Iwhowho Uvie A n’Iyẹrẹ

Eduku Uzẹme na Evaọ Oria Oghẹrẹ-Sa

O RRỌ oreva Ọghẹnẹ re “ahwo kpobi a wo usiwo, re a ze te riẹ uzẹme na.” (1 Timoti 2:3, 4) Re a ruẹsi le ute yena te obọ, Isẹri Jihova i kporo jẹ ghale ima buobu erọ Ebaibol gbe ekwakwa uwuhrẹ Ebaibol no. Ẹsejọ, ekwakwa enana i fi obọ họ kẹ ahwo udu-oruọzewọ wuhrẹ uzẹme na no evaọ edhere nọ a rẹro riẹ hẹ. Evaọ abọ nana, iwhowho Uvie nọ e rrọ Freetown, Sierra Leone, a nẹ iyẹrẹ oware nọ a rehọ ẹro ruẹ fihọ obotọ na.

Osman ọ jọ ọmọ avivẹ evaọ usu emọ izii nọ e jọ uviuwou na. Nọ ọ jẹ rro ze evaọ uviuwou nọ a jọ se egagọ gboja, ọ jẹ hai lele ọsẹ riẹ kpohọ egagọ kẹse kẹse. Dede na, oware nọ egagọ riẹ i wuhrẹ kpahe ehẹle o jẹ hae kẹ Osman idhọvẹ gaga. Ọ sai wo otoriẹ oware nọ Ọghẹnẹ ohrọ ọ rẹ rọ lahiẹ ahwo omuomu ẹkwoma erae nọ ọ rẹ rọ mahe ae he. Oruvẹ kpobi nọ a ro fi obọ họ kẹ Osman re o wo otoriẹ uwuhrẹ erae ehẹle na o vọ riẹ eva ha.

Eva ẹdẹjọ nọ Osman ọ kpako te ikpe 20 no, ọ tẹ ruẹ obe iburu jọ nọ a ku ezuzu ruru ubro riẹ jọ no. Fikinọ ebe i re si ei uru gaga, ọ tẹ tọlọ iẹe, voro iei, ọ tẹ ruẹ uzoẹme na—Uzẹme nọ U re Suohwo kpo Uzuazọ Ebẹdẹbẹdẹ.a

U te gbe Osman unu nnọ, ‘Uzẹme vẹ ona?’ Avọ ọwhọ riẹ nọ onana o kpare, Osman ọ tẹ rehọ obe na kpo je se i reno evaọ ẹkeriotọ ọvo. Ẹvẹ o sasa e riẹ oma te nọ o wuhrẹ nnọ Ọghẹnẹ o wo odẹ-oma riẹ—Jihova! (Olezi 83:18, NW ) Osman o wuhrẹ re inọ okwakwa Ọghẹnẹ nọ o mae rro họ uyoyou gbe nnọ iroro ahwo ọlahiẹ evaọ ebrerae o rrọ oware nọ u re tu Ei oma. (Jerimaya 32:35; 1 Jọn 4:8) Ukuhọ riẹ, Osman o te se inọ Jihova ọ te rehọ aparadase otọakpọ ze kẹle onọ ahwo a te sae jọ rria bẹdẹ bẹdẹ. (Olezi 37:29; Eviavia 21:3, 4) Ẹvẹ uzẹme igbunu nọ u no obọ Ọghẹnẹ oyoyou avọ ohrọ ze u woma te! Avọ evawere nọ i no udu ze, Osman o te yere Jihova nọ ọ rọ kẹe uvẹ duku uzẹme na evaọ oria oghẹrẹ-sa.

Edẹ jọ nọ i lele i rie, egbẹnyusu riẹ jọ i te fi obọ họ kẹ Osman gwọlọ Ọgwa Uvie Isẹri Jihova, koyehọ o kpohọ ewuhrẹ evaọ ẹdẹ ọsosuọ riẹ. Evaọ etẹe, ọ tẹ ta kẹ Osẹri jọ re o wuhrẹ Ebaibol na kugbe i. Ghelọ ọwọsuọ ọgaga ọ uviuwou, Osman ọ ruabọhọ ẹnyaharo abọ-ẹzi ọ tẹ te họ ame. (Matiu 10:36) Enẹna, ọ be gọ wọhọ ọkpako evaọ ukoko na. U gbunu kẹhẹ inọ eware nana kpobi nọ evia na yọ fiki ọ obe nọ a kere no Ebaibol ze nọ a duku evaọ ezuzu!

[Oruvẹ-obotọ]