Enọ Ahwo nọ A s’Ebe

Kọ u fo re a lẹ se Ọghẹnẹ ababọ ẹme wọhọ “evaọ odẹ Jesu”?

Ebaibol na o dhesẹ nnọ Ileleikristi nọ e gwọlọ lẹ se Jihova a re ru ere evaọ odẹ Jesu. Jesu ọ ta kẹ ilele riẹ nọ: “Ohwo ọvo o bru Ọsẹ na ze he, rekọ fiki mẹ.” O fibae nnọ: “Koware koware nọ wha rẹ te rọ odẹ mẹ yare, oye me re ti ruẹ, re a kẹ Ọsẹ oruaro evaọ Ọmọ; wha tẹ rehọ odẹ mẹ yare omẹ oware, oye me re ruẹ.”—Jọn 14:6, 13, 14.

Be ta kpahe ọkwa obọdẹ ọ Jesu, obe-ofeme na, Cyclopedia of Biblical, Theological, and Ecclesiastical Literature, o ta nọ: “Ọghẹnẹ ọvo a rẹ lẹ se, ẹkwoma Jesu Kristi wọhọ Obruthe. Fikiere ayare kpobi se erezi hayo enjẹle orọnikọ i fioka ha ọvo ho, rekọ e rrọ eme ọ izue. Egagọ nọ a rẹ rọ kẹ omama jọ kpobi, makọ epanọ omama na u kpehru te, a ghọ riẹ gaga evaọ uzi Ọghẹnẹ.”

Kọ ẹvẹ otẹrọnọ ohwo jọ nọ oware uwoma jọ o via kẹ, ọ ta nọ: “Me yere owhẹ Jihova” ababọ “evaọ odẹ Jesu” nọ o fihọ iẹe? Kọ onana o thọ? O nwane rrọ ere he. Dae rehọ iẹe nnọ Oleleikristi ọ nyaku enwoma idudhe jọ o te bo nọ: “Fiobọhọ k’omẹ, Jihova!” Ọghẹnẹ o re gbolo ovao kẹe he fikinọ odibo riẹ na ọ ta nọ “evaọ odẹ Jesu” hu.

Rekọ o rrọ oware nọ a re muẹrohọ inọ ẹme nọ a rẹ ta via ọvo makọ ro se Ọghẹnẹ yọ olẹ hẹ. Wọhọ oriruo, okenọ Jihova o brukpei no fiki oniọvo riẹ Ebẹle nọ o kpe, Keni ọ tẹ ta nọ: “Uye mẹ o ro vi epanọ mẹ sae rọ wha e. Ri, who le omẹ no otọ na no enẹna; jegbe eva aro ra, me re ti dhere mẹ vẹ te jọ ọ nọ o re ti mughoro nya eva akpọ na, jegbe ọnọ ọ ruẹ omẹ o ve kpe omẹ.” (Emuhọ 4:13, 14) Dede nọ Keni ọ kpọ eme riẹ se Jihova, eme nọ i je no eva riẹ ze na yọ unoma kpahe uye uzioraha riẹ.

Ebaibol na ọ ta k’omai nọ: “Ọghẹnẹ o mukpahe otu-eheri, rekọ ọ rẹ rehọ aruoriwo kẹ enọ eromakpotọ.” Ẹme nọ ma rẹ ta kẹ Ọnọ Ọ Mae Rro na wọhọ ẹsenọ ọ rrọ ohwo-akpọ jọ gheghe u dhesẹ ababọ omarokpotọ. ( Jemis 4:6; Olezi 47:2; Eviavia 14:7) O rẹ jẹ jọ orivo re ma riẹ oware nọ Ẹme Ọghẹnẹ ọ ta kpahe ọkwa Jesu re ma keke aro fihọ lẹ ababọ evuhumu Jesu Kristi.—Luk 1:32, 33.

Orọnikọ onana u dhesẹ nọ Jihova ọ gwọlọ re ma rọ oghẹrẹ ovo jọ lẹ hẹ. Oware nọ u wuzou họ uyero ubiudu ohwo. (1 Samuẹle 16:7) Evaọ ikpe-udhusoi ọsosuọ C.E., oletu ogbaẹmo ahwo Rom nọ a re se Kọniliọs ọ jẹ “lẹ Ọghẹnẹ kẹse kẹse.” Kọniliọs, ohwo orẹwho Egedhọ nọ ọ yawo ho, ọ rehọ oma mudhe kẹ Jihova ha. Dede nọ o wọhọ nnọ ọ rehọ odẹ Jesu lẹ hẹ, ‘a yo elẹ riẹ evaọ aro ekareghẹhọ Ọghẹnẹ.’ Fikieme? Keme ọnọ “ọ rẹ dawo ibiudu” na, ọ ruẹ nọ Kọniliọs yọ ‘ọgba egagọ gbe ọnọ ọ be dhozọ Ọghẹnẹ.’ (Iruẹru 10:2, 4; Itẹ 17:3) Okenọ o wo eriariẹ kpahe “Jesu obọ Nazarẹt” no, ẹzi ọfuafo o te te Kọniliọs obọ a tẹ họe ame wọhọ olele Jesu.—Iruẹru 10:30-48.

Orọ urere riẹ, o rrọ kẹ ahwo-akpọ họ re a fodẹ elẹ nọ Ọghẹnẹ o re yo. Otẹrọnọ Oleleikristi ọ t’ẹme kẹ Ọghẹnẹ ababọ “evaọ odẹ Jesu” nọ o fihọ iẹe, u du fo re o weri hi. Jihova ọ riẹ kpahe ọnyaba mai ziezi yọ ọ gwọlọ fiobọhọ k’omai. (Olezi 103:12-14) O rẹ sai mu omai ẹro nnọ ma te fi ẹrọwọ họ “Ọmọ Ọghẹnẹ na, . . . ma tẹ yare oware jọ wọhọ epaọ oreva riẹ, o re yo kẹ omai.” (1 Jọn 5:13, 14) Rekọ, maero okenọ ma tẹ be lẹ kẹ amọfa evaọ ẹgbede, Ileleikristi uzẹme a re dhesẹ ọkwa Ikereakere nọ Jesu o wo evaọ ẹjiroro Jihova. Yọ a rẹ rọ ẹmeoyo daoma rọ ọghọ kẹ Jesu ẹkwoma odẹ riẹ nọ a rẹ rọ lẹ se Ọghẹnẹ.