Dhesẹ Iroro Egbagba nọ Urere na U Bi Si Kẹle Na
1 Unuẹse buobu Ẹme Ọghẹnẹ o dhesẹ ẹdẹ Jihova inọ ọ be te tha “wọhọ oji”—koyehọ, ọ te ruọ ahwo ọza, kpregede, idudhe. (1 Tẹs. 5:2; Mat. 24:43; 2 Pita 3:10; Evia. 3:3; 16:15) Jesu ọ ta nnọ: “Fikiere wha [ruẹrẹ oma kpahe]; keme okenọ wha roro ho Ọmọ ohwo ọ rẹ [te] tha.” (Mat. 24:44) Ẹvẹ ma sae rọ yọrọ aro-ọjajavi abọ-ẹzi mai nọ urere na u bi si kẹle na? A re duku edhere nọ a sai ro ru onana evaọ ohrẹ nọ a rọ ẹgba ẹzi kẹ na: ‘Jọ jajaja evaọ iroro.’—1 Pita 4:7.
2 Iroro egbagba e kẹre te oghẹrẹ eriwo Jihova nọ ma re wo kpahe eware. (Ẹf. 5:17) U re fi obọ họ kẹ omai rri oma mai wọhọ ‘erara gbe enọ e be rria ubroke’ evaọ udevie uyero-akpọ nana. (1 Pita 2:11) U re fi obọ họ kẹ omai vuhu oware nọ o ghinẹ r’oja mu, fi itee họ, jẹ jẹ emamọ iroro.—Fil. 1:10.
3 Fi Itee Abọ-Ẹzi Họ: Itee abọ-ẹzi nọ a re fihọ je le t’obọ u re fi obọ họ k’omai dhesẹ iroro-egbagba. Kọ who wo itee abọ-ẹzi nọ who bi le enẹna? Kọ whọ be daoma re who se Ebaibol na kẹdẹ kẹdẹ, kpohọ iwuhrẹ Ileleikristi kpobi, se uvitha ọ Uwou-Eroro Na gbe Awake! kpobi, hayo ru ẹkẹ abọ ra evaọ odibọgba na kẹre? Otẹrọnọ who fi itee jọ nọ i fo họ kẹ oma ra no, ruabọhọ ele itee yena, jẹ lẹ se Jihova re ọ ghale omodawọ ra, iyẹrẹ nọ i ti noi ze i ti gb’owhẹ unu.
4 Ọkpako ukoko jọ ọ nọ ọzae avọ aye jọ nọ a rọo obọ kpahe itee abọ-ẹzi rai. Onọ na u fi obọ họ kẹ ae ruẹ nnọ otẹrọnọ a ru uzuazọ rai lọhọ jẹ wha osa nọ a re thomawa no, a sai ru iruo ọkobaro. A tẹ jiroro nọ a re ru oyena fihọ ute rai. A tẹ rọ ẹmẹrera hwosa na kpobi no jẹ gwọlọ idhere nọ a ro bru iruẹru nọ i wo izou hu nọ e jẹ rehọ oke gbe ẹgba rai kpẹre. Nọ ukpe ovo o nwane vrẹ no, a le ute rai t’obọ. Kọ eme o no rie ze? Ọzae na ọ ta nọ: “O gbẹ rrọ itee nọ ma fihọ họ, ma hai te oria nọ ma rrọ nẹnẹ na ha. Eva e be were omai gaga. Uzuazọ mai u re dhedhẹ jẹ rrọ wowoma. U wo uvi otofa gbe ẹjiroro.”
5 Nọ ma be hẹrẹ ẹdẹ Jihova na, wha j’oma yọrọ aro-ọjajavi abọ-ẹzi mai ẹkwoma ẹria avọ iroro egbagba, re ma t’ẹrovi oreva Ọghẹnẹ uruo.—Tait. 2:11-13.