Kọ O Gwọlọ re Ẹrọwọ Ọ Rọwokugbe Iroro Egbagba?

“Ma wo ‘egba-egagọ’ buobu enọ e dhẹ ruọ egagọ re a ruẹse whaha eroruiruo ẹgba-iroro rai,” ere owuhrẹ isukulu-egagọ jọ evaọ United States ọ ta. O fibae nọ: “A rẹ rọwo ẹme kpobi nọ whọ ta kẹ ae ‘evaọ odẹ ẹrọwọ.’ ”

OWARE nọ u no rie ze họ ahwo buobu nọ a ta nọ a rrọ egagọ a re roro kpahe oware nọ o soriẹ nọ a rọ rọwo oware nọ a rọwo na ha hayo sọ uvi otọhotọ jọ o rrọ kẹ ẹrọwọ rai na. Agbẹta nọ o rọ rrọ ibuobu oma eheho re a ta kpahe egagọ na.

O rrọ oware uweri inọ, iruemu wọhọ emema egagọ nọ a rẹ rọ gọ hayo elẹ nọ a re se no obe ze i bi ru nọ ahwo a gbẹ be rọ rehọ izou rai ruiruo ho. Egagọ nọ ima ahwo buobu a bi kie lele họ enọ i wo iruemu enana, kugbe iwou ilogbo, enọ i wo ekwakwa ona enwranwra, enọ i re kporo ile awere. Dede nọ ichọche jọ a rẹ ta nọ orọwọ rai u no Ebaibol ze, ovuẹ rai orọ, ‘rọwo Jesu yọ whọ zọ no’ u se uvi uwuhrẹ Ebaibol gb’oja ha. Usiuwoma nọ ejọ a rẹ ta kpobi họ ekuhọ ebẹbẹ inẹnẹ hayo kpahe egọmeti akpọ na. Eme onana kpobi o wha ze no?

Kpahe uyero na evaọ North America, okere-obe egagọ jọ ọ ta nọ: “Egagọ-Ileleikristi . . . e wọhọ oware ehruehru gheghe, [yọ] a bi wuhrẹ enọ i bi kpohọ ae didi kpahe orọwọ na ha.” Ohwo jọ nọ o re ruiruo ahwo ọkiẹriwo o tube dhesẹ United States wọhọ “orẹwho igbori Ebaibol.” Uzẹme riẹ họ, enẹ o rrọ re kpahe erẹwho efa enọ a rri nọ Egagọ-Ileleikristi i bi jo titi. Egagọ efa buobu nọ e rrọ erọ Ileleikristi hi e rẹ jẹ tuduhọ ahwo rai awọ inọ a ru ekiakiẹ iroro ho, ukpoye a ve fiẹgba họ eme nọ a re kele, elẹ nọ a kere fihotọ, gbe oghẹrẹ eroro sa-sa nọ i w’aro ho, viukpọ iroro ivevẹ nọ a re ro roro eware totọ.

Ghele na, evaọ uzuazọ ekẹdẹ kẹdẹ rai, ahwo ọvo nana nọ a re roro kpahe ẹgbagba erọwọ egagọ rai hi na ae a rẹ r’obọ k’otọ roro kpahe eme efa ziezi. Kọ u gbe bi gb’owhẹ unu inọ ohwo nọ ọ rẹ kiẹ ebe nọ e rrọ akpọ na kpobi re taure ọ tẹ te dẹ omoto—ọnọ ọ te rọ n’otọ ẹdẹjọ na—ọ rẹ ta kpahe egagọ riẹ nọ, ‘Otẹrọnọ u kiehọ ọsẹ gbe oni mẹ oma, yọ u woma k’omẹ’?

Ma te ghine wo isiuru kpahe eva nọ ma re ru were Ọghẹnẹ, kọ ma gbe roro ziezi kpahe ẹgbagba oware nọ ma rọwo kpahe iẹe? Pọl ukọ na ọ ta kpahe ahwo egagọ edẹ riẹ jọ enọ i wo ‘ajọwha kẹ Ọghẹnẹ, rekọ orọnọ avọ eriariẹ egbagba ha.’ (Ahwo Rom 10:2) Ahwo otiọye na a wọhọ ohwo nọ a haya re ọ ralọ uwou, ọnọ o ruiruo gaga re ọ ralọ uwou na rekọ ọ tẹ rehọ ekọlọ ọfa rọ ralọ uwou na keme ọ gaviezọ kẹ uthubro ọnọ o wo uwou na ha. Iruo na e sae were ọnọ ọ ralọ uwou na, rekọ who roro nọ ọnọ o wo uwou na o ti jiri iei?

Evaọ ẹme kpahe egagọ uzẹme, eme Ọghẹnẹ ọ rẹ jẹrehọ? Ebaibol na ọ kuyo nọ: “Onana u re ziezi, u te je fo ẹrehọ eva aro Ọghẹnẹ Osiwi mai; ọnọ ọ guọlọ re ahwo kpobi a wo usiwo, re a ze te riẹ [eriariẹ] uzẹme na.” (1 Timoti 2:3, 4) Ejọ e sai roro nọ o lọhọ họ re a ruẹ oghẹrẹ eriariẹ itieye na evaọ egagọ buobu nọ e r’otọ nẹnẹ na. Rekọ roro iei—otẹrọnọ o rrọ oreva Ọghẹnẹ re ahwo a wo eriariẹ egbagba ọrọ uzẹme na, kọ ọ rẹ rehọ iẹe gbọ ae ogbọ? Ebaibol na ọ ta ere he, keme ọ ta nọ: ‘Otẹrọnọ whọ gwọlọ Ọghẹnẹ, whọ rẹ te rue riẹ.’—1 Iruẹru-Ivie 28:9.

Ẹvẹ Ọghẹnẹ o bi ro ru re enọ e be ghinẹ gwọlọ iẹe a rue riẹ? Uzoẹme n’otha na o te kẹ uyo na.