Okokohọ Ubrotọ “Lele Kristi!” ọrọ Isẹri Jihova—2007
1, 2. (a) Ẹvẹ Mosis ọ rọ tuduhọ ahwo Izrẹl awọ re a wo erere no ekokohọ kugbe ze? (b) Ẹvẹ ma rẹ sai ro mu oma họ ẹruẹrẹ kpahe enẹna?
1 Mosis ọ vuẹ ahwo Izrẹl gbe erara nọ e rrọ ẹwho na kpobi re a kokohọ evaọ ukpe avọ ihrẹ kpobi re a se Uzi na kẹ ae. Fiki ẹjiroro vẹ? “Re a yo je wuhrẹ.” (Izie. 31:10-12) Jihova ọ ruẹ nọ u fo re ahwo riẹ a hai kuomagbe. Kẹle na ahwo Jihova a te wariẹ kokohọ edẹ esa kẹ Okokohọ Ubrotọ “Lele Kristi!”
2 Kọ who mu oma họ ẹruẹrẹkpahe no? Kọ o gwọlọ nọ who re mi ọga iruo ra uvẹ? Kọ who mu ugho họ ekoko fihọ no nọ whẹ avọ uviuwou ra a sae rọ nya edẹ esa okokohọ na gba? Kọ whọ sai fiobọhọ kẹ emọ-uwuhrẹ Ebaibol ra hayo ahwo uviuwou ra nọ a rrọ ukoko ho re a lele owhẹ kpohọ okokohọ na? Kọ ahwo jọ a rrọ ukoko na nọ a gwọlọ obufihọ re a sai kpohọ okokohọ na? Kọ who wo omaa inọ who ti kpohọ okokohọ ọfa nọ a ghale ukoko ra fihọ họ? Kọ whọ te gwọlọ uwou nọ who re wohọ? Evuẹ nọ e rrọ obotọ na i ti fi obọ họ kẹ owhẹ ruẹrẹ oma kpahe.
3. (a) Ẹvẹ obe Aizaya 25:6 u bi ro rugba nẹnẹ? (b) Eme a muẹrohọ no nọ o be hae via kpahe unu-ahwo nọ a rẹ jariẹ evaọ Edisoi-Oka, kọ eme u fo nọ mai omomọvo o ru?
3 Jariẹ Edẹ Esa na Kpobi: Jihova ọ be rehọ emu abọ-ẹzi buobu kẹ ahwo riẹ. (Aiz. 25:6) Emu abọ-ẹzi nọ a be kẹ omai eva ikokohọ ẹgbukpe mai na yọ abọjọ onana. Rekọ, ma muẹrohọ no inọ unu-ahwo nọ a be hae jariẹ evaọ Edisoi-Oka a be kawo vi ahwo nọ e rẹ jariẹ evaọ Ẹdẹ-Ọmaha gbe Ẹdoka. Jọ o jọ ute ra re whọ jariẹ evaọ edẹ esa okokohọ na kpobi nọ ukoko Jihova o ruẹrẹ họ kẹ omai na! Otẹrọnọ o gwọlọ nọ who re mi ọga iruo ra uvẹ, lẹ se Jihova kpahe iẹe. Kẹsena nọ a tẹ nwani woro ideti okokohọ rai no, gbaudu ta kẹ ọga iruo ra kpahe iẹe. (1 Tẹs. 2:2; Neh. 2:4, 5) O rẹ sai fi obọ họ nọ who te ru ei vẹ kẹ ọga iruo ra inọ okokohọ ẹgbukpe na yọ abọjọ egagọ ra. Nọ whọ tẹ kake vuẹ ọga iruo ra ẹdẹ na, o rẹ sai ru ei lọhọ kẹe ru inwene nọ ọ jẹ sai siobọno owhẹ kpohọ okokohọ na.
4. Ẹvẹ ma sae rọ ruẹrẹ emọ-uwuhrẹ Ebaibol mai gbe ahwo uviuwou mai nọ a rrọ ukoko ho kpahe kẹ okokohọ na?
4 Ruẹrẹ Emọ-Uwuhrẹ Ebaibol Ra gbe Uviuwou Ra Kpahe: Dai roro epanọ o rẹ kẹ evawere te nọ emọ-uwuhrẹ Ebaibol ra a te lele owhẹ rrọ okokohọ na, nọ a be rọ ẹro rai ruẹ okugbe-inievo Ileleikristi ọruọruọ mai “eva udevie ogbotu” na! (Ol. 22:25) Kake vuẹ ai re a sae ruẹrẹ oma kpahe. Vuẹ ai eware nọ e rẹ mae lẹliẹ ekpohọ ikokohọ si owhẹ urru. Whọ sai dhesẹ eware nọ a re rẹro rai evaọ okokohọ na kẹ ai ẹkwoma ividio nọ a jo dhesẹ ikokohọ jọ nọ a ru vrẹ no, maero ividio nọ uzoẹme riẹ o rrọ United by Divine Teaching. Jọ ahwo uviuwou ra nọ a rrọ ukoko ho riẹ inọ whọ gwọlọ kpohọ okokohọ. Ẹsejọhọ a sai lele owhẹ kpohọ okokohọ na o tẹ kawo ẹdẹ ọvo jọ hayo nyaze ti rri edrama na.
5, 6. (a) Ẹvẹ ma sai ro dhesẹ ẹzi ọghọruo nọ a tẹme te eva 1 Timoti 6:18? (b) Didi ọruẹrẹfihotọ a ru no re a fiobọhọ kẹ ahwo nọ a gwọlọ iwou nọ a re wohọ?
5 Fiobọhọ kẹ Inievo Ra: Pọl ukọ na ọ hrẹ Ileleikristi nọ i fe evaọ oke riẹ inọ “a he ru ewoma re a fe eva iruo iwoma, eva efuafo avọ ọghọ-oruo.” (1 Tim. 6:17, 18) Ma sai dhesẹ ẹzi ọghoruo nọ Pọl ọ tudu riẹ họ ahwo awọ na otẹrọnọ ma re roro te uyero otu nọ e kpako no gbe enọ oma o ga ha, enọ e rrọ iruo odibọgba oke-kpobi, iviuwou ọyewọ-ọvo, gbe amọfa nọ a gwọlọ obufihọ re a sai kpohọ okokohọ na. Imoni ahwo otiọye na nọ e rrọ ukoko na họ enọ i wo ugogo owha-iruo na rekọ ekpako ukoko gbe amọfa a sai muẹrohotọ je fi obọ họ wọhọ epanọ u fo.—Gal. 6:10; 1 Tim. 5:4.
6 Otẹrọnọ ohwo jọ evaọ ukoko na ọ gwọlọ obufihọ evaọ ewo uwou nọ o re wohọ, Ogbẹgwae Iruo Ukoko na o rẹ jiroro sọ owhowho-uvie na o te ohwo nọ ọ rẹ rehọ efọmo ọ Special Needs Room Request rọ yare uwou.
7. Didi ekpọvio a kẹ otẹrọnọ o gb’omai họ nọ ma re kpohọ okokohọ ọfa nọ a ghale ukoko mai fihọ họ?
7 Ekpohọ Okokohọ Ọfa: Uyero ra o sae gb’owhẹ họ nọ who kpohọ okokohọ ọfa viukpọ onọ a ghale ukoko ra fihọ. Otẹrọnọ whọ gwọlọ yare uwou nọ who ti wohọ, iviena nyabru okere-obe ukoko ra, ọ te k’owhẹ efọmo Room Request jọ. Who te kere ayare ra fihọ iẹe no who ve vi ei kpohọ ugogo oria okokohọ na. Otẹrọnọ a be jọ ẹwho yena ru okokohọ bu vrẹ ọvo, muẹrohọ nọ who kere ugogo ideti okokohọ nọ whọ gwọlọ nya na fihọ efọmo na.
8. Igogo eware vẹ ma re wo họ iroro nọ ma tẹ be yare uwou nọ ma re wohọ, kọ fikieme? (Ku ẹkpẹti nọ ọ rrọ ẹwẹ-obe avọ 4 na kugbei.)
8 Eria nọ A re Wohọ: Re u kiehọ owhẹ oma, a ti ru ọruẹrẹfihotọ oria nọ a re wohọ evaọ ẹwho kpobi nọ a be jọ ru okokohọ. Evaọ eria ikokohọ jọ, a rẹ kẹ ahwo iwou nọ a re wohọ evaọ ogege okokohọ na. Iviena woi họ iroro inọ ukoko na o te sae bọ iwou nọ ahwo kpobi nọ a ziọ okokohọ a re wohọ họ. Ahwo nọ Ẹko-Iruo Uwou na a rọwo kẹ ọvo a rẹ wezẹ ogege okokohọ na. A te fi owhẹ họ oria ofa, whọ rẹ rọwo kugbe Ẹko-Iruo Uwou na, whọ vẹ jọ oria nọ a kẹ owhẹ nọ who wohọ na. Kareghẹhọ re inọ o sae gwọlọ ugho nọ whọ rẹ rọ f’ofa kpohọ oria okokohọ na je ziheze kẹdẹ kẹdẹ. U te je fo re ma ru unevaze kẹ iruo akpọ-soso na. Fikiere, u wuzou gaga re who wo enana họ iroro nọ who bi koko ugho họ kẹ okokohọ na. (1 Kọr. 16:1-4; 2 Kọr. 9:7) Taure who te ti kere eme fihọ efọmo Room Request na, kiẹ eme nọ e rrọ ẹkpẹti na “Epanọ A rẹ rọ Yare Uwou nọ A re Wohọ.”
9, 10. (a) Eme a rẹ ruẹrẹ kpahe no k’omai taure ma te ti te ọgwa okokohọ na? (b) Ẹvẹ ma sai ro dhesẹ nọ iruo nọ a ru fiki mai na e d’omai ẹro? (Se Ahwo Hibru 13:17.)
9 Ru Lele Ọruẹrẹfihotọ Na: Nọ ma te te ogege okokohọ na, o rẹ jọ vevẹ inọ a ru iruo gaga rọ ruẹrẹ oria na kpahe kẹ ẹnyaze mai. Inievo iyoyou nọ i bi ru iruo eruẹrẹahwohọ i re yere omai, ghale iprogramo kẹ omai, je fiobọhọ kẹ omai gwọlọ oria ẹkeria. Inievo-emezae gbe erọ emetẹ a ru oria kpobi fihọ fuafo. Ẹruẹrẹhọ eme nọ a te jọ okokohọ na ta, ẹyare iwou nọ ahwo a re wohọ, gbe eware efa buobu e rehọ iruo ilogbo re.
10 Re a sai ru okokohọ ọvuọvo, inievo sa-sa a re ruiruo emera buobu re a ru eruẹrẹfihotọ nọ i fo, yọ iviuwou rai a zọhọ fihọ onana re ẹkwoma uvẹ nọ a kẹ rai re a rẹrote iruo itieye nọ i wuzou na. Kọ iruo egaga nọ inievo enana a ru fiki mai na e gbẹ da omai ẹro? Ma rẹ sai dhesẹ nọ iruo na e da omai ẹro ẹkwoma ẹnya lele ithubro nọ a kẹ evaọ uzoẹme nana gbe ekpọvio efa nọ a te kẹ omai taure okokohọ mai o te ti te. (Hib. 13:17) Ohwo kpobi o te yoẹme no eva ze u re ru ei nọ eware kpobi e jẹ nya “ziezi” lele ọruẹrẹfihọ.—1 Kọr. 14:40.
11. (a) Eme ọ soriẹ nọ ikokohọ ahwo Jihova i je wuzou gaga evaọ oke mai na? (b) Eme mai omomọvo ọ rẹ sai ru enẹna?
11 Enẹna ekokohọ ahwo Ọghẹnẹ ọ mai wuzou nọ ma “riẹ nọ ẹdẹ na ọ kẹlino” na. (Hib. 10:25) Eva ikokohọ Ileleikristi mai, odibo nọ o wo ẹrọwọ avọ areghẹ na ọ rẹ kẹ ithubro nọ i re fiobọhọ kẹ omai ‘yọrọ oma epanọ ma re ro ru lele eme’ Jihova nọ ọ gwọlọ nọ ma lele. (Izie. 31:12) Mu oma họ ẹruẹrẹkpahe enẹna re who kpohọ edẹ esa ọrọ Okokohọ Ubrotọ “Lele Kristi” na re whọ ruẹsi wo erere no ithubro abọ-ẹzi gbe omakugbe osasa na ze!
[Box on page 3]
Oke Iprogramo
Edisoi-Oka 9:00 a.m. - 4:35 p.m.
Ẹdẹ-Ọmaha 9:00 a.m. - 4:35 p.m.
Ẹdoka 9:00 a.m. - 3:40 p.m.
[Box on page 4]
Epanọ A rẹ rọ Yare Uwou nọ A re Wohọ
1. Mi okere-obe ukoko ra efọmo Room Request na.
2. Kere eme fihọ efọmo Room Request na evaọ ẹruoke. Ivie muẹrohọ nọ whọ kẹ evuẹ egbagba kpahe odẹ, ikpe, sọ ohwo na ọzae hayo aye, jegbe sọ ohwo nọ ọ be yare uwou na yọ ọkobaro oke-kpobi hayo owhowho-uvie. A rẹ roma totọ kere evuẹ Room Request Form na gbagba, e vẹ jẹ jọ vevẹ.
3. Okere-obe ukoko na ọ rẹ kiẹ efọmo Room Request na riwi, whobọ họ iẹe, o ve vi ei kpohọ oria okokohọ na, ORỌNIKỌ OBỌ UWOU OGHA HA. Oware nọ onana o jẹ rrọ ere họ ẹsejọhọ efọmo na ọ te kaki te oria okokohọ na ha otẹrọnọ ẹkwoma uwou ogha a ro vi ei kpohọ oria okokohọ na.
4. A re vi efọmo Room Request na se Ẹko-Iruo Uwou na ẹruoke taure okokohọ na o te ti te. Onana o rẹ lẹliẹ Ẹko-Iruo Uwou na gwọlọ uwou nọ u re kiehọ k’owhẹ.
5. Ẹko-Iruo Uwou na a te jọ owhẹ riẹ kpahe oria nọ who ti wohọ taure okokohọ na o te ti te yọ o sae te gwọlọ nọ whọ rẹ hwa ugho fihotọ re a rawo uwou na kẹ owhẹ.
Iviena
◼ Rehọ uwou nọ Ẹko-Iruo Uwou na o k’owhẹ. Who wohọ iwou nọ a bọ fihọ ogege na ha otẹrọnọ Ẹko-Iruo Uwou na o rehọ etẹe k’owhẹ hẹ. Who ku ahwo gb’oma bu vi unu nọ a kuvẹ riẹ evaọ oria na ha.
◼ Whọ nya ruọ eria nọ a kuvẹ riẹ kẹ erara ha evaọ uwou nọ who wohọ na ha. Whọ jọ eria nọ a kuvẹ riẹ hẹ there emu hu.
◼ Whọ hwa igho kẹ ohwo nọ o wo uwou bu vrẹ unu nọ Ẹko-Iruo Uwou na o wha ha re uwou na o ruẹsi t’owhẹ obọ.
◼ Nọ who te bi ru ọruẹrẹfihotọ oria nọ who re wohọ kẹ omobọ ra, iviena nọ mi Ẹko-Iruo Uwou na re whọ siọ uwou ovona ba ẹrehọ.