Kọ Amọfa Ọvo Ma Re Rẹro nọ A Ta Uzẹme?

“ỌRUE-ỌTA ọ rẹ dh’omẹ eva, yọ o rẹ dh’omẹ eva nọ a tẹ ta ọrue kẹ omẹ,” ere ọmọtẹ ikpe 16 jọ ọ tae. Ere ọvona o rrọ ibuobu mai oma. Ma rẹ gwọlọ nọ ẹme nọ a ta kẹ omai hayo onọ a kere se omai ọ rẹ jọ uzẹme. Kọ ma be hae ta uzẹme evaọ okenọ ma te bi kpeze ovuẹ se amọfa?

Evaọ ekiakiẹ jọ nọ a jọ Germany ru, ahwo buobu a ta inọ re a “ta ọrue evaọ eware esese re ohwo ọ ruẹse thọ omobọ riẹ hayo amọfa no enwoma o thọ họ, ẹhẹ, o tubẹ roja dede re ahwo a sae rria kugbe ohwohwo.” Yọ ọniyẹrẹ jọ o kere nọ: “Re a ta uzẹme ọvo ẹsikpobi o kiehọ, rekọ o rẹ lẹliẹ uzuazọ fou ehoo.”

Kọ o sae jọnọ o rẹ were omai otẹrọnọ amọfa a ta uzẹme, rekọ ma ve roro nnọ o sai kiehọ ẹsejọ re ma ta ọrue kẹ amọfa? Kọ u muẹme sọ ma ta uzẹme hayo ọrue? Eme u re no ọrue-ọta ze?

Enwoma nọ I re no Ọrue-Ọta Ze

Roro kpahe enwoma nọ ọrue-ọta ọ rẹ wha ze. Ọrue-ọta ọ rẹ whae ze nọ ọzae avọ aye gbe ahwo uviuwou a gbe ro fi eva họ ohwohwo ho. Iguẹgu nọ i wo otọ họ e rẹ sae raha ohwo odẹ. Iwhayo nọ ahwo a be jọ ekọmpene fi o be whae ze nọ igho nọ a be rọ rẹrote ekọmpene i bi ro bu thomawa, o tẹ be whae ze nọ eware nọ a bi ru e be rrọ jọ ghaghae. Ọrue nọ ahwo a be ta kẹ egọmeti re a ruẹse hwa umutho ugho ọvo kẹ eki nọ a be tho o be whae ze nọ egọmeti o bi ro wo ugho ho nọ a re ro ru eware nọ a gwọlọ. Ọrue nọ ahwo a bi gu fihọ ekọmpene nọ a bi ruiruo kẹ uzou o be raha eware ku ekọmpene itieye na abọ jẹ raha emamọ odẹ rai. A be rehọ eyaa efe asohẹrioke ro fi ahwo nọ i rri otọ mu hu igho rai kpobi rehọ no. Agbẹta nọ Ebaibol e rọ ta kẹ omai inọ usu eware nọ i re tu Jihova Ọghẹnẹ oma họ “ọrue-ọta,” gbe “ose-isẹi erue nọ ọ rẹ ta erue.”—Itẹ 6:16-19.

[Uwoho nọ o rrọ ẹwẹ-obe avọ 3]

Ọrue-ọta o re ru nọ ọzae-avọ-aye a gbe ro fi eva họ ohwohwo ho