Okokohọ Ubrotọ “Ẹmeoyo kẹ Ọghẹnẹ” ọrọ Isẹri Jihova—2005
1 Wọhọ Owuhrẹ Ologbo mai, Jihova Ọghẹnẹ o bi ru ọruẹrẹfihotọ nọ ma re ro kokohọ re o wuhrẹ omai idhere riẹ. (Aiz. 30:20, 21; 54:13) O bi ru onana ẹkwoma utu ọrigbo nọ o wo ẹrọwọ avọ areghẹ na, nọ u bi ru ọruẹrẹfihotọ omakugbe wọhọ ikoko ubrotọ ẹsiẹvo ẹgbukpe mai na. (Mat. 24:45-47) Iroro mai e wọhọ erọ Devidi ọso ilezi na, ọnọ ọ so nọ: “Eva udevie ogbotu na me je ti jiri Ọnowo.” (Ol. 26:12) Devidi o wo otoriẹ epanọ u wuzou te re Jihova o wuhrẹ ohwo, fikiere ọ tẹ gbae mu nọ o re ku oma gbe ahwo Riẹ eva oke kpobi nọ a kokohọ.
2 Kọ whọ te jọ “udevie ogbotu” nọ o ti ru Okokohọ Ubrotọ “Ẹmeoyo kẹ Ọghẹnẹ” evaọ ukpe nana? O tẹ rrọ ere, evuẹ obotọ na i ti fiobọhọ k’owhẹ evaọ oma nọ whọ rẹ ruẹrẹ kpahe re whọ jariẹ.
3 Ma Omaa Enẹna re Whọ Jariẹ Kẹdẹ Kẹdẹ: “Oma omamọ ohwo o rẹ rehọ ọruẹriọ tha.” (Itẹ 21:5) Kọ eme yena i gbe fi ẹgba họ epanọ u wuzou te re a ma omaa nọ a re ro kpohọ okokohọ na ababọ oke-oraha? Re whọ ruẹ nọ abọ ọvuọvo ọruẹrẹfihotọ emu abọ-ẹzi nọ ọ rẹ sasa oma na o vo owhẹ hẹ, jọ enẹna mu omaa ra họ ẹmaa re whọ jariẹ evaọ edẹ esa na kpobi. Otẹrọnọ whọ gwọlọ mi ọga iruo ra uvẹ nọ who re ro kpohọ okokohọ na, ru ere enẹna. Otẹrọnọ whọ gwọlọ jiroro omaa ra kugbe ọrivẹ orọo ra, whọ rawo abọ thomawa whọ tẹ vuẹe he. Use-abọ kpobi nọ whọ rẹriẹ ovao dhe kẹhẹ, fi ai họ olẹ kẹ Jihova, je fi eva họ inọ “o re ti ru ejiroro ra gba.” (Itẹ 16:3) Ofariẹ, u re woma re who fiobọhọ kẹ emọ-uwuhrẹ Ebaibol ra re a ruẹrẹ oma kpahe nọ a rẹ rọ jariẹ evaọ abọ kpobi.
4 Eria nọ A re Wohọ: Re u kiehọ owhẹ oma, a ti ru ọruẹrẹfihotọ oria nọ wha re wohọ evaọ ẹwho kpobi nọ a be jọ ru okokohọ. Evaọ eria okokohọ buobu, a rẹ kẹ ahwo iwou nọ a re wohọ evaọ ogege okokohọ na, o sae jọ iwou nọ a bọ nnọ ahwo a wohọ eva ubroke hayo enọ a bọ nọ ahwo a re wohọ ẹsikpobi. Ivie woi họ iroro inọ ukoko na o te sae bọ iwou nọ ahwo kpobi nọ a ziọ okokohọ a re wohọ họ. Ahwo nọ Ẹko-Iruo Uwou na a rọwo kẹ ọvo a rẹ wezẹ ogege okokohọ na. A te fi owhẹ họ oria ofa, whọ rẹ rọwo kugbe Ẹko-Iruo Uwou na, whọ vẹ jọ oria nọ a kẹ owhẹ nọ who wohọ na. Kareghẹhọ re inọ araha igho jọ ọ sae jariẹ evaọ ofa ẹnya gbe ezihe no okokohọ na ze kẹdẹ kẹdẹ. U wuzou gaga re who wo onana họ iroro nọ who bi koko ugho kẹ okokohọ na. Taure who te ti kere eme fihọ efọmo Room Request na, kiẹ eme nọ e rrọ ẹkpẹti na “Epanọ Whọ Sae rọ Tha Ọruẹrẹfihotọ Iwou na Uke” riwi. Who ve ru lele epanọ a kere fihọ ẹkpẹti na “Edhere vẹ Ọ Mai Woma nọ A rẹ rọ Yare Uwou nọ A re Wohọ?”
5 Ẹgwọlọ Obọdẹ: Pọl ukọ na o dhesẹ inievo jọ wọhọ “erọ omaosasọ” rọ kẹe. (Kọl. 4:7-11) Edhere jọ nọ a ro fiobọhọ kẹe họ ẹkwoma eware nọ Pọl ọ gwọlọ nọ a je ru kẹe. Ẹvẹ whọ sae rọ jọ obufihọ ọbọga kẹ amọfa evaọ etoke okokohọ na? Iwhowho-uvie nọ e kpako no, enọ oma o ga ha, enọ e rrọ iruo odibọgba oke-kpobi, gbe efa e sae gwọlọ obufihọ evaọ abọ ugho-ofa hayo epanọ a re ro te obei gbe oria nọ a re wohọ. Imoni ahwo nana họ enọ i wo ugogo owha-iruo nọ a rẹ rọ rehọ ẹro te ahwo otiọye. (1 Tim. 5:4) Rekọ otẹrọnọ a gbẹ sai ru ere he, ibe enọ e rọwo a sai fiobọhọ. (Jem. 1:27) Esẹro uwuhrẹ obe ukoko a rẹ jọ itu rai kiẹ ahwo nọ a gwọlọ obọdẹ obufihọ riwi re a ruẹse ma omaa kpahotọ ziezi taure oke okokohọ na u te ti te.
6 Ọruẹrẹfihotọ ẹgwọlọ obọdẹ na ọ rrọ rọkẹ ahwo nọ a gwọlọ obufihọ obọdẹ mi amọfa evaọ omaa okokohọ rai, maero kọ ọruẹrẹfihotọ eria nọ a re wohọ. A sae jẹ gwọlọ obufihọ evaọ idhere efa, wọhọ epanọ iyero rai omomọvo e rrọ. Iwhowho-uvie gbe ekobaro nọ e rrọ emamọ oriruo avọ emọ rai nọ i wo emamọ uruemu, nọ e gwọlọ obufihọ obọdẹ yọ Ogbẹgwae Iruo Ukoko na o rọwo kẹ ai no ọvo họ enọ i te kẹ obufihọ evaọ otọ ọruẹrẹfihotọ Ẹgwọlọ Obọdẹ na. Ukoko nọ ohwo nọ o wo ẹgwọlọ obọdẹ na ọ be jọ kpohọ ewuhrẹ u re ru eruẹrẹfihotọ efa nọ a rẹ rọ rehọ ẹro te ohwo na, orọnikọ a rẹ wọ owha-iruo nana họ uzou ahwo nọ a be rọ ẹro te okokohọ na ha.
7 Ekpohọ Okokohọ Ọfa: Re a ruẹ nọ oria ẹkeria, ebe, iwou nọ a re wohọ, gbe eware efa i te ziezi, ma tuduhọ iwhowho-uvie awọ re a kpohọ okokohọ nọ a ghale ukoko rai fihọ. Otẹrọnọ iyero jọ e gb’owhẹ họ nnọ who re kpohọ okokohọ ọfa, yọ whọ gwọlọ ru ayare uwou nọ who re wohọ, ivie ta kẹ okere-obe ukoko rai re ọ kowhẹ efọmo ọ Room Request. Vi efọmo ayare ra na kpohọ ugogo oria nọ whọ gwọlọ ro kpohọ okokohọ na. Otẹrọnọ a be jọ ẹwho yena ru okokohọ bu vrẹ ọvo, muẹrohọ nọ who kere ugogo ideti okokohọ nọ whọ gwọlọ nya na fihọ efọmo na.
8 Ma Gwọlọ Ahwo Unevaze: Jesu o fi oriruo ọgbagba hotọ eva oma nọ a re ro kpotọ ru ẹgwọlọ amọfa kẹ ae. (Luk 9:12-17; Jọn 13:5, 14-16) Enọ e rẹ fialoma ze re a ruiruo eva ikokohọ a bi dhesẹ oghẹrẹ ẹzi yena. Re a sai ru ẹgwọlọ eko-iruo sa-sa okokohọ gba, ogbẹgwae iruo okokohọ obonẹ o te hai zizie amọfa re a ku oma gbe ai ruiruo. Ekpako na ẹgwọlọ ọ mae rrọ kẹ re a fialoma via, jẹ rehọ iruo nọ a re ru. Ẹzi unevaze rai ọ rẹ jọ emamọ oriruo kẹ ahwo kpobi eva ukoko na.—1 Pita 5:2, 3.
9 Eware nọ Amọfa A re Muẹrohọ: Aye jọ nọ o wuzou abọ nọ a rẹ jọ zẹ eware evaọ ehọtẹle jọ ọ ta nọ: “Whai họ ahwo nọ a mae were omai. Wha wo emamọ uruemu nọ u wo ohẹriẹ no egagọ efa kpobi. Eyae na kpobi nọ e rẹ rọ ẹro te iwou na e ta kpahe epanọ ahwo rai a bi dhesẹ ovuhumuo rai kẹ iruo nọ a bi ru na. Ahwo kpobi a rẹ gwọlọ ruiruo eva urere-oka nọ wha rọ kpahe etenẹ!” Ọzae ọfa jọ nọ ọ rrọ ehọtẹle ruiruo ọ ta nọ: “Isẹri Jihova họ utu ahwo nọ a mae lọhọ obọ nọ ohwo ọ rẹ sai ruiruo kugbe.” Ẹsejọhọ uruemu uwoma ra o zọhọ fihọ eme nana nọ ahwo na a ta na. Whọ jai roro epanọ eva e rẹ were Jihova te nọ ọ tẹ ruẹ omai nọ ma bi ru eware eva edhere nọ ọ rẹ wha orro utioye sei!—1 Pita 2:12.
10 Ẹkwoma “odibo oruọzewọ” na, Jihova o ru ọruẹrẹfihotọ kẹ ahwo riẹ no re a kokohọ kẹ ithubro evaọ ukpe nana. (Luk 12:42) Oma nọ a rẹ ruẹrẹ kpahe re a jariẹ evaọ edẹ esa na kpobi o te gwọlọ omodawọ, yọ omodawọ na u gine fo. Okokohọ Ubrotọ “Ẹmeoyo kẹ Ọghẹnẹ” ọrọ ukpe nana o te bọ ọtamuo mai ga nọ ma rọ gwọlọ gọ Jihova enẹna gbe bẹdẹ bẹdẹ. Joma gbae mu re ma nya lele uthubro ọso-ilezi na: “Oghale u te Ọghẹnẹ eva ogbotu na.”—Ol. 68:26.
[Box on page 3]
Oke Iprogramo
Edisoi-Oka gbe Ẹdẹ-Ọmaha
9:20 a.m. - 4:50 p.m.
Ẹdoka
9:00 a.m. - 3:20 p.m.
[Box on page 4]
Epanọ Whọ Sae rọ Tha Ọruẹrẹfihotọ Iwou na Uke
◼ Rehọ uwou nọ Ẹko-Iruo Uwou na o kowhẹ. Who wohọ iwou nọ a bọ fihọ ogege na ha otẹrọnọ Ẹko-Iruo Uwou na o rehọ etẹe k’owhẹ hẹ. Who ru re ahwo a rria kugbe owhẹ bu vi unu nọ a jọ oria na gwọlọ họ.
◼ Whọ nya ruọ eria nọ a kuvẹ riẹ kẹ erara ha evaọ uwou nọ who wohọ na ha. Whọ jọ eria nọ a kuvẹ riẹ hẹ there emu hu.
◼ A re vi Efọmo Room Request na se Ẹko-Iruo Uwou na ẹruoke taure okokohọ na o te ti te. Onana o rẹ lẹliẹ Ẹko-Iruo Uwou na gwọlọ uwou nọ u kiehọ k’owhẹ.
◼ A rẹ roma totọ kere evuẹ efọmo Room Request na gbagba, e vẹ jẹ jọ vevẹ.
[Box on page 4]
Edhere vẹ Ọ Mai Woma nọ A rẹ rọ Yare Uwou nọ A re Wohọ?
1. Mi okere-obe ukoko ra efọmo Room Request na.
2. Kere eme fihọ efọmo Room Request na evaọ ẹruoke. Ivie muẹrohọ nọ whọ kẹ evuẹ egbagba kpahe odẹ, ikpe, sọ ohwo na ọzae hayo aye, jegbe sọ ohwo nọ ọ be yare uwou na yọ ọkobaro oke-kpobi hayo owhowho-uvie.
3. Okere-obe ukoko na ọ rẹ kiẹ efọmo Room Request na riwi, whobọ họ iẹe, o ve vi ei kpohọ oria okokohọ na, ORỌNIKỌ OBỌ UWOU OGHA HA. Oware nọ onana o jẹ rrọ ere họ efọmo na ọ sae kaki te oria okokohọ na ha otẹrọnọ ẹkwoma uwou ogha a ro vi ei kpohọ oria okokohọ na. Wọhọ oriruo, ẹsejọ inievo na i re vi efọmo no Eko ze se uwou ogha re uwou ogha o wariẹ vi efọmo na zihe kpobọ Eko. O he mae lọhọ jẹ vẹrẹ re a vi efọmo itieye na se ugogo ọgwa okokohọ nọ ohwo na o wo họ iroro eva Eko viukpenọ a re vi ei ẹkwoma uwou ogha.
4. Whọ wha igho kẹ ohwo nọ o wo uwou bu vrẹ unu nọ Ẹko-Iruo Uwou na o wha ha re uwou na o ruẹsi t’owhẹ obọ.
5. Nọ who te bi ru ọruẹrẹfihotọ oria nọ who re wohọ kẹ omobọ ra, iviena jẹ Ẹko-Iruo Uwou na riẹ re a siọ uwou ovo yena ba ẹrehọ.