Rọ Aro Kele Ewoma Jihova
1 Nọ ma tẹ ruẹ ehru ọnwranwra evaọ okenọ ọre o bi kiediwi hayo nọ ma tẹ reawere emu ọwewere jọ no, kọ oma o gbẹ w’omai yere Jihova, ọnọ ọ rrọ Ehri ewoma kpobi na? Ewoma riẹ ọ rẹ wọ omai nọ ma jẹ gwọlọ rọ aro kele ei. (Ol. 119:66, 68; Ẹf. 5:1) Kọ ẹvẹ ma sai ro dhesẹ ewoma?
2 Kẹ Enọ E Rrọ Ukoko Ho: Edhere jọ nọ ma sae rọ raro kele ewoma Jihova họ ẹkwoma uvi ọdawẹ nọ ma re dhesẹ kẹ enọ e rrọ ukoko ho. (Gal. 6:10) Ewoma nọ ma re dhesẹ evaọ uvi idhere o rẹ sae lẹliẹ ahwo rehọ ubiẹro uwoma riwi Isẹri Jihova gbe ovuẹ nọ ma bi whowho na.
3 Wọhọ oriruo, nọ a jẹ hẹrẹ evaọ oria uwou-imu, oniọvo ọmọzae jọ nọ ọ rrọ ọkobaro ọ keria kẹle ọkpọkuaye jọ nọ o wọhọ nọ ẹyao riẹ ọ ga vi ọrọ ahwo buobu nọ a kiọkọ evaọ oria na. Nọ u te oke nọ oniọvo ọmọzae na ọ rẹ rọ ruẹ edọkita, ọ tẹ rehọ uvẹ riẹ kẹ ọkpọkuaye na re ọ kake ruẹ edọkita na. Oke ofa aimava a tẹ wariẹ nya kuoma evaọ obọ eki, yọ eva e were aye na gaga nọ ọ ruẹ oniọvo ọmọzae na. Dede nọ aye na ọ jẹ hae kezọ kẹ emamọ usi na vẹre he, ọ ta nnọ enẹna ọ riẹ nnọ Isẹri Jihova a ghine wo uyoyou kẹ erivẹ rai. A te muọ obe-uwuhrẹ Ebaibol ẹsikpobi họ kugbei.
4 Kẹ Inievo Mai: Okenọ ma te fi obọ họ kẹ ibe enọ e rọwo yọ ma be rọ aro kele ewoma Jihova re. Okenọ okpẹtu ọ tẹ roma via, ma rẹ jọ usu ahwo ọsosuọ nọ a rẹ dhẹze ti fi obọ họ kẹ inievo mai. Ma bi je dhesẹ oghẹrẹ ẹzi nana evaọ okenọ ma te fi obọ họ kẹ enọ e gwọlọ uketha re a sai te obọ iwuhrẹ, weze bru enọ oma o ga ha, je ru uyoyou mai kẹre te enọ ma re riẹ ziezi hi evaọ ukoko na.—2 Kọr. 6:11-13; Hib. 13:16.
5 Edhere ọfa jọ nọ Jihova o re ro dhesẹ ewoma họ ẹkwoma “erọvrẹ.” (Ol. 86:5) Ma tẹ be rọ aro kele ei, ma rẹ sai dhesẹ nnọ ma you ewoma ẹkwoma amọfa nọ ma rẹ rọ vrẹ. (Ẹf. 4:32) Onana u re fiobọhọ nọ usu mai kugbe ibe inievo mai u je ‘woma jẹ were oma.’—Ol. 133:1-3.
6 Jọ ewoma obuobu Jihova ọ wọ omai vọ avọ ujiro nọ ma rẹ rọ kẹe jẹ lẹliẹ omai lo avọ oghọghọ. Jọ o wọ omai re ma daoma rọ aro kele ewoma riẹ evaọ oware kpobi nọ ma bi ru.—Ol. 145:7; Jeri. 31:12.