Okokohọ Ubrotọ Isẹri Jihova ọrọ 2008
1. (a) Fikieme ohrẹ Pọl ro se Ileleikristi obọ Hibru o jẹ rrọ oware nọ u wuzou gaga nẹnẹ? (Se Ahwo Hibru 10:24, 25.) (b) Uvẹ vẹ ma bi ti wo nọ ma ti ro fi ohrẹ Pọl na họ iruo?
1 Pọl ukọ na ọ ta udu họ Ileleikristi obọ Hibru awọ inọ a hai kokohọ jẹ bọ ohwohwo ga maero nọ a be ruẹ inọ ẹdẹ na o bi sikẹle na. (Hib. 10:24, 25) Imuẹro buobu e riẹ nọ i bi dhesẹ nọ “ẹdẹ na” nọ Pọl ọ tẹme kpahe na ọ kẹle gaga no! Fikiere, ma rẹ gwọlọ uvẹ nọ ma re ro kokohọ kugbe inievo Ileleikristi mai kẹ ithubro abọ-ẹzi nọ i re fi obọ họ kẹ omai dikihẹ ga evaọ “edẹ urere” iyoyoma nana. (2 Tim. 3:1) Uvẹ utioye na u ti rovie fihọ evaọ ikokohọ ubrotọ 2008 nọ e be tha na.
2. (a) Fikieme u ro wuzou re ma jariẹ evaọ edẹ esa okokohọ na kpobi? (b) Ẹvẹ ma re ro mu oma họ ẹruẹrẹ kpahe re ma jọ okokohọ na?
2 Jariẹ Edẹ Esa na Kpobi: Ma ta udu họ owhẹ awọ re whọ jariẹ evaọ edẹ esa na kpobi. Ma te kpohọ okokohọ na, ma te re emu abọ-ẹzi da oma fia. (Hib. 10:25) Mu oma họ ẹruẹrẹ kpahe ababọ oke oraha. O tẹ gwọlọ nọ whọ rẹ vuẹ ọga-iruo ra, kake vuẹe re ọ sai ru ọruẹrẹfihotọ epanọ omọfa jọ o re ro fi obọ họ ru iruo ra evaọ oke nọ whọ te jariẹ hẹ na. Otẹrọnọ oke okokohọ rai u kie fihọ oke nọ emọ ra a gbe bi ro kpohọ isukulu, vuẹ iticha rai kpahe omaa ra. Jae riẹ inọ okokohọ na yọ abọjọ egagọ ra. Jọ u mu owhẹ ẹro inọ Jihova ọ te ghale oma nọ whọ be dawo re whọ rehọ isiuru Uvie na karo.—Mat. 6:33.
3. Idhere vẹ ma sai ro dhesẹ ororokẹ kẹ amọfa?
3 Fi Obọ họ kẹ Amọfa re A Jariẹ: Pọl ọ tẹ jẹ ta udu họ inievo riẹ awọ inọ ‘ohwo o he roro ohwohwo.’ (Hib. 10:24) Kọ inievo jọ e rrọ utu Uwuhrẹ Obe Ukoko ra nọ e gwọlọ obufihọ re a sai kpohọ okokohọ na? Kọ whọ sai fi obọ họ kẹ emọ-uwuhrẹ Ebaibol ra re a kpohọ okokohọ na, o tẹ make rọnọ ẹdẹ ọvo dede? Nọ whọ te vuẹ ahwo uviuwou ra nọ a rrọ ukoko ho inọ who ti kpohọ okokohọ, zizie ai nọ a lele owhẹ nya. Eghale nọ e rẹ sai no omodawọ ra ze e sai gb’owhẹ unu.
4. Diẹse ma rẹ sae jọ ruẹ evuẹ kpahe oke gbe eria ikokohọ ubrotọ?
4 Whọ tẹ Gwọlọ Ovuẹ Jọ: Kukpe kukpe ahwo buobu a be hae rọ ifonu se uwou ogha rọ nọ kpahe oke gbe eria nọ a ti jo ru ikokohọ. Inievo buobu nọ e be hai se use nana yọ ahwo nọ Odibọgba Uvie Mai nọ o ta kpahe ikokohọ na u te obọ no. Taure who te ti fonu se uwou ogha, ma be ta nọ rri ẹwẹ-obe avọ 5 gbe 6 ọrọ Odibọgba Uvie Mai nana tao.
5. Eme ma re ru otẹrọnọ ma gwọlọ evuẹ kpahe iwou nọ a re wohọ evaọ okokohọ ọfa nọ a ghale ukoko mai fihọ họ?
5 Otẹrọnọ whọ te gwọlọ kpohọ okokohọ ọfa nọ a ghale ukoko ra fihọ họ, whọ rẹ sae rehọ adrẹse oria okokohọ utioye na nọ o rrọ emu efọmo Room Request ọkpokpọ na ro kere kpohọ oria okokohọ na kẹ evuẹ kpahe iwou nọ a re wohọ. Ma vi efọmo nana se ikere-obe ukoko kpobi. Re ahwo Ẹko-Iruo Uwou na a sai kere zihe se owhẹ, ruẹ nọ who fi ẹnvẹlopu ọfa nọ who kere adrẹse ra fihọ jẹ ta estampo mu no ba ileta ra na vi se ai.
6. Eme a kareghẹhọ omai kpahe efọmo ọ Room Request na?
6 Ẹgwọlọ Obọdẹ: Otẹrọnọ owhowho-uvie jọ ọ gwọlọ obufihọ evaọ ewo uwou nọ o re wohọ, Ogbẹgwae Iruo Ukoko na o rẹ jiroro sọ o te epanọ o re ro kere eme fihọ abọ Special Needs evaọ efọmo Room Request na. Taure okere-obe ukoko na o te ti vi efọmo na se Ẹko-Iruo Uwou okokohọ na, ọ rẹ kiẹ ekpọvio nọ e rrọ efọmo na riwi.
7. Ẹvẹ ma sai ro ru lele ọruẹrẹfihotọ nọ a ru fihọ kẹ iwou nọ a re wohọ? (Rri ẹkpẹti na “Epanọ A rẹ rọ Yare Uwou nọ A re Wohọ.”)
7 Iwou nọ A re Wohọ: Re u kiehọ owhẹ oma, a ti ru ọruẹrẹfihotọ oria nọ a re wohọ evaọ ẹwho kpobi nọ a be jọ ru okokohọ. Evaọ eria ikokohọ jọ, a rẹ kẹ ahwo iwou nọ a re wohọ evaọ ogege okokohọ na. Iviena woi họ iroro inọ ukoko na o te sae bọ iwou nọ ahwo kpobi nọ a ziọ okokohọ a re wohọ họ. Ahwo nọ Ẹko-Iruo Uwou na a rọwo kẹ ọvo a rẹ wezẹ ogege okokohọ na. A te fi owhẹ họ oria ofa, whọ rẹ rọwo kugbe Ẹko-Iruo Uwou na, whọ vẹ jọ oria nọ a kẹ owhẹ nọ who wohọ na. Kareghẹhọ re inọ o sae gwọlọ ugho nọ whọ rẹ rọ f’ofa no etẹe kpohọ oria okokohọ na je ziheze kẹdẹ kẹdẹ. U te je fo re ma ru unevaze kẹ iruo akpọ-soso na. Otẹrọnọ iwou nọ e rrọ Ọgwa Okokohọ na a fi owhai họ, o te gwọlọ nọ wha rọ ugho ru unevaze kẹ iwou nọ wha wohọ na. Fikiere, u wuzou gaga re who wo enana họ iroro nọ who bi koko ugho họ kẹ okokohọ na. (1 Kọr. 16:1-4; 2 Kọr. 9:7) Taure who te ti kere eme fihọ efọmo Room Request na, kiẹ eme nọ e rrọ ẹkpẹti na “Epanọ A rẹ rọ Yare Uwou nọ A re Wohọ.”
8. (a) Idhere vẹ ma sae rọ wha orro se Jihova nọ ma te kpohọ okokohọ? (b) Eme iwoma vẹ ahwo jọ nọ a wuzou ehọtẹle a ta no fiki uruemu uwoma inievo mai?
8 Iruo Iwoma: Ẹme nọ ma re yo kẹ ujaje Jihova inọ ma hai kuomagbe kẹ egagọ o rẹ kẹ omai erere. Mai wuzou na, u re rovie uvẹ fihọ k’omai nọ ma rẹ rọ wha orro se odẹ Jihova. (Aiz. 48:17) Ahwo buobu a re muẹrohọ “iruo iwoma” mai evaọ ikokohọ ubrotọ mai, yọ onana o wọ ahwo jọ ta eme iwoma kpahe omai no. (1 Tim. 5:25) Evaọ ẹwho jọ nọ a be hai jo ru ikokohọ anwọ ikpe buobu, ọzae jọ nọ o wuzou ehọtẹle jọ ọ ta nọ: “Ahwo a be jọ ẹwho na ta ẹme kpahe Isẹri Jihova gaga gbe epanọ ikokohọ rai i bi ro fiobọhọ kẹ omai. Ma riẹ epanọ ahwo rai a be hai ru ọgwa-arozaha ẹwho na fihọ fuafo, ma tẹ jẹ be hai ruẹ nọ wha bi ru eria nọ a rẹ dhẹ imoto fihọ na fuafo. O rẹ kẹ omai evawere gaga nọ ahwo rai a tẹ nyaze evaọ ezi nana kukpe kukpe. Ma bi rẹro nọ wha te gbẹ nyaze enenẹ.” Nọ ọzae jọ nọ o wuzou ehọtẹle jọ ọ ta kpahe epanọ itu ahwo efa gbe itu-arozaha nọ e rẹ ziọ etẹe e rẹ kẹ ae uye te no, ọ tẹ ta epanọ inievo mai a be hai ro ru lele ọruẹrẹfihotọ rai je dhesẹ odiri ẹsikpobi. Ọ ta nọ: “Iroro mai họ, dodokọ ahwo ọfa kpobi nọ a be ziọ etenẹ a wọhọ Isẹri Jihova!” Uruemu uwoma inievo mai nọ o lẹliẹ ahwo ta eme iwoma nana gbe efa na, o rẹ wha oghọghọ se udu Jihova, Ọghẹnẹ mai! Evaọ oria kpobi nọ a fi owhẹ họ, makọ evaọ ehọtẹle, uwou ohwo jọ, hayo iwou nọ e rrọ Ọgwa Okokohọ na, iviena dhesẹ emamọ uruemu je ru oria na fihọ fuafo.
9. Ẹvẹ Matiu 4:4 u ro fielo họ epanọ uwuzou te re ma gaviezọ ziezi kẹ abọ ọruẹrẹfihotọ okokohọ na kpobi?
9 Jesu ọ ta nọ oware nọ o rẹ kẹ omai uzuazọ họ ezọgaviẹ kẹ “kẹme kẹme nọ ọ via no unu Ọghẹnẹ ze.” (Mat. 4:4) Evaọ ikokohọ mai, Jihova ọ be hae rehọ ẹkwoma odibo nọ o wo ẹrọwọ avọ areghẹ na kẹ omai emu abọ-ẹzi ẹruoke. (Mat. 24:45) A ru iruo gaga re a sae ruẹrẹ emu abọ-ẹzi nana họ jẹ ruẹ nọ a rehọ e riẹ kẹ omai. Joma dhesẹ nọ ma wo ovuhumuo kẹ ẹruorote Jihova ẹkwoma okokohọ na nọ ma re kpohọ jẹ gaviezọ ziezi kẹ abọ ọruẹrẹfihotọ okokohọ na kpobi.
[Etehe nọ e rrọ ẹwẹ-obe avọ 3]
Oke Iprogramo:
Edisoi-Oka gbe Ẹdẹ-Ọmaha
9:20 a.m. - 4:55 p.m.
Ẹdoka
9:20 a.m. - 4:00 p.m.
[Etehe nọ e rrọ ẹwẹ-obe avọ 4]
Epanọ A rẹ rọ Yare Uwou nọ A re Wohọ:
1. Mi okere-obe ukoko ra efọmo Room Request na.
2. Kere eme fihọ efọmo Room Request na evaọ ẹruoke. Iviena muẹrohọ nọ whọ kẹ evuẹ egbagba kpahe odẹ, ikpe, sọ ohwo na ọzae hayo aye, jegbe sọ ohwo nọ ọ be yare uwou na yọ ọkobaro oke-kpobi hayo owhowho-uvie. A rẹ roma totọ kere evuẹ fihọ efọmo Room Request na gbagba, e vẹ jẹ jọ vevẹ.
3. Okere-obe ukoko na ọ rẹ kiẹ efọmo Room Request na riwi, whobọhọ iẹe, o ve vi ei kpohọ oria okokohọ na, ORỌNIKỌ OBỌ UWOU OGHA HA. Oware nọ onana o jẹ rrọ ere họ efọmo na ọ te kaki te oria okokohọ na ha otẹrọnọ ẹkwoma uwou ogha a ro vi ei kpohọ oria okokohọ na.
4. A re vi efọmo Room Request na se Ẹko-Iruo Uwou na ẹruoke taure okokohọ na o te ti te. Onana o rẹ lẹliẹ Ẹko-Iruo Uwou na gwọlọ uwou nọ u re kiehọ k’owhẹ.
5. Ẹko-Iruo Uwou na a te j’owhẹ riẹ kpahe oria nọ who ti wohọ taure okokohọ na o te ti te, yọ o sae te gwọlọ nọ whọ rẹ hwa ugho fihotọ re a rawo uwou na kẹ owhẹ.
Iviena
◼ Rehọ uwou nọ Ẹko-Iruo Uwou na o k’owhẹ. Who wohọ iwou nọ a bọ fihọ ogege na ha otẹrọnọ Ẹko-Iruo Uwou na o rehọ etẹe k’owhẹ hẹ. Who ku ahwo gb’oma bu vi unu nọ a kuvẹ riẹ evaọ oria na ha.
◼ Whọ nya ruọ eria nọ a kuvẹ riẹ kẹ erara ha evaọ uwou nọ who wohọ na ha. Whọ jọ eria nọ a kuvẹ riẹ hẹ there emu hu.
◼ Whọ rọ fikiọ re uwou o ruẹsi te owhẹ obọ dhẹ uvremu nyae hwa igho buobu kẹ ohwo nọ o wo uwou na vi unu nọ Ẹko-Iruo Uwou na o wha ha.
◼ Nọ who te bi ru ọruẹrẹfihotọ oria nọ who re wohọ kẹ omobọ ra, iviena nọ mi Ẹko-Iruo Uwou na re whọ siọ uwou nọ Ẹko-Iruo Uwou na u mi fihotọ no ba ẹrehọ.