Iwhowho Uvie A n’Iyẹrẹ

“Ẹme nọ Whọ Ta na O Rovie Omẹ Aro!”

DOROTA, ọgbodibo oke-kpobi ọrọ Isẹri Jihova evaọ Poland, o lele ọmọzae ikpe 14 riẹ kpohọ ẹsipito isukulu ọmọ na. Okenọ Janina,a edọkita na, o je rri oma ọmọ na, ọ tẹ nọ Dorota iruo nọ ọmọ riẹ ọ be hae jọ obọ uwou ru.

Dorota o te yo nnọ: “Okenọ me wo uvẹ hẹ, ọmọ mẹ o re there emu k’omai imazeza nọ e rrọ uwou na. O re je hwere uwou na je fi obọ họ ruẹrẹ eware nọ e raha. Obe-use o rẹ were iẹe gaga. Ọ rehọ isukulu riẹ zaro ho.”

Janina o te bo nọ: “Uzẹme ọ! Mẹ jọ etenẹ ruiruo te ikpe 12 no, me ri yo ẹme otiọna ha.”

Nọ ọ ruẹ nnọ uvẹ u rovie nọ o re ro se isẹi no, Dorota ọ tẹ ta nọ: “Esẹgbini buobu nẹnẹ a bi wuhrẹ emọ rai ziezi hi. Oye jabọ nọ emọ rai a je rri oma rai nnọ a fioka ha na.”

Janina ọ tẹ nọ inọ: “Ẹvẹ whọ rọ riẹ eware enana kpobi? Esẹgbini buobu a riẹ eware enana ha.”

Dorota o te yo nnọ: “Evuẹ itieye na e vọ Ebaibol na kiọkọ. Wọhọ oriruo, wọhọ epanọ Iziewariẹ 6:6-9 o ta, ma rẹ kaki wuhrẹ omobọ mai taure ma te wuhrẹ emọ mai. Kọ ma gbẹ kaki wuhrẹ oma mai emamọ uruemu nọ ma gwọlọ wuhrẹ emọ mai?”

Janina o te bo nọ: “Emọna, onana u gbunu kẹhẹ!” Kẹsena ọ tẹ nọ Dorota epanọ Ebaibol na i bi ro fi obọ họ kẹe yọrọ emọ riẹ je wuhrẹ ai.

Dorota ọ tẹ ta nọ: “Ma re wuhrẹ Ebaibol na kugbe emọ mai k’oka k’oka. Odẹ obe nọ ma bi wuhrẹ kugbe ai họ Questions Young People Ask—Answers That Work.” b Ọ tẹ rọ unu dhesẹ obe na kẹe jẹ fodẹ izoẹme jọ nọ e rrọ eva riẹ.

Janina ọ tẹ tehe enu nọ: “Who rovie omẹ aro no! Kọ mẹ sae ruẹ obe na?”

Oware wọhọ auwa o vrẹ no, Dorota o te zihe ze avọ obe na.

Okenọ o je rri obe na, Janina ọ tẹ nọ inọ: “Didi egagọ whọ rrọ?”

“Mẹ yọ omọvo Isẹri Jihova.”

“Ẹvẹ Isẹri Jihova a re yeri kugbe ahwo egagọ efa?”

“Avọ adhẹẹ, wọhọ epanọ me bi yeri kugbe owhẹ na,” ere Dorota ọ k’uyo, o fibae nọ: “Yọ, o rẹ were omai otẹrọnọ a sae riẹ uzẹme Ebaibol na.”

Janina ọ tẹ ta nọ: “Who ru oma kiehọ omẹ no dede.”

Taure ọ tẹ te ruọ edhere, Dorota ọ tẹ tuduhọ Janina awọ re o se Ebaibol na. “O te lẹliẹ uzuazọ ra wo aro je fi obọ họ k’owhẹ evaọ iruo ra.”

Janina ọ tẹ za nọ: “Whọ k’omẹ ọwhọ nọ me re ro ru ere no.”

Dorota ọ rehọ areghẹ gbe ọtamuo rẹriẹ iweze gheghe kpobọ ọfisi edọkita kpohọ uvẹ emamọ isẹri-ise.—1 Pita 3:15.

[Oruvẹ-obotọ]