Egagọ Vẹ Whọ Rẹ Salọ?
‘EGAGỌ sa-sa yọ idhere sa-sa gheghe nọ i bi su kpohọ oria ovona. Ọghẹnẹ ọvo ma wo, manikọ ere he?’ Onana họ iroro ahwo buobu nọ a roro inọ dede nọ u fo re ohwo ọ jọ egagọ jọ, egagọ nọ ohwo ọ salọ nọ ọ rẹ jọ u fiẹme tere he.
Ohwo ọ tẹ kaki rri eme yena ọvo, ọ sae ta nnọ iroro e rrọ ẹme na, keme uzẹme riẹ họ Ọghẹnẹ ọvuọvo ọ riẹ, Erumeru na. (Aizaya 44:6; Jọn 17:3; 1 Ahwo Kọrint 8:5, 6) Dede na, ma rẹ sai rri ohẹriẹ sa-sa—tubọ iwuhrẹ nọ e wọso ohwohwo erọ egagọ buobu nọ e ta nnọ a be gọ Ọghẹnẹ uzẹme na vo vievie he. A wo ohẹriẹ gaga evaọ iruemu rai, erọwọ rai, iwuhrẹ rai, gbe itee rai. Ohẹriẹ sa-sa na e rro gaga te epanọ o rọ rrọ bẹbẹ kẹ ahwo egagọ jọ re a wo otoriẹ hayo tubẹ rọwokugbe oware nọ ahwo egagọ edekọ a bi wuhrẹ jẹ rọwo.
Dede na, Jesu ọ ta nọ: “Ọghẹnẹ họ ẹzi, enọ e be gọ e, e rẹ rọ ẹzi gbe uzẹme gọ e hrọ.” (Jọn 4:24) Re a rehọ uzẹme gọ Ọghẹnẹ, kọ o kuvẹ kẹ ewo eriwo sa-sa nọ e wọso ohwohwo kpahe oghẹrẹ ohwo nọ Ọghẹnẹ ọ rrọ, ẹjiroro riẹ, gbe epanọ ọ gwọlọ nnọ a rọ gọe? Kọ o rẹ jọ oware iroro re ma rọwo nnọ epanọ ma rọ gọ Ọghẹnẹ Erumeru na kpobi o rẹ were iẹe?
Ileleikristi Uzẹme erọ Oke Ọsosuọ gbe Enẹna
Ileleikristi ikpe-udhusoi ọsosuọ a wo eriwo sa-sa kpahe eware ẹsejọ. Wọhọ oriruo, be ta kpahe enọ e jọ Kọrint, Pọl ukọ na ọ ta nọ: “Imoni mẹ, keme ahwo unuwou Klọe a bigu kẹ omẹ nọ ẹwhọ ọ rọ udevie rai. Otọ o nọ mẹ ta na o na, nnọ, e jọ rai a be ta nọ, ‘Mẹ ọ rọ Pọl’, hayo ‘Mẹ ọ rẹ Apọlọs’, hayo ‘Mẹ ọ rọ Kifas’, hayo ‘Mẹ ọ rọ Kristi.’ ”—1 Ahwo Kọrint 1:11, 12.
Kọ Pọl o rri eriwo sa-sa nana wọhọ oware osese? Kọ ọ rehọ e riẹ inọ ohwo kpobi ọ be thakpe nya ọvuọ edhere riẹ kpohọ esiwo? Kakaka! Pọl ọ kẹ ohrẹ nọ: “Inievo, mẹ rehọ odẹ Ọnowo mai Jesu Kristi na bose owhai re wha jọ ọvuọvo se oma ohẹriẹ ba udevie rai, re wha ruẹse jọ iroro gbe oziẹ-obro ọvo.”—1 Ahwo Kọrint 1:10.
Uzẹme o rrọ, a rẹ gba ahwo họ jọ okugbe evaọ eware nọ a rọwo ho. Oware nọ o rẹ wha okugbe ze họ okenọ ahwo a tẹ roma totọ kiẹ Ebaibol na riwi jẹ rọwo fihọ oware ovona evaọ ekuhọ riẹ. Fikiere, Ẹme Ọghẹnẹ nọ ahwo a re wuhrẹ kẹ omobọ rai gbe isiuru nọ a re ro fi oware nọ a wuhrẹ na họ iruo e r’oja re a reawere oghẹrẹ okugbe nọ Pọl ọ t’ẹme kpahe na. Kọ a sai duku oghẹrẹ okugbe yena?
Erere ọ Emamọ Usu
Devidi ọso-ilezi na ọ nọ okejọ nọ: “O ỌNOWO, ono ọ rẹ te ria evaọ uwoudhu-egagọ ra? Ono ọ rẹ te ria evaọ ugbehru ẹri ra na?” Oyena ghinọ onọ nọ u re ru ohwo roro. Devidi ọ kuyo na: “Ọnọ o re yere uzuazọ ugbogbo ho, o je ru oware nọ ukiete, ọ ta uzẹme no obọ eva riẹ ze.” (Olezi 15:1, 2) Otoriẹ ogbagba orọ Ebaibol na u re ru ohwo vuhu egagọ nọ e be nyate itee Ọghẹnẹ eyena mu. Kẹsena, ẹkwoma ẹnya kugbe utu ahwo yena, ohwo ọ rẹ sae reawere usu ọbọga kugbe ahwo nọ e be rọ okugbe gọ Ọghẹnẹ evaọ “ẹzi gbe uzẹme.”
Isẹri Jihova a dhesẹ no nnọ o lọhọ re a wo okugbe orọwọ gbe uruemu makọ evaọ akpọ inẹnẹ nọ ọ tahaku na. A rẹ jọ udevie rai ruẹ ahwo nọ e jọ egagọ sa-sa vẹre je no uyẹ sa-sa ze. Isẹri efa yọ enọ e vro nọ a rẹ sae riẹ Ọghẹnẹ hẹ hayo enọ e rọwo nnọ Ọghẹnẹ ọ rrọ họ vẹre. Ejọ evaọ usu rai e jọ enọ i se egagọ gb’oja vẹre he. Ahwo nana nọ e jọ oghẹrẹ egagọ, wo oghẹrẹ uruemu-ẹwho, gbe ereghẹ-ididi sa-sa vẹre na a be reawere okugbe egagọ enẹna, onọ a rẹ ruẹ obọ riẹ hẹ evaọ akpọ na nẹnẹ.
Ehri okugbe nana họ Ẹme Ọghẹnẹ, Ebaibol na. Uzẹme, Isẹri Jihova a riẹ nnọ a rẹ ta họ amọfa obọ họ. Rekọ o rẹ were ae re a ta udu họ amọfa awọ nnọ a wuhrẹ Ebaibol re evaọ ẹme egagọ nọ a rẹ salọ, a rehọ iroro-ejẹ rai no Ebaibol na ze. Evaọ edhere nana, amọfa buobu a rẹ sai wo irere nọ i re te enọ e be “rọ ẹzi gbe uzẹme gọ” Ọghẹnẹ.
Nẹnẹ, ọza nọ ohwo o re ro kie ruọ isiuru enwoma ọ re ruaro. Ẹsalọ usu uwoma o r’oja. Ebaibol e ta nnọ “ọnọ ọ nya lele ahwo owareghẹ o re wo areghẹ” gbe nnọ “usu uyoma o rẹ raha uruemu ezi.” (Itẹ 13:20; 1 Ahwo Kọrint 15:33) Usu kugbe uvi egegagọ Ọghẹnẹ yọ ọthọwẹ. Fikiere, Ebaibol na e kareghẹhọ omai nọ: “Jọ mai ohwo o he roro epanọ ọ rẹrọ jaja ọrivẹ riẹ oma, re o wo uyoyou, je ru iruo ezi kpobi, [wha hẹ] se oma ba e kugbe he, wọhọ epanọ uruemu otu jọ o rọ, rekọ whai ohwo ọ hẹ ta udu họ ohwo awọ, ofa riẹ, wha riẹ nọ ẹdẹ na ọ kẹlino.” (Ahwo Hibru 10:24, 25) Dai rri epanọ oghale riẹ o rẹ rro te okenọ uvi egbẹnyusu, inievo abọ-ẹzi, a tẹ be rehọ uyoyou fi obọ họ kẹ ohwohwo re a ru ewha-iruo rai kẹ Ọghẹnẹ gba!
Oriruo Ottmar o dhesẹ onana via. Dede nnọ ọ whẹro evaọ uviuwou Kathọlik evaọ Germany, ọ tẹ te siọ ichọche ba ẹnya. Ọ ta nọ: “Oke kpobi nọ me kpohọ ichọche, mẹ be ruẹ uvumọ oware ovo nọ me bi wo noi ze he.” Ghele na, o gbe fi ẹrọwọ họ Ọghẹnẹ. Nọ ọ te nyaku Isẹri Jihova, u te ti mu ei ẹro nnọ idibo uzẹme Ọghẹnẹ a rrọ. Ọ tẹ ruẹ ẹgwọlọ nọ o re ro ku oma gbe ai. Ọ ta nọ: “Fikinọ me bi wo abọ evaọ ukoko akpọ-soso, mẹ be reawere udhedhẹ iroro gbe udu. A bi fi obọ họ k’omẹ ẹmẹrera re me wo eriariẹ egbagba erọ Ebaibol na viere. Onana yọ oware erere ologbo k’omẹ.”
Uzizie kẹ Enọ E be Gwọlọ
Ahwo nọ a wo iroro evo nọ i bi ru iruo kugbe a rẹ sai ru iruo nọ a kẹ rai te ẹgwọlọ vi ahwo nọ i bi ru kpohọ ọvuọ obo riẹ. Wọhọ oriruo, eme akodẹ Jesu kẹ ilele riẹ họ: “Fikiere wha wuhrẹ ahwo erẹwho kpobi, wha họ ae ame evaọ odẹ Ọsẹ, gbe Ọmọ gbe Ẹzi Ẹri, wha wuhrẹ ai, re a ru eware kpobi nọ mẹ vuẹ owhai: ri, mẹ avọ owhai a gbẹ jọ kẹse kẹse, makọ te urere akpọ na.” (Matiu 28:19, 20) Ẹvẹ a sai ro ru iruo yena vọvọ otẹrọnọ ọkpọvio hayo ukoko o riẹ hẹ? Ẹvẹ ohwo ọ sai ro yoẹme kẹ ujaje Ikereakere nana otẹrọnọ ọye ọvo goli ọ rrọ usu be gọ Ọghẹnẹ?
Eva ukpe n’ukpo na, Isẹri Jihova evaọ akpọ na soso a ghale ebe, emebe, gbe ibroshọ 91,933,280 nọ a kere no Ebaibol ze, avọ emagazini 697,603,247, rọ ere rehọ ovuẹ nọ u no Ẹme Ọghẹnẹ ze nya te ima ahwo buobu oma evaọ ekwotọ 235. Onana yọ imuẹro ilogbo inọ utu ahwo nọ i wo okugbe, nọ i koko oma họ ziezi a rẹ sai ru ikpeware vi omomọvo nọ o bi ru ọvuọ ẹkẹ riẹ!
Fiba ẹvaha ebe nọ a kere no Ebaibol ze, Isẹri Jihova a re ru ebe-iwuhrẹ Ebaibol ọvọvẹ ro fi obọ họ kẹ ahwo wo otoriẹ uvevẹ orọ oware nọ Ọghẹnẹ ọ gwọlọ mi omai. Ukpe n’ukpo, a tẹ ghale ae, a ru ebe-iwuhrẹ Ebaibol 5,726,509 koka koka kugbe ahwo gbe ẹko ahwo. Iwuhrẹ Ebaibol nana nọ a bi ru na i fi obọ họ kẹ ahwo no wo uvi otọhotọ nọ a rẹ rọ jẹ iroro kpahe egagọ nọ a rẹ salọ. Ma zizie owhẹ re who wuhrẹ kpahe itee Ọghẹnẹ nọ e rrọ Ebaibol na. Whọ vẹ rọ enẹ jẹ iroro ra.—Ahwo Ẹfẹsọs 4:13; Ahwo Filipai 1:9; 1 Timoti 6:20; 2 Pita 3:18.
Whọ tẹ gwọlọ ru Ọghẹnẹ eva were, u fo re who ku oma gbe egagọ jọ—rekọ orọnikọ thakpọ egagọ kpobi hi. Ruẹ nnọ iroro-ejẹ ra kpahe egagọ nọ whọ rẹ jọ e rehọ oma hwa eriariẹ egbagba Ebaibol na, orọnikọ izi nọ ahwo jọ a fihọ hayo atanọ họ. (Itẹ 16:25) Wuhrẹ itee egagọ uzẹme. Rehọ enana wawo eware nọ whọ rọwo. Whọ vẹ rehọ enẹ salọ.—Iziewariẹ 30:19.
[Iwoho nọ e rrọ ẹwẹ-obe avọ 5]
Isẹri Jihova a be reawere okugbe evaọ akpọ nọ ọ hẹriẹ