Okokohọ Ubrotọ Isẹri Jihova ọrọ 2009
1. (a) Didi eghale ma te reawere rai nọ ma tẹ jariẹ evaọ edẹ esa okokohọ ubrotọ na kpobi? (b) Omaa vẹ u fo nọ ma re muhọ ẹma enẹna?
1 Mai kpobi ma bi rẹro Okokohọ Ubrotọ 2009 nọ u ti rovie uvẹ fihọ k’omai nọ ma ti ro kuomagbe inievo mai nọ ma gbe bi jiri Jihova, nọ i ‘se ẹgwọlọ abọ-ẹzi rai gboja.’ (Mat. 5:3) Nọ ẹdẹ Jihova o bi si kẹle kpata kpata na, ma be ta udu họ ohwo kpobi awọ re ọ jariẹ evaọ edẹ esa na kpobi, re ọ sai wo erere vọvọ rono omakugbe osasa Ileleikristi na ze gbe uduotahawọ abọ-ẹzi nọ a te k’omai re ma dikihẹ ga ziezi evaọ uzẹme na. (Zef. 1:14) Vuẹ iticha gbe ọga-iruo ra inọ okokohọ na yọ abọjọ nọ o wuzou gaga evaọ egagọ ra. Jọ enẹna mu omaa ra họ ẹma kpahotọ, jẹ lẹ se Jihova kẹ obufihọ, Jihova ọ te tha owhẹ uke.—Aiz. 50:10.
2. A gbẹ maki zizie omai kpohọ okokohọ akpọ-soso ho, eme ma rẹ sai rẹro riẹ evaọ okokohọ ubrotọ mai?
2 Ikokohọ Akpọ-Soso: Nọ o rọnọ umutho erẹwho gbe ewho jọ ọvo a ti jo ru ikokohọ nana, ahwo nọ a salọ ọvo a rẹ nya. Ọruẹrẹfihotọ nana nọ ma rẹ nya lele u ti ru nọ ahwo a gbe bu hrọ họ. (1 Kọr. 14:40; Hib. 13:17) O make rrọ ere na, a te jọ ikokohọ ubrotọ buobu wo omaweromẹ ovona nọ a te jọ ikokohọ akpọ-soso wo na, keme imishọnare, ahwo Ebẹtẹle gbe idibo ebabọ akpọ-soso nọ e rrọ erẹwho efa a te rọ erẹwho rai kpohọ okokohọ na.
3. Ẹvẹ ma sai ro dhesẹ uyoyou kẹ inievo jọ evaọ ukoko mai?
3 Fi Obọ Họ kẹ Amọfa re A Jariẹ: Kọ inievo jọ evaọ ukoko ra a gwọlọ obufihọ re a sai kpohọ okokohọ na? Ahwo nọ a diezọ a te gwọlọ obufihọ ziezi re a sai kpohọ okokohọ ubrotọ nọ a te jọ rehọ Obọ rọ t’Ẹme America ọvo ru eme na kpobi, yọ ọruẹrẹfihotọ nana ọ te jọ okokohọ avọ 7 evaọ Benin City. Who te fi obọ họ kẹ amọfa re a sae nya, koyehọ whọ be ‘guọlọ ifowe oma obọ ra ọvo ho, rekọ te ifowe amọfa re.’—Fil. 2:4.
4, 5. Otẹrọnọ uyero jọ o wha riẹ ze nọ o jẹ gwọlọ nọ who re kpohọ okokohọ ubrotọ ọfa nọ a ghale ukoko rai fihọ họ, eme who re ru?
4 Whọ tẹ Gwọlọ Ovuẹ Jọ: Whọ tẹ gwọlọ ovuẹ jọ kpahe edẹ okokohọ rai gbe oria nọ a te jọ ru ei, nọ mi okere-obe ukoko rai tao. Otẹrọnọ ọ gbẹ riẹ hẹ whọ vẹ tẹ rọ ifonu se uwou ogha.
5 Otẹrọnọ whọ te gwọlọ kpohọ okokohọ ọfa nọ a ghale ukoko rai fihọ họ, mi efọmo Room Request re who kere eme fihọ iẹe gbagba, whọ vẹ rehọ adrẹse oria okokohọ otiọye na nọ o rrọ emu efọmo Room Request ọkpokpọ na ro kere kpohọ oria okokohọ na. Ma ti vi efọmo nana se ikere-obe ukoko kpobi kẹle na.
6. Didi ọkpọvio a rẹ nya lele otẹrọnọ owhowho-uvie nọ o wo ẹgwọlọ obọdẹ ọ yare obufihọ kpahe uwou nọ o re wohọ?
6 Ẹgwọlọ Obọdẹ: Otẹrọnọ owhowho-uvie jọ ọ gwọlọ obufihọ evaọ ewo uwou nọ o re wohọ, Ogbẹgwae Iruo Ukoko na o rẹ jiroro sọ o te epanọ o re ro kere eme fihọ abọ Special Needs evaọ efọmo Room Request na. Taure okere-obe ukoko na o te ti vi efọmo na se Ẹko-Iruo Uwou okokohọ na, ọ rẹ kiẹ ekpọvio nọ e rrọ efọmo na riwi.
7. (a) Eme ma re ru otẹrọnọ ma gwọlọ uwou nọ ma re wohọ? (b) Ithubro vẹ i ti fi obọ họ k’omai nọ ma sai ro dhesẹ emamọ uruemu evaọ oria kpobi nọ ma wohọ? (Rri ẹkpẹti na “Ithubro kẹ Ahwo nọ A be Rehọ Iwou.”)
7 Ẹyare Iwou nọ A re Wohọ: Otẹrọnọ whọ te gwọlọ uwou nọ who re wohọ evaọ ẹwho okokohọ na, yọ whọ gwọlọ obufihọ Ẹko-Iruo Uwou okokohọ na, ru lele ekpọvio nọ e rrọ obotọ na:
◼ Mi okere-obe ukoko ra efọmo Room Request na.
◼ Kere eme fihọ efọmo Room Request na evaọ ẹruoke. Iviena muẹrohọ nọ whọ kẹ evuẹ egbagba kpahe odẹ, ikpe, sọ ohwo na ọzae hayo aye, jegbe sọ ohwo nọ ọ be yare uwou na yọ ọkobaro oke-kpobi hayo owhowho-uvie. A rẹ roma totọ kere evuẹ fihọ efọmo Room Request na gbagba, e vẹ jẹ jọ vevẹ.
◼ Okere-obe ukoko na ọ rẹ kiẹ efọmo Room Request na riwi, whobọhọ iẹe, o ve vi ei kpohọ oria okokohọ na, ORỌNIKỌ obọ uwou ogha ha. Oware nọ onana o jẹ rrọ ere họ efọmo na ọ te kaki te oria okokohọ na ha otẹrọnọ ẹkwoma uwou ogha a ro vi ei kpohọ oria okokohọ na.
◼ A re vi efọmo Room Request na se Ẹko-Iruo Uwou na ẹruoke taure okokohọ na o te ti te. Onana o rẹ lẹliẹ Ẹko-Iruo Uwou na gwọlọ uwou nọ u kiehọ k’owhẹ.
8. Ẹvẹ ọruẹrẹfihotọ Ẹko-Iruo Uwou na nọ ma rẹ nya lele u re ro fi obọ họ kẹ ahwo kpobi rọ umutho ugho rehọ iwou?
8 Ma riẹ inọ orọnikọ ohwo kpobi nọ ọ ziọ okokohọ na o ti wohọ iwou nọ e rrọ Ọgwa Okokohọ na ha. Ahwo jọ dede a te gwọlọ wohọ ehọtẹle. Rekọ otẹrọnọ ehọtẹle ma gwọlọ wohọ, u re woma re ma nọ mi Ẹko-Iruo Uwou na tao sọ a rehọ iwou yena no vẹre. Otẹrọnọ a rehọ uwou na no vẹre, u re fo re ma nya lele ọruẹrẹfihotọ ọ Ẹko-Iruo Uwou na. Ma tẹ nya lele ọruẹrẹfihotọ nana, u re fi obọ họ nọ ohwo kpobi ọ jẹ sae rọ umutho ugho rehọ uwou.—1 Kọr. 10:24.
9. Eme ọ rẹ mai jọ omai oja nọ ma be ruẹrẹ oma kpahe kẹ Okokohọ Ubrotọ 2009 na gbe okenọ ma te te obei no?
9 Iruo nọ E rẹ Kẹ Ọghẹnẹ Orro: Ma te bi dhesẹ ubi ẹzi na evaọ kabọ kabọ uzuazọ mai, be yọrọ ẹmeunu gbe uruemu mai ziezi evaọ eria nọ ma wohọ, je kugbe amọfa nọ a ziọ okokohọ na, o rẹ lẹliẹ amọfa ta ẹme-ezi kpahe ahwo Jihova jẹ siọ amọfa ba ezoruẹ. (1 Kọr. 10:31; 2 Kọr. 6:3, 4) Jọ ẹnyaze ra gbe emamọ uruemu ra evaọ Okokohọ Ubrotọ 2009 na o wha orro se Ọghẹnẹ!—1 Pita 2:12.
[Uwoho nọ e rrọ ẹwẹ-obe avọ 4]
Oke Iprogramo:
Edene-Oka
(Rọkẹ Ikokohọ Akpọ-Soso)
1:20 p.m. - 4:55 p.m.
Edisoi-Oka gbe Ẹdẹ-Ọmaha
9:20 a.m. - 4:55 p.m.
Ẹdoka
9:20 a.m. - 4:00 p.m.
[Uwoho nọ e rrọ ẹwẹ-obe avọ 5]
Ithubro kẹ Ahwo nọ A be Rehọ Iwou:
◼ Rehọ uwou nọ Ẹko-Iruo Uwou na o k’owhẹ. Who wohọ iwou nọ a bọ fihọ ogege na ha otẹrọnọ Ẹko-Iruo Uwou na o rehọ etẹe k’owhẹ hẹ. Who ku ahwo gb’oma bu vi unu nọ a kuvẹ riẹ evaọ oria na ha.
◼ Whọ nya ruọ eria nọ a kuvẹ riẹ kẹ erara ha evaọ uwou nọ who wohọ na ha. Whọ jọ eria nọ a kuvẹ riẹ hẹ there emu hu.
◼ Whọ rọ fikiọ re uwou o ruẹsi te owhẹ obọ dhẹ uvremu nyae hwa igho buobu kẹ ohwo nọ o wo uwou na vi unu nọ Ẹko-Iruo Uwou na o hwa ha.
◼ Nọ who te bi ru ọruẹrẹfihotọ oria nọ who re wohọ kẹ omobọ ra, iviena nọ mi Ẹko-Iruo Uwou na re whọ siọ uwou nọ Ẹko-Iruo Uwou na u mi fihotọ no ba ẹrehọ.