Okokohọ Ubrotọ “Esiwo Ọ Kẹlino!” Ọrọ Isẹri Jihova—2006
1 Hẹzikaya Ovie Juda anwae ọ rehọ enyukọ ro vi ileta nọ o ro zizie ahwo na re a kokohọ kugbe evaọ Jerusalẹm. (2 Irv. 30:6, 13) Owọ nọ ahwo na a jẹ kpahe uzizie na u dhesẹ uruemu rai kpahe egagọ uzẹme. (2 Irv. 30:10-12) Evaọ emerae jọ nọ e be tha na, idibo Jihova nẹnẹ a ti wo obọ uvẹ utioye nọ a re ro dhesẹ ovuhumuo rai nọ o no udu ze rọkẹ uvẹ-ọghọ orọ ekokohọ kugbe re a gọ Jihova. A vi ileta se ukoko rai no bi ro zizie owhai kpohọ Okokohọ Ubrotọ “Esiwo Ọ Kẹlino!” na. Didi owọ whọ te jẹ kpahe uzizie na?
2 Ruẹrẹ Oma Kpahe Enẹna: Re ma wo erere vọvọ rono ọruẹrẹfihotọ abọ-ẹzi nọ a nabe ruẹrẹ họ ziezi na ze, u fo nọ ma rẹ jariẹ evaọ etoke ọruẹrẹfihotọ na kpobi. Jọ enẹna mu oware nọ o gwọlọ mi owhẹ avọ uviuwou ra họ ẹruẹrẹ kpahe re wha jariẹ evaọ edẹ esa na kpobi. (Itẹ 21:5) Omaruẹrẹkpahe utioye na o sae kẹre te uvẹ nọ who re mi ọga iruo ra, omaa ra nọ whọ rẹ rọ jiroro kugbe ọrivẹ-orọo ra nọ ọ rrọ ukoko ho, ọruẹrẹfihotọ kẹ uwou nọ wha ti wohọ, gbe obọ nọ who re fihọ kẹ emọ-uwuhrẹ Ebaibol ra re a jariẹ evaọ edẹ esa na kpobi. Whọ hẹrẹ bẹsenọ oke u re re no who te ru eware nana nọ i wuzou na ha. Ukpoye, lẹ se Jihova kpahe ẹme na, avọ evaifihọ inọ “o ti ru gba kẹ owhẹ.”—Ol. 37:5.
3 Ukoko Jihova o daoma gaga no re a ruẹ nọ iwou nọ i re te ahwo wohọ e riẹ evaọ ẹwho okokohọ kpobi. Ovuhumuo nọ ma re wo kẹ omodawọ inievo nọ i bi ruiruo gaga ro fiobọhọ evaọ eru eruẹrẹfihotọ nana, ororokẹ nọ ma re wo kẹ amọfa nọ a ziọ okokohọ na, gbe adhẹẹ rọkẹ ọruẹrẹfihotọ ukoko na o rẹ w’omai nya lele ekpọvio nọ e rrọ uzoẹme nana.—1 Kọr. 13:5; 1 Tẹs. 5:12, 13; Hib. 13:17.
4 Eria nọ A re Wohọ: Re u kiehọ owhẹ oma, a ti ru ọruẹrẹfihotọ oria nọ a re wohọ evaọ ẹwho kpobi nọ a be jọ ru okokohọ. Evaọ eria okokohọ buobu, a rẹ kẹ ahwo iwou nọ a re wohọ evaọ ogege okokohọ na, o sae jọ iwou nọ a bọ nnọ ahwo a wohọ eva ubroke hayo enọ a bọ nọ ahwo a re wohọ ẹsikpobi. Iviena woi họ iroro inọ ukoko na o te sae bọ iwou nọ ahwo kpobi nọ a ziọ okokohọ a re wohọ họ. Ahwo nọ Ẹko-Iruo Uwou na a rọwo kẹ ọvo a rẹ wezẹ ogege okokohọ na. Dede na, fiki unuigho buobu nọ o gwọlọ nọ a rẹ rọ rẹrote iwou nana, a tuduhọ ahwo nọ a fihọ iwou nọ e rrọ ogege okokohọ na awọ re a ru unevaze ugho kẹ iwou nọ a wohọ na. A te fi owhẹ họ oria ofa, whọ rẹ rọwo kugbe Ẹko-Iruo Uwou na, whọ vẹ jọ oria nọ a kẹ owhẹ nọ who wohọ na. Kareghẹhọ re inọ o sae gwọlọ araha igho evaọ ofa ẹnya gbe ezihe no okokohọ na ze kẹdẹ kẹdẹ. U te je fo re ma ru unevaze kẹ iruo akpọ-soso na. Fikiere, u wuzou gaga re who wo onana họ iroro nọ who bi koko ugho họ kẹ okokohọ na. (1 Kọr. 16:1-4; 2 Kọr. 9:7) Taure who te ti kere eme fihọ efọmo Room Request na, kiẹ eme nọ e rrọ ẹkpẹti na “Epanọ A rẹ rọ Yare Uwou nọ A re Wohọ.”
5 Ẹgwọlọ Obọdẹ: Itẹ 3:27 o ta nọ: “Whọ se ewoma ba e ru kẹ enọ u te he, okenọ who wo ogaga nọ who re ro ru ei.” Ẹvẹ whọ sai ro ru ewoma kẹ amọfa eva etoke okokohọ na? Iwhowho-uvie nọ e kpako no, enọ oma o ga ha, enọ e rrọ iruo odibọgba oke-kpobi, gbe efa e sae gwọlọ obufihọ evaọ abọ ugho-ofa hayo epanọ a re ro te obei gbe oria nọ a re wohọ. Imoni ahwo nana họ enọ i wo ugogo owha-iruo nọ a rẹ rọ rehọ ẹro te ahwo otiọye. (1 Tim. 5:4) Rekọ otẹrọnọ a gbẹ sai ru ere he, ibe Ileleikristi a sai fiobọhọ. (Gal. 6:10) Esẹro uwuhrẹ obe-ukoko a rẹ jọ itu rai mu ẹro họ ahwo nọ a gwọlọ obufihọ obọdẹ re a ruẹse ma omaa kpahotọ ziezi taure oke okokohọ na u te ti te.
6 Ahwo nọ a re kere eme fihọ abọ Special Needs ọrọ Room Request Form na họ iwhowho-uvie nọ ahwo uviuwou rai hayo ukoko rai a sae rẹrote ẹgwọlọ eria nọ a re wohọ ha ọvo. Ogbẹgwae Iruo Ukoko na o rẹ rehọ ekpọvio nọ e rrọ efọmo na ro rri edikihẹ owhowho-uvie na. Ọruẹrẹfihotọ nana ọ rrọ rọkẹ iwhowho-uvie nọ i wo emamọ edikihẹ ọvo, gbe emọ rai nọ i wo emamọ uruemu.
7 Ekpohọ Okokohọ Ọfa: Re a ruẹ nọ oria ẹkeria, ebe, iwou nọ a re wohọ, gbe eware efa i te ziezi, ma tuduhọ iwhowho-uvie awọ re a kpohọ okokohọ nọ a ghale ukoko rai fihọ. Otẹrọnọ iyero jọ e gb’owhẹ họ nnọ who re kpohọ okokohọ ọfa, ivie nọ mi okere-obe ukoko kpahe adrẹse nọ who re ro kere se okokohọ nọ whọ te nya, onọ a kere fihọ obọ uke Room Request Form na. Otẹrọnọ a be jọ ẹwho yena ru okokohọ bu vrẹ ọvo, muẹrohọ nọ who kere ugogo ideti okokohọ nọ whọ gwọlọ nya na fihọ efọmo na.
8 Ma Gwọlọ Ahwo Unevaze: Avro ọ riẹ hẹ inọ oghọghọ o rẹ jọ kẹ ahwo kpobi nọ a kpohọ okokohọ na je wo erere no emu abọ-ẹzi gbe uvẹ omakugbe ọbọga na ze. Evawere mai e te rro viere otẹrọnọ ma fialoma via re ma fiobọhọ ru iruo nọ o gwọlọ nọ a re ru hrọ re okokohọ na ọ nya dẹdẹ. (Iruẹru 20:35) Uviemenẹ Ogbẹgwae Okokohọ oborai a ti mu amọfa họ ezizie re a fiobọhọ evaọ iruo nana. Kọ whọ sae fialoma via?—Ol. 110:3.
9 Nọ a kpohọ okokohọ ubrotọ, ọmọzae ikpe-isoi jọ ọ ta nọ: “Okokohọ ubrotọ na họ abọ nọ ọ mae were omẹ eva egagọ Jihova.” Ẹme yena nọ o no udu ze na u fiobọhọ k’omai kpobi ruẹ epanọ ma bi wo omawere ikokohọ ubrotọ mai te. O nwane wọhọ epanọ ọso-ilezi na ọ so: “Ẹdẹ ọvo eva ọgua ra o woma vi eno ivẹ gbe abọ eva oria ofa.” (Ol. 84:10) Devidi ọ rehọ ole ta isiuru riẹ nọ ọ rọ gwọlọ ‘jọ uwou ỌNOWO na bẹdẹ nọ o re whuẹ re o riwi eru uwou egagọ-ode ỌNOWO na.’ (Ol. 27:4) Eva e were Devidi gaga inọ ọ rrọ usu enọ e be gọ Jihova. Joma rehọ aro kele ovuhumuo riẹ kẹ egagọ uzẹme ẹkwoma ekpohọ Okokohọ Ubrotọ “Esiwo Ọ Kẹlino!” na evaọ edẹ esa na kpobi.
[Study Questions]
1. Ẹvẹ ahwo Ọghẹnẹ evaọ oke anwae a ro dhesẹ ovuhumuo rai kẹ egagọ uzẹme, kọ obọ uvẹ utioye na vẹ ma wo nẹnẹ?
2. Eme ma rẹ sai ru enẹna re ma sai wo erere vọvọ no okokohọ na ze?
3. Fikieme ma jẹ rọ oma totọ nya lele eruẹrẹfihotọ nọ a ru kẹ eria nọ ma re wohọ?
4. Igogo eware vẹ ma re wo họ iroro nọ ma tẹ be yare uwou nọ ma ti wohọ, kọ fikieme? (Ku ẹkpẹti nọ ọ rrọ ẹwẹ-obe avọ 4 na kugbei.)
5, 6. Ẹvẹ a sae rọ rehọ ẹro te ahwo nọ a wo ẹgwọlọ obọdẹ?
7. (a) Fikieme u ro fo re ma kpohọ okokohọ nọ a ghale omai fihọ? (b) Owọ vẹ u fo nọ whọ jẹ otẹrọnọ eware e gb’owhẹ họ nọ who kpohọ okokohọ ọfa?
8. Edhere jọ vẹ ma sai ro fiba evawere nọ e rẹ jọ okokohọ nọ ọ be tha na?
9. Eme ọ jọ okokohọ ologbo nọ ma re ru kukpe kukpe na were owhẹ, kọ eme u fo nọ o rẹ jọ ọtamuo ra?
[Box on page 3]
Oke Iprogramo
Edisoi-Oka 9:20 a.m. - 4:55 p.m.
Ẹdẹ-Ọmaha 9:00 a.m. - 4:05 p.m.
Ẹdoka 9:00 a.m. - 3:40 p.m.
[Box on page 4]
Epanọ A rẹ rọ Yare Uwou nọ A re Wohọ
1. Mi okere-obe ukoko ra Room Request Form na.
2. Kere eme fihọ Room Request Form na evaọ ẹruoke. Ivie muẹrohọ nọ whọ kẹ evuẹ egbagba kpahe odẹ, ikpe, sọ ohwo na ọzae hayo aye, jegbe sọ ohwo nọ ọ be yare uwou na yọ ọkobaro oke-kpobi hayo owhowho-uvie.
3. Okere-obe ukoko na ọ rẹ kiẹ Room Request Form na riwi, whobọ họ iẹe, o ve vi ei kpohọ oria okokohọ na, ORỌNIKỌ OBỌ UWOU OGHA HA. Oware nọ onana o jẹ rrọ ere họ ẹsejọhọ efọmo na ọ te kaki te oria okokohọ na ha otẹrọnọ ẹkwoma uwou ogha a ro vi ei kpohọ oria okokohọ na.
4. Whọ wha igho kẹ ohwo nọ o wo uwou bu vrẹ unu nọ Ẹko-Iruo Uwou na o wha ha re uwou na o ruẹsi t’owhẹ obọ.
5. Nọ who te bi ru ọruẹrẹfihotọ oria nọ who re wohọ kẹ omobọ ra, iviena nọ mi Ẹko-Iruo Uwou na re whọ siọ uwou ovona ba ẹrehọ.
Iviena
◼ Rehọ uwou nọ Ẹko-Iruo Uwou na o k’owhẹ. Who wohọ iwou nọ a bọ fihọ ogege na ha otẹrọnọ Ẹko-Iruo Uwou na o rehọ etẹe k’owhẹ hẹ. Who ku ahwo gb’oma bu vi unu nọ a kuvẹ riẹ evaọ oria na ha.
◼ Whọ nya ruọ eria nọ a kuvẹ riẹ kẹ erara ha evaọ uwou nọ who wohọ na ha. Whọ jọ eria nọ a kuvẹ riẹ hẹ there emu hu.
◼ A re vi Room Request Form na se Ẹko-Iruo Uwou na ẹruoke taure okokohọ na o te ti te. Onana o rẹ lẹliẹ Ẹko-Iruo Uwou na gwọlọ uwou nọ u re kiehọ k’owhẹ.
◼ A rẹ roma totọ kere evuẹ Room Request Form na gbagba, e vẹ jẹ jọ vevẹ.