Idibo Jihova Nọ E Be Wereva
“Ahwo nọ a wo ẹzi iwhrori, eva e were ae.”—MATIU 5:3.
1. Eme họ uvi evawere, kọ eme u re dhesẹ via?
EVAWERE yọ obọdẹ okwakwa oghaghae nọ ahwo Jihova a wo. Devidi ọso-ilezi na, o whowho nọ: “Oghọghọ u te ahwo nọ ỌNOWO ọ rọ Ọghẹnẹ rai!” (Olezi 144:15) Evawere yọ odhesẹvia oma nọ o be sasa ohwo. Evawere nọ e mae ga kpobi—nọ u re te omai udu, o roma wha ovuhumuo nọ ma re wo inọ ma wo oghale Jihova. (Itẹ 10:22) Evawere itieye na i re dhesẹ usu okpekpe nọ ma wo kugbe Ọsẹ obọ odhiwu mai gbe ovuhumuo inọ ma bi ru oreva riẹ. (Olezi 112:1; 119:1, 2) U woma kẹhẹ, Jesu ọ fodẹ ẹjiroro izii nọ ma sae rọ wereva. Ẹkiẹriwo ẹjiroro sa-sa enana nọ e rẹ lẹliẹ ohwo ghọghọ hayo wereva evaọ uzoẹme nana gbe onọ o be tha na, u ti fi obọ họ kẹ omai riẹ epanọ ma rẹ sae were eva te nọ ma tẹ be rehọ ẹrọwọ gọ ‘Ọghẹnẹ nọ o wo evawere’ na, Jihova.—1 Timoti 1:11.
Ẹro Omuhọ Ẹgwọlọ Abọ-Ẹzi Mai
2. Oke vẹ Jesu ọ rọ ta ẹme kpahe evawere, kọ ẹme vẹ o ro muhọ?
2 Evaọ 31 C.E., Jesu ọ kẹ ovuẹ jọ nọ a riẹ gaga evaọ ikuigbe. A se rie Ovuẹ obọ Ugbehru keme Jesu ọ kẹ ovuẹ nana evaọ akotọ ugbehru nọ o rẹriẹ ovao ku Abade Galili. Usiuwoma ọ Matiu o ta nọ: ‘Nọ [Jesu] ọ ruẹ itu ibuobu na, ọ tẹ nya kpo evaọ ugbehru na, nọ ọ keria no, ilele riẹ i te bru ei ze. O rovie unu riẹ, o te wuhrẹ ai nọ: “Ahwo nọ a wo ẹzi iwhrori, eva e were ae, keme ae a wo uvie odhiwu.” ’ Nọ a tẹ fa ẹme na oghẹrẹ nọ Jesu ọ ta riẹ dẹẹ, eme emuhọ riẹ na họ: “Ahwo nọ a rrọ iwhrori evaọ abọ-ẹzi, eva e were ae,” hayo “Ahwo nọ a be yare kẹ ẹzi na eva e were ae.” (Matiu 5:1-3) Efafa ọ Today’s English Version i se nọ: “Eva e were ahwo nọ a riẹ inọ a yogbe evaọ abọ-ẹzi.”
3. Oghẹrẹ vẹ omarokpotọ udhesẹ o rẹ rọ zọhọ fihọ evawere mai?
3 Evaọ ovuẹ riẹ obọ akotọ ugbehru na, Jesu ọ ta vevẹ inọ ohwo ọ rẹ mae wereva nọ ọ tẹ riẹ inọ o wo ẹgwọlọ abọ-ẹzi. Ileleikristi omarokpotọ nọ e riẹ kpahe uyero sebaẹgba rai vọvọ, a rẹ yare Jihova kẹ erọvrẹ ẹkwoma idhe ẹtanigbo Kristi. (1 Jọn 1:9) A tẹ be rehọ ere wo udhedhẹ iroro gbe uvi evawere. “O ghale ohwo nọ a rehọ izieraha riẹ oke nọ u kpemu vrẹ, gbe ọnọ a ruru umuomu riẹ.”—Olezi 32:1; 119:165.
4. (a) Idhere vẹ ma sai ro dhesẹ inọ ma vuhu ẹgwọlọ abọ-ẹzi mai gbe ọrọ amọfa mu? (b) Eme o re fiba evawere mai nọ ma tẹ riẹ kpahe ẹgwọlọ abọ-ẹzi mai?
4 Ovuhumuo nọ ma wo kẹ ẹgwọlọ abọ-ẹzi mai o rẹ wọ omai se Ebaibol na kẹdẹ kẹdẹ, riọ emu abọ-ẹzi ‘ẹruoke’ nọ o bi no obọ ‘ọrigbo nọ o wo ẹrọwọ avọ areghẹ na’ ze, je kpohọ iwuhrẹ Ileleikristi ẹsikpobi. (Matiu 24:45; Olezi 1:1, 2; 119:111; Ahwo Hibru 10:25) Uyoyou kẹ erivẹ u re ru omai vuhu ẹgwọlọ abọ-ẹzi amọfa, jẹ wọ omai rehọ ọwhọ whowho je wuhrẹ ahwo emamọ usi Uvie na. (Mak 13:10; Ahwo Rom 1:14-16) Uzẹme Ebaibol na nọ ma re wuhrẹ amọfa o rẹ wha evawere se omai. (Iruẹru 20:20, 35) Evawere mai e rẹ rro haro nọ ma te bi roro didi kpahe ẹruore igbunu Uvie na gbe eghale nọ Uvie na o te wha ze. Rọkẹ “uthuru okakao” ọ Ileleikristi nọ a wholo na, a wo ẹruore uzuazọ nọ o kare ewhuo evaọ obọ odhiwu wọhọ abọjọ egọmeti Uvie Kristi. (Luk 12:32; 1 Ahwo Kọrint 15:50, 54) Rọkẹ “igodẹ efa” na, o be te jọ uzuazọ ebẹbẹ bẹdẹ eva otọakpọ aparadase nọ Uvie yena u ti su.—Jọn 10:16; Olezi 37:11; Matiu 25:34, 46.
Epanọ Eva E Sae Rọ Were Ahwo nọ A Bi Weri
5. (a) Eme họ otofa ẹme na “ahwo nọ a bi bruenu”? (b) Ẹvẹ ahwo otiọye nọ a bi bruenu hayo weri na a sai ro wo omosasọ?
5 O wọhọ nọ oware avivẹ nọ Jesu ọ ta nọ o rẹ lẹliẹ ohwo wereva na o wọso evawere. Ọ ta nọ: “Ahwo nọ a bi bruenu eva e were ae, keme a re ti wo oma osasọ.” (Matiu 5:4) Ẹvẹ ohwo ọ sai ro bruenu jẹ wereva oke ovona? Re ma sai wo otoriẹ ẹme Jesu na, u fo re ma roro kpahe oghẹrẹ enuobro hayo uweri nọ ọ be ta ẹme kpahe na. Jemis olele na o ru rie vẹ inọ u fo re oma uzioraha mai u ru omai weri. O kere nọ: “Wozẹ abọ ra fo, whai erahaizi, wha veje ru eva rai fo, whai enọ i wo iroro ivẹ. Wha muomahọ, wha weli, wha viẹ. Rure ohwẹ rai o rẹriẹ ruọ uweli, re oghọghọ rai u zihe ruọ izuidhe. Wha hrẹ oma rai kpotọ kẹ Ọnowo Ọghẹnẹ re ọye ọvo ọ te kpare owhai kpehru.” (Jemis 4:8-10) Ahwo nọ a bi ghine weri fiki uyero uzioraha rai a re wo omosasọ nọ a tẹ riẹ inọ a rẹ sae rehọ izieraha rai vrẹ rai otẹrọnọ a fi ẹrọwọ họ idhe ẹtanigbo Kristi je dhesẹ uvi ekurẹriẹ ẹkwoma eruo oreva Jihova. (Jọn 3:16; 2 Ahwo Kọrint 7:9, 10) A rẹ sae rehọ ere wo usu oghaghae kugbe Jihova je wo ẹruore uzuazọ ebẹdẹ bẹdẹ nọ a te rọ gọe je jiri ei. Onana o rẹ wha oghọghọ ulogbo se ai.—Ahwo Rom 4:7, 8.
6. Edhere vẹ ahwo jọ a bi ro bruenu hayo weri, kọ ẹvẹ a bi ro wo omosasọ?
6 Ẹme Jesu na ọ kẹre te ahwo nọ a bi weri fiki eware etọtọ nọ e da otọ fia evaọ akpọ na. Jesu o dhesẹ eruẹaruẹ nọ e rrọ Aizaya 61:1, 2 na kpahe oma riẹ, onọ o ta nọ: “Ẹzi Ọnowo ỌGHẸNẸ na ọ rọ omẹ oma, fiki epanọ ỌNOWO na o wholo omẹ, re mẹ vuẹ emamọ usi kẹ enọ a nwẹ, o vi omẹ re mẹ sasa ahwo nọ a rọ uweli oma, . . . re mẹ jaja enọ e [rrọ] uweli oma.” Uwou yena nọ a vi na u te Ileleikristi nọ a wholo nọ e gbẹ rrọ otọakpọ na, enọ erivẹ rai “igodẹ efa” na a bi fi obọ họ kẹ vuẹ amọfa emamọ usi na. Aikpobi a bi ru iruo ẹwoho orọ oka ukpehọ aruezo “ahwo nọ a bi dimẹ je bi bo fiki eware oma-uzue nọ a bi ruẹ [evaọ] eva riẹ [Jerusalẹm nọ o kie no ẹrọwọ, onọ u dikihẹ kẹ Kristẹndọm].” (Izikiẹl 9:4) Ahwo otiọye nọ a bi weri na a bi wo omosasọ no “ovuẹ usiuwoma uvie na” ze. (Matiu 24:14) Eva e be were ai nọ a rọ riẹ inọ akpọ ọkpokpọ okiẹrẹe Jihova o bi ti nwene eyero omuomu Setan kẹle.
Ahwo nọ A rọ Oma Kpotọ Eva E Were Ai
7. Re a “rọ oma kpotọ,” eme u dhesẹ hẹ?
7 Jesu ọ ta haro evaọ Ovuẹ obọ Ugbehru riẹ na nọ: “Ahwo nọ a te rọ oma kpotọ eva e were ae, keme arẹ te ria akpọ na.” (Matiu 5:5) Ẹsejọ ahwo a re roro nọ re a dhesẹ uruemu omarokpotọ yọ oka oyẹlẹ. Dede na, orọnikọ ere o rrọ họ. Nọ ọ jẹ kẹ otofa ẹme nọ a fa fihọ ‘omarokpotọ’ na, ọgba-eriariẹ Ebaibol jọ o kere nọ: “Okwakwa ulogbo orọ ohwo nọ o wo [uruemu omarokpotọ] họ, ọ rrọ ohwo nọ o wo obọdẹ oma-oriẹsuo. Orọnikọ omarokpotọ yọ ẹwolẹ nọ ohwo o re ro fi oma hotọ nọ amọfa a rẹ rọ ta họ iẹe obọ họ, nọ ohwo o re ro wo iroro obọriẹ hẹ, hayo nọ o re ro kpo kwẹkwẹkwẹ. U dhesẹ ohwo nọ o wo ẹgba nọ ọ be rọ kpọ ogaga riẹ.” Jesu ọ ta kpahe omariẹ nọ: “Me re wowolẹ jegbọ eva i ro kpotọ.” (Matiu 11:29) Ghele na, Jesu ọ rehọ uvi aruọwha thọ ehri-izi nọ i kiẹrẹe.—Matiu 21:12, 13; 23:13-33.
8. Okwakwa vẹ omarokpotọ o kẹle gaga, kọ fikieme ma jẹ gwọlọ okwakwa onana evaọ eyeri kugbe amọfa?
8 Fikiere omarokpotọ o kẹle oma-oyọrọ gaga. Evaọ uzẹme, Pọl ukọ na o kele omarokpotọ kugbe oma-oyọrọ evaọ okenọ ọ jẹ fodẹ “ubi Ẹzi” na. (Ahwo Galesha 5:22, 23) Omarokpotọ yọ okwakwa nọ ẹzi ọfuafo Ọghẹnẹ o re fi obọ họ kẹ omai wo. O rrọ okwakwa Oleleikristi nọ o rẹ wha udhedhẹ haro kugbe ahwo nọ a rrọ ukoko ho gbe ahwo nọ a rrọ ukoko na. Pọl o kere nọ: “Wha whẹ . . . eyowo họ oma, eva ehrọ, ọriẹruo, iroro idhedhẹ iwo, oma-urokpotọ, odiri, whai ohwo o thi-akọ kẹ ohwo, re ohwo jọ o te wo eguago kpahe ọrivẹ riẹ, jọ ọrọ vrẹe.”—Ahwo Kọlọsi 3:12, 13.
9. (a) Fikieme omarokpotọ udhesẹ o jẹ kẹre vi oyerikugbe mai kugbe amọfa ọvo? (b) Oghẹrẹ vẹ ahwo nọ a rọ oma kpotọ a te rọ rehọ “otọ na reuku”?
9 Dede na, orọnikọ oyerikugbe mai kugbe ibe ahwo-akpọ ọvo ma je dhesẹ omarokpotọ họ. Nọ ma tẹ be rehọ unevaze yo ẹme kẹ esuo-okpehru Jihova yọ omarokpotọ ma bi dhesẹ na. Oriruo ohwo nọ ọ karo evaọ abọ nana họ Jesu Kristi, ọnọ o dhesẹ omarokpotọ jẹ rehọ oma riẹ kpobi kẹ oreva Ọsẹ riẹ uruo eva okenọ ọ jọ otọakpọ. (Jọn 5:19, 30) Jesu họ ohwo ọsosuọ nọ o wo ukuoriọ otọakpọ na keme ọye họ Osu akpọ na nọ a ro mu. (Olezi 2:6-8; Daniẹl 7:13, 14) Ọye omariẹ avọ ‘ibe ereuku’ 144,000 nọ a salọ no ‘udevie ahwo-akpọ’ ze re ‘a su akpọ na wọhọ ivie,’ a gbe wo abọ evaọ ukuoriọ na. (Ahwo Rom 8:17; Eviavia 5:9, 10; 14:1, 3, 4; Daniẹl 7:27) Kristi avọ ethabọ isu riẹ a ti su ima buobu erọ ezae gbe eyae nọ e wọhọ igodẹ, enọ eruẹaruẹ nọ e rrọ olezi nana i ti rugba kẹ avọ evawere: “Enọ e rọ oma kpotọ, e rẹ te rọ otọ na reuku; oma o rẹ te were ae evaọ omofọwẹ.” (Olezi 37:11; Matiu 25:33, 34, 46)
Ahwo nọ Ohọo Ẹrẹreokie U re Kpe Eva E Were Ae
10. Edhere jọ vẹ ahwo nọ “ohọo gbe uruame ẹrẹreokie u re kpe” a sai ro wo evevọwẹ?
10 Oware ofa nọ o rẹ kẹ evawere nọ Jesu ọ fodẹ evaọ akotọ ugbehru Galili na ona: “Ahwo nọ ohọo gbe uruame ẹrẹreokie u re kpe eva e were ae, keme eva e rẹ te vọ ae.” (Matiu 5:6) Jihova o fi ute ẹrẹreokie họ kẹ Ileleikristi. Fikiere, ahwo nọ ohọo gbe uruame ẹrẹreokie u bi kpe koyehọ a bi wo isiuru kẹ ewo ọkpọvio Ọghẹnẹ. Ahwo otiọye na a ghine vuhu oruthọ gbe sebaẹgba rai mu yọ a be gwọlọ usu ọjẹrehọ nọ a re wo kugbe Jihova. Ẹvẹ eva e rẹ were ai te nọ a te wuhrẹ no Ẹme Ọghẹnẹ ze inọ otẹrọnọ a kurẹriẹ jẹ yare erọvrẹ ẹkwoma idhe ẹtanigbo Kristi, a re wo uvẹ edikihẹ ẹrẹreokie eva aro Ọghẹnẹ!—Iruẹru 2:38; 10:43; 13:38, 39; Ahwo Rom 5:19.
11, 12. (a) Oghẹrẹ vẹ Ileleikristi nọ a wholo na a ro wo ẹrẹreokie? (b) Oghẹrẹ vẹ egbẹnyusu enọ a wholo na a be rọ ruẹ evevọwẹ uruame rai kẹ ẹrẹreokie?
11 Jesu ọ ta nọ ahwo otiọye na a rẹ wereva, keme “eva e rẹ te vọ ae.” (Matiu 5:6) Ileleikristi nọ a wholo nọ a se re a ‘su wọhọ ivie’ kugbe Kristi evaọ obọ odhiwu na, a whowho i rai nọ a te kẹ “ẹrẹreokie uzuazọ.” (Ahwo Rom 5:1, 9, 16-18) Jihova ọ rehọ e rai wọhọ emọ abọ-ẹzi. A te zihe ruọ ibe ereuku kugbe Kristi, enọ a se re a jọ ivie gbe izerẹ evaọ egọmeti Uvie obọ odhiwu riẹ.—Jọn 3:3; 1 Pita 2:9.
12 A ri whowho egbẹnyusu Ileleikristi nọ a wholo na kiẹrẹe rọkẹ uzuazọ no ho. Dede na, a jọ aro Jihova kiẹrẹe te umuo jọ no fiki ẹrọwọ nọ a fihọ azẹ Kristi nọ o hwẹ. (Jemis 2:22-25; Eviavia 7:9, 10) A dhesẹ i rai kiẹrẹe wọhọ egbẹnyusu Jihova nọ e te zọ vrẹ ‘uye ulogbo na.’ (Eviavia 7:14) A ti wo evevọwẹ viere evaọ uruame rai kẹ ẹrẹreokie nọ a te zihe ruọ abọjọ akpọ ọkpokpọ nọ “ẹrẹreokie ọ be ria” eva otọ “ihru ekpokpọ” na no.—2 Pita 3:13; Olezi 37:29.
Ahwo nọ A Wo Ohrọ Eva E Were Ae
13, 14. Oghẹrẹ idhere vẹ u fo nọ ma re ro dhesẹ ohrọ, kọ irere vẹ i re noi ze te omai?
13 Eva ovuẹ obọ ugbehru riẹ na, Jesu ọ ta haro nọ: “Ahwo nọ a wo ohrọ eva e were ae, keme a re ti wo ohrọ oriọ.” (Matiu 5:7) Evaọ abọ-uzi, a riẹ ohrọ wọhọ aruoriwo nọ oguẹdhọ o re dhesẹ kẹ ohwo nọ o ruthọ ẹkwoma ebrukpotọ uye nọ uzi o ta nọ a rẹ kẹ orumuomu na. Dede na, wọhọ epanọ a rehọ e riẹ ru iruo evaọ Ebaibol na, ubiẹme ẹvẹrẹ ọsosuọ nọ a fa fihọ “ohrọ” na u dhesẹ ororokẹ ẹwo hayo ohrọ-oriọ nọ o rẹ wha ufuoma se ahwo nọ akpọ o kiehọ kẹ hẹ. Oyejabọ nọ ahwo nọ a wo ohrọ a re ro dhesẹ arodawẹ gaga na. Ọtadhesẹ Jesu ọrọ ohwo Sameria ọrivẹ na ọ kẹ emamọ oriruo ohwo nọ “o dhesẹ ohrọ” kẹ ọnọ ọ rrọ uye.—Luk 10:29-37.
14 Re ma sai wo evawere nọ i re no edhesẹ ohrọ ze, o gwọlọ nọ ma rẹ rehọ ẹwo ru ewoma kẹ ahwo nọ akpọ o kiehọ kẹ hẹ. (Ahwo Galesha 6:10) Jesu o dhesẹ ọdawẹ kẹ ahwo nọ ọ nyaku. ‘Ohrọ rai o re riẹ, epanọ a wọhọ igodẹ nọ i wo othuru hu; o te mu ai eware ibuobu họ ewuhrẹ.’ (Mak 6:34) Jesu ọ riẹ nnọ ẹgwọlọ ahwo-akpọ nọ ọ mae rro họ ọrọ abọ-ẹzi. Ma rẹ sai dhesẹ ọdawẹ gbe ohrọ re ẹkwoma oware nọ amọfa a mae gwọlọ nọ ma rẹ kẹ ai—“ovuẹ usiuwoma uvie na.” (Matiu 24:14) Ma rẹ sae jẹ rehọ obufihọ kẹ ibe Ileleikristi mai nọ e kpako no, eyae-uku, gbe imiwhrori na, jẹ “ta udu họ enọ udu u re bro awọ.” (1 Ahwo Tẹsalonika 5:14; Itẹ 12:25; Jemis 1:27) Orọnikọ evawere ọvo onana o te kẹ omai hi rekọ o te jẹ lẹliẹ omai wo ohrọ-oriọ Jihova.—Iruẹru 20:35; Jemis 2:13.
Ahwo nọ A Wo Eva Efuafo gbe Enọ I re Ru Udhedhẹ
15. Ẹvẹ ma sai ro wo eva efuafo jẹ jọ enọ i re ru udhedhẹ?
15 Jesu o dhesẹ oware avọ ezeza gbe orọ avọ ihrẹ nọ e rẹ kẹ evawere nọ ọ ta inọ: “ ’Ahwo nọ a wo eva efuafo eva e were ae, keme a rẹ te ruẹ Ọghẹnẹ. Ahwo nọ a rẹ ruẹrẹ ahwo họ eva e were ae, keme a retise ai emọ Ọghẹnẹ.’ ” (Matiu 5:8, 9) Orọnikọ udu nọ o kare egbegbe uruemu ọvo họ udu ofuafo ho rekọ udu nọ o rẹ jọ fuafo re evaọ abọ-ẹzi jẹ jọ ovo evaọ oreva Jihova uruo. (1 Iruẹru-Ivie 28:9; Olezi 86:11) Ahwo nọ a rẹ ruẹrẹ ahwo họ hayo nọ i re ru udhedhẹ a rẹ rria avọ udhedhẹ kugbe ibe Ileleikristi rai jẹ rehọ udhedhẹ lele erivẹ rai rria te epanọ o rẹ sae lọhọ te kpobi. (Ahwo Rom 12:17-21) A rẹ “guọlọ udhedhẹ [je] lele ei.”—1 Pita 3:11.
16, 17. (a) Fikieme a ro se Ileleikristi nọ a wholo na “emọ Ọghẹnẹ,” kọ oghẹrẹ vẹ a be rọ “ruẹ Ọghẹnẹ”? (b) Oghẹrẹ vẹ “igodẹ efa” na a be rọ “ruẹ Ọghẹnẹ”? (c) Oghẹrẹ vẹ gbe oke vẹ “igodẹ efa” na a ti ro zihe ruọ “emọ Ọghẹnẹ” vọvọ?
16 A yeyaa kẹ ahwo nọ a re ru udhedhẹ jẹ rrọ fuafo evaọ udu inọ a “retise ai emọ Ọghẹnẹ,” yọ “a rẹ te ruẹ Ọghẹnẹ.” Ileleikristi nọ a wholo yọ enọ ẹzi o yẹ, yọ nọ a gbẹ rrọ otọakpọ na Jihova ọ rehọ e rai wọhọ “emọ” riẹ. (Ahwo Rom 8:14-17) Nọ a tẹ kpare ai no re a jọ kugbe Kristi evaọ odhiwu, a te gbodibo kẹ Jihova evaọ aro riẹ, jẹ te ghinẹ rue Riẹ.—1 Jọn 3:1, 2; Eviavia 4:9-11.
17 “Igodẹ efa” nọ e rrọ ahwo udhedhẹ na a be gọ Jihova eva otọ Othuru-Igodẹ Owoma na, Kristi Jesu, ọnọ o zihe ruọ “Ọsẹ Ebẹdẹ bẹdẹ” rai. (Jọn 10:14, 16; Aizaya 9:6) Ahwo nọ a sai fi odawọ urere na kparobọ okenọ Esuo Odu Ikpe Kristi ọ tẹ vrẹ no, a te jẹ ae rehọ wọhọ emọ Jihova erọ otọakpọ, a ve ti wo “uvẹ oruaro emọ Ọghẹnẹ.” (Ahwo Rom 8:21; Eviavia 20:7, 9) Avọ irẹro onana, a bi se Jihova nnọ Ọsẹ rai, keme a rehọ oma mudhe kẹe no je vuhu ei mu wọhọ Ọkokẹ-Uzuazọ rai. (Aizaya 64:8) Wọhọ Job gbe Mosis oke anwae, a rẹ sae rehọ ibiaro ẹrọwọ “ruẹ Ọghẹnẹ.” (Job 42:5; Ahwo Hibru 11:27) Ẹkwoma “aro eva rai” gbe eriariẹ egbagba Ọghẹnẹ nọ a wo, a be ruẹ ekwakwa igbunu Jihova a tẹ jẹ be daoma raro kele iei ẹkwoma eruo oreva riẹ.—Ahwo Ẹfẹsọs 1:18; Ahwo Rom 1:19, 20; 3 Jọn 11.
18. Rọwokugbe eware ihrẹ ọsosuọ nọ Jesu ọ ta inọ e rẹ kẹ evawere na, amono a be ruẹ uvi evawere nẹnẹ?
18 Ma ruẹ no inọ otu nọ i se ẹgwọlọ abọ-ẹzi rai gboja, enọ i bi bruenu hayo weri, enọ e rọ oma kpotọ, enọ uruame gbe ohọo ẹrẹreokie u bi kpe, enọ i wo ohrọ, enọ i wo eva efuafo, gbe enọ i re ru udhedhẹ a bi wo uvi evawere evaọ egagọ Jihova. Ghele na, ahwo otiọye na a nyaku ọwọsuọ, makọ ukpokpoma ẹsibuobu no. Kọ onana o be raha evawere rai? Ma te ta ẹme kpahe onọ yena evaọ uzoẹme nọ o tha.
Evaọ Edhere Ọkiẹkpemu
• Evawere vẹ i re te ahwo nọ a rrọ iwhrori evaọ abọ-ẹzi?
• Idhere vẹ ahwo nọ a bi bruenu hayo weri a bi ro wo omosasọ?
• Ẹvẹ ma sai ro dhesẹ omarokpotọ?
• Fikieme u je fo nọ ma dhesẹ ohrọ, wo eva efuafo, je ru udhedhẹ?
[Uwoho nọ o rrọ ẹwẹ-obe avọ 22]
“Ahwo nọ a wo ẹzi iwhrori, eva e were ae”
[Iwoho nọ e rrọ ẹwẹ-obe avọ 22]
“Ahwo nọ a wo ohrọ eva e were ae”
[Uwoho nọ o rrọ ẹwẹ-obe avọ 22]
“Ahwo nọ ohọo gbe uruame ẹrẹreokie u re kpe eva e were ae”