Okokohọ Ubrotọ “Rehọ Oruaro kẹ Ọghẹnẹ” ọrọ Isẹri Jihova ọrọ 2003
1 Ẹkwoma Aizaya, ọruẹaro ẹrọwọ riẹ, Jihova ọ kẹ ujaje nnọ: “Wha gaviezọ rọ kẹ omẹ, ahwo mẹ, re wha yo eme mẹ, orẹwho mẹ.” (Aiz. 51:4) Evaọ oke urere nana nọ u bi dhe ẹgẹga na, kọ ma gbẹ rọwo nnọ ezọgaviẹ kẹ ijaje Jihova o r’oja vi epaọ anwẹdẹ? Edhere jọ nọ ma rẹ rọ “gaviezọ” kẹ Jihova họ ẹkwoma ẹmeoyo kẹ ujaje riẹ re ma kokohọ kẹ egagọ. Ma re rẹro uvẹ obọdẹ nọ ikokohọ ubrotọ ẹsiẹvo-ẹgbukpe mai e rẹ kẹ na gaga! Ugboma Esuo Isẹri Jihova o wariẹ ru ọruẹrẹfihotọ no re a ru ikokohọ ubrotọ evaọ Nigeria evaọ 2003.
2 Wọhọ epanọ a dhesẹ evaọ Uwou-Eroro ọ September 1, 2002 na, a ti ru ikokohọ akpọ-soso evaọ erẹwho jọ, avọ ahwo nọ a ti no eghagha avọ eghagha akpọ na ze. A ghale Nigeria fihọ Ghana. Nọ o rọnọ umutho erẹwho jọ ọvo a te jọ ru ikokohọ akpọ-soso na, ahwo nọ a ghale fihọ ikokohọ eyena ọvo i ti kpohọ ae. Rekọ a te jọ ikokohọ ubrotọ na kpobi wo erere no omakugbe inievo akpọ-soso na ze. Imishọnare e te jọ eria ikokohọ buobu, yọ ma ti wo uvẹ nọ ma ti ro yo eware jọ nọ a rọ ẹro ruẹ. Kọ eme ma rẹ sai ru re ma wo erere vọvọ no ọruẹrẹfihọ nọ a bi ru enẹna rọkẹ ikokohọ mai na ze?
3 Jariẹ Evaọ Edẹ na Kpobi: Re ma wo erere vọvọ no uthubro nọ a be rọ ẹkwoma ọrigbo nọ o wo ẹrọwọ avọ areghẹ na kẹ ze, ma rẹ jariẹ evaọ etoke ọruẹrẹfihotọ na kpobi. (Mat. 24:45) Kọ o gwọlọ re whọ yare uvẹ mi ọga iruo ra nọ who re ro kpohọ edẹ okokohọ na kpobi? Taure Nehemaya ọ tẹ te yare Atagzazis Ovie na uvẹ nọ o re ro kpohọ obọ Jerusalẹm re ọ wariẹ bọ igbẹhẹ na, ọ “lẹ [se] Ọghẹnẹ obọ odhiwu.” (Neh. 2:4) Epọvo na re, whọ rẹ lẹ se Jihova re ọ k’owhẹ udu nọ whọ rẹ rọ yare ọga iruo ra re ọ k’owhẹ oke nọ whọ rẹ rọ nya edẹ esa okokohọ na kpobi. Kọ ẹvẹ otẹrọnọ ọga iruo ra ọ se nnọ ọ rẹ k’owhẹ uvẹ nọ whọ rẹ rọ nya ha? Ẹsejọhọ re who ru ei vẹ kẹe inọ ithubro nọ ma re wo eva ikokohọ mai i re fi obọ họ k’omai jọ iruiruo oruọzewọ, erọ osegboja, gbe enọ a re fi eva họ, o sai ruei nọ ọ jẹ kẹ emamọ uyo. Fibae, otẹrọnọ ma wo ahwo uviuwou nọ a rrọ ukoko ho, o rẹ jọ oware uyoyou re ma vuẹ ae kpahe omaa okokohọ mai na evaọ ẹruoke.
4 Koko Ugho họ kẹ Okokohọ Na: Fiba eruẹrẹfihotọ efa, ENẸNA họ oke nọ a re ro muọ ugho họ ekoko kẹ okokohọ ubrotọ na. Oria nọ ahwo jọ a be rria u dina thabọ no oria okokohọ na. Ofariẹ, ahwo jọ a wo iviuwou ilogbo. Rọkẹ ahwo nana gbe omai kpobi, o gwọlọ ugho nọ a re ro ru unevaze, ofa-ojẹ, emuore evaọ etoke okokohọ na, gbe araha idudhe efa. O gwọlọ nọ ibuobu ahwo nọ a wo iviuwou ilogbo a rẹ m’omaa fihotọ je koko ugho họ ziezi re uviuwou na soso o sai kpohọ okokohọ na. Obọdẹ edhere jọ nọ a re ro ru onana o sae jọ eroro oma unuigho nọ o rẹ rehọ kpobi. O rrọ oware areghẹ re a roro epanọ eware e be ghare te evaọ okenọ whọ tẹ be m’omaa ra. Ghale unuigho nọ who roro na fihọ unu emerae nọ e rrọ umuo oke onana rite ẹdẹ okokohọ ubrotọ rai na. Unuigho nana whọ rẹ hai koko k’amara k’amara. Amara kpobi, kaki fi unuigho onana họ akotọ wọhọ ugho okokohọ. Whọ sai fi ei họ ẹkpẹti ọsese jọ hayo ẹnvẹlopu. Dede na, a rẹ sae ghale ugho ọ k’amara k’amara na kpohọ abane a vẹ hai koko iei họ k’oka k’oka. Oware nọ u w’uzou họ whọ rẹ hẹrẹ hẹ bẹsenọ amara ọvo hayo ivẹ i re kiọkọ re okokohọ na o te te, re who te ti muọ ugho họ ekoko họ kẹ erẹ ẹgbukpe ọnana.—Itẹ 21:5.
5 Ithubro kẹ Ewo Uwou nọ A re Wohọ: Ma te daoma vi ebe ọ Room Request buobu ro se ukoko kpobi. Ohwo kpobi nọ ọ gwọlọ oria nọ o re wohọ ẹkwoma ọruẹrẹfihotọ ọrọ ẹko-iruo iwou okokohọ na o re kere evuẹ kpobi nọ a gwọlọ vevẹ fihọ efọmo na ọ vẹ rehọ iẹe kẹ okere-obe ukoko. U re mu okere-obe ukoko na ẹro nnọ eme nọ a kere fihọ obe ọ Room Request nọ a te rọ ze na e gba. Who kere unu iwhowho-uvie nọ e gwọlọ uwou na ỌVO HO, wọhọ “iwhowho-uvie 50,” evaọ oria nọ a re kere edẹ ahwo nana fihọ na. A re kere eme na kpobi kpatiẹ jẹ jọ vevẹ. Iviena jọ u mu owhẹ ẹro nọ who kere odẹ, ikpe, sọ ọzae hayo aye, jegbe sọ ohwo nọ ọ gwọlọ uwou na yọ ọkobaro hayo owhowho-uvie. Ku emọ na kugbe unu ahwo na. Evaọ oke nọ u kpemu, ikoko jọ i kere unu ekpako na ọvo. Onana u re ru ọruẹrẹfihotọ iwou na jọ bẹbẹ gaga. Otẹrọnọ eme nọ whọ gwọlọ kere e gba obe na ha, whọ rẹ sai kere fihọ ẹwẹ-obe ọfa gheghe kugbei. Otẹrọnọ who kere vrẹ omọvo fihọ obe na, fodẹ oghẹrẹ nọ ahwo na a kpekpe te fihọ oria nọ a ru fihọ iẹe na. U re mu okere-obe ukoko na ẹro nnọ a kere eme fihọ obe ọ Room Request na gbagba taure o te ti vi ei se Ẹko-Iruo Uwou okokohọ na. A rẹ kaki vi efọmo na evaọ ẹruoke taure ẹdẹ okokohọ o te ti te. IVIENA WHO vi efọmo Room Request na se Society HI. A re vi ei kpohọ adrẹse okokohọ nọ o kiehọ ọrai evaọ usu enọ a dhesẹ fihọ emu efọmo na.
6 K’ukpe k’ukpe, ma rẹ tudu họ inievo na awọ re a yoẹme kẹ Ẹko-Iruo Uwou okokohọ na. O tẹ kawo u re ru eware ivẹ gba nọ ma tẹ kezọ kẹ ithubro enana:
7 O rẹ whaha araha igho kẹ inievo mai: Nọ ma te yoẹme kẹ ọruẹrẹfihotọ Society, osa iwou u re kpotọ kẹ inievo mai. Ukpenọ ma rẹ raha igho kẹ enọ i wo iwou, a rẹ sae raha igho nana ziezi ro fi obọ họ kẹ iviuwou ọ inievo mai gbe iruo akpọ soso na. Ma te tube wo igho nọ ma sae rọ rehọ iwou eghaghae dede, u fo re ma tha omodawọ Ẹko-Iruo Uwou na uke. A dhesẹ ẹzi ọdawẹ nana nọ a re dhesẹ k’amọfa na eva 1 Jọn 3:17, yọ oye họ ehri-uzi nọ o rrọ emu ọ 1 Ahwo Kọrint 10:24 na.
8 U re dhesẹ ẹmeoyo kẹ ọkpọvio Society: Onana o rẹ j’omai oja gaga. Ahwo Hibru 13:17 o ta nọ: “Wha yo ẹme e nọ i bi su owhai re wha rehọ oma kpotọ kẹ ae; keme ae a be sẹro izi rai, wọhọ ahwo nọ a rẹ te niyẹrẹ re a rọ [evawere] ru onana o [gbẹ jọ orọ] ofuhu, keme oyena u re wo erere kẹ owhai hi.” Nọ inievo mai i bi ru eruẹrẹfihotọ buobu kẹ okokohọ ubrotọ mai na, ma gwọlọ nọ a riẹ inọ ma be thọ ae uke vọvọ. Nọ a gwọlọ ẹmeoyo mai evaọ ẹme ọnana evaọ edẹ ivẹ hayo esa ọvo k’ukpe k’ukpe na, onana yọ emamọ edhere nọ ma rẹ rọ tha omodawọ rai uke. O tẹ make rọnọ ẹgwọlọ omobọ mai o wo ohẹriẹ, emamọ oriruo mai, nọ inievo mai gbe ahwo akpọ na a rẹ ruẹ, o rẹ wha ẹzi uyoyou, ọrọ okugbe, gbe uketha haro.—Fil. 2:1-4.
9 Ẹgwọlọ Obọdẹ: Ahwo nọ a gwọlọ uketha obọdẹ mi amọfa evaọ omaa rai kẹ okokohọ na ọvo ọruẹrẹfihotọ nana ọ rrọ kẹ, maero ọruẹrẹfihotọ uwou. Ahwo nana a sae jẹ gwọlọ obufihọ evaọ idhere efa wọhọ epanọ iyero rai sa-sa e rrọ. Iwhowho-uvie hayo ekobaro nọ i wo emamọ uruemu ọvo, kugbe emọ rai nọ e rrọ kpatiẹ, enọ i wo ẹgwọlọ obọdẹ nọ Ogbẹgwae Iruo Ukoko na u kuenu kẹ ọvo họ enọ i te kẹ obufihọ evaọ ọruẹrẹfihọ Ẹgwọlọ Obọdẹ na. Ukpenọ a re fi owha-iruo onana họ ogbẹgwae okokohọ na uzou, ukoko nọ ahwo na a no ze u re ru eruẹrẹfihotọ efa nọ a rẹ rọ sẹro ahwo nọ a wo ẹgwọlọ obọdẹ. Ekpako gbe amọfa nọ a riẹ kpahe uyero ohwo na a rẹ sae rọ uyoyou fi obọ họ. Ẹsikpobi onana o rẹ gwọlọ nọ iwhowho-uvie a re roro kpahe ẹgwọlọ ahwo nọ a rrọ iruo odibọgba oke-kpobi, enọ e kpako no, enọ e be mọ, gbe amọfa. Iwhowho-uvie e rẹ sai fi obọ họ ẹkwoma ahwo nana nọ a rẹ rehọ gb’oma hayo rẹrote ẹgwọlọ rai evaọ idhere efa.—Jem. 2:15-17; 1 Jọn 3:17, 18.
10 Uzẹme, Ẹko-Iruo Uwou na o te dao oma re a gwọlọ iwou nọ i fo kẹ iwhowho-uvie nọ i wo ẹgwọlọ obọdẹ otẹrọnọ ahwo ukoko na a sai fiobọ họ kẹ ae he. Iwhowho-uvie nana a rẹ ta ẹbẹbẹ rai kẹ okere-obe ukoko na. Okere-obe na ọ vẹ t’ẹme na kugbe Ogbẹgwae Iruo Ukoko na re a ruẹ sọ o lọhọ kẹ ukoko na re u fi obọ họ kẹ ahwo nana re ae ọvo a rẹrote araha ọruẹrẹfihotọ iwou nọ a re wohọ. Otẹrọnọ ukoko na o gbẹ sae kẹ obufihọ nọ a gwọlọ họ, okere-obe na ọ sae kẹ ohwo na obe ọ Room Request na, onọ ọye omariẹ o re kere eme fihọ obehru ẹwẹ-obe ọsosuọ na nnọ, “SPECIAL NEEDS” (ẸGWỌLỌ OBỌDẸ). Ahwo nọ a wo ẹgwọlọ obọdẹ ọvo a re kere eme fihọ obe nana nọ a kpokahọ na. Ohwo nọ ọ gwọlọ uwou na o re kere eme fihọ iẹe. O ve zihe iei bru okere-obe na, re o rri rie sọ o gba, ọ vẹ jẹ riẹ oware nọ o lẹliẹ ohwo na te kẹ ororokẹ otiọye na. Okere-obe na o re DHESẸ ẸBẸBẸ OHWO NA VEVẸ evaọ oria nọ a dhesẹ fihọ uke obe na. A re ru onana evaọ ẹruoke taure oke okokohọ na u te ti te. Okere-obe na o ve vi obe na se Ẹko-Iruo Uwou na. A ti kere se ohwo nọ ọ gwọlọ uwou na ovavo kpahe oria nọ o ti wohọ.
11 Ahwo nọ a wo ẹgwọlọ obọdẹ a re kpohọ okokohọ na re a yare oria nọ a re wohọ nọ a te t’obei no VIEVIE HE, keme Ẹko-Iruo Uwou na o rẹ gwọlọ yo mi Ogbẹgwae Iruo Ukoko na tao.
12 Ibuobu i dhesẹ ovuhumuo rai via no kpahe ọruẹrẹfihotọ nọ a ru kẹ eria nọ a re wohọ evaọ etoke ikokohọ na. Kọ eva e be were owhẹ re fiki eruẹrẹfihotọ buobu nọ a bi ru eva emu ra na? Eva e rẹ were Society re a ruẹrẹ emamọ eria nọ a re wohọ evaọ etoke okokohọ na kpahe, onọ u re fi obọ họ k’omai kpobi t’ẹrovi irere abọ-ẹzi erọ okokohọ na gbe eme ọruẹrẹfihotọ na.
13 Ekpohọ Okokohọ Ọfa: A ghale ukoko kpobi fihọ okokohọ nọ ọ mae kẹle iẹe. Rono unu iwhowho-uvie nọ a fihọ okokohọ ọvuọvo ze, Society ọ rẹ riẹ unu ahwo nọ a ti kpohọ okokohọ ọvuọvo re a ru ọruẹrẹfihotọ kẹ eria ẹkeria nọ i re te, iwou, ebe, gbe eware efa. Dede na, otẹrọnọ whọ gwọlọ kpohọ okokohọ ọfa nọ a ghale owhẹ fihọ họ fiki oware jọ, yọ whọ gwọlọ uwou, okere-obe ukoko na ọ rẹ sae k’owhẹ obe ọ Room Request na. Whọ rẹ sai kere eme fihọ iẹe, okere-obe na ọ vẹ whobọhọ iẹe taure who te ti vi ei kpohọ okokohọ nọ whọ gwọlọ nya na.
14 Fialoma Via Wọhọ Oruiruo-Unevaze: Evaọ etoke okokohọ na, egba buobu erọ ahwo-unevaze a re fi obọ họ re eko-iruo sa-sa na e riẹ nya ziezi. Eruẹrẹahwohọ nọ e rrọ ọgwa na gbe eria nọ a rẹ dhẹ imoto fihọ a rẹ kẹ ọkpọvio kpahe oria ẹkeria jẹ rẹrote imoto mai evaọ okpẹdẹ na. Ẹko-Iruo ọ Orufuọ na a wo owha-iruo nọ a rẹ rọ kpare odẹ ezi mai orọ ẹfuọ kpehru, ru oria egagọ mai na fo vi epanọ ma di rie họ. Kọ ma sae tha eko-iruo enana gbe efa nọ e gwọlọ uketha mai na uke? Kọ whọ te fialoma via re whọ rọ “evevo” lele inievo ra ruiruo?—Zef. 3:9.
15 Ma Rrọ Afe Ughe: Kọ ahwo a be ruẹ ohẹriẹ nọ o rrọ udevie Isẹri Jihova avọ ahwo akpọ nana? O rrọ vevẹ! Muẹrohọ eme jọ nọ enọ i w’uzou ehọtẹle evaọ okpẹwho jọ a ta: “Ahwo a be hae ziọ etenẹ ti kokohọ ẹsikpobi, rekọ whai họ ahwo nọ a rẹ mae rọ oma kpotọ gbe enọ e mai wou.” “Oka n’ukpo utu-ahwo egagọ efa jọ a kokohọ etenẹ na. Ohẹriẹ nọ o rrọ udevie rai avọ ae o rrọ vevẹ.” “Ma riẹ nnọ ma rẹ sai wo imuẹro obufihọ gbe ẹmeoyo rai.” Kọ eme itieye na i gbe fi obọ họ k’omai vuhu epanọ “areghẹ nọ o nehru ze” o re kpomahọ uruemu mai woma te? (Jem. 3:17) Nọ ma rrọ ‘afe ughe kẹ akpọ na,’ jọ uruemu mai o hai dhesẹ adhẹẹ gbe oruaro Ọghẹnẹ mai, Jihova via ẹsikpobi.—1 Kọr. 4:9.
16 Nọ ‘uyero akpọ nana u bi nwene’ na, ma gwọlọ ikokohọ ubrotọ mai re i fi obọ họ k’omai kpomamu evaọ abọ-ẹzi. (1 Kọr. 7:31) Re a ru ọruẹrẹfihotọ nọ a rẹ rọ jariẹ edẹ na kpobi o rẹ gwọlọ omodawọ, rekọ avọ erere nọ o re noi ze. A ruẹrẹ Okokohọ Ubrotọ “Rehọ Oruaro kẹ Ọghẹnẹ” ọrọ enukpe nana họ re u fi obọ họ k’omai dikihẹ ga nọ ma be hẹrẹ ẹdhoguo obrukpe Jihova kpahe akpọ Setan na. Wha j’oma kẹ uvumọ oware uvẹ re o whaha omai ewo ithubro nọ Jihova ọ ruẹrẹ họ kẹ omai no na ha.—Aiz. 51:4, 5.
[Box on page 3]
Oke Iprogramo
Edisoi-Oka
9:20 a.m. - 4:40 p.m.
Ẹdẹ-Ọmaha
9:00 a.m. - 4:20 p.m.
Ẹdoka
9:00 a.m. - 3:20 p.m.