Okokohọ Ubrotọ “Iwhowho Uvie Ajọwha” ọ Isẹri Jihova ọrọ 2002
1 “Eva e were omẹ hrọ nọ a ta kẹ omẹ nọ, ‘Ma kpo obọ uwou ỌNOWO!’ ” (Ol. 122:1) Evaọ ẹkiẹriwi ẹme ọso-ilezi na, muẹrohọ (1) oghẹrẹ nọ o jariẹ oma evaọ okenọ a zizie ei re o kuomagbe evaọ egagọ Jihova, (2) emamọ egbẹnyusu nọ o wo, enọ i wo isiuru kpahe egagọ uzẹme gaga, gbe (3) omaa nọ o gwọlọ re a ru uzizie na, re a kokohọ kugbe, je kpohọ erẹ obọ uwou Ọghẹnẹ na.
2 Kọ eme ọso-ilezi na i gbe dhesẹ oghẹrẹ iroro nọ e rẹ jọ omai eva evaọ okenọ ma te yo nnọ a be m’omaa kẹ okokohọ ologbo mai ọfa? Ma rẹ vọ avọ irẹro nọ ma be kareghẹhọ oghọghọ ikokohọ ilogbo nọ e vrẹ gbe ẹruore ọ ẹwariẹ kpohọ omakokohọ obọdẹ kugbe ibe enọ i you Jihova na. A ru ọruẹrẹfihotọ no rọkẹ Okokohọ Ubrotọ “Iwhowho Uvie Ajọwha” ọrọ edẹ esa evaọ Nigeria soso evaọ 2002/2003. Enẹna họ oke nọ ma rẹ rọ m’omaa re ma nya re ma wo erere vọvọ no ehaa abọ-ẹzi nọ e be hẹrẹ omai na ze.
3 “Odibo oruọzewọ avọ areghẹ na,” o muọ emu ẹruoke ọrọ abọ-ẹzi nọ a te ghale evaọ okokohọ ologbo na họ ẹruẹrẹfihọ no. (Luk 12:42) A ghale ukoko kpobi fihọ okokohọ jọ no re o ruẹse whaha ahwo nọ a re bu vrẹoma evaọ eria okokohọ jọ. Fibae, inievo buobu i muọ eko-iruo okokohọ sa-sa na họ ẹruẹrẹfihọ no re a ruẹsi “ru eware kpobi ziezi gba kiete.” (1 Kọr. 14:40) Nọ a ruẹrẹ eware buobu họ kẹ erere gbe ewoma mai no na, eme ma rẹ sai ru rọ ruẹrẹ oma kpahe kẹ okokohọ na?
4 M’Omaa Enẹna re Whọ Jariẹ Edẹ Esa na Kpobi: Kọ o gwọlọ re whọ yare uvẹ mi ọga iruo ra nọ who re ro kpohọ okokohọ nọ a ghale owhẹ fihọ evaọ edẹ na kpobi? Jihova ọ riẹ nnọ ega-iruo jọ “i wo udu ogaga.” (1 Pita 2:18, NW ) Rekọ ikokohọ mai i w’uzou gaga, yọ ma gwọlọ daoma gaga re ma jariẹ evaọ ọruẹrẹfihotọ na kpobi. Ta kẹ Jihova kpahe eme eyena evaọ olẹ, re whọ gwọlọ ọkpọvio riẹ kẹ emamọ iyẹrẹ.—Neh. 2:4.
5 Koko Ugho họ kẹ Okokohọ Na: Fiba eruẹrẹfihotọ efa, ENẸNA họ oke nọ a re ro muọ ugho họ ekoko kẹ okokohọ ubrotọ na. Ahwo jọ a dina thabọ no oria okokohọ na. Ofariẹ, ahwo jọ a wo iviuwou ilogbo. Rọkẹ ahwo nana gbe omai kpobi, o gwọlọ ugho nọ a re ro ru unevaze, ofa-ojẹ, emuore evaọ etoke okokohọ na, gbe araha idudhe efa. O gwọlọ nọ ahwo nọ a wo iviuwou ilogbo a rẹ m’omaa fihotọ je koko ugho họ ziezi re uviuwou na soso o sai kpohọ okokohọ na. Obọdẹ edhere jọ nọ a re ro ru onana o sae jọ eroro oma unuigho nọ o rẹ rehọ kpobi. O rrọ oware areghẹ re a roro epanọ eware e be ghare te evaọ okenọ whọ tẹ be m’omaa ra. Ghale unuigho nọ who roro na fihọ unu emerae nọ e rrọ umuo oke onana rite ẹdẹ okokohọ ubrotọ rai na. Unuigho nana whọ rẹ hai koko k’amara k’amara. Amara kpobi, kaki fi unuigho onana họ akotọ wọhọ ugho okokohọ. Whọ sai fi ei họ ẹkpẹti ọsese jọ hayo ẹnvẹlopu. Dede na, a rẹ sae ghale ugho ọ k’amara k’amara na kpohọ abane a vẹ hai koko iei họ k’oka k’oka. Oware nọ u w’uzou họ whọ rẹ hẹrẹ bẹsenọ amara ọvo hayo ivẹ i re kiọkọ re okokohọ na o te te re who te ti muọ ugho họ ekoko kẹ erẹ ẹgbukpe ọnana ha.—Itẹ 21:5
6 Ithubro kẹ Ewo Uwou nọ A re Wohọ: Ma te daoma vi ebe ọ Room Request buobu ro se ukoko kpobi. U re mu okere-obe ukoko na ẹro nọ eme nọ a kere fihọ obe ọ Room Request nọ a te rọ ze na e gba. Who kere unu iwhowho-uvie nọ e gwọlọ uwou ỌVO HO, wọhọ “iwhowho-uvie 50,” evaọ oria nọ a re kere edẹ ahwo nana fihọ na. A re kere eme na kpobi kpatiẹ vevẹ. Iviena jọ u mu owhẹ ẹro nọ who kere odẹ, ikpe, sọ ọzae hayo aye, jegbe sọ ohwo nọ ọ gwọlọ uwou na yọ ọkobaro hayo owhowho-uvie. Ku emọ na kugbe unu ahwo na. Evaọ oke nọ u kpemu, ikoko jọ i kere unu ekpako na ọvo. Onana u re ru ọruẹrẹfihotọ iwou na jọ bẹbẹ gaga. Otẹrọnọ eme nọ whọ gwọlọ kere e gba obe na ha, whọ rẹ sai kere fihọ ẹwẹ-obe ọfa gheghe kugbei. Otẹrọnọ who kere vrẹ omọvo fihọ obe na, fodẹ oghẹrẹ nọ ahwo na a kpekpe te fihọ oria nọ a ru fihọ iẹe na. U re mu okere-obe ukoko na ẹro nnọ a kere eme fihọ obe ọ Room Request na gbagba taure o te ti vi ei se Ẹko-Iruo Uwou okokohọ na. A rẹ kaki vi efọmo na taure ẹdẹ okokohọ o te te. IVIENA WHO vi efọmo Room Request na se Society HI. Adrẹse okokohọ nọ o fo nọ a dhesẹ fihọ emu efọmo na a re vi ei kpohọ.
7 K’ukpe k’ukpe, ma rẹ tuduhọ inievo na awọ re a yoẹme kẹ Ẹko-Iruo Uwou okokohọ na. Ma tẹ kezọ kẹ onana, o tẹ kawo u re ru eware ivẹ gba:
8 O rẹ whaha araha igho kẹ inievo mai: Nọ ma te yoẹme kẹ ọruẹrẹfihotọ Society, osa iwou u re kpotọ kẹ inievo mai. Ukpenọ ma rẹ raha igho kẹ enọ i wo iwou, a rẹ sae raha igho nana ziezi ro fiobọhọ kẹ iviuwou ọ inievo mai gbe iruo akpọ soso na. Ma te tube wo igho nọ ma sae rọ rehọ iwou eghaghae dede, u fo re ma tha omodawọ Ẹko-Iruo Uwou na uke. A dhesẹ ẹzi ọdawẹ nana nọ a re dhesẹ k’amọfa na eva 1 Jọn 3:17, yọ oye họ ehri-uzi nọ o rrọ emu ọ 1 Ahwo Kọrint 10:24 na.
9 U re dhesẹ ẹmeoyo kẹ ọkpọvio Society: Onana o rẹ j’omai oja gaga. Ahwo Hibru 13:17 o ta nọ: “Wha yo ẹme e nọ i bi su owhai re wha rehọ oma kpotọ kẹ ae; keme ae a be sẹro izi rai, wọhọ ahwo nọ a rẹ te niyẹrẹ re a rọ [evawere] ru onana o [gbẹ jọ orọ] ofuhu, keme oyena u re wo erere kẹ owhai hi.” Nọ inievo mai a bi ru eruẹrẹfihotọ buobu kẹ okokohọ ubrotọ mai na, ma gwọlọ nọ a riẹ nọ ma be thọ ae uke vọvọ. Nọ a gwọlọ ẹmeoyo mai evaọ ẹme nana edẹ ivẹ hayo esa ọvo evaọ k’ukpe k’ukpe na, onana yọ emamọ edhere nọ ma rẹ rọ tha omodawọ rai uke. O tẹ make rọnọ ẹgwọlọ omobọ mai u wo ohẹriẹ, emamọ oriruo mai, nọ inievo mai gbe ahwo akpọ na a rẹ ruẹ, o rẹ wha ẹzi uyoyou, okugbe, gbe uketha haro.—Fil. 2:1-4.
10 Ẹgwọlọ Obọdẹ: Ọruẹrẹfihotọ nana ọ rrọ kẹ ahwo nọ a gwọlọ uketha obọdẹ mi amọfa evaọ eruo eruẹrẹfihotọ rai kẹ okokohọ ọvo, maero ọruẹrẹfihotọ uwou. Ahwo nana a sae jẹ gwọlọ obufihọ evaọ idhere efa wọhọ epanọ iyero rai sa-sa e rrọ. Iwhowho-uvie hayo ekobaro nọ i wo emamọ uruemu ọvo, kugbe emọ rai nọ e rrọ kpatiẹ, enọ i wo ẹgwọlọ obọdẹ nọ Ogbẹgwae Iruo Ukoko na u kuenu kẹ ọvo họ enọ i te kẹ obufihọ evaọ ọruẹrẹfihọ Ẹgwọlọ Obọdẹ na. Ukoko nọ ahwo na a no ze u re ru eruẹrẹfihotọ efa nọ a rẹ rọ sẹro ahwo nọ a wo ẹgwọlọ obọdẹ, ukpenọ a re fi owha-iruo onana họ ogbẹgwae okokohọ na uzou. Ekpako gbe amọfa nọ a riẹ kpahe uyero ohwo na a rẹ sae rọ uyoyou fiobọhọ. Ẹsikpobi onana o rẹ gwọlọ nọ iwhowho-uvie a re roro kpahe ẹgwọlọ ahwo nọ a rrọ iruo odibọgba oke-kpobi, enọ e kpako no, enọ e be mọ, gbe amọfa. Iwhowho-uvie a rẹ sai fiobọhọ ẹkwoma ahwo nana nọ a rẹ rehọ gb’oma hayo rẹrote ẹgwọlọ rai evaọ idhere efa.—Jem. 2:15-17; 1 Jọn 3:17, 18.
11 Dede na, Ẹko-Iruo Uwou na o te daoma re a gwọlọ iwou nọ i fo kẹ iwhowho-uvie nọ i wo ẹgwọlọ obọdẹ otẹrọnọ ahwo ukoko na a sai fiobọhọ kẹ ae he. Iwhowho-uvie nana a rẹ ta ẹbẹbẹ rai kẹ okere-obe ukoko na. Okere-obe na ọ vẹ t’ẹme na kugbe Ogbẹgwae Iruo Ukoko na re a ruẹ sọ o lọhọ kẹ ukoko na re u fiobọhọ kẹ ahwo nana re ae ọvo a rẹrote araha ọruẹrẹfihotọ iwou nọ a re wohọ. Otẹrọnọ ukoko na o gbẹ sae kẹ obufihọ nọ a gwọlọ họ, okere-obe na ọ sae kẹ ohwo na obe ọ Room Request na, onọ ọye omariẹ o re kere eme fihọ obehru ẹwẹ-obe ọsosuọ na nnọ, “SPECIAL NEEDS” (ẸGWỌLỌ OBỌDẸ). Ahwo nọ a wo ẹgwọlọ obọdẹ ọvo a re kere eme fihọ obe nana nọ a kpokahọ na. Ohwo nọ ọ gwọlọ uwou na o re kere eme fihọ iẹe. O re zihe iei bru okere-obe na, o ve rri rie sọ o gba ọ vẹ jẹ riẹ oware nọ o lẹliẹ ohwo na te kẹ ororokẹ otiọye na. Okere-obe na o re DHESẸ ẸBẸBẸ OHWO NA VEVẸ evaọ oria nọ a dhesẹ fihọ uke obe na. A re ru onana evaọ ẹruoke taure oke okokohọ na u te ti te. Okere-obe na o ve vi obe na se Ẹko-Iruo Uwou na. A ti kere se ohwo nọ ọ gwọlọ uwou na ovavo kpahe oria nọ o ti wohọ.
12 ORỌNIKỌ ahwo nọ a wo ẹgwọlọ obọdẹ a re kpohọ okokohọ na a vẹ yare oria nọ a re wohọ nọ a te t’obei hi, keme Ẹko-Iruo Uwou na o rẹ gwọlọ yo mi Ogbẹgwae Iruo Ukoko na tao.
13 Ibuobu i dhesẹ ovuhumuo rai via no rọ kpahe ọruẹrẹfihotọ nọ a ru kẹ eria nọ a re wohọ evaọ etoke ikokohọ na. Kọ eva e were owhẹ epọvo na rọkẹ eruẹrẹfihotọ buobu nọ a ru k’owhẹ? Eva e rẹ were Society re a ruẹrẹ eria nọ a re wohọ evaọ etoke okokohọ na kpahe, nọ u re fiobọhọ k’omai kpobi t’ẹrovi irere abọ-ẹzi erọ okokohọ na gbe eme ọruẹrẹfihotọ na.
14 Ekpohọ Okokohọ Ọfa: A ghale ukoko kpobi fihọ okokohọ nọ ọ mae kẹle iẹe. Rono unu iwhowho-uvie nọ a fihọ okokohọ ọvuọvo ze, Society ọ rẹ riẹ unu ahwo nọ a ti kpohọ okokohọ ọvuọvo re a ru ọruẹrẹfihotọ kẹ eria ẹkeria nọ i re te, iwou, ebe, gbe eware efa. Dede na, otẹrọnọ whọ gwọlọ kpohọ okokohọ ọfa nọ a ghale owhẹ fihọ họ fiki oware jọ yọ whọ gwọlọ uwou, okere-obe ukoko na ọ rẹ sae k’owhẹ efọmo ọ Room Request na. Whọ rẹ sai kere eme fihọ iẹe, okere-obe na ọ vẹ wh’obọhọ iẹe taure who te ti vi ei kpohọ okokohọ nọ whọ gwọlọ nya na.
15 Fialoma Via Wọhọ Oruiruo-Unevaze: Evaọ etoke okokohọ na, egba buobu ọrọ ahwo-unevaze a re fiobọhọ re eko-iruo na e riẹ nya ziezi. Eruẹrẹahwohọ nọ e rrọ ọgwa na gbe eria nọ a rẹ dhẹ imoto fihọ a rẹ kẹ ọkpọvio kpahe ẹkeria jẹ rẹrote imoto mai evaọ okpẹdẹ na. Ẹko-Iruo ọ Orufuọ na a wo owha-iruo nọ a rẹ rọ kpare odẹ ezi ọ ẹfuọ mai kpehru, ru oria egagọ mai na fo vi epanọ ma di rie họ. Kọ ma sae tha eko-iruo enana gbe efa nọ e gwọlọ uketha mai na uke? Kọ whọ te fialoma via re whọ rọ “evevo” lele inievo ra ruiruo?—Zẹf. 3:9.
16 Kọ Ahwo A re Ghine Muẹrohọ Oware nọ Ma bi Ru? Evaọ etoke okokohọ ubrotọ jọ evaọ ukpe n’ukpo na, ọzae jọ nọ ọ siọ obe ba ewuhrẹ kugbe Isẹri Jihova vrẹ ikpe 20 no o je ruiruo evaọ ehọtẹle jọ. Ọ ta kẹ Isẹri jọ nnọ enẹna o bi roro kpahe ẹwariẹ muhọ uwuhrẹ Ebaibol riẹ gbe ekpohọ iwuhrẹ ukoko na. Fikieme? Fikiọ edhere oyoyou nọ a ro yeri kugbe ei evaọ edẹ nọ Isẹri na a ro wohọ ehọtẹle na.
17 Ohwo jọ nọ ọ rẹ zẹ emu evaọ ehọtẹle ọ ta kpahe inievo mai nnọ: “Utu rai họ onọ o mai woma nọ o rria ehọtẹle mai no. Ahwo rai a wo odiri jẹ rrọ wolẹ gaga.” Ẹvẹ onana u re ru eva were Ọsẹ obọ odhiwu mai te nọ ọ be ruẹ omai nọ ma be nya lele uduotahawọ Jesu na: “Ru re elo rai o lo iraro ahwo, re a ruẹ iruo iwoma rai, a jiri Ọsẹ rai nọ ọ rọ obọ odhiwu”!—Mat. 5:16.
18 Dede na, ma wo ekpehre iyẹrẹ jọ no ikokohọ jọ ze kpahe emaha gbe ekpako nọ i je mu nya evaọ okenọ a muọ ẹme ọta họ no. A ruẹ ahwo jọ nọ a jẹ wezẹ evaọ iwou nọ a wohọ evaọ oria okokohọ na jẹ daji obọ iwou nọ a kẹ rai na gheghe ọvo evaọ okenọ a rrọ obọ okokohọ t’ẹme. Ejọ e nyae da udi-ọgọ evaọ oke-eriosehọ na nọ a je ziheze evaọ okenọ a mu ẹme họ ẹta no a te kie ruọ owezẹ. A n’iyẹrẹ re inọ evaọ okenọ a be t’ẹme na, yọ inievo jọ e be ruọ ifoto. Esẹgbini gbe emọ nọ e be ruọ ifoto uviuwou e jọ usu na re. Wha joma dhesẹ ababọ ovuhumuo kẹ eruẹrẹfihotọ Jihova ha ẹkwoma eware itieye na nọ ma rẹ kuvẹ re e wariẹ roma via evaọ ikokohọ enukpe nana. Ma tuduhọ ahwo kpobi awọ inọ iviena wha dhesẹ oma-oriẹsuo. Ma tẹ jẹ kareghẹhọ esẹgbini re a r’ẹrote emọ rai.—Fil. 1:9-11; 1 Kọr. 10:31; jẹ wawo Iruo-Izerẹ 10:9.
19 Joma dhesẹ uruemu Devidi Ovie na, ọnọ o rẹro ekpohọ uwou egagọ Jihova avọ oghọghọ. Ikokohọ ubrotọ mai yọ ehri emu abọ-ẹzi nọ u w’uzou gbe uvẹ omakugbe uyoyou nọ a rẹ ruẹ ibe riẹ hẹ. Fikiere, ma rọ oma osasa zizie owhai re wha muọ eruẹrẹfihotọ rai họ eruo re wha jariẹ evaọ oke na kpobi evaọ edẹ esa ọ Okokohọ Ubrotọ “Iwhowho Uvie Ajọwha” ọrọ enukpe nana!
[Ọjọriẹ kẹ Ugboma Ekpako Na: Nọ uko obeva onana u te te owhai obọ no, iviena wha whowho oria gbe ẹdẹ okokohọ nọ Society o fihọ kẹ ukoko rai evaọ Ewuhrẹ Odibọgba gbe Uwuhrẹ Uwou-Eroro n’ọtha na. U re woma re a kpoka họ oria gbe ẹdẹ okokohọ nọ a ghale ukoko rai fihọ na evaọ uko obeva na a vẹ tae mu ebọdo ovuẹ na.
Okere-obe ukoko na ọ rẹ rẹrote eme gbe iwhowhovia nọ i kpomahọ okokohọ evaọ iwuhrẹ obaro. Ekpako na kpobi a re fiobọhọ re a ruẹ nọ eme nọ i kpomahọ okokohọ na a ru rai evaọ ẹruoke, sasasa, je ru ai ziezi.]
[Box on page 3]
Oke Iprogramo
Edisoi-Oka: 9:20 a.m. – 4:40 p.m.
Ẹdẹ-Ọmaha: 9:00 a.m. – 4:20 p.m.
Ẹdoka: 9:00 a.m. – 3:20 p.m.