Enọ Ahwo nọ A s’Ebe

Ẹvẹ awhaha nọ a jọ Uzi Mosis fihọ kpahe orọo evaọ udevie imoni na u re kpomahọ Ileleikristi te nẹnẹ?

Uzi nọ Jihova ọ rehọ kẹ orẹwho Izrẹl o t’eme bu hu kpahe ehaa gbe iruẹru orọo. Rekọ u fi aghọ họ usu erọo jọ. Wọhọ oriruo, eva Iruo-Izerẹ 18:6-20, ma ruẹ usu kugbe “imoni” ohwo buobu nọ a ghọ. Oria ikere na o nya kodo ta kpahe epanọ imoni e rẹ kpekpe te nọ a gbẹ ro usu orọo ho. Uzẹme, Ileleikristi e rrọ otọ Uzi Mosis na ha, yọ uzi na o gba rae họ họ. (Ahwo Ẹfẹsọs 2:15; Ahwo Kọlọsi 2:14) Makọ ere, orọnikọ onana u dhesẹ nọ Ileleikristi e rẹ sai gbabọ kẹ ẹme ọnana evaọ okenọ a tẹ be salọ ohwo nọ a rẹ rọo ho. Ẹjiroro buobu e riẹ nọ a je roro kpahe ẹme na.

Orọ ọsosuọ, izi egọmeti e riẹ nọ a fihọ kpahe orọo udevie imoni ekpekpe, yọ o gba Ileleikristi họ re a yo ẹme kẹ izi orẹwho nọ a be rria. (Matiu 22:21; Ahwo Rom 13:1) Rekọ izi eyena i wo ohẹriẹ n’oria ruọ oria. Izi ọgbọna itieye na buobu e roma hwa iroro epanọ u re kpomahọ emọ nọ a ti yẹ. O rrọ uzẹme nọ a jọ oria kpobi riẹ inọ otẹrọnọ imoni ivẹ a rọo, a sai yẹ emọ nọ i wo oghẹrẹ ebẹbẹ gbe eyao sa-sa. Fiki ẹjiroro ọnana gbe fiki ‘ẹmeoyo rai kẹ enọ a kẹ udu na,’ Ileleikristi nọ e be rọo a re yo ẹme kẹ izi orọo ẹwho na.

Ẹme ọ oware nọ a rẹ jọ okegbe nọ ma be rria jẹrehọ gbe onọ a rẹ jẹrehọ họ o tẹ jẹ riẹ. Enwenọ oria kpobi a jo wo izi nọ e ghọ orọo imoni, keme a re rri onana wọhọ oware aghọ. Dede nọ ẹkẹle imoni na i re wo ohẹriẹ n’oria ruọ oria, “evaọ omariẹ kpobi, epanọ imava na a moni te, ere uzi nọ o ghọ hayo whaha orọo nọ a rẹ ro o rẹ ga te,” ere The Encyclopædia Britannica o ta. Fikiere, o gbẹ make rrọ usu imoni ekpekpe he, Ileleikristi a rẹ whaha uzou uveghe kẹ izi ẹwho hayo oware nọ o rẹ lẹliẹ ẹwho soso niabọ họ ohwo, re a siọ afuẹwẹ ba ẹwha fihọ ukoko Ileleikristi na hayo odẹ Ọghẹnẹ.—2 Ahwo Kọrint 6:3.

Oware ofa jọ nọ a re gbolo aro kẹ hẹ họ iroro-oziẹbro nọ Ọghẹnẹ ọ k’omai na. A yẹ ahwo kpobi avọ iroro ọ oware ogbagba gbe othọthọ, uwoma gbe uyoma. (Ahwo Rom 2:15) Iroro-oziẹbro rai o rẹ ta oware nọ u fo je kiehọ kẹ ae gbe oware nọ o thọ jẹ rọ tọtọtọ, ajokpanọ a rehọ iruemu etọtọ raha hayo kpe iroro-oziẹbro na no. Jihova o dh’unu te onana okenọ ọ kẹ emọ Izrẹl uzi riẹ mukpahe orọo imoni. Ma se nọ: “Wha ru epanọ [a re] ru eva otọ Ijipti hi, oria nọ wha riae, ru epanọ a ru eva otọ Kenan he, onọ mẹ be rọ owhai nya na. Wha re lele ijaje rai hi.” (Iruo-Izerẹ 18:3) Ileleikristi a re rri iroro-oziẹbro rai nọ a rehọ Ebaibol wuhrẹ no ghaghae, a rẹ kẹe uvẹ hẹ re u gbeku fiki eriwo ọgẹgẹlẹ ọrọ ẹgbagba gbe ẹthọthọ erẹwho na.—Ahwo Ẹfẹsọs 4:17-19.

Kọ ẹvẹ ma sai ro ku ẹme na họ? Dede nọ Ileleikristi e rrọ otọ Uzi Mosis na ha, iroro-oziẹbro rai o rẹ ta kẹ ae nọ orọo imoni ekpekpe—wọhọ ọsẹ avọ ọmọtẹ riẹ, oni hayo ọmọzae riẹ, inievo ivẹ—a ghọ riẹ evaọ udevie Ileleikristi.a Nọ imoni i bi thabọ na, Ileleikristi i re vuhumu inọ izi gbe ijaje e riẹ nọ e be kpọ orọo gbe nnọ itee e riẹ nọ ahwo a jẹrehọ. Ma re roro kpahe enana ziezi re ma sai yo ẹme kẹ ujaje Ikereakere na: “Jọ orọo o jọ oware adhẹwẹ eva udevie rai kpobi.”—Ahwo Hibru 13:4.

[Oruvẹ-obotọ]