Ikokohọ Akpọ-Soso Evaọ 2003
EVAỌ Ẹdẹ-Ọmaha, October 6, 2001, a gba ẹgwae ẹgbukpe ọrọ ahwo ogbẹgwae Watch Tower Bible and Tract Society of Pennsylvania na evaọ Jersey City, New Jersey, U.S.A. Nọ ẹgwae na ọ fa no, ahwo ogbẹgwae na gbe erara rai a reawere obọdẹ ọruẹrẹfihotọ jọ. Okiokiọ riẹ, eva ẹgwae ofiba nọ a gba evaọ ikpewho ene evaọ Canada gbe United States, ahwo Ugboma Esuo ọrọ Isẹri Jihova a ru owhowhovia nana nọ a ru ẹme urere na no:
“Nọ ma bi rri kpobọ aro na, u wuzou gaga inọ ahwo Ọghẹnẹ kpobi a rẹ siọ oma ba ekokohọ họ. Pọl ukọ na ọ ta udu họ omai awọ nọ ma ru onana, jẹ ta udu họ ohwohwo awọ viere nọ ma ruẹ nọ ẹdẹ ologbo avọ idudu ọ Jihova o bi si kẹle na. (Ahwo Hibru 10:24, 25) Rọwo kugbe ujaje Ikereakere nana, ma rẹro nọ ma ti ru ikokohọ ubrotọ evaọ abọ akpọ na kpobi evaọ ukpe n’otha na [2002]. Evaọ ukpe 2003, o tẹ rrọ oreva Jihova, o te lọhọ re ma ru ikokohọ akpọ-soso obọdẹ evaọ abọjọ akpọ na. Enẹna họ oke nọ ma rẹ rọ jaja aro vi je roro, muẹrohọ epanọ uyero akpọ na u bi nwene kpohọ.”
Ghelọ awa gbe idhọvẹ nọ i bi vihọ nọ uyerakpọ nana o be kẹle ekuhọ riẹ na, iruẹru ahwo Ọghẹnẹ e rẹ nyaharo hrọ. Usiuwoma Uvie na, kugbe ovuẹ unuovẹvẹ Ebaibol na, a re whowho ai hrọ rọkẹ orẹwho kpobi, orua, ẹrọo-unu, gbe ahwo, ta kẹ ae re a ‘dhozọ Ọghẹnẹ jẹ kẹe oruaro keme auwa ẹdhoguo riẹ ọ kẹle viere no.’ (Eviavia 14:6, 7) Fikiere, wọhọ epanọ o rrọ oreva gbe aruoriwo Ọsẹ obọ odhiwu mai, ma be jiroro ikokohọ akpọ-soso evaọ abọ sa-sa akpọ na rọkẹ ukpe 2003.
Wọhọ emuhọ, eria nọ e rrọ omai iroro obọnana kẹ ikokohọ nana họ ikpewho jọ evaọ North America, kẹsena ma ve ti ru ejọ evaọ Europe. Nọ ukpe 2003 o be nyaharo na, a ti ru eruẹrẹfihotọ re ahwo a kpohọ ikpẹwho jọ evaọ Asia; yọ evaọ ubrobọ urere ukpe na, amọfa a ti kpohọ Africa, South America, gbe ofẹ Pacific na. A ti kere se iwou-ogha jọ re a vi umutho ahwo jọ kpohọ eria ikokohọ nana jọ, fikiere o sae te lọhọ họ re a ta nọ ọnọ u je kpobi ọ nya. Ghele na, o te jọ oware uduotahawọ re a wo umutho ahwo jọ nọ e rẹ jọ ẹro erẹwho sa-sa evaọ k’oria k’oria.
Evuẹ efa kpahe ikokohọ nana i ti te ikoko Isẹri Jihova obọ kẹle. Iwou-ogha sa-sa e sae te kẹ ovuẹ kpahe uzedhe edẹ gbe ikpewho nọ ahwo a sai ro kpohọ ikokohọ na. Fikiere, wha du kere n’enọ kpahe ẹme nana tao ho.
Enọ a be te salọ uwhremu na e te jọ Isẹri nọ e roma mudhe jẹ họ-ame no enọ e te jọ emamọ oriruo je dhesẹ uyoyou inievo kẹ inievo ewho na. Inievo ewho eyena a ve je wo emamọ uvẹ nọ a re ro dhesẹ odederehọ oyoyou gbe uvi ọghoruo kẹ erara na. (Ahwo Hibru 13:1, 2) Onana o te wha “oma osasọ kugbe” ze. (Ahwo Rom 1:11, 12) Ma te rọ evuẹ efa kpahe eruẹrẹfihotọ na rọ kẹ iwou-ogha nọ ma zizie re a vi ahwo kpohọ ugogo orẹwho hayo erẹwho jọ.
Wọhọ epanọ o be jọ anwẹdẹ, ikokohọ ubrotọ edẹ esa e te jọ erẹwho buobu evaọ ukpe 2003 na. Ẹkwoma oma-ukokohọ kugbe, ahwo kpobi a ti wo uvẹ nọ a rẹ rọ ‘gaviezọ, wuhrẹ, je wo uduotahawọ.’ (Iziewariẹ 31:12; 1 Ahwo Kọrint 14:31) Onana o te kẹ ahwo Ọghẹnẹ kpobi uvẹ nọ a rẹ rọ “jawo, [jẹ] ruẹ nọ ỌNOWO o woma!” (Olezi 34:8) Eva ikokohọ akpọ-soso na kpobi, jegbe ikokohọ ubrotọ buobu, imishọnare e te jariẹ, ejọ rai i ti w’obọ evaọ ọruẹrẹfihotọ na.
Evaọ enukpe nana, ma te reawere Ikokohọ Ubrotọ “Iwhowho Uvie Ajọwha” na, enọ e te wọ omai se isẹi viere. Ofariẹ, isiuru mai e te rro viere kẹ oware nọ Jihova o wo h’eva k’omai kẹ ukpe n’otha na. Onana u ti fi obọ họ k’omai ‘mu ẹro h’otọ, jaja aro vi, jẹ ruẹrẹ oma kpahe’ fiki oke ogaga ọ obọdẹ nana.—Matiu 24:42-44.