu a bi ro dhesẹ enẹna inọ a rọwo kugbe Olezi 31:19 na?
EWOMA nọ ọ mae rro nọ ohwo-akpọ jọ kpobi ọ rẹ sai ru họ re ọ wha orro se Jihova. Nẹnẹ, ima ahwo buobu a bi ru ere ẹkwoma Ọghẹnẹ nọ a bi jiri fiki ewoma riẹ. Wọhọ Isẹri omarokpotọ erọ Jihova, ma rehọ udu kpobi rọwo kugbe ọso-ilezi na ọnọ ọ so nọ: “Ẹvẹ ewoma ra o bu te, no whọ ruẹrẹ kpahe rọ kẹ enọ e be dhẹozọ ra!”—Olezi 31:19.
2, 3. Eme ọ rẹ sae via ma gbẹ rọ emamọ uruemu tua iruo ilele-iruo mai hi?
2 Ozodhẹ urirẹ orọ Jihova o rẹ wọ omai jiri iei kẹ ewoma riẹ. O rẹ jẹ wọ omai ‘jiri ỌNOWO, ghale iẹe, je ru re a riẹ oruaro ọkwa-uvie riẹ.’ (Olezi 145:10-13) Oye jabọ ma jẹ rọ ọwhọ w’obọ evaọ iruo ewhowho Uvie na gbe ilele-iruo na. (Matiu 24:14; 28:19, 20) Dede na, ma rẹ rọ emamọ uruemu tua iruo usiuwoma ota mai. Ogbẹrọ ere he, ma rẹ sae wha ẹpoviẹ se odẹ ofuafo Jihova.
3 Ahwo buobu a rẹ ta nnọ a be gọ Ọghẹnẹ, rekọ uruemu rai o rọwo kugbe itee nọ a fihọ Ẹme riẹ nọ a kẹ ẹgba na ha. Kpahe ejọ nọ e jẹ rria te ewoma nọ a ta nọ a bi ru hu, Pọl ukọ na o kere nọ: “Whẹ [owuhrẹ] amọfa, kọ whọ gbẹ sai wuhrẹ oma obọ ra re? Kọ whẹ ọnọ ọ rẹ ta kẹ omọfa nọ, who tho uji hi, kọ who re tho [uji] re? Kọ whẹ nọ ọ be takẹ ohwo nọ o bru ẹhwae he na, who re bruẹhwae? . . . Odẹ Ọghẹnẹ u zihe ruọ ọliọose udevie ahwo Egedhọ fiki rai, wọhọ epanọ a kere i riei.”—Ahwo Rom 2:21, 22, 24.
4. Eme o re no emamọ uruemu mai ze?
4 Ukpenọ ma rẹ poviẹ odẹ Jihova, ma rẹ daoma rọ emamọ uruemu jiri iei. Onana u re kpomahọ enọ e rrọ otafe ukoko Ileleikristi na wowoma. Oware jọ họ, u re fiobọhọ k’omai faunu otu ọwọsuọ mai. (1 Pita 2:15) Maero, emamọ uruemu mai u re si ahwo ziọ ukoko Jihova, rovie edhere kẹ ae re a kẹe orro je wo uzuazọ ebẹdẹ bẹdẹ.—Iruẹru 13:48.
5. Didi enọ u fo nọ ma re roro kpahe obọnana?
5 Nọ ma gba ha na, ẹvẹ ma rẹ sae rọ whaha uruemu nọ u re kp’omovuọ họ Jihova oma je zoruẹ enọ e be gwọlọ uzẹme na? Evaọ uzẹme, ẹvẹ ma sae rọ kparobọ evaọ eruo ewoma?
Ubi Elo Na
6. Evẹ jọ họ “iruo ebi nọ e rẹ mọ ibi hi,” rekọ didi ibi i re dhesẹ oma via evaọ udevie Ileleikristi?
6 Wọhọ Ileleikristi nọ e rọ oma mudhe no, ma be reawere oware jọ nọ u re fiobọhọ k’omai whaha “iruo ebi nọ e rẹ mọ ibi hi.” Enana i kugbe iruo nọ i re kp’omovuọ họ Ọghẹnẹ oma wọhọ erueta, ujitho, ekela, eme oworu kpahe owezẹ ezaveyae, uruemu omovuọ, eme etọtọ, gbe ọgba-idieda. (Ahwo Ẹfẹsọs 4:25, 28, 31; 5:3, 4, 11, 12, 18) Ukpenọ ma re duoma họ iruo itieye na, ma rẹ “nya wọhọ emọ elo.” Pọl ukọ na ọ ta nọ “ubi elo na eva ewoma te onọ ukiete gbe uzẹme a jẹ rue riẹ.” (Ahwo Ẹfẹsọs 5:8, 9) Fikiere ẹnya evaọ elo na ma jẹ sae ruabọhọ eruo ewoma. Rekọ didi oghẹrẹ elo onana o rrọ?
7. Re ma ruabọhọ edhesẹ ubi ewoma, eme ma re ru hrọ?
7 Ghelọ sebaẹgba mai, ma rẹ sai ru ewoma otẹrọnọ ma be nya evaọ elo abọ-ẹzi. Ọso-ilezi na ọ so nọ: “Ẹme ra họ ukpẹ kẹ awọ mẹ, ọye họ elo kẹ edhere mẹ.” (Olezi 119:105) Ma tẹ gwọlọ ruabọhọ edhesẹ “ubi elo na” ẹkwoma oghẹrẹ “ewoma” kpobi, ma rẹ rehọ uvẹ elo abọ-ẹzi nọ ma rẹ jọ Ẹme Ọghẹnẹ ruẹ na ro ruiruo, onọ a be romatotọ dhesẹ evaọ ebe Ileleikristi, jẹ ta kpahe ẹsikpobi eva iwuhrẹ egagọ mai na. (Luk 12:42; Ahwo Rom 15:4; Ahwo Hibru 10:24, 25) U te je fo re ma fiẹro h’otọ ziezi kẹ oriruo gbe iwuhrẹ Jesu Kristi, “elo akpọ na” gbe “oruaro gbe uwoho ẹkoma” Jihova.—Jọn 8:12; Ahwo Hibru 1:1-3.
Ubi Ẹzi Na
8. Fikieme ma jẹ sai dhesẹ ewoma?
8 Ababọ avro, elo abọ-ẹzi o re fiobọhọ k’omai ru ewoma. Fibae, ma rẹ sai dhesẹ ubi nana keme ẹzi ọfuafo Ọghẹnẹ, hayo ogaga iruo riẹ, o be kpọ omai. Ewoma ọ rrọ usu “ubi Ẹzi” na. (Ahwo Galesha 5:22, 23) Ma tẹ rehọ uzou kpotọ kẹ ọkpọvio ẹzi ọfuafo Jihova, o te jọ oma mai mọ ubi igbunu riẹ ọrọ ewoma.
9. Ẹvẹ ma rẹ sai ro ru lele eme Jesu nọ a kere fihọ Luk 11:9-13 na?
9 Isiuru egaga mai re ma ru Jihova eva were ẹkwoma edhesẹ ubi ẹzi orọ ewoma na o rẹ wọ omai ru lele eme Jesu na: “Mẹ ta kẹ owhai, yare, a rẹ te kẹ owhai; guọlọ wha rẹ te ruẹ; kporo, a reti rovie kẹ owhai, keme ọnọ ọ yare kpobi, o wo; ọnọ ọ guọlọ ọ ruẹ; ọnọ o kporo a reti rovie kẹe. Whai ọvẹ ọ rọ ọsẹ, nọ ọmọzae riẹ ọ rẹ te yare eri, kọ ọ rẹ kẹe oriọvọ rọ eri; hayo ọ tẹ yare iẹ eke, kọ ọ rẹ kẹe akpakpasimagha? Whai enọ i yoma wha tẹ riẹ epanọ wha rẹ rọ emamọ eware kẹ emọ rai, kẹvẹ Ọsẹ obọ odhiwu rai ọ rẹ rehọ Ẹzi Ẹri kẹ enọ e yare riẹ te re?” (Luk 11:9-13) Joma lele ohrẹ Jesu ẹkwoma ẹlẹ kẹ ẹzi Jihova re ma sae ruabọhọ edhesẹ ubi ewoma riẹ na.
“Ru Onọ Uwoma”
10. Didi abọ ewoma Jihova a fodẹ eva Ọnyano 34:6, 7?
10 Avọ elo abọ-ẹzi nọ o bi no Ẹme Ọghẹnẹ ze gbe obufihọ ẹzi ọfuafo Ọghẹnẹ, ma rẹ sai “ru onọ uwoma.” (Ahwo Rom 13:3) Ẹkwoma uwuhrẹ Ebaibol ẹsikpobi, ma re wuhrẹ viere kpahe epanọ ma sae rọ raro kele ewoma Jihova. Uzoẹme n’ukpo na o ta kpahe abọ ewoma Ọghẹnẹ nọ a fodẹ evaọ ewhowhovia nọ a kẹ Mosis nọ a kere fihọ Ọnyano 34:6, 7 na, oria nọ ma jo se nọ: “ỌNOWO na, ỌNOWO na, Ọghẹnẹ nọ ọ vọ avọ ohrọ gbe aruoriwo, ọ rẹ kaki muofu hu, o wo uyoyou nọ o rẹ rẹriẹ hẹ gbe ọtẹruo, o wo uyoyou nọ o rẹ rẹriẹ hẹ rọkẹ idu ahwo, nọ ọ rẹ rehọ eyoma gbe iruthọ gbe uzioraha rọ vrẹ, yọ dede o re voro imuemu no ho.” Ma te rri abọ ewoma Jihova nana viere u ti fiobọhọ k’omai “ru onọ uwoma.”
11. Ẹvẹ eriariẹ na inọ Jihova o wo ohrọ gbe aruoriwo i re kpomahọ omai?
11 Ewhowhovia Ọghẹnẹ nana o rovie omai aro kẹ ẹgwọlọ nọ ma rẹ rọ raro kele Jihova ẹkwoma edhesẹ ohrọ gbe aruoriwo. Jesu ọ ta nọ: “Ahwo nọ a wo ohrọ eva e were ae, keme a re ti wo ohrọ oriọ [kẹ ae].” (Matiu 5:7; Luk 6:36) Avọ ovuhumuo inọ Jihova o wo aruoriwo, oma o rẹ wọ omai dhesẹ aruoriwo evaọ usu mai kugbe amọfa, kugbe enọ ma be ta usiuwoma kẹ. Onana o rọwo kugbe ohrẹ Pọl na: “Jọ ẹme rai ọ vọ avọ aruoriwo, jẹ hẹ mere wọhọ uwhei kẹse kẹse, re wha riẹ epanọ ohwo o re yo kẹ ohwo.”—Ahwo Kọlọsi 4:6.
12. (a) Nọ o rọnọ Ọghẹnẹ ọ rẹ kaki muofu hu na, ẹvẹ u fo nọ ma re yeri kugbe amọfa? (b) Eme uyoyou-ẹwo Jihova o rẹ wọ omai ru?
12 Nọ Ọghẹnẹ ọ rẹ kaki muofu hu na, isiuru mai re ma “ru onọ uwoma” o rẹ wọ omai kpairoro vrẹ iruthọ esese erọ ibe enọ e rọwo jẹ tẹrovi ekwakwa iwoma rai. (Matiu 7:5; Jemis 1:19) Uyoyou-ẹwo Jihova o rẹ wọ omai dhesẹ uyoyou ọriẹruo, makọ evaọ otọ edawọ nọ e mae rro. Onana u ghine siuru gaga.—Itẹ 19:22.
13. Didi uruemu ma re wo ro dhesẹ via nọ Jihova ‘ọ vọ avọ uzẹme’?
13 Nọ Ọsẹ obọ odhiwu mai ọ ‘vọ avọ uzẹme’ na, ma rẹ gwọlọ rọ ‘uzẹme-ota dhesẹ oma mai wọhọ egbodibo riẹ.’ (2 Ahwo Kọrint 6:3-7) Ejọ evaọ usu eware ihrẹ nọ e rẹ tọtọ Jihova oma na họ “ọrue-ọta” gbe “ose-isẹi erue nọ ọ rẹ ta erue.” (Itẹ 6:16-19) Fikiere isiuru mai re ma ru Ọghẹnẹ eva were e wọ omai ‘siobọno ọrue ọta no jẹ be ta uzẹme.’ (Ahwo Ẹfẹsọs 4:25) Ajọ ma siọ ewoma ba edhesẹ hẹ evaọ abọ ologbo ọnana.
14. Fikieme ma je wo erọvrẹ?
14 Ewhowhovia Ọghẹnẹ kẹ Mosis o rẹ jẹ wọ omai re ma rọ vrẹ, keme Jihova ọ rẹ rọ vrẹ. (Matiu 6:14, 15) Dede na, Jihova ọ rẹ rọ uye kẹ irumuomu nọ i kurẹriẹ hẹ. Fikiere ma re kru itee riẹ ọrọ ewoma nọ u te kpomahọ ẹme ẹyọrọ ẹfuọ abọ-ẹzi ọrọ ukoko na.— Iruo-Izerẹ 5:1; 1 Ahwo Kọrint 5:11, 12; 1 Timoti 5:22.
“Wha Fiẹrohọ Otọ”
15, 16. Ẹvẹ ohrẹ Pọl nọ a kere fihọ Ahwo Ẹfẹsọs 5:15-19 na u re ro fiobọhọ k’omai ruabọhọ ewoma oruo?
15 Re u mu omai ẹro nọ ma bi le ewoma ghelọ eyoma nọ ọ wariẹ omai họ na, u re fo re ẹzi Ọghẹnẹ ọ vọ omai oma je fiẹrohọ epanọ ma be nya. Nwani fo, Pọl ọ tuduhọ Ileleikristi obọ Ẹfẹsọs awọ nọ: “Wha fiẹrohọ otọ enẹna eva onya rai, o jọ wọhọ igheghẹ hẹ rekọ iwoareghẹ, wha raha oke he, keme edẹ na i re yoyoma. Fikiere wha jọ wọhọ igheghẹ hẹ, rekọ wha riẹ otọ epanọ oreva Ọnowo na o rọ. Wha jọ ọgba udi o da ha, nọ o rẹ vrẹ ẹta; rekọ jọ Ẹzi na ọ vọ owhai eva, whai ohwo ọ hẹ sua ilezi te ile gbe ile ẹzi kẹ ohwo, wha hẹ sua e re wha jọ eva rai ghrẹghrẹ ae kẹ Ọnowo na.” (Ahwo Ẹfẹsọs 5:15-19) Ohrẹ nana u ghine fo kẹ omai evaọ edẹ ebẹbẹ enana.—2 Timoti 3:1.
16 Otẹrọnọ ma rẹ ruabọhọ ewoma oruo, ma rẹ yọroma gaga re ma ruẹ nọ ma be nya wọhọ enọ i wo areghẹ Ọghẹnẹ. (Jemis 3:17) Ma rẹ whaha izieraha ilogbo hrọ, ma vẹ jẹ rọ ẹzi ọfuafo vọ oma mai, ru re ẹzi na ọ kpọ omai. (Ahwo Galesha 5:19-25) Ẹkwoma efihiruo uthubro abọ-ẹzi nọ a be rọ k’omai evaọ iwuhrẹ Ileleikristi, ikoko esese gbe ilogbo, ma rẹ sae ruabọhọ eruo oware nọ u woma. Eme ọ Pọl se ahwo Ẹfẹsọs na e rẹ sae jẹ kareghẹhọ omai inọ evaọ omakugbe egagọ mai buobu, ma re wo erere no uvi ẹsuọ “ile ẹzi” mai na ze—enọ ibuobu rai i w’obọ kpahe ekwakwa abọ-ẹzi, wọhọ ewoma.
17. Otẹrọnọ iyero rai e whaha e rae ekpohọ iwuhrẹ ẹsikpobi, didi imuẹro Ileleikristi nọ e be mọ gaga a rẹ sai wo?
17 Kọ ẹvẹ kpahe ibe enọ e rọwo enọ e rẹ sai kpohọ iwuhrẹ Ileleikristi ẹsikpobi hi fiki ẹyao ọgaga? A rẹ sae jọ ọkora keme a be sai kuomagbe inievo abọ-ẹzi rai gọ Jihova ẹsikpobi hi. Rekọ u re mu ai ẹro nọ Jihova ọ riẹ iyero rai, ọ te sẹro rai evaọ elo na, ọ te kẹ ae ẹzi ọfuafo riẹ, yọ o ti fiobọhọ kẹ ae gbe ru oware nọ u woma.—Aizaya 57:15.
18. Eme o ti fiobọhọ k’omai le edhere ewoma?
18 Ele edhere ewoma o gwọlọ nnọ ma rẹ yọrọ usu mai jẹ kẹnoma kẹ enọ i “re mukpahe ahwo ezi.” (2 Timoti 3:2-5; 1 Ahwo Kọrint 15:33) Efihiruo ohrẹ utioye na u re fiobọhọ k’omai whaha ‘eva nọ ma rẹ kpọ ẹzi ẹri Ọghẹnẹ’ ẹkwoma eruo eware nọ e wọso ẹe. (Ahwo Ẹfẹsọs 4:30) Ofariẹ, ma re wo obufihọ nọ ma re ro ru oware nọ u woma otẹrọnọ ma wo usu okpekpe kugbe enọ izuazọ rai e kẹ imuẹro nnọ a you ewoma gbe nnọ ẹzi ọfuafo Jihova ọ be kpọ ae.—Emọs 5:15; Ahwo Rom 8:14; Ahwo Galesha 5:18.
Ewoma Ọ rẹ Wha Emamọ Iyẹrẹ Ze
19-21. Gbiku nọ i dhesẹ epanọ ewoma oruo o re duobọte ahwo.
19 Ẹnya evaọ elo abọ-ẹzi, omarokpotọ kẹ ọkpọvio ẹzi Ọghẹnẹ, gbe ẹromuhọ oghẹrẹ nọ ma be nya i ti fiobọhọ k’omai whaha oware nọ u yoma je “ru onọ uwoma.” Kẹsena, onana o vẹ wha emamọ iyẹrẹ ze. Roro kpahe oware nọ o via kẹ Zongezile, omọvo Isẹri Jihova evaọ South Africa. Nọ o je kpohọ isukulu ohiohiẹ jọ, ọ tẹ wẹriẹ ebanke re ọ riẹ unuigho nọ o wo. Obe nọ u no emashini ebanke na ze o rehọ ẹthọthọ fi ₦670,200 ba kẹe. Oroiro ebanke na jọ gbe amọfa a tẹ ta kẹe re o mi igho na re o fi ai họ ebanke ọfa. Imava-orọo Osẹri nọ o bi lele rria ọvo a jiri rie fiki ugho na nọ o mi hi.
20 Evaọ ẹdẹ iruo n’otha, Zongezile ọ tẹ vuẹ ebanke na kpahe ẹthọthọ na. A tẹ ruẹ nọ inọmba ebanke riẹ i tho ọrọ ọhreki ọdafe jọ ọnọ ọ rehọ ethobọ fi ugho họ ẹkpa ebanke ọthọthọ. Avọ igbunu inọ Zongezile o dhobọ te ugho na kakaka ha, ọhreki na ọ tẹ nọe inọ: “Didi egagọ whọ rrọ?” Zongezile ọ tẹ ta nọ ọye yọ omọvo Isẹri Jihova. Ahwo ebanke na a te jiri iei gaga, a tẹ ta nọ: “O hae were omai otẹrọnọ ahwo kpobi a rrọ oruọzewọ wọhọ Isẹri Jihova.” Evaọ uzẹme, iruo oruọzewọ gbe ewoma o sai ru amọfa jiri Jihova.—Ahwo Hibru 13:18.
21 Orọnikọ idhere ilogbo jọ ọvo a re ro ru ewoma re u te duobọte ahwo wowoma ha. Re a dhesẹ iẹe: Osẹri ọmoha jọ nọ ọ rrọ ọtausiwoma oke-kpobi evaọ ukoliko ọ Samoa jọ o kpohọ ẹsipito. Ahwo a dhuhie họ re a ruẹ edọkita na, Osẹri na ọ tẹ ruẹ nọ ọkpọkuaye jọ nọ ọ kẹle riẹ ọ be mọ gaga. Ọ ta kẹ aye na re ọ ruọ aro riẹ re a kake kẹe imu. Oke ofa jọ, Osẹri na ọ tẹ nyaku ọkpọkuaye na eva obọ eki. Aye na ọ kareghẹhọ iẹe avọ iruo ezi riẹ eva obọ ẹsipito na. Ọ tẹ ta nọ: “Enẹna mẹ riẹ no inọ Isẹri Jihova a ghine you erivẹ rai.” Dede nọ ọ jẹ hae gaviezọ kẹ ovuẹ Uvie na vẹre he, ewoma nọ Osẹri na o dhesẹ kẹe u duobọ tei ziezi. Ọ tẹ rọwo re a wuhrẹ Ebaibol kugbei, o te muọ eriariẹ Ẹme Ọghẹnẹ họ ewo.
22. Edhere obọdẹ jọ vẹ ma re ro “ru onọ uwoma”?
22 Ẹsejọhọ whọ sai gbe iku nọ i dhesẹ erere ọ ewoma oruo. Edhere ologbo jọ nọ ma re ro “ru onọ uwoma” họ obọ nọ ma re wo ẹsikpobi evaọ ewhowho emamọ usi Uvie Ọghẹnẹ na. (Matiu 24:14) Joma rọ ọwhọ ruabọhọ iruo eghaghae nana, vuhumu nnọ onana yọ edhere jọ nọ ma re ro ru ewoma, maero rọ kẹ enọ e be jẹ emamọ owọ. Maero, odibọgba gbe uruemu ezi mai o rẹ kẹ Jihova oruaro, ọnọ ọ rrọ ehri ewoma na.—Matiu 19:16, 17.
Gbẹ Hai “Ru Iruo Ezi”
23. Fikieme odibọgba Ileleikristi na ọ jẹ rọ iruo ezi?
23 Avro ọ riẹ hẹ inọ odibọgba mai yọ iruo iwoma. O rẹ sae wha usiwo s’omai gbe enọ e gaviezọ kẹ ovuẹ Ebaibol na re a ruọ edhere nọ o re su kpohọ uzuazọ ebẹdẹ bẹdẹ. (Matiu 7:13, 14; 1 Timoti 4:16) Fikiere, nọ ma tẹ rẹriẹ ovao ku iroro ejẹ, isiuru re ma ru onọ u kiehọ e rẹ wọ omai nọ oma mai nọ: ‘Ẹvẹ ẹjiroro nana o ti kpomahọ iruo ewhowho Uvie mẹ? Kọ emamọ owọ mẹ be ghinẹ gwọlọ jẹ na? Kọ u ti ru omẹ fiobọhọ kẹ amọfa jẹ “usiuwoma ebẹdẹ bẹdẹ na” rehọ re a ruọ usu okpekpe kugbe Jihova Ọghẹnẹ?’ (Eviavia 14:6) Evawere ilogbo i ti no ẹjiroro nọ a rẹ rọ wha isiuru Uvie na haro ze.—Matiu 6:33; Iruẹru 20:35.
24, 25. Idhere jọ vẹ ma re ro ru ewoma evaọ ukoko na, kọ eme o re mu omai ẹro ma tẹ ruabọhọ ewoma oruo?
24 Ma re rri erere nọ ewoma ọ rẹ wha ze vo ho. Ma rẹ sae ruabọhọ edhesẹ okwakwa nana ẹkwoma uketha nọ ma rẹ kẹ ukoko Ileleikristi na je ru utho nọ ma rẹ sai ru rọ sẹro isiuru gbe ewoma riẹ. Evaọ uzẹme, nọ ma te bi kpohọ je w’obọ ẹsikpobi evaọ iwuhrẹ Ileleikristi na yọ ma bi ru ewoma. Iwuhrẹ na nọ ma rẹ jọ o rẹ tuduhọ ibe egegagọ mai awọ, yọ ọkpahefihọ mai nọ ma ruẹrẹ kpahe ziezi e rẹ bọ ae ga evaọ abọ-ẹzi re. Okenọ ma tẹ rehọ efe mai rẹrote Ọgwa Uvie na je fiobọhọ ru ei fihọ kpatiẹ yọ ma bi ru ewoma re. (2 Ivie 22:3-7; 2 Ahwo Kọrint 9:6, 7) Evaọ uzẹme, “nọ uvẹ o gbẹrọ na, joma ru iruo ezi kẹ ahwo kpobi, onọ o mae ro kọ rọ kẹ otu nọ ọrọ ẹgba orọwọ na.”—Ahwo Galesha 6:10.
25 Ma rẹ sae ta kpahe uyero kpobi nọ ma rẹ jọ ru ewoma ha. Fikiere, nọ ma be rẹriẹ ovao ku use-abọ ekpokpọ na, joma gwọlọ otoriẹ no Ikereakere na ze, lẹ kẹ ẹzi ọfuafo Jihova, je ru uthoma mai re ma wha oreva uwoma ogbagba riẹ haro. (Ahwo Rom 2:9, 10; 12:2) Ma rẹ sai wo udu inọ Jihova ọ te ghale omai vọvọ nọ ma be ruabọhọ ewoma oruo na.
Ẹvẹ Whọ te k’Uyo?
• Ẹvẹ ma sai ro ru ewoma nọ ọ mae rro?
• Fikieme a je se ewoma “ubi elo”?
• Fikieme a je se ewoma “ubi Ẹzi” na?
• Didi iyẹrẹ emamọ uruemu mai o rẹ wha ze?
[Uwoho nọ o rrọ ẹwẹ-obe avọ 15]
Ẹme Ọghẹnẹ gbe ẹzi ọfuafo riẹ i re fiobọhọ k’omai ru ewoma
[Iwoho nọ e rrọ ẹwẹ-obe avọ 16]
Ewoma oruo ọ rẹ wha emamọ iyẹrẹ ze