Okokohọ Ubrotọ “Nya Kugbe Ọghẹnẹ” ọrọ Isẹri Jihova—2004
1 Eme ọ be lẹliẹ ikokohọ ubrotọ nọ ma bi ru kukpe kukpe na si owhẹ urru? Kọ eme ọbọga gbe edrama nọ ‘ọrigbo nọ o wo ẹrọwọ avọ areghẹ na’ a ruẹrẹ họ kẹ omai? (Mat. 24:45-47) Ebe ekpokpọ nọ emu abọ-ẹzi ẹruoke ọ rrọ? Inievo-emezae gbe erọ emetẹ nọ i bi gbiku epanọ Ebaibol na i ro nwene uzuazọ rai wowoma no? Iyẹrẹ epanọ iruo usiuwoma ota Uvie na e be rọ nyaharo evaọ ekwotọ efa? Omakugbe ibe enọ e rọwo nọ e rrọ edhe kpobi? Ẹhẹ, ma rẹ rọ ajọwha rri kparo kpohọ ikokohọ mai avọ irẹro eware enana gbe ẹjiroro efa buobu!
2 Jariẹ Evaọ Edẹ Esa na Kpobi: Jihova ọ rọ ẹkwoma Mosis kẹ ujaje nọ: “Koko ahwo na họ . . . re a yo je wuhrẹ.” (Izie. 31:12) Ẹkwoma utu ọrigbo nọ o wo ẹrọwọ avọ areghẹ na, Jihova ọ ruẹrẹ obọdẹ omaa orọ ewuhrẹ fihọ kẹ omai evaọ ẹdẹ okokohọ mai na kpobi. Nọ o bi wuhrẹ omai re ma ‘wo erere’ kẹ oma mai na, ma gwọlọ jariẹ re ma yo ithubro riẹ kpobi. (Aiz. 48:17) Otẹrọnọ whọ gwọlọ mi ọga iruo ra uvẹ, nya lele oriruo aruọwha Nehemaya ẹkwoma olẹ nọ whọ rẹ lẹ se Jihova taure whọ tẹ nyai mi uvẹ na. (Neh. 1:11; 2:4) Ofa riẹ re, u ti woma gaga re whọ vuẹ ahwo uviuwou ra nọ a rrọ ukoko na ha kpahe omaa ra rọkẹ okokohọ na ababọ oke-oraha.
3 Eria nọ A re Wohọ: Ma te daoma vi efọmo Room Request buobu se ukoko kpobi. Okere-obe ukoko na ọ rẹ ruẹ nọ a rọ oma totọ kere eme nọ o gwọlọ kpobi fihọ efọmo ọ Room Request na taure a te ti vi ei vrẹ. WHO du kere unu ahwo nọ a gwọlọ iwou ỌVO HO, wọhọ “iwhowho-uvie 50,” evaọ oria nọ a re kere edẹ ahwo nana fihọ na. A rẹ roma totọ kere eme na fuafo jẹ jọ vevẹ. Iviena muẹrohọ nọ who kere eme kpobi nọ i kpomahọ odẹ, ikpe, ọzae hayo aye, jegbe sọ ohwo nọ ọ be yare uwou na yọ ọkobaro oke-kpobi hayo owhowho-uvie. Kere odẹ emaha na fihọ obe na re. Otẹrọnọ oria nọ a re kere eme fihọ evaọ efọmo na u gbe te he, kere fihọ ẹwẹ-obe ọfa kugbe re. Otẹrọnọ edẹ nọ a kere fihọ efọmo na e vrẹ ọvo, iviena dhesẹ usu hayo epanọ ahwo nọ a be yare uwou na a kpekpe te evaọ ofẹ obe na nọ a re kere eme yena fihọ na. Okere-obe ukoko na o re muẹrohọ inọ a kere eme na gbagba fihọ efọmo ọ Room Request na taure o te ti vi ei se ahwo Ẹko-Iruo Uwou okokohọ na. A re vi efọmo na evaọ ẹruoke taure okokohọ na o te ti te. IVIENA WHO VI efọmo ọ Room Request na se uwou ogha HA. Adrẹse okokohọ nọ o fo nọ a dhesẹ fihọ emu efọmo na a re vi ei kpohọ.
4 Kukpe kukpe, ma rẹ tuduhọ inievo na awọ re a rọwo-kugbe ahwo Ẹko-Iruo Uwou okokohọ na. Dede nọ ibuobu e be nya lele ọkpọvio nana, iyẹrẹ i gbe bi te omai obọ inọ ahwo jọ a be nya lele ekpọvio nana ha. Ma tudu họ ahwo kpobi awọ re a dhesẹ uyoyou kẹ okugbe inievo na ẹkwoma ọruẹrẹfihotọ ahwo Ẹko-Iruo Uwou na nọ a rẹ rọwo-kugbe o tẹ make rọnọ a fi owhẹ họ uwou nọ whọ hae gwọlọ họ. Nọ who te bi ru ọruẹrẹfihotọ uwou nọ who re wohọ, iviena rọ ẹkwoma ahwo Ẹko-Iruo Uwou na ru ọruẹrẹfihotọ na re ae ọvo a gwọlọ uwou kẹ owhẹ, ajokpanọ whọ te rria kugbe ogbẹnyusu hayo imoni ra. O tẹ make rrọ ere, u fo re whọ nọ mi ahwo Ẹko-Iruo Uwou na sọ a mi uwou yena kẹ amọfa no. Ofariẹ re, whọ dhẹ ahwo Ẹko-Iruo Uwou na uvremu re whọ nyae wha igho buobu kẹ ọnọ o wo ighẹ hayo ehọtẹle na ha, re a ruẹse ruẹrẹ uwou nọ o mai woma họ kẹ owhẹ. Ẹkwoma ahwo Ẹko-Iruo Uwou na nọ ma rẹ rọwo-kugbe, ma rẹ rawo igho kẹ inievo mai je dhesẹ nọ ma rrọ ahwo ẹmeoyo avọ okugbe.—Fil. 2:1-4; 1 Jọn 3:17; 1 Kọr. 10:24.
5 Ẹgwọlọ Obọdẹ: Ọruẹrẹfihotọ ọnana ọ rrọ kẹ ahwo nọ a gwọlọ uketha obọdẹ mi amọfa evaọ eruo eruẹrẹfihotọ rai kẹ okokohọ ọvo, maero ọruẹrẹfihotọ uwou. Ahwo nana a sae jẹ gwọlọ obufihọ evaọ idhere efa wọhọ epanọ iyero rai sa-sa e rrọ. Iwhowho-uvie hayo ekobaro nọ e rrọ emamọ oriruo ọvo, kugbe emọ rai nọ e rrọ kpatiẹ, enọ i wo ẹgwọlọ obọdẹ nọ Ogbẹgwae Iruo Ukoko na u kuenu kẹ họ enọ i te kẹ obufihọ evaọ ọruẹrẹfihotọ Ẹgwọlọ Obọdẹ na. Ukoko nọ ahwo na a no ze u re ru eruẹrẹfihotọ efa nọ a rẹ rọ rẹrote ahwo nọ a wo ẹgwọlọ obọdẹ, ukpenọ a re fi owha-iruo onana họ ogbẹgwae okokohọ na uzou. Pọl ukọ na ọ kareghẹhọ ukoko nọ o jọ Galesha re a “ru iruo ezi kẹ ahwo kpobi, onọ o mae ro kọ rọ kẹ otu nọ ọrọ ẹgba orọwọ na.” (Gal. 6:10) Ẹsejọhọ inievo-emezae gbe erọ emetẹ nọ e kpako no, enọ e be mọ, ọyewọ ọvo, hayo enọ e rrọ iruo odibọgba oke-kpobi na a te sae nya bru owhẹ ze nọ a gwọlọ obufihọ họ, rekọ o sae jọ nọ a wo ebẹbẹ jọ nọ o gwọlọ nọ a re fi kparobọ re a ruẹsi kpohọ okokohọ na. Kọ whọ sai “ru iruo ezi” kẹ ai jẹ kẹ ai uketha jọ? Ileleikristi nọ e rrọ imoni ahwo nana gbe ekpako ukoko a rẹ mai muẹrohọ iyero ahwo itieye na.
6 Otẹrọnọ owhowho-uvie ọ rehọ efọmo ọ Special Needs Room Request (efọmo Ẹgwọlọ Obọdẹ nọ a rẹ rọ yare iwou) rọ kẹ Ogbẹgwae Iruo Ukoko na, ogbẹgwae na o rẹ kiẹe riwi, avọ ekpọvio enana nọ a re ro ru iruo. A re roro kpahe iẹe sọ ae ọvo a sae rọ ẹro te ẹgwọlọ na. Otẹrọnọ Ẹko-Iruo Uwou na u wo enọ jọ kpahe ayare ẹgwọlọ obọdẹ jọ, a te nọ mi okere-obe ukoko na.
7 Uzẹme, Ẹko-Iruo Uwou na a te daoma re a gwọlọ iwou nọ i fo kẹ iwhowho-uvie nọ i wo ẹgwọlọ obọdẹ otẹrọnọ ahwo ukoko na a sai fiobọhọ kẹ ae he. Iwhowho-uvie enana a rẹ ta ẹbẹbẹ rai kẹ okere-obe ukoko na. Okere-obe na ọ vẹ t’ẹme na kugbe Ogbẹgwae Iruo Ukoko na re a ruẹ sọ o lọhọ kẹ ukoko na re u fiobọhọ kẹ ahwo nana re ae ọvo a rọ ẹro te araha iwou nọ a re wohọ. Otẹrọnọ ukoko na o gbẹ sae kẹ obufihọ nọ a gwọlọ họ, okere-obe na ọ sae rehọ obe ọ Room Request na rọkẹ ahwo otiọye na, onọ ọye omariẹ o re kere eme fihọ obehru ẹwẹ-obe ọsosuọ na nnọ, “SPECIAL NEEDS” (ẸGWỌLỌ OBỌDẸ). Ahwo nọ a wo ẹgwọlọ obọdẹ ọvo a re kere eme fihọ obe nana nọ a kpokahọ na. Ohwo nọ ọ gwọlọ uwou na o re kere eme fihọ iẹe. O re zihe iei bru okere-obe na, okere-obe na o ve rri rie sọ o gba ọ vẹ jẹ riẹ oware nọ o lẹliẹ ohwo na te kẹ ororokẹ otiọye na. Okere-obe na o re DHESẸ ẸBẸBẸ OHWO NA VEVẸ evaọ oria nọ a dhesẹ fihọ obeva efọmo na. A re ru onana evaọ ẹruoke taure oke okokohọ na u te ti te. Okere-obe na o ve vi efọmo na se Ẹko-Iruo Uwou na. A ti kere ileta se ohwo nọ ọ gwọlọ uwou na ovavo kpahe oria nọ o ti wohọ.
8 Orọnikọ ahwo nọ a wo ẹgwọlọ obọdẹ a re kpohọ okokohọ na a vẹ yare oria nọ a re wohọ nọ a te t’obei HI, keme Ẹko-Iruo Uwou na o rẹ gwọlọ yo mi Ogbẹgwae Iruo Ukoko na tao.
9 Ekpohọ Okokohọ Ọfa: Ẹsejọhọ iyero ra e sae gwọlọ nọ who kpohọ okokohọ ọfa viukpọ ọnọ a ghale ukoko ra fihọ. Whọ tẹ gwọlọ yare uwou nọ who re wohọ, iviena nya bru okere-obe ukoko ra re ọ k’owhẹ efọmo ọ Room Request na. Vi efọmo ayare ra na kpohọ adrẹse oria nọ whọ gwọlọ ro kpohọ okokohọ na. Otẹrọnọ a be jọ ẹwho yena ru okokohọ bu vrẹ ọvo, muẹrohọ nọ who kere ugogo ideti okokohọ nọ whọ gwọlọ nya na fihọ efọmo na.
10 Eva okokohọ ahwo Jihova jọ nọ a ru evaọ oware wọhọ ikpe 2,500 nọ i kpemu, Ẹzra avọ ibe ahwo Livai riẹ a se Ẹme Ọghẹnẹ je ru ei vẹ kẹ ogbotu nọ o kokohọ na. Eme o no rie ze? Nehemaya 8:12 o ta k’omai inọ “koyehọ ahwo na kpobi a tẹ nya vrẹ kpohọ ọvuọ oboriẹ . . . je wo oghọghọ ulogbo, fiki epanọ a riẹ otọ eme nọ a whowho kẹ ae na.” Kọ ma gbẹ kẹ uyere nnọ utu ọrigbo nọ a ro mu na, wọhọ Ẹzra avọ ahwo Livai, a be rehọ Ẹme Ọghẹnẹ ru iruo, ru ei vẹ, je dhesẹ epanọ ma sai ro fi iei họ iruo k’omai evaọ uzuazọ mai? Evaọ ere oruo, ọrigbo yena ọ be rọ aro kele uvi uyoyou gbe ọdawẹ nọ Jihova o wo kẹ ahwo Riẹ kpobi. Ru ei fihọ ute ra re ẹdẹ jọ ọrọ Okokohọ Ubrotọ “Nya Kugbe Ọghẹnẹ” na ọ se owhẹ ba evo!
[Box on page 3]
Oke Iprogramo
Edisoi-Oka
9:20 a.m. - 4:50 p.m.
Ẹdẹ-Ọmaha
9:00 a.m. - 4:30 p.m.
Ẹdoka
9:00 a.m. - 3:20 p.m.